اذهب الي المحتوي
منتديات ياللا يا شباب
سحر العيون

يوميات صعيدى فى الجامعه

Recommended Posts

الحلقة ((1))

 

 

 

 

احمد: لو سمحتي حضرتك...ممكن براية

نور: ههههههههههههههههههههههههههه

احمد :حضرتك بتضحكي على ايه ممكن اعرف يعني لو سمحتي

نور : مش عيب شاب في سنك يطلب براية ..ده احنا في جامعة

احمد : طيب معاكي شفرة...عشان المحاضرة هتبدأ خلاص

نور : ايييييه..ايه شفرة دي..ممكن تسكت لو سمحت

احمد : حد معاااااااه براااااااااية....او قلم زيااااااادة..ردوا

نور: انت اكيد مجنون وطي صوتك الطلبة كلها بتضحك عليك

احمد :ويضحكوا ليه ولاد الدزمة دووووووووول

نور: خلاص خلاص انا هنقل المحاضرة وبعدين اديلك تصورها

احمد :شكرا بس انقلي كويس ..وياريت تنظمي الكراسة

 

(اثناء ما المحاضرة شغالة ونور شغالة كتابة واحمد هيموت عشان مش معاه قلم)

 

احمد: يا انسة خطك زفت زفت..انتي مش مسطرة الصفحة ليه ...وفين التاريخ الهجري .يادي النيلة عليا وعلى الجامعة

نور : انت مالك ومال خطي مش كفاية هديلك تنقل مني وهتعطل انا

احمد : ليه وانتي عربية اصلك علشان تتعلطي..هما البنات متعطلين خلجة

نور : انت انسان قليل الادب...بجد مش بتعرف تكلم البنات ازاي

احمد : لأ يا شيخة والنبي المرة الجاية تبقي تجيبيلي الكتالوج بتاعك

 

(نور عشان رقيقة سكتت ومش عرفت ترد على بجاحة احمد وانتهت المحاضرة )

 

اثناء خروج الطلبة من المدرج...احمد حب يستظرف بس بطريقة غبية شوية

احمد وسط حشد من الطلبة بنات وولاد

وكأنهم قطيع من المواشي

هررررررررررررررررررر...وضحكته سمعت كل اللي ماشي

 

(نور بتحكي مع زميلتها من كلية تانية على احمد )

 

نور : بصي يا هالة الولد ده....فضيحة فضيحة يعني...وحكتلها على اللي حصل

هالة : تلاقيه شاب تحفة...مش باين عليه استايل خالص..ده لابس بدلة وكرافت

نور : بس تعرفي شكله وسيم اووووي...حاسة انه طيب وعلى سجيته

هالة :اوووو...ده وسيم؟...ده مش حاطط نقطة جيل على شعره حتى..شعره منعكش جدا

نور:يا ستي سيبك

هالة: على رأيك

 

خلص اول يوم في الجامعة وقبل النهاية بدقايق

 

احمد: يا استاذة يا انسة فين المحاضرة عايز انقلها هاتيها يلا يلا بسرعة

نور : تنقل ايه يابني دي عشر ورقات غير في رسومات وجداول

احمد :ومالهم يعني عشر ورجات انتي هتخلفي وعدك ولا ايه

نور : انا مقلتش كده بس في حاجة اسمها تصوير..اسرع يعني

احمد: هههههههههههههههههه اصور ايه بخطك الزفت ده..شوفي ...زفت

نور: حقيقي انا غلطانة وكلام هالة باين عليه صح...بعد اذنك..اوف

 

سابته ومشيت .....وقال

 

احمد: عليكي يا شيخة وعلى هالة وعلى الجامعة كلتها....وبرضه خطك زي الزفت

 

 

انتظروا الحلقة القادمة

 

نداء الى كل الصعايده محدش يزعل انا عن نفسى والدتى من الصعيد

شارك هذه المشاركه


رابط المشاركه
شار ك علي موقع اخر

لو لم اكن صعيديا ... لوددت ان اكون صعيديا

 

هذه هى الصورة التى يرسمها الناس عن الصعايدة

 

ولكن والله انى لافخر انى من الصعيد ومن قنا على وجه التحديد ..

