زهرة الجنة

جزاك الله خيرا اخى على الموضوع الجميل وجزى الله الحاجة ليلى الخير الكثير لانها ضربت المثل لكل من يتحجج بعدم قدرته على الحفظ اما لكبر سنه او لمرضه او لضعف ذاكرته والرسالة له وللشباب من قبله طبعا اقول كلمة قالها لنا شيخنا فى بداية تعلمنا للقرآن قال: كل من يعتقد انه لايستطيع حفظ القرآن هو فى الواقع يغلق قلبه امام كلام الله فمن قال لكم ان القرآن يحتويه العقل ان القرآن مكانه القلب واستشهد بآية فى سورة العنكبوت ﴿ بل هو آيات بينات فى صدور الذين اوتوا العلم وما يجحد بآياتنا الا الظالمون ﴾ فلتكن دعوة لحفط القرآن الكريم واعلموا ان من فتح قلبه للقرآن اعطاه الله اياه فاجعلوا لقلوبكم نصيبا

لا حول ولا قوة الا بالله العلى العظيم انا لله وانا اله راجعون ربنا يرحمه يارب ويسكنه فسيح جناته عارفين لما عرفت الخبر افتكرت ايه انه الحاجة الوحيدة اللى اتربينا على حبها كلنا غير برامج الاطفال برنامجه العلم والايمان وعلى الرغم من انه برنامج علمى بحت الا ان اسلوبه الساحر جعل من العلم صورة مبسطة ومبهرة تجذب الصغير قبل الكبير حتى اننى اعتقد ان الاجيال الجديدة فى حاجة ماسة لمتابعته فلربما قللت عندهم السطحية والتفاهة رحم الله العالم الفقيد وعوضنا عنه

شكرا اخى على على الموضوع المفيد بجد فيه معلومات مفيدة بس انا عايزة اوضح موضوع الرغيف ده مش عنترة طلبوا منه انه يقدم مهر عبلة نوق حمر ولو واحد عايز يعجز واحد عن عمل شئ بيطلب لبن العصفور فقريب لما يطلبوا رغيف عيش هيكون اصعب من النوق الحمر ومن لبن العصفور بس الهدف واضح ان العريس لما يخرج متقطع من طابور العيش هيثبت لحبيبته اد ايه هو بيحبها وبيضحى بحياته عشان يتجوزها وانه هوه الوحيد الجدير بيها ده جاب لها رغيف عييييييييييييييييييييييش بحاله

والله انا كنت محتاجة القصة دى جدا محتجاها تطمن قلبى بعد كل ما مر به من احزان الا اننى لم اقل مثل صاحبك يوما واتمنى الا اقولها ابدا فقط اقول ربنا افرغ علينا صبرا وتوفنا مسلمين شكرا اخى على القصة الرائعة تقبل مرورى وتحيتى

حبيبتى فى الله شهد القصة اكثر من رائعة جزاكى الله خيرا على القصة وعلى نصائحك الغالية واعاننا الله على التمسك بديننا تقبلى مرورى وتقبلى صداقتى احبك فى الله زهرة الجنة

مش عارفة ليه كل ماتيجى سيرة حفريات اليهود تحت المسجد الاقصى بفتكرقصة ابرهه الحبشى اللى كلكم عارفينها كان عايز يهدم الكعبة لكن ربنا سبحانه وتعالى ابى الا ان يهدم بيته وارسل المعجزة الطير الابابيل لكن ده كان فى عام الفيل سنة ولادة الرسول الكريم عليه الصلاة والسلام السؤال اللى دايما يلح عليا هو ربنا ليه مش بيبعت المعجزة يمكن علشان احنا منستحقش ان ربنا ينصرنا بمعجزة من عنده او يمكن لاننا محتاجين نفوق من الغيبوبة اللى احنا فيها او لان - لاقدر الله - حدوث اى شئ للمسجد الاقصى هيكون عقاب من ربنا لينا على تكاسلنا وتفريطنا بجد مش عارفة بس بتمنى ان ربنا يحفظ المسجد الاقصى من كل قلبى بتمنى ان يبقى بسواعد المسلمين بتمنى انى مكنش من الاجيال التى تشهد انهياره - لاقدر الله حتى لا اقف امام العزيز الجبار اسئل عنه يوم القيامة لانى لن اجد ما اقول

