اذهب الي المحتوي
منتديات ياللا يا شباب
angel_of_mercy

[ مميز] *يوميات طالبة طب انتساب

Recommended Posts

تبدا الحكاية بزغاريط مالية المكان ، و تخرج ام سيد من شقتها و تنادي علي ام ماجد و تقول :خير ياام ماجد الزغاريط دي جاية منين؟

ترد ام ماجد و تقول: البنت اللي في التالت عقبال ولادك جابت مجموع كبير في الثانوية و اهلها عاملين هيصة و هليلة.

لم تكن تعرف البنت من حسن او سوء حظها انها جابت هذا المجموع ، لكن بانتهاء فرحة النتيجة و جت اللحظة الحاسمة (هتقولولي هية ايه؟) هقولكم كتابة رغبات مكتب التنسيق.. اول حاجة قالتها البنت (ايام ما كانت بتقول!!) :انا عايزة ادخل اسنان

وعينك ماتشوف الا النور قامت الدنيا و نسيت تقعد .. معارضة من كل الناس اللي تعرفه و اللي متعرفوش ..اللي يقول يابنتي خسارة المجموع؟!(هوة احنا بنشتري كيلو بطاطس) و اللي يقول ابن الوز عوام!(وكمان خلتوني وزة) ..المهم بعد مناهدة و زن عالودان رضخت البنت لرايهم و قالت عديها يابت.

وجه اول يوم في كلية الطب ، دخلت المدرج ؛ اول حاجة جذبت انتباها شكل زمايلها ..بحر من النضارات الكعب كباية و عيال شايلة هم الدنيا فوق دماغهم و سطور المنهج بتجري علي جبهتهم ..ساعتها قالت :بداية مبشرة للغاية

دخل الدكتور وقال سلاموعليكوا و دي كانت الكلمة الوحيدة العربي اللي اتقالت و بعدها رس انجليزي(ده انجليزي ده يامرسي؟)

المهم بعد ساعتين من الفيلم الاجنبي المحروق ده و اللي اتقطش فيه نص الترم .تفضل المحاضر و عتقنا لوجه الله لنلاقي بقية اهوال الرحلة.

خرجنا من المدرج علي المشرحة (ولمن لايعرف المشرحة) المشرحة مكان مظلم موحش قاعدة فيه جثث مالهاش حد يسال عليها

وواخدة ميت غزة (اقصد مشرط) و يتهيالك انها بتقول اعتقوني لوجه الله ..و بعد صراع طويل مع الجثة؛ افرج علينا بضمان محل العمل.

ان اليوم يخلص ؟ابدااا.. دخلنا بعد كدا السكشن و قابلنا معيدين الكلية (العيال اللي كانت دحيحة في الكلية)و لك ان تتخيل!!

عقد و كلاكيع تملأ خزان اسوان ، و يدرسولنا نظريات الغرب بيعتبرها تحتمسية و اثبتوا خطئها من 10سنين و احنا بنعتبرها من النظريات الفانكي الجديدة لسة نازلة علي ايدينا ..

الحمدلله انتهي اليوم بعد صراع طويل بعدما كنت اظن ان لا مخرج ..

و ادركت حينها ان هذه هي نهاية الاحلام و بداية الالام ..

 

مع تحياتي

angel_of_mercy

 

علي فكرة لو عجبكم الموضوع و اخدت منكم الاوكي هاواصل تقديم يومياتي و ياريت تعجبكم

 

مع كل الحقد علي بتوع تجارة :unsure:

شارك هذه المشاركه


رابط المشاركه
شار ك علي موقع اخر

بجد موضوع جمييييييييييييييل جداً وطريقتك فى الكتابه جميله جداً وواضح انك بسم الله ما شاء الله دمك خفيف جداً

 

إستمرى فى الموضوع وأنا متابعك .. وأهلا بيكى فى المنتدى ... على فكره أنا اللى بحقد عليكم دلوقتى ..

 

لأنى فى كلية علوم .. و 70 % من المنتدى طب بشرى .. ربنا يوفقكم .. وبجد بنعانى زيكوا ويمكن أكتر وإنتوا عارفين علوم

 

أنا حطيت قاعده ذهبيه بهديها لكل اللى فى الكليه

 

عدد سنوات كلية العلوم = 4 + N حيث n لا تساوى صفر

شارك هذه المشاركه


رابط المشاركه
شار ك علي موقع اخر

الهدف اننا ننقض حياتنا ومشاكلها

اننا نحاول نفكر في حالنا المتدهور دراسيا

اننا نحس اننا علي غلط لان احساسنا ده نص حلنا للمشكله

شارك هذه المشاركه


رابط المشاركه
شار ك علي موقع اخر

سيري على بركة الله يا angel_of_mercy :unsure:

 

موضوعك ظريف جدا جدا بجد عملي euphoria ;) رغم انك فكرتيني بايام المشرحة :wacko:

وانا شايفة ان الهدف من الموضوع واضح جدا ، دي رسالة من تحت الماء لاى شاب او فتاة

بتسول لهم انفسهم انهم يدخلوا كلية طب حيث الضياع الى الابد :(:D

جد شوية بقى :mellow: :

احنا بنتشارك خبراتنا وتجاربنا ومفيش ضرر من موضوع ظريف يدخل البهجة على نفوسنا في العالم

اللي مليان مآسي اللي احنا عايشين فيه حتى لو ماكانش الموضوع بيحمل رسائل موجهة.

