اذهب الي المحتوي
منتديات ياللا يا شباب
رجل من الصحراء

الفقر عارف صحابه

Recommended Posts

الفقر عارف صحابه

اريد ان اناقشكم في موضوع هام قد انتشر من قديم الازل واصبح عادة بيننا بل ووثقنا فيه و في معتقداتنا كل الثقة واصبحت هذه المعتقدات اساسا في تعاملاتنا مع كل من حولنا بل وتطورت الى حد كبيير. فقد نلجأ احيانا الى قطع علاقاتنا بمن حولنا نظرا لايماننا بهذه المعتقدات الغريبة ألا وهي (التشاؤم) ونسميه بلغتنا العامية (الفال). وطبعا كالعادة مع كامل الاعتذار سوف نكسر حاجز اللغة العربية الفصحى الذي يعانى كثيرا من كسري له باستمرار ولكن كما نعلم فالنقد الساخر يحب (الرحرحة).

 

زمان كان جدي دايما يحكيلي على ايامهم لما كان مفيش كهرباء ولا عمدان نور ولا اراضي مرصوفة وكانوا يقعدوا يتدفوا حوالين النار الوالعة ويشربوا الشاي من البراد اللي شكله بقى لون النار اللي بتسخنه واللي كباية الشاي منه احلى كباية شاي تشربها في حياتك .

 

كان يقلي :زمان يابن بنتي كان فيه خير والناس كلها كانت بتحب بعض في الفرح كله يفرح ويجامل ويفتح بيته لضيوف غيره, وفي الحزن والهم كله يواسي ويحزن لحزن جاره ويراعي مشاعره لأبعد الحدود.

 

بصراحة جدي كان بيتكلم صح على الرغم من اني مشفتش الايام دي بس دايما عندي احساس ان الدنيا زمان كانت احسن بكتيير كانت ابسط من كده بكتيير . ده كفاية ان احنا كنا قليلين ومكنتش لسه ماسورة السكان ضربت والمحبس العمومي باظ وغرق مصر سكان.

 

ومن كتر احساسي ان الناس دي كانت احسن منينا بكتيير كنت دايما وانا بتكلم مع جدي احاول جاهدا اني انقد ايامهم وده طبعا بدافع الغيرة الشديدة وفي يوم واحنا بنتكلم عن زمان وناس زمان سالته سؤال

 

قلي ياجد: هو انتوا يعني مفيش حاجة على ايامكم وحشة خالص عمال تقول الناس والخير والحب وبصراحة حسستني ان احنا ملناش اي لازمة خالص, اكيد فيه حاجات وحشة يعني كفاياك غيظ فيا ياراجل ياعجوز ومش سايبك الا لما تقلي على حاجة دايما كانت بتضايقك على ايامكم اللي مش لاقينلها حل دي.

 

ابتسم ابتسامة عريضة وقريت في عنيه نظرة بتقلي ايه اللي خلاك تقلب في المواجع

 

بص يابن بنتي مشكلتنا اننا متمسكين بعاداتنا وتقاليدنا بشكل غير طبيعي من زمان وحتى من قبل ايامنا واحنا بنؤمن بالفال الوحش وللأسف حتى مع التقدم الرهيب اللي ظهر على ايامكم الا انه مفيش فايدة فينا بنتقدم بالزمن بس عقولنا لسه زي ماهي .

 

زمان لما كان يبقى فيه فرح وكلنا فرحانين وبنضحك ونهزر ومرة واحدة يدخل علينا واحد من ضمن المعازيم

 

ويسلم علينا ويقعد معانا وتحصل حاجة وحشة في الفرح بعد وصولة بشوية على طول نقول الراجل ده قدمه وحشة علينا اول ماجيه خرب الدنيا على الرغم من الراجل ده ملوش اي دخل لا من بعيد ولا من قريب باللي

 

حصل بس ده معتقدنا ماهو احنا قاعدين من الصبح كويسين اشمعنا يعني لما جيه الراجل ده ,لا لا ياعم ده ميتعزمش تاني في افراح ولاحد يختلط بيه غير سلام عليكم _عليكم السلام , اه مش ناقصة هي ياعم خلينا بعيد عنه. وفجاة الراجل يلاقي نفسه بعيد عن الناس وهو مش عارف عملهم ايه.

 

ولا الغراب ياسلام على الغراب يبقى الواحد معاه مصلحة عايز يقضيها وخلاص مستعد وتمام يجي الغراب

 

يقف على بلكونة البيت ويبدا يقول (واق واق) تلاقي التشاؤم سيطر علينا تماما وقرفنا, طيب مالك ياعم مكنت كويس........ اصلي ياعم شفت غراب النهارده وبصراحة فال وحش انا بفكر الغي المصلحة دي عشان شكلها كده كده مش مقضية.

