اذهب الي المحتوي
منتديات ياللا يا شباب
ابن تيميــــة

كنت شيخه فأصبح شيخي!!!!! قصة حقيقية

Recommended Posts

----------------------------------------------

بطلي القصة هما أخين أحبّا بعضهما في الله - يوسف وخالد - في العشرينات من العمر

يوسف يعمل في بقالة والده ، وخالد أخ يعمل إمام مسجد صغير ومحفظ للقرآن .

المشهد الأول( بقالة يوسف)

 

خالد: السلام عليكم كيف حالك يايوسف

 

يوسف: وعليكم السلام ورحمة الله وبركاته الحمد لله بخير كيف حالك انت ياخالد

 

خالد: والله في نعمة أخبار الشغل معاك ايه

 

يوسف:تعبان والله ياخالد حاسس اني في طاحونة ومش عارف اخرج منها

 

خالد: ليه بس

 

يوسف: بشتغل من العصر لقبل الفجر ولا عارف اصلي بخشوع ولا عارف اعمل اي حاجة حاسس اني ضايع خالص

 

خالد: لازم يايوسف تعمل ليك هدف علشان يبقا لحياتك معنى

 

يوسف: زي ايه مثلا

 

خالد: انك تحفظ القرآن مثلاً

 

يوسف : هههههههههههههه

 

خالد: بتضحك ليه

 

يوسف: ياعم هو انا فاكر انا أكلت ايه امبارح, تقولي احفظ القرآن,أنت مفكر كل الناس زيك ولا إيه

 

خالد: الله يهديك ربنا يقول (ولقد يسرنا القرآن للذكر فهل من مدكر(, وبعدين أنت مفكرني حفظت بسهولة , دا أنا طلع عيني لما ختمت

 

يوسف وهو يحك ذقنه: بس انا ياخالد مش هنفع انت شايف شغلي عامل ازاي مش هنفع خالص

 

خالد: لا هتنفع ومين يعلم يمكن يجي اليوم وتبقا فيه الشيخ بتاعي في القرآن

 

يوسف:هههههههههههههه انت النهاردة مش طبيعي خالص!!! شيخك ايه بس دا أصغر ولد عندك في الكتّاب يبقى شيخي

 

خالد: مين عارف يايوسف مين عارف!!! المهم أنت ناوي ؟؟

 

يوسف: طبعاً ناوي بس بشرط انك تتابعني

 

خالد:أكيد أنا مش هسيبك بس لازم تعرف أن كل حاجة في أولها صعب يعني مش تمشي شوية وتقلي انا تعبت ومش قادر

 

يوسف: الله المستعان, ربنا يعينا بقا

 

خالد: اللهم آمين, ها هتبدأ امتى

 

يوسف:الأسبوع الجاي إن شاء الله

 

خالد:لا هتبدأ بكرة إن شاء الله

 

يوسف:دا انت صعب ياخالد

 

خالد:ياعم يوسف لازم تستغل انك نشيط الوقتي قبل ما تهبط تاني

 

يوسف:ماشي هبدأ من البقرة

 

خالد:لا هتبدأ من جزء عم علشان لو بدأت من البقرة هتقف لأنها صعبة عليك الوقتي

 

يوسف:طيب توكلنا على الله

 

خالد:بكرة بعد صلاة الفجر تصح عليا اللي أنت هتحفظه وتقعد تحفظ بعد الفجر

 

يوسف:ياعم أنا شغال طول الليل عايزني أحفظ بعد الفجر إزاي دا أنا ممكن أنام والمصحف يقع مني وأنا قاعد

 

خالد:مش احنا قلنا لازم هنتعب في الأول وبعدين أنت مفكر أنك هتبقا حافظ لكتاب الله بالساهل كدة لازم تتعب

 

يوسف:الله المستعان طيب ادعيلي بالله عليك

 

خالد:ربنا يوفقك وتبقى من أهل القرآن

 

يوسف:اللهم آمين

----------------------------------------------------

انتهى المشهد الأول

تابعونا للمشهد الثاني ....

