سنه اولى ههههههه فسحه

[bassant 2]

• أخيرا خلصت الثانوية العامة:

ياااااااااااااااااااااااااااااااااااه أخيرااا خلصت من الثانوية العامة بعد ذل. كانت أيام الله لا يرجعها. بس أنا مش عارفه أعمل إيه ؟ الحمد لله التنسيق ظهر وجت لى كليه وخلاص بس أنا مش متخيله خالص إيه اللى هيحصل

مبنى الكلية ومبنى المدرسة ( الحوش والفصول ) ياترى هنقدر ننط من فوق السور زى أيام العز ؟

يا ترى مبنى الكلية زى مبنى المدرسة ، طيب الكلية فيها فصول ؟ أنا كنت فى ثالثة تانى فصل المتفوقين ياترى هكون فى أولى كام فى الكلية ؟

طيب افرضوا إن الحصة معجبتنيش – حصة إيه يامتخلفه – اسمها محاضره. طيب خلاص لو المحاضره معجبتنيش هقدر أزوغ على الحوش وأروح ع حجرة الدكتورة واعمل نفسى عيانه واهرب من الحصص زى زمان ؟ واللا الكلية نظام تانى مفيهاش اودة دكتور ؟ لا يا ستى اتهيألى مش هقدر أعمل كده ، بيقولو فيه حرس فى الكليات ولو عملت كده تبقى فضيحة . زمان فى المدرسة كان كبيرها الناظر وده امره مفروغ بس منساش عمكريم بواب المدرسة الى يامه داره علينا واحنا دخلين متأخر المدرسه وكنت بزبطه بربع جنيه وكانت ماشية عال العال . وبعدين هيا الفصول جنب بعضها واللا خلطابيطا يعنى بما إننا كبرنا بأه المفروض الواحد يدخل الفصل اللى على مزاجه ؟. يوووووووووه دانتى مش هنا خالص هوا مش صفاء صاحبتنا قالت إن الفصل اسمه مدرج والدفعه كلها بتقعد فيه صبيان وبنات مع بعض ؟ أيوه صح هوا قال كده

. • الأبلة والأستاذ والدكاترة- الناظر وعميد الكلية

طيب إيه أخبار طقم الأبلوات والمدرسين ؟ ياترى هيبقو كشرين زى أبلة سعاد ومستر عادل واللا هيكونوا ناس مفرفشين ؟ أنا بتخنق من الناس الكشرة كفاية بقا خلينا نعيش حياتنا حبه روشنة . تبقى مصيبة لو دخلو علينا المحاضرة وف إيدهم خرزانه ؟ ومين عارف يمكن يدخلو علينا بالشوم على أساس إن احنا كبار ويمكن يكون معاهم زخيرة حية . بس مش معقول دا يحصل عشان وزير التعليم كان مانع الضرب فى ثانوى فمن باب أولى يحترمونا فى الجامعه ويرقونا شويه بدل الإحترامات اياها اللى بتورم القفا . استنى استنى .. انتا مش عاوزة تكبرى بقا .. مفيش أستاذ وأبلة وشغل العيال ده عشان اللى بيدرسو لينا دكاترة . ناقص تقوليلى لو المدرس زعق لى هشتكيه للناظر أو لمدير المدرسة ويمكن تكبر فى دماغك وتشتكية فى الإدارة التعليمية . كل دا مش موجود لأن الكلية لها عميد ووكلا وناس جامدة أوى والكلية ليها أقسام وكل قسم له رئيس وحوار جامد موت .