شكرا اختى ريحانة الربيع على القصة الجميلة بس المهم الاستفادة منها ان فعلا كلمات بسيطة ممكن تهدى اسرة كاملة وان الاجتماع على اى طاعة يؤلف بين القلوب زى ما حصل بين الولد والجد وان المحبة فى الله ولله اقوى من محبة الاقارب وان الاهمال فى تربية الابناء يباعد بين قلوب الاسرة الواحدة ويجعل الابناء عرضة للتاثر باراء الاخرين ربما تغير هذا الولد للافضل لكن غيره ممكن يكون فريسة لاى افكار اخرى والحل الصداقة بين افراد الاسرة الواحدة والاجتماع معهم على طاعة الله جزاكى الله خيرا اختى تقبلى تحيتى

حسبى الله ونعم الوكيل حسبى الله ونعم الوكيل حسبى الله ونعم الوكيل للدرجة دى الغل والحقد على الاسلام والمسلمين انا ليا بعض الملاحظات على الموضوع ده اولا : دول مش علمانين ولا حاجة دول اصحاب ديانات وقارئيين جيدين فى الدين الاسلامى شياطين بشريين تفرغوا لمحاربة الاسلام والدليل من كلامهم نفسه فقد قال احدهم ( انها مساهمة فى ايقاظ العقول النائمة واعادة بث الحياة فى تلك العقول التى وهبها الله لنا وسلبها منا الجهلاء والمتخلفين ) يعنى هما مؤمنين بالله وانه هو واهب العقول للبشر ثانيا : هى مش مجرد لعبة علشان يضحوا بيها على المسلمين وبس لا هما قاصدين ان لكلام ده يوصل لنا علشان فعلا فى معجزات حقيقة بتحصل وكلمات فعلا مكتوبة على الثمار- يعنى ممكن تكون 90%من الصور اللى حطوها مفبركة فعلا وصورة او 2 حقيقية فعلا - زى ثمرة الكانتالوب اللى مكتوب عليها الله انا اخويا شاف فعلا ثمرة كانتالوب مكتوب عليها الله بعينه فى اسكندرية وصورهالى بالموبايل والسوبر ماركت اللى جنبنا محتفظ ببيضة وعارضها للناس مكتوب عليها الله يعنى هما قصدهم مش بس الضحك لا هما بيقولولنا ان كل شئ هتشوفوه او تسمعوا عنه من صنعنا احنا ولوصدقتوه يبقى انتو متخلفين وسذج علشان يشوهوا اى معجزة حقيقية بتحصل ثالثا : احنا ايمانا بالله مش متوقف على وجود اسمه على ثمرة ولا جهاز ذبذبات مش عارفة ايه هو اللى هيعرفنا ان كل شئ فى الكون يسبح بحمد الله هما مش بيسخروا منا لا هما بيسخروا من ايماننا القوى بغيبيات هما مش قادرين يصدقوها ومهما فعلوا لن يهتز ايماننا اللهم اكفى الاسلام شرورهم اللهم اجعل كيدهم فى نحورهم اللهم انك انت الكفيل بهم فانهم لن يعجزوك ابدا وحسبنا الله ونعم الوكيل

حبيبتى حياتى من اجل ربى انا مستحقش كل الكلام الجميل ده وجزاك الله الف خير على دعواتك الجميلة وعلى وقفتك معايا فى ازمتى بس انا متفقة معاكى فى حاجة مهمة جدا انا كمان بحبك فى الله حقيقى من قلبى

حبيبتى حياتى من اجل ربى اولا انا مش عايزاكى تكونى متاثرة بالشكل ده واضح انك صغيرة فى السن ولسه بتتصدمى بشكل كبير اول حاجة عايزاكى تعرفيها ان الدنيا اد مابتجمع اد مابتفرق يمكن ظروف خارجة عن ارادة الناس هى اللى بتبعدها او انها اتغيرت لوضع جديد اصبحوا فيه فاصابهم الغرور مثلا او ان الناس دى من الاول مش صادقة فى قربها منك مثلا بتعرفك علشان مصلحة معينة وبعدين معدتش محتاجالك تانى وده بقى السبب الاكثر انتشارا هذه الايام بس ده كله ميمنعش ان فى فالدنيا صداقة حقيقية وحب خالص لله عالعموم احسن حاجة تعمليها ان تمشى عالحكمة اللى بتقول احبب حبيبك هونا ما وابغض عدوك هونا ما تقبلى تحيتى اختى

انا هقول يااااااااااااااااااااارب ان كنت قد ابتليتنى بذنوبى فارجو ان تكون قد غفرت لى وان كنت قد ابتليتنى لترفع درجتى فارجو ان اخرج من هذه المحنة باجر الصابرين الموضوع اكثر من رائع تقبلى تحيتى اختى بنت مصرية