شارك هذه المشاركه


رابط المشاركه
شار ك علي موقع اخر
احنا بنتشارك خبراتنا وتجاربنا ومفيش ضرر من موضوع ظريف يدخل البهجة على نفوسنا في العالم

اللي مليان مآسي اللي احنا عايشين فيه حتى لو ماكانش الموضوع بيحمل رسائل موجهة.

إيه الكلام الجامد ده .. بجد مفيش رد أقوله ليك يا كيمو بعد رد أخى العرابى وأختى نجمة الكتب

بس أنا عاوز أنوه عن حاجه .. ممنوع يا إخواننا الشتايم فى المنتدى

إيه

euphoria
دى .. مش ده ممنوع وبالذات الغلط فى الأم ..

ده آخر تحذير يا نجمة الكتب .. ومش حكررها تانى !!؟ :PB):unsure:

شارك هذه المشاركه


رابط المشاركه
شار ك علي موقع اخر

النهاردة هاحكيلكم علي يوم عظيم و جليل في حياة كل طالب طب و هو : يوم امتحان الشفوي

اليوم اللي بيتمني كل طالب ان يمر بسلام و بدون اي مشاكل .. و لمن لايعرف امتحان الشفوي، هو وسيلة الدكاترة الكبار لتكفير ذنوب الطلبة و هي تصفية حسابات و حرب شرسة من تحت لتحت بين الstaff يقع الطلبة فريسة سهلة لها.

بس اول امتحان بتكون ليه هيبته الخاصة و انطباعه اللي مايتنساش من ذاكرة اي دكتور . وفي شوية قواعد ذهبية كلنا بنعرفها (يا اما من المدبلرين او الخبرة) لامتحان الشفوي الا وهي:

1- لو دخلت لدكتور متدين مربي ذقنه ، تعلي صوتك و انت بتقول السلام عليكم و رحمة الله و بركاته

2-لو دخلت لدكتور روش و بتاع حركات ، ماتنساش تفتكره بكلمتين مدح وسط الاجابة و تعيشه فالوهم

3-جاري الدكتور مترح مايوديك انشاءالله يسالك عن التيشرت اللي لابسه ماركة ايه؟

4-لو كلامك غلط ،قوله بنتعلم منك ياسعاة البيه

5-ولو عندك كارت توصية (من دكتور و لا فراش) ياسعدك ياهناك ..تبقي باضتلك فالقفص

ولاهمية هذا اليوم قررت احكيلكم عن اول شفوي ليا(استروا عليا ربنا يستر عليكوا)

جه العامل بالقسم و قال الطلبة من رقم كذا لرقم كذا عند الدكتور فلان و فلان (و كاننا مترحلين علي سجن طره)

دخلت مكتب الدكتور الاولاني و قلبي يرتجف من هول ماسمعت وانا بره انه بيدي صفر مربع بلا رحمة .. خبطت عالباب و دخلت

بص لي شذرا (جامدة شذرا دي) و قال اقعدي ..استقربت اول كرسي و قعدت مستنية فرج ربنا .بعد دقائق استجمعت قواي وقلت اما اشوف الشخصية اللي دخلنلها دي ايه؟

لقيت (خير اللهم اجعله خير!!) رجل عجوووووووووووووووووز و زي مايكون منزلينه من المتحف علية عدل و لابس نضارة كعب كباية سمكها لايقل عن5سم ، كتبلي 3 اسئلة في ورقة عشان افكر فيهم لغاية مايخلص علي اللي قبلي (سوري اقصد مع اللي قبلي..لها الله!) كانت المشكلة في الاسئلة لاني ببساطة مش عارفة اقراها كانت نبش فراخ ..خط قذر لايمكن فك طلاسمه

فسالته علي استحياء :ددددكتور هية الكلمة دي ايه؟

اتنفض و قالي :قصدك ايه ..انا خطي مش حلو (ياريته قال وحش)

قلتله : لا ياسعاة الباشا انا اللي نظري طشاش

فضحك و قاللي خلاص ابقي البسي نضارة (قال يعني انا بتكلم مع زرقاء اليمامة)

و عدت الليلة ..تنفست الصعداء (حلوة برضه تنفست الصعداء دي صح؟) و اخدت نفس عميق استعدادا للجنة التانية