على العموم انا تعبت انهرضه خلينا نكمل الحوار ده بكره ولا بعده ياله بااااااااااااااااااااى

 

انتظروا قريبا

تم تعديل March 9, 2008 بواسطه عاشق الصداقه

[ديدو 3]

ههههههههه فكرتينى باأيام الثانوى يابسنت وخلتينى أشعر بالذنب بعد اللى كنت بعملة فى المدرسة والمدرسين هههههههههه

وكمان فى الكلية بنعمل مقالب فى المعيدين الجداد بس بيصعبوا عليا بشكل

شكرا بسنت

[Shetos 2]

ههههههههههههههههههههه

 

لالالالالالالالالالالالالالالالا

الكلية وضع مختلف تماماً

 

وربنا يوفقك

 

شكراً على الموضوع الجميل

[EL3aref 5]

الكلية .. يا سلام على الكلية .. فى الكلية مفيش حد يقولك ذاكر ولا عملت ايه فى الدرس ولا فى غياب وفصل ده يمكن عندى فى كلية التجارة ولو الواحد شال ماده تترفع الترم التانى .. وربنا يستر علينا :wink_smile: :wink_smile:

[bassant 2]

اشكر كل من قام بالرد على موضوعى

وارجوا منكم انتظار الجزء التالى

[سمر 1]

السلام عليكم ورحمة الله وبركاته،،

 

بارك الله فيكي اختي الغاليه

 

موضوع رائع

 

في انتظار البقيه

[bassant 2]

شكرا اختى سمر لمرورك الكريم

واوعدك بأن يكون الموضوع جاهز فى اقرب وقت

[bassant 2]

الجزء الثانى

يارب الكلمات القادمه تحيز على اعجابكم

• ازاى أتعامل مع زميلاتى ( ياترى هعجبها واللا هتقول عليا عيله ؟)

 

مشكلة صعبه خالص مش عارفه هعمل فيها إيه صبيان وبنات مع بعض فى مكان واحد .ولازم ونا طالعه من البيت أزبط هدومى ع الآخر وكله مكوى والجزمة بتلمع وضاربه شعرى جيل ومغرقه نفسى برفان . من الآخر لازم أبقى بنت روشه طحن . هيا صحيح الميزانية هتخرم ويمكن الوالد يطردنى برة البيت بس مش مهم الصيت واللا الغنى . أنا عارفه إن همه يومين وكل واحد يروح لحاله بس بردو المنظر مهم .

• ازاى أتعامل مع زميلى ( ياترى هيقول عليا عبيطة وهايفة ودماغى فاضية ؟ لازم أخس الأول ؟ وأتكلم برقة؟ إزاى ؟ )

ونا بقا مشكلتى مشكلة . ثانوى كان رحمة عشان مكانش فيه إختلاط يعنى كانت الواحدة تروح المدرسة بشبشب فردة وفردة.. مش مشكلة .. واكلة بصل .. مش مشكلة .. نسيت تغسل وشها ..بردو مش مشكلة.. طيب دلوقتى الكلية دى فيها صبيان وبنات .. ياترى هتكون نظرتهم ليا ازاى ؟ هحاول أكون جد على أد مقدر علشان ميقولوش عليا هايفة ودماغي فاضية .. فكرة كويسة .. بس ممكن لو عملت كده وخدتنى الجلالة يقولو عليا انطوائية ومعقدة .. ياترى إيه الصح ؟ كدا أحسن واللا يقولو عليا روشة ومتفتحه ع الآخر .. لأ عيب برده .. مينفعش.. بس على كل حال .. لازم أزبط نفسى وأعمل برنامج تخسيس من اللى بالى بالك .. يعنى ممكن أخس حوالى 150 كيلو فى أسبوع يادوبك عشان ميقولوش عليا أد الفيل . وأحاول بردو أشفط بطنى ونا موجودة فى الكلية عشان الكرش ميبانش ..أو آخدها من أصيرها وألبس طاقية الإخفا حفاظا على نظافة البيئة .. وطبعا لازم أروح الكلية بتاكس وآجى بتاكس وأحاول أخللى السواق يوصلنى لحد باب المجمع عشان الناس تشوفنى ونا نازلة من التاكس ( أهو برستيج بردو ) وأحاول أخللى الجاعورة متطلعش ونا بتكلم عشان ميقولوش دى دكر متنكر .. رقه بقا .. وأعمل تقويم لسنانى عشان التطريم اللى فيها .. وأركب عدسات زرقا عشان تدارى الحول .. يعنى من الآخر أتنكر تماما وأبقى واحدة تانية غيرى .. تقدرو تقولو غش تجارى .. يعنى نقضيها بالطول واللا بالعرض لحد مالخمس سنين يخلصوا على خير .

