المش مهندس وصل

[رجل من الصحراء 36]

المش مهندس وصل

سلام عليكم ياجدي

اهلاااااا ازيك يابن بنتي عامل ايه يارب تكون رايق

هــه الحمدلله ياجــد

اه طالما قلتلي هه و لويتلي في بوزك وكشرتلي بعينيك تبقى مضايق مالك يابن بنتي؟؟

مش عوايدك يعني طول عمرك بتيجي وتتشعلق في رقبتي وتفضل تغلس عليا

وضحتك بترن في كل مكان والنهارده جاي ساكت وهادي .

مالك يابشمهندس؟؟؟

هههههههههههه قصدك يامش مهندس.مش انا ياجد اكتشفت اني مش مهندس.

مالك اسم الله عليك يابن بنتي اتجننت ولا ايه وريني دماغك كده مانت حلو اهو ومش سخن ولا بتهلوس امال فيه ايه.

انا سخن من جوايا ياجد قلبي موجوع وقايد نار.

ليه كده يابن بنتي تعال ياولدي هات ايديك تعال ننزل نتمشى في البلد شوية ولا هتتحجج زي كل مرة وتقلي اصلي انا جاي اقعد معاكم مش جاي اتمشى.

لا ياجد ياللا بينا ...ياللا .. معدتش تفرق اي حاجة.

اه قلي بقى مالك مخنوق من ايه؟؟

مخنوق من نفسي ومن الناس ومن البلد ومن كل حاجة.

ياااااااه ده انت شكلك شايل هموم ,, مالك يابن بنتي فضفضلي

اقلك ا يه ولا ايه ياجد كل ماامشي في طريق الاقيه اتسد

انت عارف اني مش مرتاح في شغلي وعايز اغيره واني خلاص كلها كم يوم وهتجوز وبصراحة مش عارف هعمل ايه.

من فترة قعدت مع نفسي واكتشفت اني اتخصصت غلط دخلت قسم ملهوش شغل الا بالواسطة ومش اي واسطة ده لازم واسطة كبيرة.

اما من غيرواسطة انت ملكش شغل خالص

وحتى يوم مااشتغلت اشتغلت في شركة كلها مشاكل ومفهاش اي استقرار .

قلت لنفسي مش هينفع كده لازم اقعد اخطط وافكر واحدد لي هدف ولازم اوصله وخصوصا اني دلوقتي داخل على جواز.

فقررت اغير مجال التخصص وابدا اخد تدريبات ودورات عشان اكتسب خبرة في المجال الجديد اللي شغله متاح وكويس ومنها اوصل لشركة كبيرة ويبقى عندي خبرة ومنها احقق حلمي وهدفي واعمل شركتي الخاصة .

يعني باختصار حطيت لنفسي هدف واضح وخطة واضحة ومشيت عليهم

وانقطعت عن العمل وسافرت واخدت الدورات واخدت الخبرة والشهادات وقدمت في الشركات الجديدة واستنيت بفارغ الصبر اولى خطوات الحلم وهيا بتتحقق.

بس الظاهر اني نسيت نفسي وحلمت زيادة عن اللزوم مع اني كنت بطلت احلم من زمان.

صحيت في يوم لقيت كل حاجة انتهت والله في نفس اليوم كله انتهى

كله بيقول انت تخصصك ملهوش شغل عندنا قلتلهم ازاي مانا اخدت شهادات وغيرت المجال قالولي مليش فيه احنا لينا بتخصصك في الكلية وانت ملكش شغل عندنا.

حتى لما كان فيه امل بسيط في احد الهيئات الكبيرة اللي كل الناس قدمت فيها من اول العمال والمؤهلات الوسطى ومؤهلات عليا مختلفة ومهندسين

الراجل بص عالشهادة وقاللي للاسف يابشمهندس انت مش مطلوب

فهمته اني ممكن اشتغل في كذا قسم عندهم ومعايا شهادات بكده قاللي انا عندي اوامر بكده تخصصك مش مطلوب.

يعني ايه انا طلعت فشنك بعد كل التعب ده تخصصي مش مطلوب امال الدولة عملته ليه

وخلته تبع هندسة ليه ومخلياه لغاية دلوقتي ليه.

