اذهب الي المحتوي
منتديات ياللا يا شباب
دعوه للجنه

عايزاكى تقطعى ابنك من الضرب لو !

Recommended Posts

السلام عليكم ورحمة الله

 

عايزاكى تقطعى ابنك من الضرب لو !

 

 

 

عايزاكى تقطعى ابنك من الضرب !
وتهريه وتكسرى عضمه كمان عشان يتربى

بس مترجعيش تشتكى ان ابنك عدوانى وعنيف
وبيضرب العيال الاصغر منه على اتفه الاسباب
او كبر ومبقاش يسمع الكلام والضرب مبقاش يأثر فيه!
او بقى ماهر جدا فى الكذب عشان يبرر افعاله الغلط ، وغبى جدا فى دراسته !!

لان للاسف هى دى نتيجة الضرب!

الضرب بيجيب نتيجة.. بس بتكون وقتية يعنى هيسمع كلامك فى لحظتها بس

عشان (خايف) مش عشان بقى عنده (الدافع) انه ميعملش الغلط !
وعدم وجود الدافع هيخليه يكرر الخطأ ولو من وراكى!

كنا فى مسجد وكان فى واحدة معاها ابنها -4سنين- قعدته جنبها لحد اما تصلى
فالولد مشى من جنبها فطلعت من الصلاة عشان خافت عليه يمشى
وراحت للولد.....
(انتى لو مكانها هتعملى اية ؟؟)
اقولك انا هى عملت اية؟
راحت للولد وعملت نفسها خايفة اوى وهتعيط وقالتله بكل هدوووء :
انا طلعت من الصلاة عشان خفت لما مش لاقيت ((الراجل)) بتاعى جنبى عشان انت اللى بتاخد بالك منى لما بصلى (وعاشت الدور اوى بقى)..الخ الخ!!
تخيلوا الواد هيكون احساسه اية بالمعانى دى ..
كدة هى بترسخ فيه انه ((راجل)) و ((مسئول)) وان ليه (قيمته) عندها وهيحاول من جواه انه يكون عند حسن ظنها وهيثبت لنفسه كدة

تعرفوا العيل اللى بيضرب الاصغر منه بيعمل كدة لية ؟
لان كل اللى اتعلمه من ضربك ليه ان الكبير بيضرب الصغير والقوى بيفرد عضلاته ع الضعيف ..
ولانه مجربش طريقة تانية اساسا للتعامل مع طلباته غير بالضرب !
تعرفوا ان بعض الدراسات بتقول (( صفعة واحدة كل اسبوعين تكفى للقضاء على ذكاء الطفل ) !
لان هيخلى كللل تركيزه فى انه يستخبى منك لما يحب يعمل الحاجة اللى بتضربيه عشانها
او يوجه كل ذكاؤه فى تبرير أخطاؤه !!

طيب نعمل اية بقى لو الولد مجاش بالعقل وبالذوق ؟؟
فى درجات للعقاب :مش كله ضرب ضرب
فى شتيمة !!
لا برضو اياكى تشتمى

لانك لو قلت مثلا لطفلك يا (غبى ) هيطلع غبى او هيتغابى لانك اقنعتيه انه غبى
الطفل مش بيكون عنده قدرة على نقد الكلام اللى بيتقال
فهيصدق انه غبى وهيتصرف بكل غباء وبلاهة
وهيقل احترامه لنفسه وثقته بقدراته

وكذلك لو قلتى ( انت مهمل ،بليد ، ...الخ)
دايما انتقدى الفعل مش الطفل

يعنى لو مش راضى يدى اخوه حاجة قوليله (كدة انانية) مش تقولى (انت أنانى) !

لو فهمتيه براحة بقى وبالمنطق ومجاش برضو بالذوق ؟
هتعملى اية ؟ هتجربى درجات العقاب واحدة واحدة وبراحة
وحاولى وجاهدى انك مطبقيش عقاب جامد
احفظى العقاب الجامد ع الغلطات الجامدة(عشان يفرق بين درجات اخطاؤه برضو)

عندنا بقى درجات العقاب:

1-النظرة الحادة والتكشيرة التمام

2- الحرمان (خروجة -لعبة -كرتون -مصروف ..الخ)

3-الخصام (ايوه خاصميه اشمعنى بتخاصمى ابوه ابتسامة )

3-الزعيق (بدون شتيمة ) قولى (كدة غلط) انا باغلي

4- مش عاوزة أقول الضرب ..بالله عليكم تجنبوه على أد ما تقدروا

ده الرسول -ص- خلى الضرب على الصلاة بعد تعليم وصبر 3 سنين !!
مش انتى فى ساعتها صبرك ينفد وتقولى هو انا فاضية للفتوكة دى وتروحى ضاربة !

وافتكرى انهم أمانة تحت ايديكى وكلكم راع وكلكم مسئول عن رعيته
والزمى الدعاء ف صلاتك بأن ربنا يرزقك حسن تربيتهم

وقريت فى دراسات ان غالبية اللى بيضربوا عيالهم بيكونوا اتعرضوا للضرب وهما صغيرين
فبلاش نطلع عقدنا على أطفالنا ربنا يكرمكم..

شارك هذه المشاركه


رابط المشاركه
شار ك علي موقع اخر

:bravo:  :bravo:  :bravo:

شارك هذه المشاركه


رابط المشاركه
شار ك علي موقع اخر

جزاكم الله خيراً

الموضوع رائع بالطبع

دايماً بقول إن أفضل أسلوب للتربية .. هو التربية بالحب، مع الحزم.

والحزم ده ليه درجات بالتأكيد، لكن لا الحزم لوحدة ينفع ولا التربية بالحب لوحدها تنفع

أفضل نتيجة ممكن الشخص يوصلّها مع من يعول، هيا إن الطفل يبقى بيحبه وبيخاف على زعله، وف نفس الوقت بيخاف منه .. ودي وجهة نظري اللي مجربها وناجحة جداً بفضل الله

بارك الله فيكم مرة أخرى للموضوع المميز :)

شارك هذه المشاركه


رابط المشاركه
شار ك علي موقع اخر

Join the conversation

You can post now and register later. If you have an account, sign in now to post with your account.

زائر
اضف رد علي هذا الموضوع....

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.


×
×
  • اضف...

Important Information

By using this site, you agree to our Terms of Use, اتفاقيه الخصوصيه, قوانين الموقع, We have placed cookies on your device to help make this website better. You can adjust your cookie settings, otherwise we'll assume you're okay to continue..