تخاريف

[الجندى المجهول]

تخاريف

حلمت ف يوم

بنور الشمس بيكسَّر

ظلام الليل /

صفوف عسكر

وبتحارب فى حزن الليل

وحزن الليل بيتوجَّع

فيتفتت ويتكسَّر

وبيودَّع ... قلوب الناس

قلوب ملِّت سواد اللون

ونبض حزين بدون إحساس

يموت الحزن يتبخَّر

ونور دافىْ بيملى الكون

ما بين الموج بيتمختر

فى نفس الحلم ...

لاقيت كل الحدود تنهار

قلوب تصرخ بكلمة لأ

يموت الظلم والظالم

نعيش أحرار

قلوب تعشق معانى الحق

وتُبدُر أرضها أحلام

وتستنَّى سحابة فرْح

سحابة حب بتمطَّر

فتروى الأرض بالبسمة

وتبقى حياتنا هى الطرْح

يموت الظلم يتبخَّر

ونور دافىْ يداوى الجرح

ما بين الموج بيتمختر

وفجأة الحلم ما بيكمل

دموع العين تصحينى

أقوم من النوم وأتحسَّر

فأسمع صوت فِ تكوينى

يواسينى

عجيب حلمك ما يتفسَّر

بتبنى النور من الأوهام

بتروى الحلم بالأوهام

وتستنَّى ...

شجر يطرح فِ وقت خريف

ولو دققنا فى المعنى

نلاقى الحلم دا تخريف

فـَ ليه تحلم وتتمنَّى ...!!

عُرُوق الحزن يا خِلِّى

دى ممدودة لسابع جِد

جدور الظلم منحوته

فى قلب الأرض

دَ شىء مكتوب ومتقَّدر

بقولك إيه ... كفانا كلام

بلاش تحلم وتتمنَّى

وإيه نابك من الأحلام ؟

[«۞۩ أبو سليمان ۩۞»]

كنت عايز اقتبس منها بس لقيتني بقتبسها كلها

 

جميلة جدا القصيدة دي

 

شكرا يا جندي الشعر و الادب

[الجندى المجهول]

ربنا يكرمك حبيبى د\عبقرينو

[الرّام]

رائعة

 

 

يعطيك الصحة و الهناء ان شاء الله

[Blue_Flower]

ما شاء الله

أرووووووووووع من رائعة

وكفرتها جميلة جدا

كفايا أحلام وكفاية كلام

على رأى مصطفى محمود مغنى دينى :

محدش يحكى عن احلام ولا يرفع شعار اوهام لحد ما تثبت الايام ان احنا هنتغير

بجد القصيدة جميلة جدا

جزاك الله خيرا

[الجندى المجهول]

جزيتم خيرا

[El-Saher Fantasy]

بلاش تحلم وتتمنَّى

وإيه نابك من الأحلام ؟

 

يكفي انه حلم

احسن من كتير بيعيشوا من غير حلم

بطل تخاريف بقى

 

جزيت خيرا