 

وبالرغم من كل ما يقال عنه .. وان كان غير حقيقي ولا يمت للواقع بصلة

 

وليس فى هذا اى تقليل من قدر الاخرين

شارك هذه المشاركه


رابط المشاركه
شار ك علي موقع اخر

ايه يا ابو تسنيم انت زعلت ولاايه

دا مجرد هزار

وبعدين انا قلت ان انا ولدتى من الصعيد

والصعايده احسن ناس والله انا دراستى كلها كانت فى الصعيد

متزعلللللللش

شكرا على مرورك

شارك هذه المشاركه


رابط المشاركه
شار ك علي موقع اخر

على فكرة مش هزعل منك لمجرد موضوع زى كده

 

بس انا والله بجد بفخر جدا انى اكون صعيدى

 

وبحب اقول كده فى اى مكان

 

يعنى مش زعل زى ما انتى افتكرتى

 

ويكمكن انتى بنفسك تتكلمى عن الصعايدة احسن منى

 

وخصوصا انك بتقولى انو دراستك كانت فى الصعيد

 

يعنى اتعاملتى معاهم وعرفتى طباعهم وعاداتهم وتقاليدهم

 

وبلاش بقى نطلع من الموضوع بتاعنا

 

وعايزين نعرف الحلقة التانية من يوميات جعيدى اللى دخل الجامعة ده

شارك هذه المشاركه


رابط المشاركه
شار ك علي موقع اخر

الحلقة ((2))

 

 

 

 

وجه اليوم التاني....ولسة الحياة الجامعية لم تؤثر على تلاميذ الثانوية العامة...بس مع بلدياتنا احمد ...ماشية عكس خالص...مش عارف يتأقلم عليها

وتعالوا نشوف الايام والحياة الجامعية هتعمل ايه في احمد وهيتعامل معاها ازاي

كان ميعاد المحاضرة الساعة 8 صباحا...كان احمد واقف قصاد المدرج من 6 الصبح مش عارف ليه ونبتدي الحلقة التانية يا جامدين

 

 

احمد: ديب ديب ديب انتوا يا ناس يللي هنا...افتحوا الباب

الساعي : يا فتاح يا عليم يا رزاق يا كريم

احمد: ماترش ميا يا راجل قصاد المدرج عشان تستفتح

الساعي:يا كابتن المحاضرة لسة الساعة 8 مفيش دخول دلوقت

احمد:هدخل يعني هدخل..عليا النعمة هدخل هاااا

الساعي: قفل الباب في وشه ودخل جوا

احمد : يا ابن الدزمة انت هتضيع عليا المحاضرة شكلك

احمد: اما اروح اجيب كوباية شاي سخن مولع

الراجل: تؤمر بأيه يا فندم

احمد : شاي خمسينة بنعناع

الراجل: ايه ايه...مفيش نعناع

احمد: ومفيش نعناع ليه

الراجل : هو كده مفيش نعناع على الشاي ..النعناع لوحده

احمد :طيب هات نص كوباية شاي ونص كوباية نعناع

الراجل: خد فلوسك اهي

احمد:طب والشاي ابو نعناع فين

الراجل:اوووف

احمد:اوووف على دماغك...ابن دزمة صحيح

 

 

كان فات حوالي ساعة ونص وهو واقف في الكافتيريا عشان يشرب شاي

قرر انه يرجع للمدرج عشان يلحق مكان وبالفعل حجز مكان وخرج تاني عشان

يجيب شاي من كافتيريا تانية...ونجح انه يجيب المرة دي ..دخل المدرج وفجأة

لقى مين اعد مكانه ...مين مين مين....لقى نور فارشة كل حاجتها وبتشرب كابتشينووووووووووووووووو

 

احمد : بصوت لا يطاق....ايييييييييه ده يا هانم...هي وكالة من غير بواب

نور :وطي صوتك من فضلك انا بتكلم بهدوء وبأدب

احمد:هي دي طريجتي..عاجبك ولا مش

نور:طيب انا مش هقوم

احمد: هروح للعميد يجي يقومك

نور:ههههههههههههههههههه

احمد:بتضحكي على ايه يا باردة

نور: لم نفسك

احمد: شايفاني مبعتر في الارض ولا اييييييييه

نور: مش هتحضر...هههههههههههههه

احمد :عليا الطلاج لأحضر غصب عنك وعن عين الدك....