و عينك ماتشوف الا النور .دكتور عنده 29 حرف من ال28 بايزين و عربية رش متنقلة و بيشترط علي الطالب انه يقعد لزق فيه

و ياخد حصته من الرش .المصيبة انه مش بيكتب الاسئلة في ورقة .. و السؤال كان :glomerular filtration rate

شايفين كمية الحروف المتحركة اللي في الكلمة؟ لك ان تتخيل كيف خرجت هذه الكلمة من فمه و ووصلت لودني

شغلت الdictionary بسرعة و عملت translation للجملة و اللي فيه النصيب اتقال

و جت اللحظة اللي استنتها من زمان لما اتعدل و قال: خلاص يابنتي قومي روحي .كان هاين عليا احب علي ايده ابوسها

و خرجت من الباب وانا بقول: ناقصين لبخة في الكلام :(

و للحديث بقية اذا كان في العمر بقية ..

NB:لو ما عديتش يومياتي تعجبكم قولولي لان الواحد مش عايز يفتري علي خلق الله

مع تحياتي:

angel_of_mercy

تم تعديل بواسطه Shetos

شارك هذه المشاركه


رابط المشاركه
شار ك علي موقع اخر

مسكينه والله شكلك كده شعرك اتملا شعر ابيض من كتر المواقف الصعبه اللي تعرضتيلها في الكليه دي

ربنا يعينك ويعين كل امثالك

علي فكره اسلوبك استايليش خالص " جديده طحن استايلش دي" هههههههههههه

علي فكره انا منهار من الضحك ولا انهيار وصلة زينر " اكتبيها يمكن تنفعك" ههههههههههه

شارك هذه المشاركه


رابط المشاركه
شار ك علي موقع اخر

مرسي علي مرورك و اهتمامك بانك تقرا الموضوع

و مرسي علي الرد ...و ربنا يستر و ماكونش خنقاكم باليوميات دي

بس وعد انا هقلل الجرعة عشان ماتشتكوش من overdose

شارك هذه المشاركه


رابط المشاركه
شار ك علي موقع اخر

اولا انا عايزة اقولك اني بجد مش عارفة ابطل ضحك من ساعة ما قريت اللي انتي كاتباه :D

 

ثانيا عايزاكي تكتبي كتيييييييييييييييييييييير لحد ما تعمليلنا toxicity مش بس overdose :unsure:

 

ثالثا اسمحيلي اضيف شوية قواعد ذهبية زى اللي انتي قولتي عليهم لدخول امتحان الشفوي ودي مش

لطلبة طب بس ، دي لكل الطلبة المقهورين في الارض واهو كلو بثوابه ;)

 

١- اختار المكان...

يعني اختار اللجنة اللي هتدخلها ده لو عرفت تختار اساسا ... المهم لو لقيت لجنة اللي طالعين منها عندهم الاعراض دي:

-ودانهم محمرة -فاقدين حاسة السمع اوالنطق -ايديهم بتترعش او ركبهم بتخبط في بعض -نوبات صرع -زمايلهم مسنيدنهم

وفي طلبة بيتحدفو من الباب ومن الشبايبك، ابعد احسنلك وبلاش تعمل فيها بطل ... وشفلك حتة تانية تمتحن فيها او اجل المادة ،ماله يعني الدور التاني ده حتى بيبقى رايق وبعيد عن الزحمة(مع العلم انك ممكن تأجل وبرده تلاقي نفسك قدام نفس اللجنة في الحالة دي اعرف ان المشكلة فيك انت وكل واحد عارف نفسه كويس ;) ) ولازم تاخد بالك عشان ممكن الوحش الكاسر :wacko: (الدكتور) اللي جوا محدش يدخل له فيطلع وينقض :o على اقرب واحد واقف قدام اللجنة ويدخلك تمتحن عنده -غصما وائتدارا -حتى لو مكنتش في لجنته وساعتها بقى يا حلو .... نشوفك في مستشفى الامراض العصبية والنفسية :blink: ولحسن الحظ المكان مش بعيد.

 

٢-اختار الزمان....

يعني هتدخل اللجنة امتى، ده بردو لو عرفت تختار.... اوعاك تدخل بعد اي طالب من اللي بتظهر عليهم الاعراض دي:

-النضارة كعب كباية - الضهر منحني -شايل شنطة مليانة كتب -الوش لازق في الكتاب لاخر فمتو ثانية قبل دخول اللجنة

طبعا انت عارف ان الاعراض دي اعراض مرض المذاكرة اللي بتظهر على اوائل الدفعة :huh: والعالم الدحيحة <_< اللي بيقفلو اي لجنة وانت طبعا عايز تنجح :( وخد بالك المظاهر خداعة وفي ناس من اياهم اللي لسة منسيوش نظام ثانوية عامة ولسة بيتخابثوا ويعملو نفسهم خايبين ومش مذاكرين ويستحسن متدخلش اول واحد لان الدكتور هيسخن بيك وهتاخد اللي فيه النصيب ،زي ما بيقولو من على وش القفص، وبرده متدخلش اخر واحد ،هيكون زهقان ومش طايقك واحتمال يمسك في خناقك :huh: ، على ايه الطيب احسن وخليك في النص ;) .