شارك هذه المشاركه


رابط المشاركه
شار ك علي موقع اخر

السلام عليكم ورحمة الله وبركاته

بسرعه لو سمحت عايزه اعرف ايه احداث الجزئ الثانى

على فكره انا زى يوسف بحاول احفظ القران وان شاء الله ربنا هيعيننى ويعين كل اللى زيي

فعلا زى ما كتبت فى الموضوع محتاج شويه تعب صغيره وبعدين ربنا هيعينا لما يشعر بصدق نيتنا واخلاصنا والله المستعان

يارب سهل حفظ القران لكل الناس الراغبين فى ذلكوارزقنا العمل به

فمن المهم اننا عندما نحفظ ايه ان نحرص على العمل بما فيها

جزاكم الله كل خير

السلام عليكم ورحمة الله وبركاته

شارك هذه المشاركه


رابط المشاركه
شار ك علي موقع اخر

بسم الله الرحمن الرحيم

اختي الفاضله / نور القرآن

بارك الله فيكم اختي الفاضله ورزقكم حفظ كتابه في اقرب وقت ان شاء الله

هو فعلا الحفظ بيكون صعب في الاول بس ده بجد بيبين مين اللي بجد عايز يحفظ القرآن بصدق واخلاص لله

اسال الله ان يرزقنا واياكم الاخلاص

.

.

.

.

.

وبجد فيه مفاجات في قصه خالد ويوسف انتظرونااااااا...

تم تعديل بواسطه ابن تيميــــة

شارك هذه المشاركه


رابط المشاركه
شار ك علي موقع اخر

المشهد الثاني (المسجد)

 

خالد: يوسف يوسف اصحا اصحا انت نمت

 

يوسف: مفزوعاً ايه في ايه , هو أنا فين

 

خالد ينظر باشفاق: أنت في المسجد يابني

 

يوسف: شوفت ياخالد أنا قايلك اني مستحيل أعرف أحفظ قرآن بسبب شغلي

 

خالد: قوم ياااااد وبطل كسل اتوضا وتعالى صلي الضحي واقعد كمل حفظ علشان هسمع لك

 

يوسف: طيب ياخويا مش عارف ليه ياخالد بحس ساعات كدة أنك مرات أبويا

 

خالد:مرات أبوك بكرة ان شاء الله لما تختم هتبوس ايدي وتقولي ربنا يكرمك ياخالد

 

يوسف: يارب يجي اليوم ده

 

خالد: إن شاء الله يلا قوم اتوضا وتعالى

 

يوسف:حاضر

يوسف راح اتوضا وصلى الضحى وقعد خلص الورد بتاعه بالعافية وجه يسمع

 

خالد: يلا سمع

يوسف بدأ في التسميع , وخالد كل شوية يرده ,

يوسف زهق فقاله ياعم أنا مش نافع دا مخي شبه علبة الكانز اللي عربية دايسة عليها

 

خالد: يابني سمع وبطل تهبط في نفسك شوف يايوسف أنا هقول لك حاجة ,

الحفظ ده زي لعب الحديد بالظبط, أول لما تيجي تلعب حديد بتشيل أوزان صغيرة

وشوية شوية بتلاقيك دخلت في التقيل لان لياقتك بتعلا كل شوية الحفظ زي كدة بالظبط ,

حاجة تانية أن مخ الإنسان ممكن يحفظ كتب تغطي وجه الكرة الأرضية

 

يوسف : يالهوي كل ده أما الواحد مخه مصدي صحيح

 

خالد: علشان كدة لازم تصنفره ياعم الحاج

 

يوسف: حاضر نصنفره , بس ايه ياواد ياخالد المعلومات دي , دا أنا حاسس اني قاعد مع لاب توب

 

خالد: واد طييييييب والله لوريك دا انا يااااااااض الشيخ بتاعك انطق بدل ما أجيب الفلكة

 

يوسف:هههههههههههه , أبوس ايديك بلاش الفلكة

 

خالد:خلاص يبقا تحفظ وتلم نفسك أصل ورب الكعبة أظبطك

 

يوسف:طيب طيب هظبط نفسي وبدأ يسمع

-------------------------------------

انتهى المشهد الثاني

تابعونا....