فكرتك جميلة جدا يا مى لكن زى ما قال باشمهندس علاء لازم نراعى النقل الصحيح واضيف شرط اخر حاولوا يا جماعة تبحثوا عن اذكار جديدة فى اذكار كتيرة مش مشهورة اوى لكن ثوابها عظيم منها ما انقله عن كتاب حادى الارواح الى بلاد الافراح للامام ابن القيم الجوزيه وهو كتاب رائع يتحدث عن الجنة روى عن الامام على رضى الله عنه انه قال ( من قال لا اله الا لله الملك الحق المبين فى كل يوم مائة مرة كان له أمان من الفقر ومن وحشة القبر واستجلب به الغنى واستقرع به باب الجنة )0 وهذا الذكر روى فى باب وصف ابواب الجنة وان اول من يقرعها الحبيب المصطفى صلى الله عليه وسلم وان صوت قرع باب الجنة من اجمل الاصوات التى تسمعها الآذان بالاضافة انه فعال بالفعل فى مسألة رفع الفقر وجلب الغنى فهو ذكر رائع اسأل الله ان يعيننا على المداومة عليه وان ينفعنا به واياكم ان شاء الله وعندى المزيد من الادعية والاذكار الجديدة انقلها لكم تباعا ان شاء الله السلام عليكــم ورحمـة الله وبركاتــة

اختى الحبيبة الرام ان كنت تبحثين عن قلب صاف يدعو لها فقلبك اصفى القلوب وان كنت تبحثين عن الصحبة والسند فهذا المنتدى والله خير صحبة وخير سند لها من قلبى خالص الدعاء بالشفاء والصحة والعافية وارجو ان تدعى لها بهذا الدعاء يا ودود يا ودود يا ودود يا ذا العرش المجيد يا مبدئ يا معيد يا فعال لما تريد اسألك بنور وجهك الذى ملأ اركان عرشك وبقدرتك التى قدرت بها على خلقك وبرحمتك التى وسعت كل شئ رحمة وعلما لا اله الا انت اللهم اسألك ان تشفيها وترفع عنها ألمها وترزقها الصحة والعافية وان تنزل عليها السكينة والطمأنينة والصبر والرضا ومن قلبى بظاهر الغيب لها الكثير من الدعاء فانا اعلم كم هى قاسية معاناة المرض ولكى حبيبتى خالص الحب والتقدير

اشكركم جميعا على المرور والتعليق انا والحمد لله احسن والموضوع ده يا اختى الرام الحبيبة يا من تتابعين اخبارى اول باول حصل بالفعل بكل تفاصيله التى حكيت عنها منذ حوالى 5 سنوات وانا عاصرته بالفعل وسبب كتابتى لهذا الموضوع مش التسلية لا لانى اول ما كتبت فالمنتدى عن حالتى ووجدت اختنا تقوى القلوب تقول انها خافت تدخل الموضوع لانها خافت ان تصدم بفراق اصدقاء جداد تذكرت حكاية البنت دى مع عم سعد ليه بنخاف نعمل خير ليه بنفكر دايما ان بكره اوحش من النهاردة والله انا نصحتها وقتها من اجلها هى ومن اجل كل من يفكر مثلها وفكرت ان احكى حكاية عم سعد لعلها تستفيد ونستفيد كلنا منها لكن ظروفى الصحية جعلتنى اؤجل الموضوع يا جماعة والله ما فى خير بيضيع عند الله تعرفو والمثال والله للعبرة واسال الله الاخلاص ذهبت مرة مع واحدة مريضة للمستشفى واحتاجت الدخول للعناية المركزة وكانت عجوز وتقريبا فى غيبوبة ومنعوا كل اهلها من الدخول معها الا انا لاننى اعمل بجهة طبية بقيت معها حوالى ساعتين حتى عملت بنتها اجراءات المرافقة وسمحوا لها بالدخول شكرتنى بنتها ودعت لى كثيرا تعرفوا اول مرة اروح اخد العلاج بالمستشفى جاءت معى دكتورة زميلة وكان معى ابى وامى وفجأة قالت الممرضة يلا يا جماعة فى تفتيش وممنوع المرافقين ياااااااااه هما هيسبونى لوحدى وانا خايفة وفى اول يوم علاج فجأة لقيت الدكتورة بتقول انا دكتورة وممكن ابقى معاها التفتيش مش هيمانع من وجودى والله طمنى اوى وجودها معايا ولحظتها بس حسيت باللى انا عملته مع المريضة العجوزة وعرفت ان ربنا عمره ما يضيع عنده خير ابدا ياريت نستفيد

