صاحب الصورة الشاعر على سلامة

[الجندى المجهول 37]

صاحب الصورة

 

الشاعر على سلامة

 

 

 

نداء..

 

من يتعرف على صاحب هذه الصورة

 

رجاء..

 

يقوله ارجع

 

قلب أمك زى ما هو..

 

شفاف..

 

يقلق لما تغيب..

 

ويضمك لما تخاف

 

ارجع يا ابنى.. الله يخليك..

 

قلبى اللى جرحته

 

قادر يداويك..

 

ارجع..

 

ولو مش عجباك الخبيزة

 

اعملك ملوخية.. ولا سبانخ..

 

ارجع.. غيبتك طالت

 

بصراحة..

 

ده مش وقت الدلع البايخ..

 

نداء..

 

من ميادين مفتوحة على البحرى

 

وقلوب مليانة حكايات..

 

من يتعرف على صاحب هذه الصورة

 

بنفس البيانات..

 

الاسم: الأمن المصرى

 

والعمر: سنين..

 

لون عيونه: زى بقيت إخواته حلوين

 

وإن كان ع النظرة المكسورة

 

قلب أمك يقدر يداويها..

 

ارجع..

 

والبدلة السودة ارميها..

 

أنا جيبالك بدلة جديدة.. لون الحرية

 

بنجوم وشرايط..

 

ورسمت عليها قلبى المفتوحلك

 

وطريق العشق..

 

مش محتاج لخرايط.. ارجع

 

مستكتر على أمك بعد سنين الحزن

 

ترجع تفرح زى زمان..

 

ارجع تانى..

 

تحت البلكونة..

 

جنب الدكان..

 

مش خايف من برد الليل

 

ولا م العفاريت

 

ولا م الأحزان..

 

احمى سور المستشفى

 

لسه جراحنا محتاجة أمان

 

ارجع.. إنسان

 

عنده فرصة تانية للحياة..

[عاشق الصداقه 525]

جميل ورائع جداً

تسلم ايد الشاعر على سلامه وتسلم ايديك يا جندينا الغالى على القصيده

 

تم التقييم

[الجندى المجهول 37]

وتسلملى يارب

ربنا يكرمك

جزاك الله خيرا يا حبيبى فى الله

جعل الله كل مجهودك فى ميزان حسناتك

[نـــــــــــور 199]