شارك هذه المشاركه


رابط المشاركه
شار ك علي موقع اخر

سلام عليكم

برأيى أول درس نتعلمه من خالد ويوسف هو الصحبة الصالحة وتأثيرها على البنى آدم فالصحبة لها تأثير وأيما تأثير

أنا مجربة تأثير الصحبة الصالحة بسم الله ما شاء الله يأخذون بيدك إلى الجنة وإلى طريق الله فهم كنز والله خصوصاً فى هذه الأيام المليئة بالشبهات والإغراءات فحرى بنا أن نجتهد بالبحث عن صحبة صالحة تأخذ بيدنا إلى الله فما أجمل أن يكون لك صديق يدعو لك بظهر الغيب وانت لا تعلم

 

وتانى درس أنك يا أخى والله نكأت جراحى فلقد حيل بينى وبين مقرأتى منذ شهر شعبان والله المستعان ولا أدرى أهو غضب من الله على أم ماذا

فلقد فترت همتى ولا أجد معين على الحفظ لكن أدعو الله أن ييسر لى العودة أو أجد أى مقرأة أخرى واسألكم الدعاء

 

شكر الله لك أخى وجزاك الفردوس الأعلى و متابعون إن شاء الله ِ

شارك هذه المشاركه


رابط المشاركه
شار ك علي موقع اخر

جزيتي الجنة اختي الفاضله بسمة الاقصي

 

بالفعل اختي الصحبة لها تاثير قوي علي الانسان اما بالايجاب واما بالسلب

 

فكما يقولون ( الصاحب ساحب ) فاما ان يسحبك صديقك الي طريق الله ومن بعده الجنة

 

واما يسحبك صديقك الي طريق النفس والهوي والشيطان ومن بعده خيبه امل وخسران

 

ويوم الحساب يقول يااااااليتني لم اتخذ فلانا خليلا لكن هيهات هيهات

 

نسال الله ان يرزقثنا الصحبه الصالحه

 

 

اما بالنسبه لحفظ القران فاسال الله ان يردكِ الي حفظك مرة اخري ان شاء الله اختي الفاضله وان يثبتك علي الطاعه

 

اللهم امين

شارك هذه المشاركه


رابط المشاركه
شار ك علي موقع اخر

المشهد الثالث (بقالة يوسف)

 

 

طفل صغير: عاوز كيلو جبنة وب 2 جنيه بيض

 

يوسف وهو يضع المصحف من يده: حااااضر

بس برضه مكنش مركز كان بيكرر في الآية اللي كان واقف عليها

طراااااااااااااخ وقع كرتونة البيض كلها

 

أبوه كان قاعد امام المحل دخل على الصوت: دخل شااااااف المنظر

 

يوسف (بيكلم نفسه): ياخبر أبيييييييييييييييض استعد للصورايخ يايوسف

 

أبوه بصوت جهوري : انت يااااااااااااااااااد مبتشوفش شغلك كويس ليه

عاجبك الخساير دي , يكونش مفكر نفسك الشيخ الحصري ولا ايه

 

يوسف وهو يقبل يد أبيه: معلش يابا مكانش قصدي والله ,

وبعدين انا لما احفظ القرآن أنت هتلبس في الجنة تاج الوقار ,

والتاج ده بس للي أولاده حافظين القرآن

 

أبوه متعجباً : بعد ما شاب ودوه الكتاب , دا أنا غلبت معاك

وأنت صغير يايوسف وانت كنت بتهرب من الكتّاب , وكنت

بتشتم الشيخ بتاعك, عايز الوقتي وانت عندك 25 سنة تحفظ القرآن!!!!!!!

 

يوسف وهو منكس رأسه في الأرض: هو أنت لازم كل شوية

تفكرني بالموضوع ده , أنا اتغيرت يابا ونفسي أنك تشجعني

وتدعيلي علشان ربنا يكرمني

 

 

أبوه: حاضر يافالح هدعيلك بس أهم حاجة تشوف شغلك وتبطل

شغل الدراويش اللي أنت فيه ده, قوم نضف اللي البيض اللي أنت كسرته ده

 

يوسف: حااااضر

 

 

 