وسعوا يا جماعة عشان عم سعد استدارت الفتاة الصغيرة حديثة التعيين بالمستشفى وهى تتساءل مين عم سعد ده وما ان وقعت عيناها عليه حتى فهمت انه كهل جاوز 80وربما 90 من العمر كفيف البصر يسند باحدى ساعديه على عجاز قديم منحنى الظهر ذو لحيه بيضاء ووجهه حفر الزمن ملامحه خلاله ولكن مازال ينم عن طيبة وسماحة كبيرة سئلت العامل الذى يسانده عنه قال ده عم سعد هوه فيه حد ميعرفوش فالمستشفى كلها!!!! انتظر العامل حتى صرف عم سعد علاجه وسنده حتى انصرف ثم عاد وقال للفتاة ده عم سعد اقدم مريض عندنا فالمستشفى!!!! ده راجل غلبان قوى والدكاترة كلهم عارفين حالته اول مابيجى المستشفى بيكتبوا له علاجه ويمشوه علطول اصل مرضه مزمن وعلاجه خلاص بقى معروف بيكرروه كل مرة بدا التأثر الشديد على الفتاة لحالة عم سعد خاصة وانها فى بداية عملها ولم تر المأسى التى تملأ المستشفيات بعد ومرت الايام وعاد مرة اخرى عم سعد ولكن هذه المرة يسنده احد المرضى الذى تركه وانصرف بعد ان اوصله للدور الثانى الذى به الفتاة ساعدت الفتاة عم سعد وسندته ولكن مع مراعاة مسافة كبيرة بينهما وعدم التلامس قط فقط يسند ساعدة على ساعدها ( تذكروا هذا وصرفت له العلاج ولكن كيف سينزل السلم لم تجد احد العمال لتوصيله فقررت ان تنزل معه حتى توصله للشارع وفى اثناء هذا سئلته انت منين يا عم سعد من الحتة الفلانية!!!!! ياخبر دى بعيدة جدا عن هنا انت بتيجى ازاى!!! ولاد الحلال بيساعدونى يا بنتى هو انتى بتشتغلى هنا؟ ايوه يا عم سعد احست من كلامه انه زى الغريق اللى بيتعلق بقشاية وانه نفسه يعرف حد فالمكان عشان يساعده وصلوا الشارع طب وبعدين هسيبو ازاى كده وسط العربيات احاول اوقف له تاكسى عشان يوصله البيت ومن اول تاكسى اوقفته واللى طبعا سابها وجرى مسرعا ادركت صعوبة الموقف المكان اللى ساكن فيه عم سعد مكسر جدا لا والاجمل انه بيختار يوم حضوره للمستشفى يوم السوق اللى بيقام عندهم فالحتة وابقى قابلنى ان عبرك تاكسى واحد ورضى يروح بيه المكان ده ولكن هذا لم يزيدها الا اصرارا على توصيله امال هوه يعنى هيعمل ايه!!!!! وكأنه مكنش بيجى ويروح قبل كده المهم بعد استعطاف عاشر سائق تاكسى رضى يوصل عم سعد وما ان ركب حتى شعرت الفتاة بسعادة غامرة وكأنها قامت بعمل بطولى !!!! الاحساس بعمل الخير جميل قوى والاجمل منه الرضا عن النفس والاحساس انك عملت حاجة ترضى ربنا وقررت الفتاة انها لن تحرم نفسها من هذا العمل ابدا وبدأتصداقة قوية بينها وبين عم سعد كل اسبوعين يجى تعمل له الازم لحد ما يخد علاجه وتمشى معاه لحد ما تركبه التاكسى وفى هذه الاثناء تستمع الى حكاياته والتى بدت لها اشبه بحكايات الجد عن الزمن اجميل ايام عمله وحياته وشبابه وابنته الوحيدة التى تعمل وتساعده على نفقات الحياة ومرت الشهور وفى كل مرة تطير من فرحتها كلما ذكر لها انه يدعو لها وانه يذكرها عند كل اذان ويدعو لها ولكن الدنيا لاتدوم على امر واحد وان لم يكن هناك