ليه لما هو مش مطلوب وشغله قليل لسه مقفلتهوش ومخليه الطلبة تدخله ,

والواحد يتخرج فرحان انه مهندس وفي الاخر يفاجأ انه ملوش شغل ومش مطلوب

ده حتى شغله كله في الجبال والصحاري وبيتعامل مع الحجارة والحيوانات الضارة يعني حتى مش هنزعج الناس ولا نزحم المواصلات ولا نزود التعداد السكاني ولانلوث البيئة ولا اي حاجة بالعكس ده احنا هنعمر البلد ونزود اقتصادها.

ليه قلي ياجدي ليه هو ذنبي اني طلعت مهندس ولا ذنبي اني دخلت القسم ده

طيب حتى لو كده انا اديني غيرت مجالي وتخصصي ورسمت لنفسي هدف

وسعيت فيه بقدر الامكان.

وبرده في النهاية يقلي تخصصك يبقى برده ده ذنبي انا ولا ايه اووووففف.

ياااااااااااه يابن بنتي تصدق اول مرة اشوف دموعك واشوفك بالشكل ده!!!!!!

ده انت معملتهاش لما كنت صغير وكنت بتتضرب كتير عشان شقاوتك عمري ماشفت دمعتك.

لا ياجد لو جات عليا انا مش مشكلة بستحمل. بس صعبان عليا الناس اللي تعبت عشاني صعبان عليا ابويا وامي اللي تعبوا عشان يشوفوا ابنهم مهندس صعبان عليا البنت اللي قدرها كان اني اتجوزها . صعبان عليا الناس اللي وثقت فيا وفي تحقيق حلمي وخذلتهم صعبان عليا التعب والحلم اللي بديته وانتهى في لحظة .

اهدى يابن بنتي ووحد الله وصلي عالنبي,, شايف الراجل العجوز اللي شغال هناك في الزرع ده.

ايوه ماله , وازاي الراجل ده بيشتغل لوحده في الارض دي كلها ده هو مش مستحمل اصلا.

اديك قلتها بنفسك ده ياسيدي اسمه عمك صابر راجل كبير في السن زي مانت شايف

وشغال في الارض دي بالاجرة عند جماعة طيبين وولاد حلال .

عمك صابر ده كان تاجر كبير زمان وكان راجل طيب وخيره كان على البلد كلها وكان امنية حياته يخلف ولد يورثه املاكه ويبقى عزوته يتعكز عليه لما يكبر

واتجوز واحدة عاش معاها سنين طويلة مبتخلفش وهو طول السنين دي بيلف على الدكاترة في كل مكان وصرف عليها دم قلبه وباع املاكه وخد ديون عشان يصرف على علاج وعمليات وفي الاخر خالص ربنا كرمه بولد فرح قوي كبره وعلمه احسن تعليم كان بيموت من الفرحة وهو بيشوف ابنه اللي هو حلم حياته بيكبر قدامه وبيبقى راجل وفي يوم جاله خبر ولده اللي مات وهو في عز شبابه ومراته مسكينة مستحملتش وتعبت من الصدمة وماتت هيا كمان فضل عمك صابر وحيد وتجارته خسرت وديونه كترت والديانة طالبوه وبيعوه بيته حبسوه لانه معهوش يسدد.

لغاية ماولاد الحلال طلعوه من السجن وشغلوه عندهم في الارض وادوله العشة اللي قدامك دي عشان يسكن فيها ورغم عن كل ده تتوقع الراجل ده ايه حالته .

ههه اكيد يعني مجنون ومش حاسس بنفسه يعني ده اقل واجب.

بالعكس راضي وصابر .. اقلك روح سلم عليه لغاية مااروح اتوضى عشان صلاة العصر قربت واجيلك تاني.

<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<

سلام عليكم ياعم صابر

سلام ورحمة الله ياولدي

ربنا يديك العافية ياعم صابر مش ترتاح شوية من الشغل

ياولدي احنا اتعودنا عالشقا .... انما قلي مش الحاج محمد اللي كان معاك من شوية.

ايوه ياعم صابر ماهو يبقى جدي.

اهلا اهلا بالناس الطيبين .. امال مالك ياولدي كده شكلك حزين

اهو ياعم صابر الدنيا ملطشة معايا ومخنوق

ياولدي ده انت لسه صغير متقولش كده.

