سلسلة صح وغلط وقصة طريفة {الحلقة السادسة والعشرون}

[ali desoky 391]

سلسلة صح وغلط وقصة طريفة

{الحلقة السادسة والعشرون}

 

 

 

 

 

الحمد لله وحده والصلاة والسلام على من لا نبى بعده

 

 

 

ومع الحلقة رقم 26

 

من سلسلة

 

" صح وغلط وقصة طريفة "

 

حلقة خاصة

 

بمناسبة ليلة 27

 

_____________________________________

 

1- صح :-

 

معلش يمكن حنعيد اللى قلناه من حلقتين تانى بس لأهميته الشديده

 

الليلة إن شاء الله ليله فرديه.... هي ليلة السابع والعشرين .. و وارد جداااا جداااااا أنها تكون ليلة القدر

 

فبنأكد تانى أننا نحرص على ان لا نعصى الله فى النهار حتى يوفقنا الله فى الطاعه باقى اليوم وخصوصاً فى الليل

واليوم هو يوم الجمعة يعنى أجازه ونصلي الجمعه ونقعد في المسجد ونقرأ قرآن بالنهار

 

وبالليل نخلي الليل كله قياااام .. تراويح وتهجد .. مش حاجه واحده منهم .. غدا السبت أجازه يعنى

 

خلاص رمضان بيخلص .. يا نلحق يا منلحقش

وتانى بنفكّر بعض بدعاء ليلة القدر

 

عن عائشة -رضي الله عنها- قالت: قلت يا رسول الله، أرأيت إن علمت أي ليلة ليلة القدر، ما أقول فيها؟ قال: قولي: " اللهم إنك عفو تحب العفو فاعف عني"

 

اذن فلنكثر من ترداد هذا الدعاء هذه الليلة .. ولنحرص على قيام هذه الليلة

ونتذكر سريعا قول رسول الله صلى الله عليه وسلم:

من قام ليلة القدر إيمانا و احتسابا غفر له ما تقدم من ذنبه

فهذا فضل عظيم لا ينبغي لمسلم أن يفوته ..فما احوجنا أن يُغفر لنا ما تقدم من ذنوبنا.

 

والمتبقي أربع ليال تقريبا .. فالمفروض علينا استثمار تلك الليالي لعلنا نرزق بقيام ليلة القدر إيمانا بالله واحتسابا

 

واحرص على ألا تُحرَم قيامها

 

ففي الحديث الذي حسّنه الشيخ الألباني رحمه الله :

 

" إنّ هذا الشهر قد حضركم وفيه ليلة خير من ألف شهر، من حُرِمها فقد حرم الخير كلّه، ولا يحرم خيرها إلاّ محروم

 

واللى يقدر يصلي التراويح ويفضل في المسجد لحد متخلص صلاة التهجد يعمل كده

 

عايزين يبقى هدفنا ندرك ليلة القدر ونحسن قيامها إيمانا بالله وإحتسابا

 

ونكون ممن قام رمضان إيمانا واحتسابا بفضل الله تعالى

وتقبل الله منا ومنكم

 

ولا تنسونا و المسلمين من صالح دعائكم في هذه الايام المباركه

 

 

____________________________

 

2 - غلط :-

 

غلط انهارده مش حديث - بس متتعودوش على كده -ء

 

غلط النهارده متعلق بحاجه بتحصل في ليلة 27

 

معظم المساجد بتختم في الليلة ديه .. وبيبقى فيه دعاء بعد مبيختموا ..

 

الغلط بقه اللى حنتكلم عنه متعلق شوية بالدعاء نفسه

 

ازاى الكلام ده ؟؟

 

يعنى تلاقى بعض المساجد بيطوّل جدااااااااااااااااااااااا في الدعاء

 

يعنى ليلة 27 ديه عند البعض قراءة القرآن فيها لا يتعدي ربع ساعه و أكثر من ساعتين أو ثلاث في الدعاء

 

ده مش من هدى النبي عليه الصلاة والسلام

 

يعنى مش نخلي مدة الدعاء أكثر من مدة القراءة

 

والتطوييييييييييييييييييييييييل ده مخالف للسنة .. فالرسول كان يدعو بجوامع الكلم والدعاء الوارد في القنوت ليس بهذا الطول

 

فالتطويل ده فعلا ناس بتتعب بجد .. وناس بيبقى نفسها تخلص وناس نفسها تخرج من الصلاة

 

والدعاء مش مكان للموعظة .. لشرح الجنة وما فيها والنار وأهوالها والقبر وما فيه من وحشة وظلمة

 

كمان فيه بعض الأئمة كأنها بتستدرك على الرسول عليه الصلاة والسلام .. ازاى ؟؟

 