وجود للشر ما عرفنا معنى الخير ففى مرة وبعد ان اوصلت الفتاة عم سعد اوقفتها احدى الممرضات من النوع اللى سابغ شعره اصفر ولابسه كل الوان الطيف وريحه البرفان تتطاير منها انتى ليه بتوصلى الراجل ده بنفسك ما انتى عارفة ان مفيش عمال كفاية ومش دايما بيلاقى حد يوصله وبعدين ده ثواب لالا ميصحش ده مهما كان راجل غريب ومينفعش تمشى توصليه بنفسك للباب كل مرة ايييييييييييييهههههه ده راجل قد جدى وغلبان جدا وكفيف ووو.. انا حذرتك وانتى حرة بدل ما حد يتكلم عليكى ............ شعرت الفتاة وكأن صاعقة هبطت على رأسها ايه اللى هيه بتقوله ده هوه اللى انا عملته ده غلط دخلت حجرتها وحكت لزملائها والذين يحفظون القرآن معها ما حدث اجمعوا جميعا انها مش غلطانة وان العيب مش فيها ولكن فى من يحاولون منع الخير وقالت احدى زملائها يا بنتى الزمن ده بقى صعب ان الواحد يعمل خير!!! انتى مسمعتيش عن المرأة التى اوقفوها فالطريق ومعهم ورقة وكانهم يسألونها عن عنوان وكانت تحتوى على مخدر اختطفوها وسرقوا ذهبها ومن ده كتير الزمن ده محدش يعمل فيه خير كفاية سدت البنت اذنها وكانها تعلن رفضها لهذا المبدا ياجماعة احنا مسلمين وانا كنت حاسة انى بعمل حاجة ترضى ربنا هدأتها احدى زملائها ونصحتها ان توصى احد العمال النادرين بالمستشفى بتوصيله وان تبعد عن الشر وتغنيله واقفت البنت على مضض وراحت الايام وعادت وفى كل مرة ياتى عم سعد يسأل عنها اصلها فى اجازة يا عم سعد طب طمنونى عليها هيه كويسة الحمد له هيه كويسة كان الحزن يعصر قلبها وهى ترى كسره خاطره فى كل مرة وهو يبحث عنها ولكن ما باليد حيلة يتركه الناس بالدور التانى وينزل السلم بمفرده وما باليد حيلة يتعثر حتى يكاد يسقط على الارض وما باليد حيلة ينزل للشارع وحده ولايعلم احد كيف يصل لمنزله وما باليد حيلة حاولت الفتاة الا تراه والا تتواجد فى اليوم الذى ياتى فيه ومرت شهور و..... انتو مش ملاحظين يا جماعة ان عم سعد معدش بيجى قالتها احدى الزميلات التى لاتدرى شيئا عن القصة ده باين عليه مات ايوه اصله معدش بيجى خالص زى عم احمد زمان كان بيجى علطول وبعدين انقطع وعرفنا انه مات سالت دموع الفتاة وهى تذكر هذا الشيخ الطيب وسمعت صوته وهو يقول لها انا بدعى لك عند كل اذان اهدى يا حبيبتى قالت وسط دموعها هى الدنيا معدش فيها خير قلتلها لا طبعا الدنيا فيها الخير وفيها الشر بس الشر لازم ينكسر والخير هوه اللى باقى اوعى تفتكرى ان انتى عملتى حاجة غلط او ان اللى عملتيه هيروح عند ربنا يمكن ربنا ينجيكى من محنة صعبة بسبب دعوة واحدة من عم سعد او ربنا يوفقك لخير كبير بسبب دعواته اوعى تندمى على فعل الخير اوعى تدخرى جهدا لمساعدة اى شخص اعرفى ان الخير باقى فى محمد وامته الى يوم الدين حتى لو كادت لك الدنيا كلها هو درس ان طريق الخير مش مفروش بالورود لكن محتاج مجاهدةو صبر مسحت دموعها وقالت نعم انا مش ندمانه ابدا وعمرى ما هندم ايوه الدنيا لسه بخير