قلي ياعم صابر انت مرتاح كده ... اصلي انا عرفت اللي حصلك من جدي ومستغرب انك لسه بتضحك وبتشتغل وعايش عادي.

بص ياولدي انت انسان ربنا خلقك وكرمك في احسن صورة واداك عقل تفكر بيه

وايد تشتغل بيها ولسان تشكره وتحمده بيه.

خلقك عشان انت اللي تتحكم في الدنيا مش هيا اللي تتحكم فيك.

ده ربنا سماها دنيا يعني ادنى مقام وانت اعلى منها في المقام.

يبقى ازاي بقى تستنى انها تديك حاجة ؟؟!!!

عمرك هتطلب مساعدة من اللي عايز حد يساعده ؟؟؟!!

هيا كده الدنيا ياولدي عايزة اللي يساعدها عايزه اللي يديها مش اللي ياخد منها.

ياولدي خليك زي انا اتعلمت كل ماتاخد الدنيا مني اضحك واحمد ربنا واقول براحتك خدي كمان انا برده اللي كسبان

ههه انت اللي كسبان طيب ازاي.

ياولدي اي حاجة في الدنيا بتديهالنا بنتحاسب عليها في الاخرة ومين اللي هيحاسبك مش رئيسك ولا مديرك لا ده ملك الملوك ياولدي.

ياولدي احنا ضعاف مش قد حساب ولا قد ان احنا نشيل الامانة بتاعة ربنا

يافرحتي لما يبقى عندي فلوس واملاك وشهادات وشغل وكل حاجة خدتها من الدنيا واجي في الاخرة اتحاسب على كل ده وعمري ماهبقى صح لان كل بني ادم عاصي محدش معصوم.

ياولدي خليك صابر زي عمك صابر واحمد ربك على اللي انت فيه هيزيدك ويكرمك

وبص للدنيا من فوق وقلها اوعي تفتكري انك هتنتصري عليا ده ربنا سماكي دنيا يعني ادنى الدرجات و انا برده اعلى منك.

وخدي مني كل حاجة وانا اللي كسبان عشان كل ما هتاخدي مني اكتر هقرب لربنا اكتر.

و برده هفضل كسبان عشان هلاقيه عند ربي اضعاف.

( الله اكبر الله اكبر ...... الله اكبر الله اكبر)

شفت ياولدي اهو العصر اذن وقال الله اكبر وصدق على كلامي.

روح صلي ياولدي لربنا ده هو الكبير وهو الكريم

وخليك صابر زي عمك صابر عشان ربنا بيحب الصابرين.

[ABOTASNEEM 117]

اسلوبك أكثر من رائع

 

بجد وعرض جميل جدا والأجمل إنك عرضت المشكلة وكمان وضحت الحل معاها

 

ويارب ربنا يوفق البشمهندس ويكرمه بوظيفه مستقرة ومحترمة وحلال

 

يفتح بيها بيته .. ويخليه زوج صالح .. ويخلى مراته زوجة صالحة

 

ويجمع بينهما على خير .. ويرزقهما ذرية طيبة صالحة

 

ويكونوا بذلك جميعا .. نصراًً وعزاً وفخراً للإسلام والمسلمين فى كل مكان

 

ويستخدمهم ولا يستبدلهم ويؤثرهم ولا يؤثر عليه

 

وسلملى على المهندس وقوله

 

إنت مهندس وغصبن عن عين الكل مهندس

 

وربنا هيكرمك وتشتغل فى المجال اللى إنت عايز تشتغل فيه

 

وهتنجح وتتفوق وتتميز .. وساعتها تفتكر الإيام دى

 

وتفضل تضحك إنت وجدك وكل اصحابك اللى بيحبوك

 

وبيتمنولك الخير من كل قلوبهم .. وربنا يعلم

[NADA 34]

 

الحمـــــــد لله

 

,,,

 

احمد ربنا وخليك صابر زي العم صابر

 

و دايماً خلي أملك ف ربنا و أحسن الظن به

 

إن شاء الله هيعوضك خير و أكتر من اللى إنت كنت بترسمه وتخطط له

 

,,,,

 

و كلنا بندعيلك يا باش مهندس

 

ربنا يكرمك ويوفقك يارب ويصلح لك الحال و دايماً إنت أعلى إن شاء الله

 

 

 

[/size]

تم تعديل June 6, 2009 بواسطه NADA

[الرّام 173]

لا ياجد لو جات عليا انا مش مشكلة بستحمل. بس صعبان عليا الناس اللي تعبت عشاني صعبان عليا ابويا وامي اللي تعبوا عشان يشوفوا ابنهم مهندس صعبان عليا البنت اللي قدرها كان اني اتجوزها . صعبان عليا الناس اللي وثقت فيا وفي تحقيق حلمي وخذلتهم صعبان عليا التعب والحلم اللي بديته وانتهى في لحظة .