يعنى ورد في دعاء القنوت : وقنا شر ما قضيت

 

البعض يقول : وقنا واصرف عنا برحمتك شر ما قضيت .. طبعا التزام السنة افضل واكمل

 

وبرضه السجع المبالغ فيه في الدعاء .. يقعد يألف أدعية كلها على سجع .. كأنه شعر

 

قال ابن عباس رضى الله عنهما : " فانظر السجع من الدعاء، فاجتنبه فإني عهدت رسول الله صلى الله عليه وسلم وأصحابه لا يفعلون إلا ذلك الاجتناب "

 

فعايزين نروح لمسجد يقرأ قرآن في القيام في ليلة 27 .. مش بس دعاء

 

ولما يدعي دعاؤه يكون مش طويييييييل جداااااااا كده

 

وميكونش من الناس اللى بتتكلف انها تقعد تألف أدعيه مبنيه على السجع .. كأنه شعر

 

الدعاء اللى من تأليفهم ممكن يخش في ساعه مثلا .. ده من التكلف وزي مورد عن ابن عباس .. فاجتنبه

 

والحديث : من قام ليلة القدر

 

ودعاء ليلة القدر الثابت : اللهم انك عفو تحب العفو فاعف عني

مفيش التطويييل ده في الدعاء في ليلة 27

 

خصوصا ان مفيش أى جزم أنها ليلة القدر

 

دعاء ليلة القدر مش دعاء مدته ساعه ونصف أو ساعتين ونصف

 

أنا عارف أن كثيييييير حيزعل مني

 

بس احنا اتفقنا منزعلش من بعض واللى حييجي يتكلم معايا أو يتخانق معايا

 

لو سمحتوا زي متفقنا

 

 

برااااااحه

 

 

_______________________

 

3- قصة طريفة :-

 

ذكر ابن الجوزي -رحمه الله- :-

 

" قال يحيى بن جعفر : كان لي جار من أهل فارس ، وكان طول الليل يبكي ، فأنبهني ذات ليلة بكاؤه ونحيبه وهو يشهق ويضرب على رأسه وصدره -حيموت من العياط- ويردد آية من كتاب الله تعالى ، فلما رأيت ما نزل به قلت : لأسمعن هذه الآية التى قتلت هذا وأذهب نومي -صحّاه من أحلى نومه- ، فتسمعت عليه فإذا الآية : وَيَسْأَلُونَكَ عَنْ الْمَحِيضِ قُلْ هُوَ أَذًى " فعلمت أنه مغفل .

 

!!!!!

 

 

لا تعليق !!ا

 

المشكلة فعلا وخصوصا في ليلة 27 ديه بيحصل حاجات زي كده من المصلين ..

 

ازاى بقه الكلام ده ؟؟

 

كثير بيقعدوا يصرخوا ويعيطوا وهما أصلا مش سامعين الامام بيقول ايه !!ا بيعيطوا بسبب صوت الإمام بس .. من غير ميسمعوا هو بيقول ايه

 

هما عمّالين يعيطوا ويصرخوا وخلاص .. ازعاج وخلاص زي الجدع اللى فوق ده

 

وفيه حاجتين غلط ظاهرين أوى بيبقوا عند بعض المصلين

 

الحاجه الأولى :- كثير تلاقى واحد جنبك بقه يقعد يعيط بصوت عاااااالي يخليك مش عارف تركز ولا تسمع أصلا الإمام بيقول ايه

 

يا جماعه البكاء يكون لا يكون بالصريخ ده .. فعلا بيبقى إزعاج جدااا

 

وده مش من هدى النبي عليه الصلاة والسلام

 

النبي كان يكتم بكاءه في صدره حتى يكون له أزيز كأزيز المرجل

 

يعنى زي صوت غليان القدر على النار .. صوت مش ملحوظ

 

وحتى ابن مسعود رضى الله عنه محسّش ببكاء النبي عليه الصلاة والسلام وهو يقرأ عليه سورة النساء

 

لحد منظر له فوجد عيناه تذرفان - صلى الله عليه وسلم-

 

البكاء مش بالصريخ والصوت العالي .. مش لازم نزعج ونضايق اللى حوالينا ونخرجهم عن الخشوع

 

الحاجه الثانية :- رفع الصوت قوىىىىىى بقول آمين والتطويل فيها

 

يعنى ايه ؟؟

 

الإمام بيدعو .. تلاقي واحد جنبك

آمييييييييييييييييييييييييييييييييييييييين

 

عقبال ميخلص آمييين بتاعته ديه يكون الإمام خلص الدعوه اللى بعدها يروح واخد نَفَسْ سريع وقايل آمييييييييييييييييييييييييييييييييييييييييييييين

 

يا سيدي انت اصلا سمعت الدعوه ايه ؟!!! ولا هو آميييييييييييييييين وخلاص

 

ويخليك جنبه مش عارف أصلا الإمام بيقول ايه ..

