الجندى المجهول 37 قام بنشر October 3, 2009 تخريفة واحد مجنون سقفتوا ....يا خيبتكوا سقفتوا على إيه وضحكتوا....يا خيبتكوا ضحكتوا على إيه فهمتوا....آه فاهمين طب ماشى يا حدقين عندنا حتة فزورة موجودة فى ملعب كورة والفريقين نازلين وفانلاتهم بلونين وصفر حكم المطش وبدأ الضرب واللطش فهمتوا....آه فاهمين طب ماشى يا حدقين سقفتوا ....يا خيبتكوا سقفتوا على إيه وضحكتوا....يا خيبتكوا ضحكتوا على إيه ********* شطرنج وقطعه مرصوصة تاكل مكرونة بمقصوصة وعساكر وملك ووزير وعمده بيدبح فى غفير وفى الفرن عملنالكوا فطير وكلته البت المقروصة وأمها منها مفروسة ضربتها بجِريدة وخوصة وتليفزيون عشرين بوصة وقعدوا ياكلوا المهروسة بطاطس ومعاها بسبوسة محشية لحمة ومكبوسة والمعدة منها متروسة وناموسة تُقْرُص فى جاموسة وتنام وتحلم بعروسة وشقة وعربية مخصوصة ومناهج ثابتة ومدروسة وحركة قرعة ومفقوسة وطيور فى بيوتها محبوسة فهمتوا....آه فاهمين طب ماشى يا حدقين سقفتوا ....يا خيبتكوا سقفتوا على إيه وضحكتوا....يا خيبتكوا ضحكتوا على إيه ********* الطور فى الساقية ربطوه وشلة حرامية حلبوه وفقعولوا عينيه وغموه وعلى ضهرهُ بكُرباج إدوه وأهو تعب من كُتر اللف وجاتله الشوطة وعقله إتخف ضربوه لحد ما قتلوه ومسكوا السكينة ودبحوه وبماية نار غسلوه ولحمهُ ع النار حطوه وجلده فى الأرض فرشوه وبعد ما طبخوه وسووه قاموا فى إيديهم مسكوه ومن غير ما يسموا اكلوه بالسم الهارى وطفحوه فهمتوا....آه فاهمين طب ماشى يا حدقين سقفتوا ....يا خيبتكوا سقفتوا على إيه وضحكتوا....يا خيبتكوا ضحكتوا على إيه ********* مولد سيدنا شَمَردل يالا نهيص ونهلل وهاتولنا مقشة وجردل وندوَخ نفسنا نتبهدل ومولد سيدنا الحلوانى بشايره هلت من تانى حنطبل ونغنى أغانى ورقاصة حلوه إسمها نانى تهز....ترقص....تتدلع وإحنا اللى لبسنا البُرقع نُندُغ لبانه ونفرقع وأبو وردة على دماغنا يطرقع والصلعة فى دماغنا بتلمع والشمعة تطفى وتولع وصوت يغنى ويلعلع وفكرة سودة بتشعشع فهمتوا....آه فاهمين طب ماشى يا حدقين سقفتوا ....يا خيبتكوا سقفتوا على إيه وضحكتوا....يا خيبتكوا ضحكتوا على إيه ******** وحاوى داير يا حالولا يلم حواليه الشله ويكسَرلك خمسين قُله ويزرعلك فدان فُله وإنت بتشم فى كُلاَ وتسمى إبنك زعبولا وبلياتشو مدهون ألوان أزرق..أصفر..وبنى كمان يتنطط فشر أبو قردان وإنت تقول دا واد فنان ووشك يضحك زى الأهبل وهو يضحك ويقولك يا أهبل وتاكل رُز بخلطة مفلفل مرشوش على وشه شوية فلفل وصوت بيعلى ويجلجل وع الواحدة الطبلة تطبل وعاشق أهبل بيسبل إتكفى على وشه وإتدهول فهمتوا....آه فاهمين طب ماشى يا حدقين سقفتوا ....يا خيبتكوا سقفتوا على إيه وضحكتوا....يا خيبتكوا ضحكتوا على إيه ********* والمايه غليت ع النار وإنت راح تبقى حمار يركبك مية صرصار ويغلبك واحد فار وعينه بتُطق شرار ويقولك دا أنا فار جبار وجاى أنبهك لقرار إن إنت لازم تنهار وعينك ما تشوفش نهار ولا صوتك يبقى له قرار وكتافك بتشيل العار وتنين بيطلع نار ومسدس علشان الطار وأخينا يعمرهُ بعيار وخاتم دهب له معيار والطبخة تتسوى بمقدار وتُسعمية مليون قنطار مشتاقين قوى للدار فهمتوا....آه فاهمين طب ماشى يا حدقين سقفتوا ....يا خيبتكوا سقفتوا على إيه وضحكتوا....يا خيبتكوا ضحكتوا على إيه شارك هذه المشاركه رابط المشاركه شار ك علي موقع اخر
خلادالحوتي 0 قام بنشر October 3, 2009 ايه الحلاوة دي دة مش تخريف واحد مجنون دة واحد واعي وناصح أقول فعلا المعنى في بطن الشاعر فهمتوا..... أيوة فاهمين شارك هذه المشاركه رابط المشاركه شار ك علي موقع اخر
الجندى المجهول 37 قام بنشر October 4, 2009 ربنا يكرمك والجنه يوعدك نورت موضوعى بردك شارك هذه المشاركه رابط المشاركه شار ك علي موقع اخر
ali desoky 391 قام بنشر October 8, 2009 لا هو مجنون بجد اللي ميفهمش الكلام الحلو ده شكرا اخي الحبيب شارك هذه المشاركه رابط المشاركه شار ك علي موقع اخر
الجندى المجهول 37 قام بنشر October 10, 2009 جزاك الله حيرا اخى الدسوقى وبارك الله لنا فيك شارك هذه المشاركه رابط المشاركه شار ك علي موقع اخر