 

قلتله ياجد: فكرتني بموضوع غريب بنتك (اللي هي امي يعني) احيانا تقلي ياولدي متطلعش النهارده المشوار ده, اقلها ليه ياامي تقلي اصلي عيني الشمال بترف ياولدي وانا مجرباها العين دي وربنا يستر فال وحش قوي خليك ياولدي قاعد جنبي... وطبعا بقعد عشان بس مزعلهاش لدرجة اني مبعرفش اعتذر للناس اللي كانت مستنياني لاني بصراحة مش لاقي عذر وكنت بتحجج بالتعب والارهاق.

 

ضحك وقالي: ههههههه ماهي طالعة لجدتك مش واخدين منها غير الفقر, التانية برده وهي قاعدة تخبز لو العيش باظ منها تقلك فال وحش العيش خفس يقطع الرزق من البيت ربنا يستر.

 

قلتله: تصدق ياجد واحنا في الشغل عينوا واحد جديد عندنا عشان يمسك البوفيه بدل اللي ساب الشغل وصادف بعد تعيينه انه في اربعة من الشركة اتصفوا لاسباب مالية وفي مرة كنت بحكي مع احد الموظفين وقاللي تصدق ياخي الواد ده قدمه فقر قلتله ليه قالي اول ماجيه مشى اربعة. ربنا يستر علينا وعلى باقي الشركة.

 

قالي: فاكر يوم ماكنا عند بيت سيد احمد اللي جوز بته قريب لما جابولنا الشاي وانت فضلت شوية مشربتهمش

 

راحت الولية قلبت وشها وقالتلك ليه ياولدي لازم تكمل كبايتك كده البت هتبور وانت مترضهالناش.

 

قلتله: ياجد انت جيت عالشاي ياراجل ده مرة مراتك(اللي هي جدتي) ماسك المقص وعمال افتح واقفل فيه ولقيتها زعقت فيا وقلتلي ياواد انت اجنيت ولا ايه ده فال وحش قوي ياولدي يجيب خناقات ومشاكل فالبيت.

 

ولا لما كنا نقعد مع صحابنا ونضحك كتيير ونهرج يقلك ربنا يستر طالما ضحكنا كتيير يبقى اكيد في حاجة وحشة هتحصل.ومش عارف ليه دايما يعني بعد الضحك الكتيير لازم يحصل حاجة وحشة.

 

ولو لقينا اي شبشب مقلوب يقلك اووه اعدل الشبب خلي ربنا يعدلها لحسن ده فال وحش.

 

سكت جدي شوية وبصلي وقال: يابن بنتي للاسف ان الزمان عمره ماغير افكارنا ولا عقولنا والجهل فينا من قديم الازل وعمرنا ماهنتغير واديني قدامك بحكيلك على حاجات من سنين وانت بتقلي على حاجات حصلت معاك وهي هي نفس المعتقدات بتاعة الثمانين سنة اللي فاتوا يااااااااااااه ياولدي بقى بعد كل التطور الرهيب اللي احنا فيه ده ولسه متخلفين.

 

طب امال امتى هنوعى للحقيقة ونعرف قيمة عقولنا؟؟؟!!!!

 

حبيت اختم موضوعي بسؤال جدي الاخير عشان هو فعلا اللي محيرني لحد امتى هنفضل كده متمسكين بعادات غلط ونربط الزواج بكباية الشاي وتيسير الحال بالشبشب المقلوب وانقطاع الكهرباء بواحد دخلته وحشه والمقص بالخناقات والعيش بالرزق والغراب والبومة بالنحس والعين الشمال لما ترف بالفقر والحوادث وغيره وغيره وغيره.

 

بصراحة مش عارف اقول اي كلام فعلا غير كلام جدي( احنا بنتقدم بالزمن بس عقولنا زي ماهي).

 

اشكركم وارجو ان تشاركوني الاراء والردود في هذا الموضوع.

 

 

 

 

 

 

 

 

 

 

 

 

 

قال – صلى الله عليه وسلم - : ( ليس منا من تطير، أو تُطيِّر له )

صدق رسول الله صلى الله عليه وسلم

واعتبر هذا الحديث هو ردي الشخصي على هذا الموضوع

تم تعديل بواسطه بنت مصرية

شارك هذه المشاركه


رابط المشاركه
شار ك علي موقع اخر

اولا :::يشرفنى ان اكون اول من رد على موضوعك الرائع

ثانيا::هو بصراحه ردك ماسبش حاجه تتقال تانى :wink::wink:

جزاك الله خيرا وزادك من فضله

ثالثا ::اجابه على سؤال جدك العزيز

لما نتمسك بسنه حبيبنا محمد صلى الله عليه وسلم وبالحديث اللى انت قولتو ده

هنفهم صح وهنفكر صح

على فكره ده مش راجع لبيئتنا بس كمان فى الغرب بيتشاؤمو من رقم 13

ده راجع زى ما اخدنا فى ماده عندنا فى الكليه ان الانسان دايما لايحب الغموض ويبحث دائما عن اسباب يعلق عليها المشكله

فما بتحصل قدامنا حاجه زى خبر وحش مره واحده لازم نربطها باسباب زى الضحك الكتير او غيره

لك منى كل التقدير والاحترام اخى على موضوعك المفيد والجميييييييييييييل

جعله الله فى ميزان حسناتك ورزقك من حيث لاتحتسب

تقبل مرورى التواضع على مووضعك ال......................

