اذهب الي المحتوي
منتديات ياللا يا شباب
بحر

رنات لوجوهات مين يقولى هات

Recommended Posts

رنات لوجوهات.. مين يقول هات؟!

awel_01.jpg

إعلان في التليفزيون

صوت بنت سعيدة دون أن يظهر سبب واضح لذلك:

ودلوقتي تقدر تنزّل أحلى وأجدد الرنات واللوجوهات والألعاب الشقية المجنونة المعفرتة.. اتصل الآن بـ...........

****

إعلان تاني في التليفزيون برضه!

زهقان ومش لاقي حاجة تعملها.. روّش مع أصحابك واعمل معاهم أجمد الحركات الشقية المعفرتة بتليفونك المحمول.. اتصل الآن بـ"..........".. وابعت لهم رسائل بصوت المعزة اللي عندها مغص والأسد اللي ماكلش من 3 أيام والفرخة اللي جت لها أنفلونزا الطيور... روّش معانا!

****

awel_02.jpg

مجموعة شباب يجلسون في مقهى أو كافيه

"أحمد" يقول لصديقه "أيمن" وهو يضحك بشدة:

اسكت أما عملت امبارح حتة مقلب في الواد "أنور" إنما إيه؟

 

"أيمن" متلهفا:

إيه إيه.. هه.. قول لي والنبي قول لي.. أصل بادوّر على مقلب أعمله في "تامر" ومش لاقي.

 

"أحمد" وهو لايزال يقهقه -تقريبا فيه حد بيزغزغه-:

أصلي.. هأهأ.. بعت له رسالة.. هع هع.. بصوت.. هوهو.. اللمبي وهو بيقول له.. كركر كركر.. مش قادر بصراحة.. "فين ياض العشرة جنيه اللي عليك".. الجميل بقى إنه ساعتها كان قاعد مع "بسنت" وعازمها على العشاء.. البنت لما سمعت الرسالة.. هيع هيع!.. قامت تجري.. خافت ليدفعها تمن العشا.. هق هق هق!.. مش ممكن مش قادر أمسك نفسي من الضحك..

 

"أيمن" مقهقها بدوره:

هع هع هع.. مش ممكن فعلا.. بالمناسبة.. هئ هئ هئ.. مش هتجيب العشرة جنيه اللي عليك؟!

****

 

حتى لو كنت عملي جدا في استخدامك للتليفون المحمول..

يعني مقضيها مكالمات على قد الشغل والدراسة والأشياء الضرورية المهمة.. يمكن في يوم من الأيام اتأثرت بسيل هجمات الإعلانات المنظمة اللي بتطاردك في كل مكان وبتحسسك بإن لو رنتك ماكانتش أغنية "عمرو دياب" الجديدة وإن لو موبايلك مافيهوش خدمة الرسائل الصوتية والمرئية والملوخية يبقى إنت راجل خارج حركة التاريخ.. ومش ناقص غير إنك تلبس جلد النمر وتمسك عصايا خشب وتشوف "شيتا" مستخبية فين عشان تبقى "طرزان" في الأدغال رسمي!

 

awel_04.jpg

 

ويمكن لو ضعفت إنت يوم..

وجربت تستخدم نغمة شقية أو لعبة جديدة مثيرة قوية أو لوجو لممثلة حلوة وشها في الحيط وقفاها ليك ولي!، فتعمل ده مرة.. مرتين.. تلاتة بالكتير.. بعد كده هتحس بإنك كده زودتها قوي وإنك بقيت زيك زي الشباب الفانكي التاني اللي حياته كلها متوقفة على الموبايل ونغماته ولوجوهاته وميسداته.. واللي ياما كتير انتقدت حياتهم دي..

لكن لو بطلت إنت تعمل ده.. غيرك مش هيبطل سيادتك..

خاصة بعد أن تحولت الرنات والرينج تون واللوجوهات والميسدات في مصر إلى "تجارة" حقيقية.. بيزنس كامل فيه ناس بتحط فيه فلوس بالهبل ومنتظرة الفلوس دي ترجع لها والهبل ده مضاعف اتنين وتلاتة وعشرة عشان كده مافيش مشاكل عندهم إنهم يصرفوا فلوس كتير قوي على الحملات الإعلانية طالما هتجيب فلوس في الآخر..

 

وأكبر دليل على ذلك الدراسة التي نشرها المركز القومي لتنظيم الاتصالات والتي كشفت عن أن المصريين ينفقون على المحمول 3 مليارات جنيه سنويا منها 186 مليون جنيه سنويا برضه على الرنات واللوجوهات والنغمات وصوت "اللمبي" وهو بيطالب "أنور" بالعشرة جنيه اللي عليه!

 

وإذا كان الرقم ده لا يمثل سوى 6% تقريبا من إجمالي فلوس المصريين اللي بيصرفوها على الموبايل فإن المبلغ لوحده كده "186 مليون" مش قليل بأي حال من الأحوال.. لأن معناه إن المصريين بيصرفوا في اليوم الواحد نص مليون جنيه على الرنات واللوجوهات مين يقول هات!

وده شيء مفزع..

لأن 186 مليون يعني 186 وقدامهم ستة أصفار.. ده رقم يبني مستشفيات ومدارس ومصانع وكباري وبيوت.. رقم يصنع حياة حقيقية لو تم إنفاقه في الاتجاه الصحيح مش في الاتجاه المعاكس...

 

وإذا كان المثل الشعبي الأصيل بيقول "اللي معاه قرش محيره يجيب حمام ويطيره" فاحنا هنا مالناش دعوة باللي معاهم فلوس وبيطيروا الحمام أو بيقضوها رنات ولوجوهات..

اللي يهمنا بقى..

 

اللي مش معاهم قرش محيرهم واللي مش لاقيين حمام عشان يطيروه أو ياكلوه حتى!

الناس العادية اللي زي أغلب المصريين واللي فيهم ممكن مايتغداش يوم ولا اتنين عشان يشتري كارت موبايل بعشرين جنيه..

دول برضه مقضيينها رنات ولوجوهات.. طيب ليه؟!

awel_03.jpg

تفتكر السبب في ده إيه؟

وازاي نقدر نقاوم السفه -أيوه اسمه سفه- ده؟

هتكتب لنا ولا هتقضيها ميسدات؟!

شارك هذه المشاركه


رابط المشاركه
شار ك علي موقع اخر

موضوع مؤسف جدا بجد يا بحر

بس ده بسبب التخلف والتفاهه اللى احنا عايشين فيها

بشكرك كتير عالموضوع

شارك هذه المشاركه


رابط المشاركه
شار ك علي موقع اخر

Join the conversation

You can post now and register later. If you have an account, sign in now to post with your account.

زائر
اضف رد علي هذا الموضوع....

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.


×
×
  • اضف...

Important Information

By using this site, you agree to our Terms of Use, اتفاقيه الخصوصيه, قوانين الموقع, We have placed cookies on your device to help make this website better. You can adjust your cookie settings, otherwise we'll assume you're okay to continue..