 

٣-ودي مخصوص لبتوع البكالوريوس

لو بنت اوعي تدخلي متشيكة لدكتورة تمتحنك هيبقى يومك مش فايت وكل عقد وكلاكيع الماضي الاليم هتطلع عليكي ، يعني لو مفيش مفر ابقي نعكشي شعرك واستلفي نضارة B) من اي زميل او زميلة ويا بخت من نفع واستنفع اما بقي لو ولد نصيحة بلاش تلبس بدلة احلي من بدلة الدكتور مراعاة ً لمشاعر الدكتور ولكرامتك او ابقى سيبها برة مع حد من زمايلك( كرامتك مش البدلة :D )وربنا يكفيكم شر الحقد الطبقي والحللي وكل انواع ادوات المطبخ :) .

 

٤- سواء عليت صوتك او اتكلمت بصوت هادي، ابتسمت او لأ ،كان كلامك مترتب او كل كلمة في ناحية ،كنت واثق من نفسك او مش عارف تتلم على اعصابك ،افتكرت وجاوبت او جالك زهايمر مبكر وتنحت كله في الاخر يتوقف على مزاج سعادة حضرة جلالة الممتحن واهم حاجة الثبات الانفعالي ، يعني اوعي تعيط مهما جرالك واوعي الدم يغلي في عروقك وتتهور ،خليك فاكر ممكن متجيبش درجة حلوة بس ده مهما كان افضل من ان والدك ييجي يستلمك من اقرب قسم بوليس.

 

يعني دخول امتحان الشفوي يتطلب دراسة المواد المقررة واللي مش مقررة ودراسة نفساويات الطلبة اللي هيمتحنو معاك وكمان دراسة الحالة النفسية والعقلية للدكتوراللي هتمتحن عنده وبعد كده..... بعد ده كله توكل على الله ومتقلقش من حاجة خالص اي حاجة هتحصلك جوة في غرفة التعذ...الامتحان :o هتبقى في ميزان حسناتك ان شاء الله :) ،بس ادخل برجلك اليمين وربنا معانا جميعا :) .

شارك هذه المشاركه


رابط المشاركه
شار ك علي موقع اخر

انا برضه اللي دمي خفيف!!!

دة انت دمك زي الشربات (منبي يامعلمي)

مرسي علي القواعد الذهبية و دي حقيقة كنت هاقولها بس فضلت ما ادوش دماغكم

و قاعدة زيادة: اوعي تدخلي مع زميلة غاوية محاضرات عند دكتور اداكوا محاضرات

لان ببساطة الزميلة المبجلة هتستغل الفرصة و تبين المواهب و تورط العبد لله

شارك هذه المشاركه


رابط المشاركه
شار ك علي موقع اخر

المتحف ...مكان مهم في حياتي ..المتحف المكان الوحيد اللي طول السنة بيبقي بينش و اخرها بيتردم طلبة

و لمن لايعرف المتحف الطبي هو مكان توضع فيه اجزاء من البني ادمين (علي راي اللمبي) في دواليب فيها مادة حافظة

تحاول تحافظ علي الجزء ده بتاع عشرين تلاتين سنة ..لغاية ماتنطق و تقول اعتقوني ي ي ي ي

الغريب باه ان كل طلبة طب بلا استثناء بيحفظوا الدولاب مش اللي جوة الدولاب يعني يقولك :اااه الدولاب المصفر ده او الدولاب اللي فيه خربشة علي جنبه الشمال او المثقفين يقولولك الدولاب اللي علي ايدك اليمين وانت داخل المتحف ..(قال يعني هيجبلهم الجار بمكانه فالمتحف)

المهم اكتشفت بخبرتي القديمة في كلية طب ان كل قصص الحب بتبدا في المشرحة او المتحف (اماكن شاعرية صح؟)

الحكاية تبدا بغلطة عفوية من بنت وهيا انها استقربت البني ادم اللي جنبها و سالته عن حاجة في الدولاب اللي قدامها

الواد ياعيني يعيش فالوهم و يقول البت بتموت فيا و هية اصلا مابصتلوش اصلا وهية بتسال، مش عيب فيه لاسمح الله

و لكن لان مفيش مساحة فالمتحف انك تبص حوليك ..انتي بترمي السؤال و تجيلك الاجابة من اي حتة ، و الواد الغلبان يفضل في الرايحة و الجاية يبصلها علي امل انها ترميه نظرة و يبدا يبان عليه اعراض المرض :

هذيان و كحة و نظره يضعف و يومين و هتلاقيه متلقح فالطوارئ جنب حبايبه(عشان تعرفوا ان البنات جبارين)

بس الميزة بجد في طب الاحترام المتبادل بين الزملاء مفيش واحد يقدر يقول لواحدة سلاموعليكو (هههههههههه) بيتكسفوا من خيالهم يعني من الاخر كلية طب هي كلية المحطمين عاطفيا ماعدا انا طبعا

و للحديث بقية اذا كان فالعمر بقية....