التحفه

اسلوبك رائع وماده الموضوع اروع

شكرا لك :yahoo::yahoo::yahoo::yahoo:

شارك هذه المشاركه


رابط المشاركه
شار ك علي موقع اخر

شرفني ردك كثيرا اختي الفاضلة وسعيد جدا بمرورك الكريم

تحياتي وتقديري

شارك هذه المشاركه


رابط المشاركه
شار ك علي موقع اخر

فعلا بتحصل كتير والله الكلام ده خصوصا من الناس اجدادنا

بس انا مبسمعش كلامهم ولما حد بيقولى حاجه زى كدا

 

وانا عندت واثبتلهم انه كل ده تخريف

 

فى ناس كتير بتخاف من يوم 13 وانا لما اشتغلت اصلا اشتغلت يوم 13 وكان يوم حلو اوى كان 13/ 11 وكان قريب من العيد

 

مع انه يوم الناس بتعبره يوم شؤم الا انهم قالولى مينفعش عشان هما حكومه منفعش العقد يتعمل نص شهر لا عملوهولى من الاول الشهر وبدل ما اقبض نص شهر قبضت شهر وكمان معاها مكافأه عشان العيد

 

 

 

وكل ده يوم 13 اللى الناس بتتشائم منه

 

 

جزاك الله كل خير اخى العزيز وموضوعك عجبنى جداَ

 

اسلوبك فى سرد الحوار جميل جدا وبسيط

 

ربنا يبارك فيك

تم تعديل بواسطه تقوى القلوب

شارك هذه المشاركه


رابط المشاركه
شار ك علي موقع اخر

شرفتيني اختي كثيرا بمرورك وردك الجمييل

وسعيد جدا بالموقف اللي حصل معاكي عشان اثبتي لكثير من الناس ان المعتقدات دي خاطئة

اسال الله ان يرزقنا الصلاح دائما في الدنيا وفي الاخرة ان شاء الله

تحياتي وتقديري لكي اختي تقوى القلوب

تم تعديل بواسطه رجل من الصحراء

شارك هذه المشاركه


رابط المشاركه
شار ك علي موقع اخر

شهادة اعتز بها من صديق حميم على قلبي

واحنا بنتعلم منك يااستاذ

اشكر مرورك الكريم الذي تشرفت به كثيرا

شارك هذه المشاركه


رابط المشاركه
شار ك علي موقع اخر

وان شاء الله همشي في المشوار ده دعواتك معانا

شارك هذه المشاركه


رابط المشاركه
شار ك علي موقع اخر

انا بصراحه مش عارف اقول ايه

مع انى لسه عضو جديد لكن اسلوبك شدنى

موضوعك ظهر فى جوجل

وتصميم المنتدى شدنى جدا

سجلت فيه وانا سعيد بده

شارك هذه المشاركه


رابط المشاركه
شار ك علي موقع اخر

حبيبي اهلا بك في منتدانا الذي هو بيتك الثاني

شرفت ونورت الموضوع

وسعدت جدا بانضمامك لمنتدانا

شارك هذه المشاركه


رابط المشاركه
شار ك علي موقع اخر

هههههههههههههههه

لعلمك طريقتك فى الكتابة روعة

جزاك الله خيرا بيها خير جزاء

وفكرتنى لما كنت فى الريف

وماسك المقشة بكنس

قالوا لى لأ

متكنسش بليل

غلط

طب أعمل إيه....؟؟

أمسك المقشة بالمقلوب ولا أفضل ماسكها للصبح((بتريق))

ولا مرة كنت ماسك قطعة قماش نايلون وبحركها -عادى يعنى -

 

لقيت مرة واحدة بيزعقوا لى

لأ

القماش بالليل غلط

 

طب أشمعنى...؟

أين العقل والمنطق فى تفسير الظواعر والأفعال

 

 

كما قال رسول الله -صلى الله عليه وسلم-

تفائلوا بالخير تجدوه

 

وسلمت أناملك أخى وحبيبى رجل من الصحراء

شارك هذه المشاركه


رابط المشاركه
شار ك علي موقع اخر

Join the conversation

You can post now and register later. If you have an account, sign in now to post with your account.

زائر
اضف رد علي هذا الموضوع....

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.


×
×
  • اضف...

Important Information

By using this site, you agree to our Terms of Use, اتفاقيه الخصوصيه, قوانين الموقع, We have placed cookies on your device to help make this website better. You can adjust your cookie settings, otherwise we'll assume you're okay to continue..