 

 

وفجأة سمع صوت الدكتور بيناديله

 

 

ياترى ايه اللى هايحصل المرة الجاية؟؟؟

 

 

مع تحياتى

واشوفكم الحلقة الجاية

ان شاء الله

شارك هذه المشاركه


رابط المشاركه
شار ك علي موقع اخر

بصراحة يا سحر العيون الواد اللي اسمه احمد ما افتكرش انه صعيدي اطلاقا ..........

 

ده حاجة صعبة قوي ... مش طبيعي ... بس ظريف .... تسلم ايديكِ ....

شارك هذه المشاركه


رابط المشاركه
شار ك علي موقع اخر

مرسيى ياقمر على مرورك

ههههه

هو انتو لسه شوفتو حاجه من احمممممممممد

دا لسه بدررررررى

شارك هذه المشاركه


رابط المشاركه
شار ك علي موقع اخر

ههههههههههههههههههههههههههههههههههههههههه

 

لأ ومنقيه الإسم :cry: .. انا لو بحضر كنت ضفتلك يومياتى فى الجامعه .. ومتهيألى كانت هتكون اظرف من كده كمان :cry: اصلى صعيدى صميييييييييييييم

 

خطييييييييييييييييييييييييييييييييييييييييييييييييييييييييييييييييييير يا سحر العيون (من الناحيه الفكاهيه) .. بجد رائع

 

ضحكتينى جداً أضحك الله سنك .. ولونى احمد برضه .. بس ذوق عن كده شويه :cry:

 

لو لم اكن صعيديا ... لوددت ان اكون صعيديا

 

بجد وده كمان شعارى .. انا الحمد لله فخور جداً انى صعيدى ويمكن ملاحظين انى من اول يوم للمنتدى مكتوب تحت اسمى :

البلد: مصر _ قنــــــا _ مدينة الألومنيوم

وعلى فكره انا قاصد ده ..

 

وكمان الحمد لله كل اللى عرفنى (ودول ميتعدوش) من بحرى .. او جه الجامعه عندنا وشاف الصعايده .. ممشيش الا لما اقسم انه ما قابلش حد احسن مننا فى حياته

 

الصعيد ذوق واخلاق ورجوله .. وكتييييييييييييييير

 

ده مش كلامى .. ده كلام اى حد عاش فى الصعيد ولو لفترة الدراسه .. وعلى فكره اقرب اصدقائى بحراويه ..

 

والحمد لله اصدقائى من اسكندريه للسويس لاسوان بيموتوا فى الصعيد .. فقط لأنهم شافوا اهله على الواقع مش زى ما الاعلام وغيره مشبههم

 

......................................................................

 

لكن بجد مش عاوزين نكبر الموضوع انا بس ذكرت اللى فات ده لأن جت سيرته .. لكن ماعلينا من النكت او غيره مجرد نكت ملهاش اى اساس من الصحه

 

وفى نموذج بسيط فى المنتدى هنا لشباب ناجح جداً جداً (وصعايده) ..

 

لو عاوزين أكشف التقاب عن الصعايده اللى فى المنتدى .. اخليهم يرفعوا البندقه :cry:

 

ما علينا من كل ده .. وعاوزين باقى يوميات صعيدى فى الجامعه

 

علشان هنبعتها للجروب ..

 

واسمحيلى اختى سحر العيون نقل الموضوع لمجلة زغازيغ .. لأنه جامد بجد ..

 

ننتظر البقيه

شارك هذه المشاركه


رابط المشاركه
شار ك علي موقع اخر

اوك شكرا ليك ولكلامك الجميل وبجد انا عشت فى الصعيد فتره دراستى كلها بجد نا جدعه جداااا

رجاله بمعنى الكلمه

شارك هذه المشاركه


رابط المشاركه
شار ك علي موقع اخر

الحلقة ((3))

 

 

 

 

