اذهب الي المحتوي
منتديات ياللا يا شباب
سجده

أهلاً بالعيد... بدون ذنوب

Recommended Posts

قام بنشر (تعديل)

العيد باقي عليه أيام و كل بيت وله عاداته من تنضيف و كحك و دي حاجه كدا تحسها متوارثه عبر الاجيال يعني الكحك لازم يتعمل مهما كانت الظروف.. تنفيضه العيد خط أحمر والله لو لسه قالبه الشقه نقلبها تاني عالعيد،، يعني الناس تقول علينا إيه اللي مقلبوش عالعيد أهم:lol:.. السجاد يتغسل حتي لو لسه مغسول واللا العيال يزفوكي اللي عيدت بسجاد مش مغسول آهي..:llll:
كل دي عادات جميله- مع اختلاف الاراء- و بتحسسنا فعلا بفرحه العيد و كلها مباحات و الحمد لله

لكن من اكتر الحاجات اللي لاحظت إصرار عليها في إقتراب العيد مع خطورتها و عِظم ذنبها هو موضوع
"النمص"
طبعاً البنات-إلا من رحم ربي- حواجبها إترفعت تلقائي:50_50: إعتراضاً علي الكلام من قبل ما يبتدي

طيب أنا مش هرفع حواجبي و يبقي حاجب بحاجب و أشمت الناس فينا:lololo:.. نزلي حواجبك يا ست البنات ايوا انتي يا سكر.. ايوا يا حفيده عائشة

- أنا
آه حواجبك اترفعت نزليها و قولي لا إله إلاّ الله
-أنا حفيده عائشة
أيوا يا ست الكل:D  مش قولتي لا إله الا الله،، تعالي نتكلم براحه
اولا: اُشهد الله إني احبك في الله :wub:
- هو انتي تعرفيني
لأ.. بس بحبك و بخاف عليكي جدااااا كمان لأنك مسلمه
- لسان حالها بيقول "هتثبتني بكلمتين و أحبك و بتاع<_< متعرفش إن حواجبي خط احمر زيها ذي الشقه بالضبط لازم تتقلب عالعيد:50_50: بس خليني معاها للأخر "

بصي يا قمر،، شكلك سرحتي مني :)

-ها.. لا لا سمعاكي
طيب رسولنا و شفيعنا و قدوتنا محمد صل الله عليه وسلم قال لعن الله الواشمات و المستوشمات و المتنمصات...

- عارفاه.. عارفاه الحديث<_<

ما شاء الله بارك الله فيكي..

طيب فهماه؟؟
عارفه يعني إيه "لعن"؟؟

:75_75:

يعني طرد من رحمه ربنا،، لو مرحمناش مين هيرحمنا
لو مرحمناش مش هندخل الجن.....


-إييييييييييييه!!!! إنتي هتفتي و تقولي مين يدخل و مين ميدخلش!!!!!!!:angry:

لا لا اهدي بس مش أنا اللي بقول

- و أعمالي؟؟!!!
دنا صوامه قوامه و بعدين مهو ربنا بيقول و نودوا ان تلكم الجنه التي أورثتموها بما كنتم تعملون

إهدي بس وصلي علي النبي

-عليه أفضل الصلاة والسلام

الرسول الكريم قال "لن يدخل الجنه أحداً عمله" قالوا : ولا أنت يا رسول الله؟ قال: "ولا أنا، إلا أن يتغمدني الله منه برحمه

- طيب و الايه الكريمه أنا فهماها غلط؟؟

لأ إنتي فاهمه الاتنين و مخك حلو و ست البنات كمان.. إسمحيلي بس أوضحلك حاجه..

- إتفضلي،،، أما نشوف اخرتها-دا لسان حالها طبعا متقدرش تقولي كدا-:)

الحديث قال ان اصل دخول الجنه برحمه الله الايه اللي انتي ذكرتيها بتقول ان الاعمال سبب في دخول الجنه
وربنا هو اللي بيعين و يوفق للاعمال الصالحه برحمته برضو مش بذكائنا و لا نصاحتنا،، أعمالك سبب دخول الجنه بس مش ثمن للجنه
لو عشتي عمرك كله صوامه قوامه متصدقه و مبتعمليش ولا معصيه دا مشة هيكون ثمن و مقابل ساعه واحده في الجنه مش تخليد في الجنه كمان و ما أدراكي ما الجنه و نعيمها فيها ما لا عين رأت ولا أُذن سمعت و لا خطر علي قلب بشر.. إزاي أعمالك -إن صحت كلها - تكون ثمن الجنه؟؟؟!!!!!