 

ما هو هي هذي اهّم حاجة تخلّي الواحد يخاف

 

يخاف انه ما يوصلش يرد الجميل او ما يوصلش يعمل الواجب متاعه رغم انه استوفى كل حقوقه و بالفائض زادا

 

 

ربي يستر "المهندس ابو الهندسة" و ربي يقدّره ان شاء الله

 

هو و كل الناس الي زيّه و كل الناس الي حاسّة نفس احساسه

 

 

و عندها نفس المشكلة

 

 

....

 

 

خويا الغالي ربي يفتح البيبان في وجهك و يخضّر الدنيا قدّامك

 

و ربي ينوّر دربك و يعطيك كل ما تتمنى

 

و ربي ان شاء الله يحققلك كل احلامك و طموحاتك

 

 

و ربي يعلّيك على من يعاديك

 

و يهنّيك

 

.. ان شاء الله ..

 

 

 

 

...

 

ربي كبييييييييييييييييييرررررررر

 

 

ربي كبير

 

 

 

....

 

 

الحمد لله و الشكر و الفضل لله

 

 

الحمد لله

 

الحمد لله

 

 

...

 

 

ربي يفرّحنا بيك و يفرّح اهلك بيك

 

ربي يسترها معاك دنيا و آخرة

 

 

 

[eng_alaa 114]

بسم الله الرجمن الرحيم

وَاصْبِرْ فَإِنّ اللّهَ لاَ يُضِيعُ أَجْرَ الْمُحْسِنِينَ

[سورة: هود - الأية: 115]

 

ربما تضيق الدنيا في وجهنا كثيراً لدرجة أن نظنها إنتهت ...

لكن سبحان الله تجدها فرجت مرة أخري إلي مالم نتوقع حدوثه أبداً ...

أيضاً هناك شيئ مهم جداً نغفله ... ألا وهو الدعاء .. المفتاح السحري لكل المشاكل التي نواجهها ..

دائماً إذا ما إستعصت علي كبيرة ولا صغيرة من هم الدنيا أدعو ...

ومهما شغلت بالك بالغد فالله عنده الأفضل .. كن واثقاً في ذلك بجد ....

فقل الحمد لله دائماً وإجعلها دائمة الذكر علي لسانك ...

وربنا يكرمك ...

[ali desoky 391]

يافرحتي لما يبقى عندي فلوس واملاك وشهادات وشغل وكل حاجة خدتها من الدنيا واجي في الاخرة اتحاسب على كل ده وعمري ماهبقى صح لان كل بني ادم عاصي محدش معصوم.

 

أعتقد والله أعلم ان الموضوع ده نال اعجاب جميع الاخوة المتخرجين من الجامعه

لان الموضوع تكرر وبيتكرر وهيتكرر مع ناس وشباب كتير

كلنا حلمنا نبقي حاجه كبيره

اللي مهندس واللي دكتور واللي ضابط شرطه

لكن لقينا نفسنا في مكان تاني او لقينا نفسنا ناس تانيين

اللي كان نفسه يبقي مهندس بقي مدرس

واللي كان نفسه يبقي دكتور بقي موظف

أما اللي كان نفسه يبقي ظابط أهو قاعد ع القهوه

 

فيه ناس فضلت تحلم وحلمها متحققش لغاية ما كبرت وعجزت

ولكنها لسه بتحلم ومش عايزه تصدق ان الحلم خلاص وقته فات

 

وفيه ناس حلمها اتحقق لكنها نسيت انه في يوم كان حلم

نسيت ان الحلم اللي اتحقق في يوم ممكن يبعد عننا في يوم

 