وقف الدكتور بكل ثقة...وبص على الطلبة كلهم

من بين كل الطلبة وقعت عينه على احمد وهو مكشر

الدكتور:مالك يابني مكشر من اول السنة ليه كده

احمد :لو سمحت معاك نمرة ماحمول العميد

الدكتور : ههههههههههه ايوة ليه

احمد : عاوز اقدم شكوى في البت دي

نور :متقولش بت

احمد :هجول بت وستين بت كمان قومي يلا

الدكتور : بس بقى اخرس شوية يا اما هطردك

احمد : انا ...تطردني ليييييييه هاتلي مكان سعادتك

الدكتور : تعالى اعد جنبي هنا على الكرسي ده

احمد : وااه...اجعد جنبك مرة واحدة يا داكتووور

الدكتور :ايوة تعالى

 

وهو نازل راح وقع الكتاب بتاع نور ورمى اقلامها

راحت نور ضربته على ضهره..قال ااااااااااااه

وصوته سمع المدرج كله والكل فضل يضحك عليه

 

 

الدكتور : اطلع برا يلا...مش هتخضر المحاضرة

احمد : ابوس ايدك يا بيه انا امبارح مكتبتش والنهاردة محضرش...مين يرضى بكده يا ناس

وهو خارج رمى عينه على نور ولمح فيها نظرة عطف جميلة

 

بعد ما المحاضرة انتهت...نور خرجت لأ حمد

 

نور :بجد انا اسفة اوووي

احمد : على ايه بقى ما المحاضرة خلاص

نور : خد المحاضرة بتاعتي انقلها وانا هستناك

احمد : بجد بتتكلمي بجد

نور : ايوة مع انهم اكتر من عشر صفحات بس هستناك

احمد : متشكر يا مازمازيل نورة

نور : لأ قول نور بس احنا اصدقاء وابتسمت ومشيت

 

احمد عمال ينقل وعمال يقول في سره...خطها زي الزفت

بس شكلها طيبة جوي....الخط مش كل حاجة في الانسان يعني

احمد لمح نور وهي جاية وبتبتسم بخجل

 

 

 

ياترى ايه اللى هايحصل فى الحلقة الرابعة؟؟؟؟؟

شارك هذه المشاركه


رابط المشاركه
شار ك علي موقع اخر

الله ..

 

ده كده الموضوع دخل فى رومانسيه صعيديه ... وربنا يستر :cry:

شارك هذه المشاركه


رابط المشاركه
شار ك علي موقع اخر

ممكن والله الموضوع يقلب بحب لان الاخ مادام بالشخصية دي يبقى اكيد اكيد حيووجع لشوشته

شارك هذه المشاركه


رابط المشاركه
شار ك علي موقع اخر

أولا انا عشت فى وسط الصعايدة و بشهادة ناس منهم انا واخد الجنسييه الجناوى

و بحب الفت النظر لبعض الذكاء اللى عندهم

اللى علمنى اتحاد الجامعه و هو مش هين عن تجربه

كان صعيدى و هو معانا فى المنتدى هنا

و اللى فاتح المنتدى هنا برضه صعيدى

بس الصعيد فى عيب واحد

الجو الحر قوى فى الشتاو البارد قوى فى الصيف

طبعا انا قصدى العكس

بس بمجرد ما تقعد مع الناس

كل حاجه بتهون

و احب اقول كلمه سمعتها من ناس

كان فى فى الصعيد فرح و كان موجود الفنان سمير صبرى و طلبوا منه انه يقول نكت

فخاف انه يقول كان فى واحد صعيدى

فقال كان فى واحد مصرى

تصورا رد الصعايده كان ايه

 

 

 

 

 

 

 

 

 

 

 

 

 

 

يا أستاذ سمير(شوفوا الادب)

يا أستاذ سمير احنا عارفين النكت اللى بتتقال عن الصعايده و مش هاممنا لانه كله كلام ابن عم حديت

يعنى ده كلام و بس

و برافى على الموضوع المضحك اخت سحر العيون

بس ليا رجاء خاص

يا ريت الاسم يتغير ل........