مع تحياتي

angel_of_mercy

شارك هذه المشاركه


رابط المشاركه
شار ك علي موقع اخر

عارفه نصيحه من ولد بس متقوليش لحد اني قلتلك الكلام ده

احنا كاولاد بنحب البنت اللي تتنك علينا ومتعبرناش

ويلهوي لو قابلت لفت نظرنا ليها بسكوت حتي لو عملنا عجين الفلاحه قدامها

ساعتها بتكبر في نظرنا اكتر

اما البنت اللي بكلمه واحده بس مننا تعيش دور عبد الحليم وناديه لطفي في فيلم الخطايا

دي مش بتعمر معانا لانها صيد سهل

واحنا بنموت في الصعب واللي ينشف ريقنا

وكما قال الشاعر

يا بطاطا طنشيني هتلاقيني

اطري منك ومن عجيني

يا بطاطا نفضيلي هتلقيني

احبك اكتر من عيوني

شارك هذه المشاركه


رابط المشاركه
شار ك علي موقع اخر

على فكره الموضوع جميل جداً أن كنت حموت من الضحك .. بجد دمكوا خفيف جداً

angel_of_mercy و نجمة الكتب .. طب إنتساب فعلاً .. بس دمكوا شربات

وأسلوبك عاجبنى جداً angel_of_mercy أنا متابع موضوعك .. وكترى مش قللى

كلنا عاجبنا الموضوع ده جداً ..

بس فى نقطه :-

(عشان تعرفوا ان البنات جبارين)
احنا كاولاد بنحب البنت اللي تتنك علينا ومتعبرناش

 

أولاً يا عرابى إتكلم عن نفسك ... مش كل الولاد .. ولا فخر ..

ثانياً : أنصحك يا angel_of_mercy تبعدى عن السكه دى " الكلام عن الولاد والبنات "

علشان ما تقومش حرب فى الموضوع بتاعك وبقيادتى كمان ...

فبلاش أحسن علشان موضوعك ما يتخذش منعطف بعيد عن اللى معمول علشانه ... " يوميات طالبه طب إنتساب "

كملى زى ما إنتى أنا فعلاً الموضوع عاجبنى جدا جدا جدا

شارك هذه المشاركه


رابط المشاركه
شار ك علي موقع اخر

مرسي علي كلامك يا عبد الله و متشكرة انك ائتمنتني علس السر الخطير ده بس ما انصحكش انك تقولي اسرار تاني لان ببساطة لو حبيت تنشر خبر لسكان مصر و ضواحيها مع مراعاة فروق التوقيت،قوله قدامي !!!!

و مرسي علي نصيحتك ياعاشق الصداقة ووعد هالتزم بيها (مش خوف ولا حاجة )

بس لما اخلص الامتحان اللي عندي هافوق لكم انشاءالله

شارك هذه المشاركه


رابط المشاركه
شار ك علي موقع اخر

هههههههههههههههه

وإحنا منتظرين تخلصى امتحانك على خير ان شاء الله

واللى يتبقى منك بعد كده يبقى يوقفلنا ويورينا

ربنا معاكى ... إنتى صعبانه عليا أصلاً .. يبقى طب وإحنا عليكى

حرام ... ده حتى كده يبقى فاول :unsure::PB)

شارك هذه المشاركه


رابط المشاركه
شار ك علي موقع اخر

اكيد وحشتكم صح؟؟؟؟ و دة سبب علشان اختار لكم موضوع مهم اكتشفته مؤخرا من اللف علي المستشفيات ( كطالبة طب كحيانة طبعا مش مريضة!!!)

اكتشفت ان احنا مهملين طب عظيم و كبير اسمه طب الريف و هو للعلم طب مهم و معقد و مستقل بذاته

و الناس اللي عايشة في الارياف عندها اسس و معتقدات مبني عليها العلم دة وهي كالاتي:

اولا : سبب الامراض ...البرد ثم البرد ثم البرد ..البرد بيسبب اي مرض في العالم و هانكتشف في يوم ان البرد مسئول عن الايدز و السرطان.

ثانيا :اعتقاد قاتل بان كمية الدم في جسم الانسان ضئيلة جدا .. سحب 3سم منهم يقتل الانسان او يصيبه بالعجز طول حياته؟!

ثالثا : السماعة تعرف كل شئ و تهمس للدكتور بتشخيص المرض و علاجه.. عشان كدا مابتخرجش الا للي يدفع الفزيتة بس.