ربنا يكرمك اخى عاشق الصداقة الحمد لله على كل حال ذكرتنى بالثواب فهان على الامر اسأل الله ان اخرج من هذه المحنة باجر الصابرين جزاك الله كل الخير وجعله فى ميزان حسناتك لاتنسانى من صالح دعائك

اخوتى فى الله يا كل امة محمد هل تريدون ان تكونوا اول فوج للجنة !!! نعم ولما لا وانتم من امة الحبيب محمد اسمعوا معى والحديث فى الصحيحيين قال صلى الله عليه وسلم نحن الآخرون الأولون يوم القيامة نحن اول الناس دخولا الجنة" "بيد انهم اوتوا الكتاب من قبلنا واوتيناه من بعدهم وقال صلى الله عليه وسلم انا اكثر الناس تبعا يوم القيامة وانا أول من يقرع باب الجنة" هل تعلمون اخوتى ان لنا نحن امة محمد صلى الله عليه وسلم بابا خاصا فى الجنة قال صلى الله عليه وسلم باب امتى الذى يدخلون منه الجنة عرض مسيرة الراكب ثلاثا "ثم انهم ليضطغطون حتى تكاد مناكبهم تزول وقال صلى الله عليه وسلم " اهل الجنة عشرون ومائة صف هذه الامة منها ثمانون صفا" هل احسستم اخوتى كم الفرصة سانحة لكم لكى تلحقوا بالفوج الاول هل احسستم كم هى غالية امة محمد على الله سبحانه وتعالى ولم لا وهو صلى الله عليه وسلم حين يأتى باب الجنة ويكون اول من ورده فيقول الخازن من انت؟ فيقول محمد فيقول الخازن امرت ان لا افتح لاحد قبلك كم انت غال على الله يا رسول الله لكم احبك الله وكرمك على جميع خلقه ورسله وانتم هل انت غال على الله؟ هل انت حقا من امة محمد ؟ هل سيشفع لك يوم القيامة؟ هل سيسقيك من يديه وياخذ بيدك للجنة؟ هل انت من الفوج الآول؟ ان كانت اجابتك نعم فاحمد الله على ما انت فيه واجتهد اكثر فللجنة درجات عديدة وان كانت اجابتك لا فهذا الموضوع نسمة امل لك إلحق بحبيبك عد الى الله اطرق بابه كن من الفوج الاول وللموضوع بقية ان شاء الله ساجمع لكم الكثير من الاحاديث عن الاعمال التى ذكر عنها الحبيب صلى الله عليه وسلم ان من ثوابها دخول الجنة وستدهشون حين تجدوا انها اعمال بسيطة جدا ولكن ثوابها عظيم اجلتها لعدم الاطالة اراكم على خير جمعنا الله واياكم مع الحبيب فى اعلى درجات الجنة السلام عليكــم ورحمـة الله وبركاتــة ،،

شكرا على الموضوع الجميل يا تويتى لانه لخص فكرة السهو فالصلاة بطريقة بسيطة ومشوقة ولى نصيحة للتركيز فالصلاة حاولوا ان تكون صلاتكم فى جماعة فانا وامى نصلى معا فالبيت يوميا صلاتين على الاقل حسب مانتقابل فلكل منا عمله وده بيعين كتير على التركيز فالصلاة ومع استحضار القلب والخشوع يكون الاجر بسبعين صلاة ان شاء الله زادنا الله واياكم من الاجر والثوب السلام عليكــم ورحمـة الله وبركاتــة ،،

السلام عليكــم ورحمـة الله وبركاته جزاك الله كل الخير اخى عاشق الصداقة بصراحة الموضوع جميل ومؤثر للغاية واسأل الله ان ينفعنا جميعا به انا لى تجربة بسيطة اود كتابتها لعنا نستفيد منها كنت احفظ القرآن مع مجموعة وكانت تأتى علينا سجدة التلاوة ولم نكن نسجد فى اول الامر حتى لانضيع وقت الحصة !!!!! وكنا نكتفى بالتسبيح حتى قالت لنا اخت جزاها الله خيرا ان الشيطان حين يسجد الانسان ينزوى ويقول يا ويلتى !! امر الله ابن ادم بالسجود فاطاع فله الجنة وامرت انا بالسجود فلم اسجد فلى النار ومن وقتها لانضيع سجدة تلاوة ابدا كلما مررنا على سجدة اوقفنا التلاوة وسجدنا لله جميعا كنت اشعر وقتها اننا كالملائكة ونحن نسجد جميعا لله فى وقت واحد طاعة لامر الله ومن وقتها حبب الى سجود التلاوة ودعاؤه لمن لايعرف (سجد وجهى للذى خلقه وصوره وشق سمعه وبصره بحوله وقوته فتبارك الله احسن الخالقين واصبح دعائى فى كل سجدة تلاوة ان يقبض روحى وانا ساجدة من غير رياء او سمعة ربنا يحسن خاتمتنا جميعا ويجمعنا بالحبيب محمد فى جنته السلام عليكــم ورحمـة الله وبركاتــة ،،