كان هذا الموقف بعد كلام خالد ليوسف عن القرآن ب 4 شهور ,

خالد كان اشترى ليوسف مصحف التجويد صغير الحجم علشان

يبقا معاه في كل مكان , وكان اتفقوا ان يوسف يحفظ كل يوم وجه من الصفحة

 

 

 

 

(المسجد )

 

خالد بيقرأ علشان يوسف يقرأ بعده

يوسف سرحان خالص ومش مركز بالمرة

 

خالد: مالك يايوسف في ايه انت النهاردة مش معايا خالص

 

يوسف : حاسس اني طالع جبل وكل الناس بتشدني لتحت

 

خالد: ليه بس

 

يوسف: أبويا كل شوية يكسر في مجدافي ويقول لي ابقا قابلني لو نفعت

 

خالد: ههههههههه , انت كسرت ايه تاني امبارح

 

يوسف: ههههههههههههه, كرتونة بيض

 

خالد: يابني صحصح شوية عنده حق برضه لما انت كل شوية

بتكسر حاجة في المحل بسبب انك مش مركز يعني خساير على الفاضي

 

يوسف: يعني أعمل ايه يعني , الوجه بتاع كل يوم لازم اكرره

كتير علشان احفظ

 

خالد : أيوة بس ركز في شغلك برضه, تعرف لما أبوك هيشوفك

مركز في شغلك و مهتم بالمصلحة بتاعته هيقول ياريت كل

ولادي زي يوسف وهيدعليك ان ربنا يزيدك من القرآن اللي خلاك

تبره وتهتم بشغلك, يعني في المرحلة دي مش عايزين مشاكل

احنا عندنا هدف وعايزين نركز فيه مش عايزين حد يشغلنا عنهدفنا

 

يوسف: والله عندك حق

 

خالد: طيب انت بتحفظ بقالك كام شهر

 

يوسف: 4 شهور الحمد لله خلصت جزء الشورى امبارح وهدخلفي سورة فصلت النهاردة

خالد: ممتاز , أنت كدة حفظت خمس القرآن يعني قطعت خمس الطريق احساسك ايه الوقتي

 

يوسف: احساسي اني كل يوم بيبقا عند ابن جديد لان كل صفحة

بحفظها هي ولد من اولادي, بس أنا فرحان أوي اني وصلت لكده

 

خالد: كويس انك تفرح بس اوعا تكسل لسة في مشوار طويل لازم نمشيه

 

يوسف : الله يبارك فيك ياخالد ويجزيك عني خير

 

خالد : اللهم آمين , يلا اقرأ علشان تصح ورد النهاردة

 

--------------------------------

انتهى المشهد الثالث

تابعونا ....

شارك هذه المشاركه


رابط المشاركه
شار ك علي موقع اخر

جزاك الله كل الخير يا حبيب قلبى يا شيخنا :wub:

 

 

 

يوسف: احساسي اني كل يوم بيبقا عند ابن جديد لان كل صفحة

بحفظها هي ولد من اولادي, بس أنا فرحان أوي اني وصلت لكده

 

متعرفش الجملة دى أثرت فيا قد إيه !!

جزاك الله كل الخير إنت ويوسف وخالد :keda: ،، وياااااااااااااااااااااااارب ربنا يكرمنى بحفظ القرآن ويكرمنى قبلها بصحبة الخير اللى تشجعنى على خوض الطريق ده

إدعيلى حبيبى لأنى بجد بحاجه للدعاء بالهدايه والثبات ،، جزاكم الله خيراً ومتابع إن شاء الله ...

 

طبعاً تم تقييم الموضوع لروعته

شارك هذه المشاركه


رابط المشاركه
شار ك علي موقع اخر

بسم الله الرحمن الرحيم

حبيبي في الله احمد اشهد الله اني احبك في الله

واسال الله ان يجمعني بك في الدنيا علي طاعته

وفي الاخرة في جنته ودار مقامته انه ولي ذلك والقادر عليه

وبعدين بلاش تقول شيخنا بعدين اصدق انه انا شيخ وتبقي مشكله

الله اسال ان يرزقنا حفظ كتابه والعمل به

وان يثبتنا علي طاعته اللهم امين

احبك فـــــــي الله

تم تعديل بواسطه ابن تيميــــة

شارك هذه المشاركه


رابط المشاركه
شار ك علي موقع اخر

المشهد الرابع (المسجد)