رابعا: السماعة يجب ان توضع موضع الالم و يعني لو عنده صداع ،و الدكتور ماوضعش السماعة علي راسه يبقي وغد (حلوة وغد دي؟؟) و بدون اخلاق

خامسا:بعض المصطلحات و الشفرات الخاصة بهم فقط زي

زغولة:ارتباك معوي

تمشية:اسهال

الانذار: المنظار

 

سادسا:الطحال مهمته القتل فقط , لو عرف ان عنده طحال يبقي دي النهاية لان الطبيعي مايبقاش موجود

سابعا: اهم شئ في التشخيص هو التكرير (التحليل) و الاوشاعة .. و الدكتور جال لابدن من الاوشاعة

ثامنا: ارتفاع الحرارة ليس حمي ..الحمي هي اي مرض يستدعي الذهاب لمستشفي الحميات و اللي بتعجل بالوفاة

تاسعا:اللي بيدخل مستشفي الطوارئ مابيخرجش الا علي قطر 7الاخمسة

عاشرا: الحياة ماتستهلش علاج و دكاترة ..السمنة و البياض العلامتين الوحيدين علي الصحة

 

 

مش بذمتكم علم مهم ؟؟

معلش ان كان الموضوع موجه لدكاترة المنتدي لكن وعد الموضوع الجاي هيكون لكل الفئات

مع تحيات

 

angel_of_mercy

شارك هذه المشاركه


رابط المشاركه
شار ك علي موقع اخر

احلي حاجه فيكي انك بتثيري موضوعات مهمه فعلا (" تثيري" اكتبيها يمكن تنفعك)

الطب في الريف مشكلته بيعتمد اكتر حاجه علي الاعتقاد

وخبرات السابقين في مواجهة الامراض

ده غير حالات الذهاب للمشايخ والمشعوذين

بس بصراحه مكدبش عليكي بيستخدمو الطب البديل بصوره كبيره

الاعشاب عندهم شئ مقدس اصلهم تبع جمعية

back to nature

وخدي المعلومه دي هديه مني

" لما تكشفي لحد من الارياف وعايزاه يجيلك دايما ويقول عليكي دكتوره شاطره استخدمي طريقة العلاج بالايحاء وخليهم يعتقدوا في دواكي بصوره كبيره"

لان عندهم مثل بيقول " اللي يعتقد في الحجر يشفيه رب البشر"

شارك هذه المشاركه


رابط المشاركه
شار ك علي موقع اخر

post-94-1166038159_thumb.jpgبجد بجد جميلة جدا كل هذه الموضوعات والأجمل من ذلك طريقة سرد الموضوع لأنها أول طريقة لجذب القراء انا يمكن بدأت أقرأ كتاباتك متأخرا ولكن اعذرينى لانشغالى بالامتحانات وياريت تدعولى كلكم حتى نعرد كلنا ونحيى المنتدى احياءة جديدة ونتقابل جميعا فى افكارنا .

المهم أهنئك جدا لأنى أرى وأشعر بنجاح يومياتك وجذبها للقراء فى المنتدى كله.

ولكن اسمحيلى بتعليق بسيط ممكن يكون أخى وحبيبى عاشق الصداقة أشار اليه وهو ألا تتحدثى عن موضوع الأولاد والبنات بهذه الطريقة وأنا لا أحذرك من قيام حرب لأن الحرب عندما تقوم تكون بين أطراف متكافئة تقريبا الى حد ما ولكن نحن نعلم اننا الرجال وأنتم النساء وأكتفى بأن أوضح لكى هذا السبب وان كان احد اعضاء المنتدى اقتنع بكلامك بهذه الطريقة ؛ فانا وانتى وكل الناس جميعا تعلم أن لكل قاعدة شواذ فأرجو أن تعتبريه (شاذ قاعدة الجال ).

وفقكى الله فى يومياتك

وعندى لكى نصيحة أخرى أرجو تقبلها وهى تتعلق بالموضوع الأخير وهو طب الريف أو طب الأرياف المهم المعنى المراد .

وهو ان الريف به طب آخر غير الطب البديل طريقة متبعة منذ قديم الزمن واعتقد انها ليست موجودة الا فى الريف وهو تميز للأرياف وهو الهواء النقى أو بمعنى آخر المصفى لآخر ذرة فكفى ثم كفى ان تجلس فى الخضرة وتستنشق الهواء النقى يا له من احساس يشفى من كل الأمراض وخاصة أصعب الهموم ................