مجله زغازيغ العدد التاسع

شارك هذه المشاركه


رابط المشاركه
شار ك علي موقع اخر

ااية يا عم فين الباقى انتو هتجنونى عاملين زى مسلسلات محمد صبحى بتاعة رمضان كل يوم يسيبلك حلقة فيها حتى تتخيل الى هيجرى فيها ونقعد نستينى لتانى يوم اية الاباداع دة والروعة دة انتى مذهلة يا بنتى

 

 

بس يا ريت تكملى بقى الواحد ريقة نشف

شارك هذه المشاركه


رابط المشاركه
شار ك علي موقع اخر

وموعدنااا مع

 

الحلقة الرابعة

 

بعد ما الدكتور طرد احمد من المحاضرة بسبب نور

وخرج زعلان خالص ونور صالحته وقالتله خد المحاضرة انقلها

واثناء ما كان بينقلها وبيقول خطها وحش بس هي طيبة كانت هي جاية بتبتسم

 

نور : احمد انت خلصت المحاضرة

احمد : لأ لسة انا في اول صفحة مش عارف اجرا الكلمة دي

نور قرت الكلمة

نور : اوكي كمل انا هستناك

احمد :لا لا انتي لازم تروحي دلوقتي عشان انتي اتأخرتي خالص

نور : طيب والمحاضرة

احمد : تتحرج المحاضرة

نور ضحكت ضحكة رقيقة جدا حركت قلب احمد الاسد

احمد : ممكن اوصلك لحد الباب...والله لحد الباب بس

نور : اوكي اوكي مفيهاش حاجة اتفضل

احمد : انتي في الجامعة هنا من امتى

نور :ايه يا احمد انا في سنك لسة اول سنة

احمد : انا عارف انا عارف

احمد : وياترى دخلتي هنا واسطة ولا ايه

نور : هههههههههههههههههه ...احمد مالك في ايه

احمد : لا بهرج معاكي

نور : تعرف انك

احمد :اني ايه

نور : طيب اوووي

احمد : وانتي انسانة محترمة اه فعلا محترمة بجد

نور : ميرسي

احمد :يالهوي ياني انا منجلتش المحاضرة بتاعت النهاردة

نور : ميرسي يا احمد على التوصيلة الجميلة دي منك

احمد : انتي رايحة فييييييييييييييييين

المحاضرة

المحاضرة

المحاضرة

 

 

 

ياترى ايه اللى هايحصل الحلقة الجاية

 

 

استنونى هاتعرفواااااااا

 

 

 

 

 

 

مع تحياتى

شارك هذه المشاركه


رابط المشاركه
شار ك علي موقع اخر

يا مسهل ي رب ابعت لينا بحلقة حلوة بقى

شارك هذه المشاركه


رابط المشاركه
شار ك علي موقع اخر

h;يد لأ طبعاً

بس بجد

فين باقى الحلقات ..

ولا ده اسلوب تشويق ؟!؟!؟

شارك هذه المشاركه


رابط المشاركه
شار ك علي موقع اخر

الحلقة ((5))

 

اهلااااا ياحلى شباب

 

يا ترى فاكرين الحلقة اللى فاتت؟؟

اديلكم ملخص لهااا

 

احمد كان بينقل المحاضرة من نور واتكلموا مع بعض وراح يوصلهااا لغاية الباااب

 

وخلص اليوم وروح على بيته

 

ودلوقت مع الاحداث الجديدة

واهوووو حلقة كبيرة عشان ماحدش يتكلم وتتبسطوااا

يا سبيرتو انت وابو تسنيم

 

يالا بقااا على الحلقة بلاش كلام كتير

 

 

 

احمد مأجر شقة مفروشة وساكن فيها فترة الدراسة....ظبط المنبه بتاعه على ميعاد الجامعة

جرس الباب بيرن...بيرن...خبط جامد....احمد قام مخضوض وبيفتح الباب وووفجأة

 

 

هاي..انا جارتك اللي ساكنة قصادك

احمد : طيب وانا اعمل ايه يعني جارتي ولا مش جارتي

جارته:تؤ...طيب قول صباح الخير..قول صباح النور..قول صباح اللي بتغني

احمد : يا فتاح يا عليم يا رزاج يا كريم...يادي النيلة ..انتي عاوزة ايه مني دلوجتي

جارته:انا ؟ ؟

احمد : امال امي

جارته:تؤ تؤ انت عصبي كده ليه...كل شئ بالتفاهم وبالهدوء...اعملك نسكافيه يهدي اعصابك

احمد : متشكر يا ستي متشكر خالص انا...عاوزة ايه مني على الصبح كده انا ورايا جامعة

جارته:ايه ده ..انت بتروح الجامعة...انا بفتكرك في المدرسة

احمد : صبرني يارب صبرني ...جولي عاوزة ايه هتأخر على الجامعة

عندك حبة شطة

احمد : هاا...جلتي عاوزة ايه؟؟

شطة شطة....اللي بتخلي الاكل يوحوح

احمد : لا انا مش بحب اوحوح عن اذنك..

