صعيدى فى الواى بلاتيشن

[الجندى المجهول 37]

 

 

صعيدى فى الواى بلاتيشن

 

الواد عبده حلولو سيكا

ابن سنية العمشه جارتنا

سلفة الاسطى حماده أميه

غاوى سياسه وهو أساسا

مالهوش عازه

والغبا جوه حبابى عنيه

جاى بيجولى

 

جولى يا عمى وحزر فزر

واى بلاتيشن تطلع ايه ؟

جلت له يا ابنى ما عرفش غير الدكتيشن

واى بلاتيشين

دى بتتاكل

ولا دى شربه لوجع الركبه ولا دى ايه ؟

جالى يا بويا دى اتفاجيه

واللى ماضوها اخوانا البعدا ولاد الايه

جلت له بس خلاص مفهومه وما تكملش

لا تجول فين ولا مين ولا ليه

المقصود يا ابن المسطوله

بيجى الحال على ما هو عليه

والمتضرر يخبط راسه فى اتخن حيطه

ويبجى ساعتها الحج عليه

واى بلاتيشن ؟

يا نهار أسود

هيه الخلق جرالهم إيه

حوسه لتبجى دى فيها نصيبه

لزمن نعرف إيه اللى وراها

ومعناته ايه

الواى طبعا ودى مفهومه ومعناها ليه

يبجى العجدة فى البلاتيشن

ودى معناها ما هوش مفهوم

بس حجيبها

لو حنجول

ان البلانتيشن م الكبونيشن

والكبونيشن يعنى سافون

شفت يا ولد ما هيش تخاريف

يعنى خلاص مافهاش تصريف

من تصرفها حناخذ ايه

احنا نجول والخلق تفكر

وده حيحذر وده يستفسر وده حيفزر

يفضلوا كده على الحال ده سنين

واحنا نخطط سوا وندبر

كيف حنحلص ع الباجيين

يعنى المعنى فى واى بلاتيشين

بجى متفسر

لساك يا واد بتحذر

يعنى كوشن يا ابن الهبله

ما هواش أنسر

واى بلاتيشن واى بلاتيشن

وحياة رحمة أبويا عويضه

ما عارف ليه

واى واى واى يا كلينتون يا ابن الايه

يا بتاع مونيكا يا كافى أوليه

تعمل كده فى الخلق دى ليه

المحجوج تجوله عفارم

والمظلوم تجيب الحج يا بويا عليه

اياك فاكر نفسك جاضى

جاضى وخايب

حتربجها عليك وعليه

بس أمانه وكلمة حج

عمر الحج ما كانش عليه

المحجوج الخوف والخسه

لما ركعنا نبوس كفيه

واللى نجوله نعيده نزيده

واللى نزيده نحط عليه

نعمل مارش ف شبر وربع

وندى تمام لولاد الايه

وده كليته علشان ايه ؟

متر ف متر يا عالم خردة

وابجى جابلنى لو يتحصلوا حتى عليه

واى بلاتشين واى يا أخوانا

يعنى كوشن وافهموا ليه

جولى يا فالح

منك ليها له ليه

ف الفزوره دى نعمل ايه

واى بلاتشين ؟

واى بلاتشين

وحياة أمى ما عارف ليه