أما اذا زاد عنصر آخر على هذه العناصر (.......) فسوف يكون الوضع مختلفا

طبعا كل واحد فكر فى العنصر ده على حسب هويته بس انا مش عايز حد يفهمنى غلط انا أقصد (الميــــــــاه النقيــــــــــة)

شارك هذه المشاركه


رابط المشاركه
شار ك علي موقع اخر

على فكرة التعليق اللى فات كان على الجزء الأخير من الموضوع اما التعليق ده فعلى الجزء الأول اصل احنا فى علوم اتعلمنا ان احنا نمشى الحياة بالمقلوب يعنى نبدأ من الآخر ونرجع للأول أو ممكن نكون أذكى من الناس وبنحب نجيب النهاية والمفيد باختصار

بس انا دلوقتى تأكدت ان البداية بيكون لها تأثير آ خر

المهم بجدبجد الموضوع جميل جدا بس نفسى اعرف اجابات لبعض أسئلة بتدور بداخلى أحب أسألهم ل(angel_of_mercy & نجمة الكتب )

هل اسلوبكم فى الكتابة ده لم يتغير منذ دخول الكلية ؟ أنا من رأيى ان الإجابة هتكون لأ أصل انتو لوبتشوفو امتحانات الشفوى بالطريقة دى وما اتغيرتوش ده يبقى انتوا عظماء

تانى حاجة هل انتو من اللى كانوا عايزين يدخلوا اسنان فى الأول ولا ايه ؟

فى حاجة محيرانى ايه الفكرة فى ان تاسيس الكليات العملية الصعبة بيكون بالقرب من مشتشفى الأمراض النفسية والعصبية .........

يعنى احنا مثلا فى كلية العلوم فى بنها لونظرنا من احدى نوافذ المدرجات بنشاهد اللى هما فى نعيم زى ما بيقولوا وايه كلهم مواهب اللى بيزغرط واللى بيصوت واللى بيحكى قصة حياته والا بقى اللى بيغنى دا كله كوم واللى بيغنى كوم تانى خالص احنا بنكون موجودين ماديا فى المحاضرات ولكن كلنا آذان صاغية للى بيغنى ومع ذلك مش عارفين نترجم حاجة من كلامه

المهم ياريت تتابعى يوميات وكثفى ولا تكتفى يدكى عن الكتابة

شارك هذه المشاركه


رابط المشاركه
شار ك علي موقع اخر

شكرا علي كل الردود الجميلة للموضوع

 

و بالنسبة ليك ياعمرو

 

اولا كفارة يامعلم بالنسبة للامتحانات و ربنا يوفقك

 

ثانيا كل طلبة طب رجالة و بيوقفوا وقفة رجالة قدام كل الصعوبات دي

 

و احلي حاجة فيهم انهم بياخدوا الامور بضحك و سخرية عشان مايحصلهمش حاجة و البلد عايزاهم

 

لاننا لو فضلنا ندقق علي كل امورنا وناخدها في نفسيتنا ،نبقي نستاهل اللي يجرالنا

 

و علي العموم انا عندي مركز للفضفضة النفسية ، لكل واحد عايز يفضفض و مش لاقي مكان

 

و هنكرمكم في الفزيتة

شارك هذه المشاركه


رابط المشاركه
شار ك علي موقع اخر

شئ غريب اوي انك تشوف دكتور مدخن ، الغريب ان معظم اللي عندنا في الكلية بييدخنوا سجاير

و تساله بتدخن ليه؟ يقولك من الهم اللي بنشوفه ..طب ياعم ماهي البنات بتشوف اللي انت بتشوفه

ما بيشربوش سجاير و لا شيشة تفاح حمي ..

المهم ان كل الدكاترة عارفين ان السجاير وسيلة للموت البطئ و هي اساس في كل الامراض و البلاوي اللي بتحصل

بس بيتذاكوا علي نفسهم ..

و تلاقي الدكتور من دول يشد النفس من السيجارة و لا اجدعها مدمن

حقيقي منظر مش لطيف خالص لان احنا طبيعي لو دخلت المدرج هتلاقي مناظر العيال زي مايكون قرش حشيش و نشرينه في المكان . :o

 

الحكاية دي بتفكرني بموقف ليا كنت قاعدة علي سلالم المدرج (كالعادة) و لقيت عالسلالم علبة سجاير و مشط كبريت

كان نسيها زميل ، فاخدت العلبة و بعزم علي زمايلي منها (كهزار طبعا ..دة احنا مبطلين بالعافية!)

لقيت الاخ ده ورايا !! وطبعا ما قولكمش كان ايه احساسي ساعتها؟.

فعدلت نفسي و قلتله : مش عيب يادكتور يامحترم تشيل مشط كبريت مش ولاعة...

 

 

 

مع تحياتي

angel_of_mercy

شارك هذه المشاركه


رابط المشاركه
شار ك علي موقع اخر
اسمحيلى بتعليق بسيط ممكن يكون أخى وحبيبى عاشق الصداقة أشار اليه وهو ألا تتحدثى عن موضوع الأولاد والبنات بهذه الطريقة وأنا لا أحذرك من قيام حرب لأن الحرب عندما تقوم تكون بين أطراف متكافئة تقريبا الى حد ما ولكن نحن نعلم اننا الرجال وأنتم النساء وأكتفى بأن أوضح لكى هذا السبب وان كان احد اعضاء المنتدى اقتنع بكلامك بهذه الطريقة ؛ فانا وانتى وكل الناس جميعا تعلم أن لكل قاعدة شواذ فأرجو أن تعتبريه (شاذ قاعدة الجال ).