 

أنا ابتليت بمثل هؤلاء 3 مرات لحد دلوقتى .. فاكرهم بالعدد بسبب المعاناة اللى عانيتها جنبهم

 

واحد منهم بقه مش آميييين وخلاص .. لا

 

الإمام يدعو .. وده يروح : آمييييييين آميييييييين آمييييين يارب العالمين آميييييييييين

 

كل مره دعوتين يطيروا مني بسبب الأخ ده .. ويروح واخد نَفَس برضه ويكرر الكوبليه بتاعه !!!!ا

 

مش ده التأمين على الدعاء .. مش ازعاج للى حواليك !! مش تخلي اللى جنبك عايز يزقّك من جنبه علشان مش عارف يسمع

 

و أخر واحد بقه ده اللى عدّى .. تخطى كل الحدود

 

مكتفاش بانه يقول آميييين بصوت عالي ويقول : آمين يا رب العالميييييييييييين

 

لاااااا .. ده بدأ هو يدعي مع نفسه !!!ا

 

 

يعنى والشيخ بيدعى وده جنبي عمّال : يارب اغفرلي يارب اغفر لي يارب ارضى عنى يارب ارضى عنى

 

ده والإمام بيدعي !!! وبصوت عالي !!! مش فاهم يعنى نروح نمشّي الإمام ونطلعك انت تدعي !!ا

 

مخلاص كان يقعد في بيته ويدعي هو بقه !! جاى المسجد ليه ؟؟

 

فعايزين نحرص ان منزعجش اللى بيصلي جنبنا ومنخرجوش عن الخشوع

 

نقول آمين بصوت هادئ كده ومنطولش فيها علشان نسمع الدعوة اللى بعدها

 

آمين اللى تتقال بصوت عالي آمين في الفاتحة

 

الموضوع مش اصطناع .. مش بالصوت العالي وحتقدر تسمّع كام واحد صوتك

 

الموضوع مش كده

 

وبلاش ازعاااااااااااج زي الجدع اللى فوق ده

 

 

_________________________

 

كده خلصت الحلقة الخاصة الطويييييييييييييييييييييييييله جدا

 

الحلقة السادسة والعشرون يارب متكونوش زهقتوا ومتكونوش حتتخانقوا معايا

 

وبكره إن شاء الله نلتقى في السابعة والعشرين إن شاء الله

 

وجزاكم الله خيرا

 

لمتابعة السلسة كامله

هنا

 

سلسلة صح وغلط وقصة طريفة

 

 

__________________________________________

ابسط ما تساهم به نشر الحلقات ولو بالايميل

[بنت مصرية 66]

بارك الله فيك

 

اسال الله انه لو ليلة 27 كانت هي ليلة القدر

ان احنا جميعا نكون من اللي قد غفر لهم وعتقاء الله في رمضان

جزاك الله كل خير يا مدرس ياللا ياشباب

يارب يارب لاتجعلنا من المحرومين

 

[فخورة بنقابي 30]

بارك اللة فيك أخي مستر علي علي موضوعك الجميل جعلنا اللة واياك من المغفورين لهم في هذا الشهر المبارك وغفر اللة لك ورضي عنك وقدر لك سعة الرزق وحسن الخاتمة وجزاك اللة عنا خير الجزاء

[ali desoky 391]

بارك الله فيك

 

اسال الله انه لو ليلة 27 كانت هي ليلة القدر

ان احنا جميعا نكون من اللي قد غفر لهم وعتقاء الله في رمضان

جزاك الله كل خير يا مدرس ياللا ياشباب

يارب يارب لاتجعلنا من المحرومين

 

 

 

 

 

اختي بنت مصريه

اسعدتني بمرورك بحلقات السلسلة وردودك الجميله طوال الشهر الكريم

بارك الله فيك يا اختي

وجزاك كل خير

وكل عام وانت بخير وصحه وسعاده دائما

 

 

بارك اللة فيك أخي مستر علي علي موضوعك الجميل جعلنا اللة واياك من المغفورين لهم في هذا الشهر المبارك وغفر اللة لك ورضي عنك وقدر لك سعة الرزق وحسن الخاتمة وجزاك اللة عنا خير الجزاء

 

 

 

 

اختي سما

سعيد جدا بمرورك الكريم

ودعواتك الجميله

بارك الله فيك يا اختي

وكل عام وانت بخير