لكننا حلمنا ...... وبنحلم ............ وهنفضل نحلم

وغصب عن الدنيا واللي بتعمله فينا

عمرنا ما ننسي حلمنا

 

بقيت مهندس .... بقيت دكتور ..... او حتي ما بقيتش حاجه

هفضل احلم طول ما انا عايش

 

معذرة علي الاطاله

ولكن الموضوع ده

جه ع الجرح زي ما بيقولوا........ ا

[بنت مصرية 66]

اولا انا بس عايزة اول حاجة مهمة انا من اكبر قرائك يارجل من الصحراء

بيشدني اسلوبك وعرضك للمشكلة او الخاطرة التي تجول في عقلك

ودائما ما اقف عاجزة عن الرد واقول ساعو قريبا لارد ولكني في الحقية لا املك ماقول

ولكن اول مرة فعلا اشوفك موضوع وكالعادة انا مش بس قريته كويس ولاخر كلمة

الا اني اتاثرت بيه جدا جدا زي ماتكون بتحكيه قدامي او حاجة حصلالي

طبعا لازم ارد في الموضوع

 

 

المهم

بص فيه شعار حلو كدا من ضمن المباديء اللي عندي في حياتي

 

احنا بنتولد....بتحصل حجات في النص....بنموت

وده مريحني جدا جدا

زي ماعمك صابر قلك دي دنيا يعني ادني الدرجات

ربنا خلقنا في دنيتنا دي علشان نعمر الكون ونعبده

طيب

ربنا سبحانه وتعالي خلقنا واتولدنا ادي اول مرحلة

 

بعد كدا ادنا الدنيا نعيش فيها وكدا فيه حجات بتحصل ادي تاني مرحلة

 

بعد كدا بنموت وادي تالت مرحلة بس مش النهاية

 

الحاجات اللي بتحصلما في حيتنا كتير فرح وحزن انجاز وفشل

سبحان الله ده من حكمة ربنا في الحياة وبني البشر

القرآن مليان ايات عن الصبر والجزاء

برضوا تاني حاجة قصاد حاجة

ومن كتر حب بنا للعبد

دايما يبليه

واحد ممكن يبص علي حياة عم صابر ده من بره

ويقول ياحرام الراجل ده مانجزش ولاحاجة في حياته وهيموت وحده

بس الحكاية مش كدا خالص

انت ممكن تكون فعلا تعبت في دراستك واتخصصت في حاجة ممتازة بس لقيت نفسك في مصر

مرحبا بك في الواقع

 

اختي علي سبيل المثال

كان نفسها تدخل كلية زراعة من وهي في ثانوي

طبعا كتير من الناس ماقدموش اي دعم ليها واللي يسمع انها دخلت الكلية دي

يحس انها بتدرس حاجة غلط او ملهاش لازمة

مع ان الكلية دي كنز من كنوز التعليم

وهي بعد تخرجها هتبقي مهندسة زراعية

بس للاسف الناس دايما بتبص للامور بسطحية

انا بصراحة خفت علي اختي ودعمتها في الموضوع وهي كانت مقتنعة بنفسها جدا

هي لسه بتدرس والطريق قدمها صعب وماحدش عارف المستبل فيه ايه

بس المهم هي عارفة عايزة ايه ومالهاش دعوة

مرة تاني مش هي دي الحقيقة

انت برضوا سعيت ولقيت الرفض

ليه بصيت للأمر انوا شيء تعبت فيه وراح

ربنا دايما بيلينا علشن يشوف قوة تحملنا

بيطنا في مواقف بنتصرف فيها تصرف ممكن يغير حياتنا لانه هو اللي عارف ماهو الافضل لنا

يعني لازم يكون عندك مرونة

مش مشكلة النهاردة فوق بكره تحت

كدا ولا كدا ليها حل

لحد ماتوصل لهدفك وحلمك في تحقيق شركتك

بس لازم في رحلتك دي يكون معاك زاد

مهما حصل اوعي تفقد الثقة بالله خليك واثق ان ربنا معاك بس هو دايما عايز يشوف عبده ده فعلا واثق فيه