على العموم للحديث بقيه لما اشوف انا حعمل اه

تم تعديل March 11, 2008 بواسطه bassant

[EL3aref 5]

موضوع رائع اختى بسنت ..

 

بس وجههة نظرى الشخصية المتواضعة إنك تحطى لنفسك خطوط حمرا لنفسك ومتحاوليش تعديها مش بس فى الكليه ولا لمدة خمس سنين ده طول حياتك وفى اى مكان تروحيه .. ولازم تبقى على طبيعتك ومش متصنعه وكمان تركزى فى مزاكرتك لان النزول ما اسهله فى الكليه .. زى شكة الابره .. ولازم تراعى ربنا فى تصرفاتك ..

 

وربنا يوفقك فى حياتك كلها ..

 

انا عارف إن الموضوع واخد سياق كوميدى .. بس اعذرينى الموضوع جه مع حالة بعيشها فى الايام دى .. ومنتظرين بقيت الاجزاء علشان نعرف هتعملى ايه

 

وربنا يوفقنا جميعاً .. اللهم امين

[bassant 2]

اخى العزيز اشكرك على كل ماقيل ولكنى عديت من المرحله ده خلاص والان انا متخرجه وكمان بشتغل بس انا حبيت اقول كلمتين بواسطة موضوعى ان مش كل الى داخل الجامعه فاهم معناها ومستنيها بشوق ولكن البعض يخافها ويحبها فى نفس الوقتودول الفئه التى اتحدث عنها

وان كان الحاله التى تمر بها صعبه الى هذه الدرجه ادعوا من الله ان ييسر لك الامر ويهديكالى الصواب

وانشاء الله تأتى البقيه تباعا

تم تعديل March 14, 2008 بواسطه bassant

[EL3aref 5]

الرسالة وصلت اختى بسنت .. شكراً لك على الدعوه التى لاتقدر بمالك .. يهدينا وإياكى .. اللهم امين

[حنان القلب 1]

الموضوع رغم انه في سياق كوميدي الا انه بيحمل مضمون قوي وواقعي لان دا فعلا تفكير الغالبيه العظمى من الشباب وخصوصا اللي عندهم اوقات فراغ كتير مثلا في الكليات النظريه ودا على سبيل المثال

والمشكله دي في الجنسين ولاد وبنات كلوا بيجري ورا الموضه عشان يعجب ومبيفوقوش غير بعد الدنيا ما تتطربق على دماغاتهم هم واللي جابوهم ربنا يحمينا ويهدينا جميعا اللهم امين

وشكرا على اسلوبك الساخر دا اللي بيحمل فكره جميله يا بسنت ودي شطاره منك طبعا لانك بتشدي اللي بيقرالك وبتبعديه عن الملل في قالب من الواقعيه في نفس الوقت الموضوع رائع ومهم جدا اننا نتناقش فيه

شكرا عالمجهود القوي دا ومستنينك على احر من الجمر عشان نشوف هتعملي ايه بس متتاخريش علينا

[bassant 2]

الرسالة وصلت اختى بسنت .. شكراً لك على الدعوه التى لاتقدر بمالك .. يهدينا وإياكى .. اللهم امين

الشكر لك اخى الكريم والله الموفق

شكرا عالمجهود القوي دا ومستنينك على احر من الجمر عشان نشوف هتعملي ايه بس متتاخريش علينا

الشكر لكى على كلامك الرائع ونا اوعدك اننى لن اطيل عليك

 

 

[bassant 2]

• الطابور وتحية العلم

 

كنا زمان نصحى بدرى بالعافية عشان نلحق الطابور وكان ياويله اللى يتأخر عن الطابور وتحية العلم كان الأستاذ جمال يديلة طابور ذنب رافع إيديه ووشه للحيطة ويمكن يخليه يعمل شقلباظ – زرع بصل – لمدة حصة كاملة .. مش بقولكم كانت أيام الله لا يرجعها. الحمد لله إن الجامعة مفيهاش لا طابور صباح ولا علم كمان ..