 

بعد 8 شهور من أول الحفظ

 

يوسف: تعرف ياخالد أنا حاسس أني اتولدت من 8 شهور بس

 

خالد: امال انت مفكر ايه , لما انت قولت لي انك مش عايش ,

عرفت أن حلك انك تحفظ القرآن, يابني أنت لسة مشوفتش بركات القرآن ده في حياتك

 

يوسف: لا والله شوفت, أبويا مبسوط مني على الآخر وعايز يجوزني كمان

 

خالد: سيدي ياسيدي على الحلاوة, ماشية معاك ياعم

 

يوسف: ههههههههه الحمد لله دا من كرم ربنا عليا,

يااااااااااه مين كان يصدق ان يوسف يحفظ 12 جزء من القرآن في 8 شهور

دا أبويا نفسه مش مصدق

 

خالد: تعرف يايوسف أنا معجب بهمتك أوي, دا أنت ياما نمت وانت بتحفظ

, وياما كسرت بيض هههههه, وياما اخدت دش بارد من أبوك

, بس أكتر حاجة عجبتني انك استحملت مع كل المشاكل دي

 

يوسف: أنا نفسي مستغرب من كدة لكن دا من فضل ربنا ومتنساش برضه انك وقفت جنبي كتير

 

خالد: ياعم الله يبارك فيك أنا أمنية حياتي أن أكون سبب في حفظ الناس كلهم للقرآن

 

يوسف : ربنا يحقق لك اللي نفسك فيه

 

خالد: ها نتكلم جد شوية بقا, اخبار حفظك ايه الوقتي

 

يوسف: الحمد لله , المصحف مش بيفارق ايدي,

حتى وانا راكب العجلة بسوق بايد والمصحف في ايد,

دا أنا مرة كانت عربية هتخبطني ههههههه,

وكنت عايز أقولك على حاجة

 

خالد: قوووووووول ياكبير

 

يوسف: عايز أزود الحفظ من وجه إلى وجهين يعني صفحة وش وضهر

, وجه واحد مش بياخد غلوة مني الوقتي

 

خالد: ياسلام شوفت مش انا قايلك زي لعب الحديد طيب ياحاج هنزود لوجهين

 

 

بعد الجلسة دي بشهر خالد راح ليوسف المحل بتاعهم

خالد : يوسف عايزك بسرعة في حاجة مهمة

 

يوسف وهو قلقان: خير قلقتني ياخالد

 

خالد: لا مفيش حاجة بس في موضوع مهم عايز فيه

 

يوسف : طيب اقابلك بعد صلاة العصر في المسجد

 

خالد: طيب منتظرك

 

بعد صلاة العصر

يوسف : ايه ياعم في ايه قلقتني

 

خالد: يابني هقولك, بص ياسيدي, في فرصة الوقتي انك تدرس علم القرآن بحق وحقيق

 

يوسف: ازاي

 

خالد: معهد القراءات فتح الباب للتسجيل للسنة الجديدة

 

يوسف: ههههههههههه, قراءات مش لما أختم الأول وبعدين أتقن حفظ أبقا أشوف القراءات

 

خالد: يابني اصبر لما أشرح لك

 

يوسف: قول ياعم الحاج

 

خالد: المعهد مش مشترط انك تكون ختمت, انت حفظت كام الوقتي

 

يوسف: 15 جزء

 

خالد: ممتاز, أن أعرف شباب دخلوا وهم معاهم 10 وختموا في المعهد

 

يوسف: بس ياخالد انا كنت نسيت موضوع الدراسة والكلام ده وبعدين الشغل

 

خالد: الدراسة هتكون في حاجة بتحبها القرآن يااااااااد وبعدين لما هتشوف حلاوة المعهد مش هتفرط فيه

 

يوسف : طيب سيبني أفكر

 

خالد : مفيش وقت التسجيل هيقفل بعد بكرة , جهز ورقك علشان نقدم بكرة ان شاء الله

 

يوسف: الله المستعان يارب يسر الأمور

 

خالد: اللهم آمين

 