مهما حصل ماتنساش الاستغفار والدعاء واسعي وكون مرن ولا تنسي انك شاب مسلم

سورة يوسف

من اكتر سور القراءن محبة وقربا الي قلبي

مافيش مرة اقرا السورة دي من غير مابكي بكاء شديد

سيدنا يوسف ربنا اعطاه نعم كتير وكمان بلاه بلاء شديد

ومع ذلك صبر

كل اما احس اني ممكن احيد عن الطريق اقرا السورة دي

ودي نصيحة ليك

دور علي الشاحن الديني بتاعك بتاعك

 

واحط نفسك بالناس المتفائلين والمؤمنين بالله

وانت في سعيك اعمل وعمر واعبد ماهو ده المطلوب منك

كلمة اخيرة

ات شكلك ممكن يعن بعدت شوية صغيرة عن ربنا فوحشته قام بلاك لانه عايز يسمع دعاك ويسمع حمدك

وخلي بالك كمان ان اهم سلاح ان تشكر الله في السراء والضراء

شوف صبر سيدنا ابراهيم

وسيدنا يونس

وانيئنا كلهم وشوف وصلهم لفين

 

 

يارب تكون افكاري اتفهمت اصل موضوعك جميل جدا ومس حجات كتير مهمة واثر فيا

فمعلش ممكن الافكار تكون ملخبطة شوية

واسفة علي الاطالة يارب اكون قدرت اقول اي حاجة مفيدة

ربنا يفرج همك ولاتياس ان الله لايبتليك الا لانه يحبك ولا ياخذ منك الا ليعطيك

بس المهم تكون انت قدها

 

شكرا كتير رجل من الصحراء ربنا يتمملك بخير

[مصطفى بهجت 2]

قلمي ينحني إليك تقديرا و احتراما ..

 

لا تستعجب صديقي على هذا الجميلة .. !!!

يعلم الله .. أنني شعرت وحسيت بكل كلمة إنت كتبتها ..

وتخيلتك قاعد قدامي دلوقتي بتحكيلي الكلام ده بالحرف الواحد ..

أنا معاك في الكلام ده ومقدر ظروفك و حاطط نفسي مكانك ..

ولعلمك بقى إنت باشمهندس ونص .. غصب عن الكل ..

ارمي حمولك على الله .. صحيح إن الدنيا كلها دلوقتي بقيت حاجة تخنق ..

لكن حنعمل إيه ؟؟؟

لازم نرضى بالامر الواقع و تتحل من عنده ..

خلي عم صابر قدام عينيك وخليه قدوة وغيره وغيره كتييير ..

عندي كلام كتييييييير عاوز أقولهولك ..

لكن محتاج مقابلة !!!!!

ياااااارب أشوفك في أحسن حال ..

وبإذن الله حنباركلك على الوظيفة الجميلة قبل الزواج بمشيئة الله تعالى ..

[YouTh~TiGeR 4]

يااااااااااااه

لعلمك أنا كنت فالأول زعلان جدا على اللى حصل لك

وبعد ما قريت اللى قاله عم صابر

حسيت إنها فعلا دنيا وأدنى من أنك تزعل عليها

 

وفكرتنى بنشيد مشارى راشد:

"أرى الدنيا لمن هى فى يديه عذابا كلما كثرت لديـــه

تهين المكرمــــــــيـــن لها بثغر وتكرم كل من هانت عليه

إذا أستغنيت عن شئ فدعه وخذ ما أنت محتاج إيه"

 

 

وأصبر أخى وحبيبى فى الله

وصابر

وأعلم أن الله يجعل لك الخير فى خطاك وإن كانت تتخللها السقطات"

صراحة الموضوع أذهلنى

وهناك دعاء يقول

اللهم لا تجعلنا فقراء بعد أن أغنيتنا

 

 

الدعاء ده معناه خطير جدا

 

ربنا يوفقك ويسدد خطاك

يا رب

 

حبيبك نمر الشباب

[orgowan 0]

كل ما يسعنى قوله هو

 

لو لم تكن الحياه صعبه لما خرجنا من بطون امهاتنا نبكى

 

 

 

 

ارجوان

[AMR DAWAM 7]

حبيبى رجل من الصحراء

 

والله موضوعك أثر بداخلى جداااا

 

 

ربنا يوفقك يارب ويسعدك

************************

[رجل من الصحراء 36]

اكرمكم الله جميعا اعزائي والله وحشتوني جميعا

والحمدلله اقدر اليوم ارد عالموضوع ده لان ربنا كرمني من وسع واشتغلت في اكبر شركة تعدين والحمدلله

جزاكم الله خيرا وبارك فيكم وحفظكم من كل سوء

[دعوه للجنه 457]

المش مهندس وصل

بص ياولدي انت انسان ربنا خلقك وكرمك في احسن صورة واداك عقل تفكر بيه

وايد تشتغل بيها ولسان تشكره وتحمده بيه.