فهمتي؟؟؟

-:blink:؟؟!!!!!

هبسطهالك،، معلمتي ضربتلنا مثل حلو أوى علي الموضوع دا قالتلنا "تخيلو لو في موظف بيشتغل عدد ساعات معينه 5 ساعات مثلا و مرتبه 1000جنيه،، جه الموظف دا إشتغل بجِد و إجتهاد لحد ما وصل 7 ساعات شغل،، فصاحب الشغل حب يكافئه فأعطاه مرتب 5 مليون جنيه...:o

تفتكري يستحقها؟؟؟

- لأ دا صاحب الشغل دا كريم أوي

أومال أخد الفلوس دي كلها ليه؟؟؟

- مش عارفه يمكن عشان هو إجتهد

صح.. هو مجتهد،، إجتهد بس عمره ما كان اجتهاده و الساعتين الزياده اللي اشتغلهم- أعمالك- ثمن ال 5مليون جنيه -الجنه-
فهمتي؟؟؟؟

- فهمت.. مهما عملت من اعمال هي سبب دخول الجنه لان مش هينفع ادخلها بلا عمل بس أعمالي مهما صلُحت مش ثمن للجنه الابديه الجنه هندخلها فقط برحمه ربنا

الله يفتح عليكي و يبارك بعمرك يارب،،
أنا مغلطش أما قولت عليكي ست البنات 
نكمل :)
-كملي

الحديث الأولاني فوق خالص بقي بيقول إن اللعن هو الطرد من رحمه الله و من الملعونات المتنمصات
إنتي بقي تخيلي انه مش مجرد نزع شعيرات دا نزع من رحمه الله اللي....
-اللي اصلا هتدخلنا الجنه
الله يفتح عليكي
عارفه إنتي بقي المشكله ان لو مش جنه هيكون نار مفيش حاله او حد في النص:47_47:

بقولك إيه.. ما تدخلي كدا تحطلنا إيدك علي البوتاجاز

- دي إتجننت بينها:sad2:

طب بلاش إطفي التكيييف و المراوح النهارده و قضيها كدا...

:75_75:

أظن الرساله وصلت:cool:

السكر اللي بتقول المسلمين هيدخلو الجنه في الاخر برضو بعد عذاب النار

- عرفتي ازاي إني هقول كدا؟ :o

حفظاكو يا بنات حوا حفظاكو.. ونتي بذات مش هرد عليكي:angry: خلي جلدك ينضج في النار و يستبدل بغيره وذوقي العذاب و هناك مفيش صن بلوك يا أم الفكاكه

واقفه بعيد ليه تعالي يا سكر جنبي هنا..
الجو حر النهارده
أأاااااااااااااه
طب ما تروحي تقلعي الطرحه وأهو الجو حر و الدنيا صيام

- إنتي إتجننتي:angry:

ليه!!!؟؟هتحسي بإنتعاش كدا لما تلبسلنا حاجه خفيفه شويه

- لا طبعا حرام

الله.. طب مهو النمص حرام دا مش حرام و بس و خطورته ذكرناها.. اشمعني بقي هناخد من الدين اللي علي مزاجنا واللا عشان التقاليد متسمحش تقلعي حجابك و تخرجي بلبس خفيف لكن تسمح بنمص حواجبك
سكتي ليه؟؟ إكتشفتي إنك لبساها عشان العرف مش الدين لو كان عشان دينك كانو الاتنين بقو واحد
يا اُخيتي: إنه من الخزي ان تكون مرجعيتنا التقاليد و العادات مش الدين .. صح؟
- صح
-طيب......
إستني عاااارفه
-عارفه ايه
هتقوليلي اللي قال ان النمص هو ازاله الحاجب و ان ازاله الشعر الزائد حلال
و بالمره كمان ازله الشعر من فوق الحاجب حلال و من تحته حرام
يا أختاه: الحاجب معروف شرعاً و طبياً و عند بتوع الكوافيرات و هاتي اي عيل هيشاورلك عليه بس حاسبي ايده تدخل في عينك:)
الحاجب هو العظمه التي تعلو العين و الشعر اللي عليها.. ها واضحه دي أظن
و النمص هو إزله الشعر دا سواء بقي إزله نصه إزلته كله ولا كام شعرايه منه كله واحد
ويا حبيبتي: كل دا إسمه تحايل.. كلمه الحرام كبيره أوي يا قلب اختك و عشان كدا مبتتجزئش بلاش نبقي عاملين ذي أصحاب السبت و ربنا قال " يَا يَحْيَىٰ خُذِ الْكِتَابَ بِقُوَّةٍ ۖ.."
- يعني إيه؟؟
يعني إنتزعي كلمه الحق.. و فعل الحق.. و قول الحق إشمعني يعني شعرك بتنتزعيه بسهوله
ها؟
ها؟
إفتكري انه مش نزع شعيرات دا نزع من رحمه الله نزع من الجنة
إنتي خايفه علي شكلك صح؟
- عرفتي إزاي؟؟؟!!!!
منا انثي زيك هو انتي بتكلمي اخوكي
عشان تتجوزي.؟؟؟
الزواج رزق و الله هو الرازق
عشان زوجك.. خايفه؟؟
خايفه ازاي ونتي معاكي رب الكون؟؟؟!!!!!
اقولك علي حاجه سمعتها قبل كدا..