 

وقفل الباب ولبس بسرررعة ونزل

 

ركب الاتوبيس

احمد : الاجرة بكام لو سمحت يا اخينا

رد شاب ستايل...ههههههههه ايه اخينا دي دي كلمة قديمة موت

احمد : ماشي يا عم الجديد....بكام الاجرة

الكمثري :بجنيه وبريزة يا كابتن

احمد : اشمعنى وبريزة

الكمثري : حكومة تقدر تتكلم

احمد : خد يا عم ونزلني عند الباب الرئيسي

 

احمد داااااااااخل بيجرررري....وهووووووب...خبط في بنت وقع عليها العصير

 

انت غبي ...انت مبتشوفش

احمد :هشششششششششش

انت قليل الادب مش محترم كمان

احمد : هسسسسسسسسسس

احمد : انا ورايا محاضرة مش فاضيلك انا خدي منديل

انا هوريك انا لازم ابهدلك

يا عمرو يا وائل يا هيثم

 

عمرو : مالك بيها يا تحفة

وائل : انت لازم تتربى كويس

هيثم : مش هاتروح سليم النهاردة

 

نور لمحت الخناقة من بعيد

 

نور : احمد احمد في ايه

احمد : ابعدي انتي يا نور ده تار جديم وهايخلص النهاردة

نور : احمد دي جامعة انت ممكن تتفصل

احمد : ومحضرش محاضرات تاني ؟

نور : ايوة ايوة انا هروح انده الامن

احمد : تندهي الامن يشيلوا جثتي ولا ايه؟؟

 

وفجأة الامن جه والمشكلة اتحلت والحمد لله احمد خرج سليم

مع انه كان ادها وادود يعني بس خاف طبعا على مستقبله

 

احمد : متشكر يا نور جوي

نور : ده اقل واجب يعني

احمد : انتي عملتي الواجب صح

نور : واجب ايه يا احمد هو احنا في مدرسة

احمد : ههههههههههه اصلها فاكراني في المدرسة

نور : هي مين دي ؟؟

احمد : اللي عاوزة الشطة

نور : انا مش فاهمة حاجة يا احمد

احمد : انتي بتحبي توحوحي؟؟

نور : هههههههههههههههههههه

احمد : هههههههههههههههههههه

نور: تعرف يا احمد ان دمك خفيف اوي

احمد : ربنا يخليكي انا مش بجدر على الكلام ده

نور : هو انا قلت حاجة يا احمد؟؟

احمد : ايوة دمي خفيف وحلو ومسمسم والكلام الكابير ده

نور : ههههههههههههههههههههههه

احمد : بتضحكي على ايه عاد؟؟

نور : ههههههههههههههههههههههه

احمد : يوه يوه يوه

نور : المحاضرة هتبتدي يا احمد يلا نحضر

احمد : ماتيجي نتمشى شوية في الحديقة وبلاش المحاضرة؟؟

نور : بجد ...طيب يلا

احمد : ال حديقة ال....يلا يا هانم نلحج المحاضرة انا حاجزلك جنبي

 

 

احمد دخل لقى اتنين اعدين مكانه هو ونور

ووووووووووووووووووووووووووو

 

اوووووووووووووووووبس

 

ياترى احمد هايعمل ايه والا يصرف ازاااى؟؟

عايزين تعرفوااا

استنونى الحلقة الجاية

ان شاء الله

 

 

 

مع تحياتى

واشوفكم الحلقة الجاية

ان شاء الله

شارك هذه المشاركه


رابط المشاركه
شار ك علي موقع اخر

×
×
  • اضف...

Important Information

By using this site, you agree to our Terms of Use, اتفاقيه الخصوصيه, قوانين الموقع, We have placed cookies on your device to help make this website better. You can adjust your cookie settings, otherwise we'll assume you're okay to continue..