[right]بحييكى على الموضوع
وعوده جميله بجد .. كنا مفتقدينك أختى / بنت مصر
موضوع جميل وحيوى - وفعلاً مواقع الزواج كتيره ، ومنكرش كمان إنها ناجحة ونسبة الزوار عليها كتير
بس زى ما وضحتى .. انا شايف إن أغلبهم بيدخلوا للتعارف ، أو حتى التسالى
بس حضرتك سألتى كام سؤال مهمين وانا حابب أجاوب عليهم (من وجهة نظرى المتواضعة)
اقتباس
ايه رائيكم في الزواج عن طريق النت ؟؟؟؟؟
وهل ياترى
بيكون فاشل ؟؟؟؟؟؟؟؟؟؟؟
ولا بيكون زواج ناجح ؟؟؟؟؟؟؟؟؟؟؟؟
الزواج عن طريق الإنترنت فيه أكتر من نقطة .. منقدرش نحكم على نجاحة أو فشلة لمجرد مسمى (الزواج عن طريق الانترنت)
لأن معرفة الإنترنت وحدها أكيد لا تكفى لثقة كبيره بين الطرفين وفهم لشخصيات بعض و .......
علشان كده ممكن يكون الإنترنت باب أو طريق لمراقبة الشخصية وانتقاء الشخص المناسب للزواج (ده ممكن) ومن بعدة بالتعارف والمقابلة والمواقف ومعرفة الأهل و ...... (خطوات الجواز الطبيعية لطلاب جامعيين مثلاً)
لكن برضه لازم ألفت الإنتباه إن الموضوع مش بالسهولة دى .. لأن 90% من شباب الإنترنت (إشتغالات) وصعب جداً معرفة الكويس من الوحش بالنسبة للطرفين ولازم الأهل يكونوا على علم تام لضمان عدم الوقوع فى غلط أو (إشتغالة) فى البداية
أما مسألة زواج ناجح أو فاشل دى .. فملهاش دعوة بالإنترنت بقى - هتبقى زيها زى زواج طلاب كانوا فى الجماعة مع بعض
لأن زى ما وضحت الانترنت ينفع باب للتعارف وتقرير الشخص بس .. لكن لابد من معرفته معرفة كويسه وقريبة ومعرفة الأهل والزواج أو المعاشرة تاخد مجراها الطبيعى ..
أما لو حضرتك بتتكلمى عن الزواج مباشرةً من الإنترنت .. فأرجح إنه فاشل بنسبة 99.9%
بالنسبة للسؤال التانى :
اقتباس
وهل ياترى
لو انت لقيت البنت المناسبة ليك من المواقع دى
هتتقدم ليه وتخطبها ؟وتتزوجها ؟
ولا هتقول دى بتقععد على النت وبنت مش كويسة ؟
طبعاً .. وعن نفسى مظنش هعمل خطوة زى دى أو هفكر حتى أدخل موقع من دول أعرف (مكتوب فى البروفايل بتاعها) مواصفات تناسبنى وأتجوزها .. ده مستحيل
بس مش علشان هقول انها بتقعد على النت ومش كويسة ، وأنا ضد كلمة إن اللى بتقعد على النت مش كويسة
ووضحت ده بإستفاضة فى موضوعى :
نعم لمشاركة الفتاة فى المنتديات .. ولكن
لكن أنا مش هاخد خطوة زى دى لأنى زى ما وضحت .. مش هرتبط بحد معرفش عنه أى حاجه غير كلام مكتوب عنه والله أعلم بصحته كمان
لكن لو الفتاة محترمة - فيها الصفات اللى انا محتاجها فى زوجة المستقبل ان شاء الله - وعرفت أهلها وكل حاجه عنها (على أرض الواقع) ليه لأ !! - ممكن تمشى خطوات الزواج عادى جداً ..
أنا قلت رأيى بكل صدق فى كل نقاط الموضوع - بس ليه الدوشه دى كلها أصلاً .. الدنيا مليانة .. بس اللى مليونير بقى يتجوز
انا عارف إن فيه آراء كتير هتناقض رأيى فى الموضوع - وده مطلوب - لأن الموضوع شائك جداً ووجهات النظر فيه بتختلف
بس دى فعلاً مجرد (وجهة نظرى) ومنتظرين نشوف وجهات نظر مفكرينا ومبدعى المنتدى .. خلونا نتعلم منكم
ومفيش مانع من النقاش فى القضية دى والموضوع ده رغم إنه شائك (لكن لازم يكون الكلام فى حدود)
تحيتى لكى - وبارك الله فيكى على موضوعك (اللى مش منقول) - جزاكى الله كل الخير للمشاركة الفعالة
2