يوسف : طيب أنت جهزت ورقك ولا لا

 

خالد: ما هو دا الموضوع التاني اللي أنا عايزك فيه

 

يوسف: خير

 

خالد: أنا بجهز ورقي علشان مسافر السعودية

 

يوسف وهو حزين: ازاي يابني زعلتني والله

 

خالد: انت شايف وضعي عامل ازاي وبعدين لازم اشتغل في تخصصي بقا

 

يوسف: والله ياخالد أنت هتفرق معايا أوي , ومش عارف هكمل الحفظ ازاي من غيرك

 

خالد: لا اوعا تهد كل اللي احنا عملناه علشاني ,

ان شاء الله تتقبل في المعهد وتلاقي هناك صحبة حلوة

ومشايخ تقال يبقوا أحسن مني مليون مرة,

وبعدين هبقا اتصل بيك في التليفون اطمن عليك

 

يوسف وقد دمعت عيناه وهو يعانقه: مفيش حد أحسن منك ياخالد

 

خالد وقد تأثر بالموقف: ربنا يبارك فيك يايوسف بس لازم توعدني انك تكمل الطريق للاخر

 

يوسف وهو يمسح دموعه: إن شاء الله هتسمع عني ما يسرك

 

خالد: اللهم آمين , يلا جهز ورقك علشان نروح بكرة ان شاء الله

 

يوسف: حااااااضر

 

في اليوم التالي ذهبا سوياً إلى المعهد وتم تسجيل يوسف , و تم

تحديد إمتحان القبول بعد أسبوع مع المقابلة الشخصية

طوال هذا الأسبوع اجتهد خالد مع يوسف وراجع له كل الذي حفظه

المهم امتحن يوسف وعمل المقابلة الشخصية وبعدها ب 10 أيام

 

يوسف: خالد بارك لي

 

خالد: بشرني

 

يوسف: الحمد لله اتقبلت في المعهد ودا كله بفضل الله ثم بسببك يا أعز أخ وصديق

 

خالد: اللهم لك الحمد , كدة بقا أسافر وأنا مطمن عليك

 

يوسف بحزن: أنت مسافر امتى

 

خالد: السبت القادم ان شاء الله

 

يوسف: توصل بالسلامة , بس اوعا تنساني ياخالد

 

خالد: انساك ازاااااي ياااااااااااااااد دا انت أكتر من أخ , بس ادعيلي

 

يوسف: يعلم الله كم أدعو لك

 

خالد: الله المستعان

 

------------------------

انتهى المشهد الرابع

تابعونا للمشهد الأخير...

سيكون مليئاً بالمفاجأت ان شاء الله

نسأل الله ان يجعلنا من أهل القرآن

شارك هذه المشاركه


رابط المشاركه
شار ك علي موقع اخر

السلام عليكم ورحمة الله وبركاته

بارك الله فيك

اللهم ارزقنا حفظ القران وحسن تلاوته وتجويده والعمل به ويرزقنا الاخلاص فى كل اعمالنا اللهم امين يارب العالمين

لا تنسونا من صالح دعائكم

جزاك الله خيرا

شارك هذه المشاركه


رابط المشاركه
شار ك علي موقع اخر

قصة روعة جدا جدا و اتابعها بشغف و تم التقييم للروعة طبعا

اخي الفاضل لا تنساني من صالح دعاءك لاتم انا بدوري حفظ القران

لا تنسوني من صالح دعاءكم

شارك هذه المشاركه


رابط المشاركه
شار ك علي موقع اخر

المشهد الأخير

 

 

سافر خالد , ودخل يوسف المعهد وتعرف على إخوة مجتهدين في القرآن,

ووجد ضالته في المعهد, وطوال هذه الفترة كان خالد دائم السؤال عليه والتعرف على أخباره

 

وفي يوم

ترررن تررررررررن جرس التليفون

 

خالد: السلام عليكم ازيك يايوسف

 

يوسف بفرح: وعليكم السلام حبيب قلبي كنت لسة هبعت لك رسالة الوقتي

 

خالد: طمني عليك اخبارك ايه واخبار القرآن والمعهد معاك إيه

 

يوسف : ما هو ده موضوع الرسالة ياغالي

 