 

أحب أرد بالنيابه عن angel_of_mercy فى الجزء ده بس لو تسمحلى ..... أصل عمر علوم زيى ونعرف نتفاهم مع بعض !!!

إيه يا عموووور إنت زعلان قوى كده ليه .. الموضوع هزار مش أكتر وحتى تحذيرى ل angel_of_mercy كان هزار ... كلنا إخوات هنا فى المنتدى ومش بناخد كلام بعض على إنه تريقه أو إستهزاء والعرابى مقالش اللى قاله إلا من منظور الفكاهه برضه "حلوه منظور دى" ... الموضوع بسيط ... ولاحظت دفاعك عن الريف ... أختى angel_of_mercy متقصدش الغلط فيهم برضه .... ده ترويح عن أنفسنا فى الأوقات دى اللى كلنا فيها أعصابنا مشدوده هزار يعنى .. وبلاش الزعل والغلط ده ؟؟؟

وبعتزر بالنيابع عن عمرو لأخى العرابى على الغلط وإن كان بسيط ... وياريت يا جماعه تاخدوا الموضوع ببساطه ... الله أسيبلكم المنتدى وأمشى يا واد ويا بت إنتا وهو وهى وهما وهن وهره ...

شارك هذه المشاركه


رابط المشاركه
شار ك علي موقع اخر

اولا اشكرا ياباشا علي الدفاع المستميت ده ، نردهالك انا و العرابي في خناقة و لا شدة قسم ان شاءالله

ثانيا انا مازعتش من الحكاية دي لان اولا عبدالله كان بيهزر بطريقته المعهودة و ماغلطش لان دي وجهة نظره حتي لو بهزار

و برضه عمرو ما غلطتش لان دي وجهة نظره ، الاختلاف لا يفسد للود قضية

و اسفة اني تسببت بخلاف بسيط في الاراء بس ده مهم عشان تفكوا كدا و تلعلعوا

ببساطة انا عايزة كل واحد فيكم يقول رايه ( عايزاكم تولعوا في المنتدي!)

 

واهو منكم نستفيد

و معلومة لعبدالله انا بتعجبني طريقة تفكيرك جدا و لايهمك ،احنا في ظهرك يامعلمي

 

و حقيقي الموضوع مش مستاهل زعل

شارك هذه المشاركه


رابط المشاركه
شار ك علي موقع اخر

ليه ياجماعة كل ده والله انا ماقصدتش اى زعل دى وجهة نظرى فقط بجد بجد ما تخيلتش ان الموضوع يكبر بالشكل ده وبالنسبة لعرابى انا ما قصدتش الطريقة اللى انتوا بتوصفوا فيها دى اما بالنسبة للأرياف انا حبيت اوضح شئ واقعى وحقيقى ده مش دفاع يا كرينكل

من الظاهر ان حالة التوتر الموجودة بسبب الإمتحانات أثرت عليا وانا بكتب

وبعدين انا تقريبا ما نظرتش من منظور الفكاهة لحظتها علشان انا جربته كتير فى المعمل وما كانتش النتائج بتكون دقيقة وانا احب الدقة

وبعدين يا كرينكل انت هتدافع عنى فى البسيطة وتحملها عليا بجميلة لأ دانا هخليك للكبيرة

يعنى مثلا angel_of_mercy عايزة تولع فى المنتدى حاضر من عينيا بس للأسف هنجيب الولاعة منين :unsure: انا مش بدخن

احنا هنولعة بطريقة تانية احنا نعمل حزبين

:wacko: ( حزب يؤيد الشدة والجدية أقصد بالعربى سى السيد ) :huh:

( وحزب شبابى مودرن يعنى يؤيد منظور الفكاهة فى رأيه ) :P

بالطريقة دى تنشأ حرب ساخنة وتزيد الولعة لو استغلينا وجود كل طلبة الطب ( بيعرفوا يضربوا حقن يعنى ) بس ويولع المنتدى على راس كرينكل :D

شارك هذه المشاركه


رابط المشاركه
شار ك علي موقع اخر

Join the conversation

You can post now and register later. If you have an account, sign in now to post with your account.

زائر
اضف رد علي هذا الموضوع....

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.


×
×
  • اضف...

Important Information

By using this site, you agree to our Terms of Use, اتفاقيه الخصوصيه, قوانين الموقع, We have placed cookies on your device to help make this website better. You can adjust your cookie settings, otherwise we'll assume you're okay to continue..