 

• الفصول والمدرجات والحوش والفسحة :

 

كانت تالته ثانوى فى مدرستنا 3 فصول كل فصل فيه خمسين طالبه كل تخته كان فيها 3طالبات سمان عشان أجيب كشكولى من الشنطة اللى بين رجليها لازمزميلتي اللى على طرف التختة تقع على الأرض عشان كده كنت بقعد دايما جوه .

وكان فيه تنافس بين فصول سنة تالته وكانت تالتة أول تغلب فصلنا رغم إن الفصلين كانو فصول متفوقين عشان كده كانت أول ماالفسحة تيجى كنا بننزل فيهم ضرب فى الحوش وفين يوجعك وفى الآخر نجمع عند المدير عشان ناخد الطريحة اللى فيها الشفا –ولما يخلصوا علينا كانوا بيستدعوا اهلنا ولما يجوا(اييييييييييي )

كان الدكتور يشخص حالتى على انها( تورم فى القفا وتمزق فى أربطة الجذمة وتهتك فى ألياف الشراب وضمور فى مصروف الأسبوع الجاى .

ياخسارة كانت حاجات لذيذة وذكريات حلوة ياترى هشوف أحلى منها .

أولا مفبيش فصول .. فيه مدرجات تقعد فيها الدفعه كلها .. يعنى مفيش تنافس بين الفصول .. وبالتالى مفيش خناقات .. إيه الخنقة دى ..

ومفيش حوش .. فيه بداله جنينة المجمع .. كويس عشان نشم الورد .. ومفيش فسحة .. لو حبيت آخدها لازم أطنش محاضرة أو سكشن .. مش حلوة الحكاية دى .

اه كانت ايام

تم تعديل March 15, 2008 بواسطه bassant

[NADA 34]

ياااااااااااااااااااااااااااااااااااه أخيرااا خلصت من الثانوية العامة بعد ذل. كانت أيام الله لا يرجعها

قول للزمان ارجع يا زمان

 

حرام عليكو بقى ايام الثانوية ذل

ليت الشباب يعود يوما

لو كنت اعرف مكنتش خلصت الثانويه

امال الكليه ايه عذااااااب

 

 

 

 

الكلية .. يا سلام على الكلية .. فى الكلية مفيش حد يقولك ذاكر ولا عملت ايه فى الدرس ولا فى غياب وفصل ده يمكن عندى فى كلية التجارة ولو الواحد شال ماده تترفع الترم التانى .. وربنا يستر علينا

 

ياريتنى لقيت حد يقول ذاكرى بس كل واحد ف وادى

 

 

من الاخر انا شايفه ان المدرسه احلى من الكليه بكتيييييير

 

 

 

 

وبعد ما خنقت عليكو (( شوية تثبيت ))

 

احلى حاجه ف الموضوع بجد ان بسنت هى اللى كاتباه

[bassant 2]

قول للزمان ارجع يا زمان

والله فعلا كانت احلى ايام على الاقل كان الواحد مريح دماغه فيها

 

حرام عليكو بقى ايام الثانوية ذل

ليت الشباب يعود يوما

يعنى مش اوى برده كان فى ايام الواحد كان بيتمنى يخاصها ولا اه

 

ياريتنى لقيت حد يقول ذاكرى بس كل واحد ف وادى

والله كانوا بيأولوا كتير بس مين يسمع ههههههههههههههه

 

 

وبعد ما خنقت عليكو (( شوية تثبيت ))

 

احلى حاجه ف الموضوع بجد ان بسنت هى اللى كاتباه

ربنا يخليكى ليا بس بجد احلى شىءئ فى الموضوع مشاركتك بالرد عليه

 

 

 

 

 

[بنت مصرية 66]

موضوع جميل جدا ياباسنت ورائع مغامرات دي

راي ااعارف وحنان القلب راي سليم مية في المية

ربنا يهدينا اكتر واكتر ىمين يارب