خلقك عشان انت اللي تتحكم في الدنيا مش هيا اللي تتحكم فيك.

ده ربنا سماها دنيا يعني ادنى مقام وانت اعلى منها في المقام.

يبقى ازاي بقى تستنى انها تديك حاجة ؟؟!!!

عمرك هتطلب مساعدة من اللي عايز حد يساعده ؟؟؟!!

هيا كده الدنيا ياولدي عايزة اللي يساعدها عايزه اللي يديها مش اللي ياخد منها.

اولدي خليك زي انا اتعلمت كل ماتاخد الدنيا مني اضحك واحمد ربنا واقول براحتك خدي كمان انا برده اللي كسبان

ههه انت اللي كسبان طيب ازاي.

ياولدي اي حاجة في الدنيا بتديهالنا بنتحاسب عليها في الاخرة ومين اللي هيحاسبك مش رئيسك ولا مديرك لا ده ملك الملوك ياولدي.

ياولدي احنا ضعاف مش قد حساب ولا قد ان احنا نشيل الامانة بتاعة ربنا

يافرحتي لما يبقى عندي فلوس واملاك وشهادات وشغل وكل حاجة خدتها من الدنيا واجي في الاخرة اتحاسب على كل ده وعمري ماهبقى صح لان كل بني ادم عاصي محدش معصوم.

ياولدي خليك صابر زي عمك صابر واحمد ربك على اللي انت فيه هيزيدك ويكرمك

وبص للدنيا من فوق وقلها اوعي تفتكري انك هتنتصري عليا ده ربنا سماكي دنيا يعني ادنى الدرجات و انا برده اعلى منك.

وخدي مني كل حاجة وانا اللي كسبان عشان كل ما هتاخدي مني اكتر هقرب لربنا اكتر.

و برده هفضل كسبان عشان هلاقيه عند ربي اضعاف.

خليك صابر زي عمك صابر عشان ربنا بيحب الصابرين.

 

 

سلمت يمنـــــــــــــــــــــــــــــــاك

ربنا يزيدك

أسلوب قمة فى الروعة

أنا من البداية كدا لقيت العقدة وحستها فعلا فى العنوان

وأسلوب حضرتك بقى فى حلها مدهش

ماااااااااااااشاء الله عليك

ربنا يكرمك من فضله

ويرزقك بالرزق الطيب الحلال

ويعوضك عن كل اللى فاتك بجنة عرضها السماوات والارض

والله الكلمات حستها حدا جويا وكنت محتاجة ليها كتير

جزاك الله خيرا أخويا الكريم

 

تم تعديل December 15, 2009 بواسطه دفءُ الأٌنْــــــــسِ

[ZaIeD 0]

ياااااااااااااااااااه...

موضوع أكتر من رائع والله...

وجالي ع الجرح.. مش ع الجرح أوي يعني.. جنبه كدة

لان أنا حالتي دلوقتي زي الباشمهندس والدنيا مضلمة معايا حبتين اليومين دول..

وكنت محتاج فعلاً لواحد زي عم صابر

جزاك الله كل خير على الموضوع

[رجل من الصحراء 36]

شرفتم الموضوع

وربنا يبارك فيكم ويكرمكم

تحيتي وتقديري

[Mego 0]

موضوع أكثر من رائع

وألف مليون مبروك على الشغل الجديد

اللهم إجعلنا من الصابرين

[رجل من الصحراء 36]

الله يبارك فيك

شرفت الموضوع

تحيتي يوتقديري

[nabih 0]

,

[رجل من الصحراء 36]

شرفت

[نونا19 28]

الموضوع جميل جدا واسلوب الكتابة كان اكثر من رائع

[رجل من الصحراء 36]

شكرا اختي الفاضلة

جزيتي خيرا كثيرا

[ايمانى بربى 6]

مبروك الشغل الجديد

ربنا يوفقك