خالد: بشرني

 

يوسف: أنا ختمت القرآن

 

خالد: الله أكبر ولله الحمد , ما شاء الله لا دا لازم عزومة فيها دي

 

يوسف: طبعاً بس لما تنزل أجازة, بس اصبر على رزقك لسة في أخبار حلوة

 

خالد: قوووووووووووووول ياعسل دا أنت النهاردة فرحتني والله

 

يوسف: أنا طلعت التاني على المعهد

 

خالد: ما شاء الله والله أنا مش عارف أقولك إيه.. ألف مبروك ياغالي

 

يوسف: الله يبارك فيك ياحبيبي , خد التقيل بقا

 

خالد: ايه ياواد الحلاوة دي كله مرة واحدة كدة, دي أحلى مكالمة من أول ما سافرت

 

يوسف:هههههههههه, أنا أخدت إجازة بحفص على ايد شيخ كبير في المعهد,

وإن شاء الله أنا رايح عالية قراءات السنة الجاية وهاخد الشاطبية بتاعت القراءات السبع

 

خالد: ما شاء الله , وكنت بتقول مش هتنفع هههههههه

ربنا يثبتك يايوسف والله انت مش عارف أنا سعيد اد إيه

 

يوسف: عارف ياخالد انك اكتر واحد هتفرح لي ,

دي زرعتك وانت رعيتها ودي النتيجة

 

خالد: الحمد لله رب العالمين

 

 

 

انتهت المكالمة وخالد و يوسف في قمة السعادة, بعدها بشهرين

نزل خالد أجازة في الصيف , وطبعاً مش هقدر أوصف لقائهم مع

بعض كان عامل إزاي علشان مش عايز أبكي, المهم نسيت

أقولكم على حاجة مهمة, أن بعد ما خالد سافر يوسف مسك المسجد مكانه

 

 

لا إله إلا الله

دي آخر جملة في إقامة صلاة العشاء

يوسف بيقدم خالد للإمامة

فقال خالد: والله أنا أستحي أن أصلي وأنت خلفي

يوسف: إزاي دا أنت شيخي

فتقدم خالد للصلاة وهو يقول في نفسه

سبحان الله اللهم لك الحمد

كنت شيخه فأصبح شيخي

 

---------

انتهى المشهد الرابع والأخير

----------------------------------------

شارك هذه المشاركه


رابط المشاركه
شار ك علي موقع اخر

السلام عليكم ورحمة الله وبركاته

ما شاء الله **** تبارك الله ***** لاقوة الا بالله

قصه رائعه حدا وجميله

ربنا يرزقنا جميعا حفظ القران ويفقهنا فى الدين اللهم امين يارب العالمين

بصراحه مش هقدر اقول القصه دى ونهايتها محسسانى بايه شعور لا يوصف

يارب ناولنا هذا الشرف يارب يــــــــــــــــــــــــــــــــــــــــــــــــــــــــــــــــــــــــــــارب يارب

شكرا يا اخى بارك الله فيك

وجعل هذ ا الموضوع الجميل فى ميزان حسناتك

لا تنسونا من صالح دعائكم

عايزين ندعى لبعض كلنا ان ربنا يرزقنا حفظ القران وحسن تلاوته وناولنا هذا الشرف

تاهت من الكلمات مش عارفه اقول ايه تانى

جزاكم الله خيرا

شارك هذه المشاركه


رابط المشاركه
شار ك علي موقع اخر

انا فرحانه جدا كان انا اللى حفظت وترقيت كدا عند ربنا يارب عقبالنا جميعا

عموما ان شاء الله متقلقوش ان واثقه فى الله لن يخزلنى الله

متنسونيش من صالح دعائكم

شارك هذه المشاركه


رابط المشاركه
شار ك علي موقع اخر

Join the conversation

You can post now and register later. If you have an account, sign in now to post with your account.

زائر
اضف رد علي هذا الموضوع....

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.


×
×
  • اضف...

Important Information

By using this site, you agree to our Terms of Use, اتفاقيه الخصوصيه, قوانين الموقع, We have placed cookies on your device to help make this website better. You can adjust your cookie settings, otherwise we'll assume you're okay to continue..