واحده كانت بتحب زوجها جدا و بتحاول ترضيه و تلفت نظره بكل الطرق عشان ميبصش بره.. صبغ شعر و اجمل لبس ومانيكير كل دا حلال مقولناش حاجه
المشكله إنها بقت بتتفنن في عمل حواجبها عشان تغير من شكلها و ميملش منها.. النهارده حواجبها رفيعه بكره طخينه بعده شالتها خالص و رسمت حواجب غيرها بعده مهبب بهباب اسود ..
ياما.. ياما الاخوات نصحوها ووضحو ليها إن دا حرام و معصيه بس هي كانت بتخاف.. بتخاف يبص بره..
يا بنتي يهديكي يرضيكي.. في أساليب تجميل كتير غير اللي بتعمليه دا.. وهي أبداً لو معملتش حواجبها وغيرت كل كام يوم هيبص بره.. وكأنها كدا بمنتهي التحدي بتقول مش عايزه الجنه المهم هو
عارفه كانت نتيجه دا إيه؟؟
سابها.. سابها و راح اتجوز صاحبتها.. سابها بعد كل اللي عملته عشانه و بعد حرصها عليه و بعد الذنوب اللي شالتها عشان ترضيه و للعلم صاحبتها شبها بالضبط يعني مبصش بره عشان إهمال و لا عشان حاجه مختلفه عن اللي عملته ذي ما كانت معتقده
عارفه ليه دا حصل؟؟
لإنها حرصت علي رضاه قبل رضا الله و لم تُرضي الله فيه عشان كدا جه العقاب برضو فيه
حبيبك النبي قال إن الله لا يقبل من العمل إلا ما كان له خالصاً و ابتغي به وجهه
صاحبتنا كانت بتتجمل عشان ترضي زوجها مش عشان ترضي الله بحسن تزينها له لا دي كانت بتعصي الله

هيبص بره.. قادر ربنا يحليكي في عينه- دا لو هتبقي وحشه اصلاً- و ميشوفش غيرك من النساء
إنتي أطاعتي رب الكون القادر يقول له كن فيكون
إدعي الله و الدعاء سبب في تغيير القدر
عارفه لما عيل يغلبك و تروحي تشتكي لأبوه و يقولك سبيهولي.. هو كدا بالضبط مع الفارق الكبير طبعاً
اللي هو انا جبتهالك من فوق يا معلم

كمان خدي بالاسباب.. حاوريه.. إقنعيه
مقتنعش.. إرفعي حاجبك ذي ما كنتي رفعاهولي في الاول :50_50: ونا هرفع معاكي..:50_50:
لا طاعه لمخلوق في معصيه الخالق ونا مش بعصيكي علي زوجك..زوجك هو أحق الناس بالطاعه بس زوجك الكيوت الامور اللي بيقولك يا بيبي  :wub:في الاخره هيقول نفسي.. نفسي
شكلك مش حلو شكلك مش عارف ايه
كلمتين مالهمش تالت.. "هل أنتم مغنون عنا نصيبنا من النار"

في واحده هناك أهي مش مقتنعه و حواجبها لسه مرفوعه ... تعالي.. تعاليلي..  قربي

- أنا بس كنت بقول: آااااااا تتتتن امممم .....

لا أنا اللي هقولك.. مش مقتنعه:chair[1]:

نتقابل في الأخره 

تم تعديل بواسطه سجده

شارك هذه المشاركه


رابط المشاركه
شار ك علي موقع اخر

Join the conversation

You can post now and register later. If you have an account, sign in now to post with your account.

زائر
اضف رد علي هذا الموضوع....

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.

جاري التحميل ...

×
×
  • اضف...

Important Information

By using this site, you agree to our Terms of Use, اتفاقيه الخصوصيه, قوانين الموقع, We have placed cookies on your device to help make this website better. You can adjust your cookie settings, otherwise we'll assume you're okay to continue..