اذهب الي المحتوي
منتديات ياللا يا شباب
بنت مصرية

تفتكر مين هو ؟؟؟

Recommended Posts

article-page1_tcm6-1475884.jpg

عارف لعبة حبل المشنقة ؟ اللعبة دي اللي كنت بتلعبها في المدرسة بإنك تختار كلمة وترسم شًُرط بعدد حروف كلماتها لصحابك وهما يخمنو حروف.. ولو صح تكتب الحرف في مكانه ولو غلط ترسم حتة من حبل المشنقة..

تعالى نلعب اللعبة دي بقى.. احنا هنحكيلك كام قصة فيها شخص ناقص.. واللي عليك إنك تعرف مين الشخص اللي ناقص ده..

وربنا يستر وميخلصش الموضوع بـ"خنقة" !

1- رشا سمعت عن قرية في الجيزة فقيرة أوي.. راحت شافتها مرة ولقت إنهم فعلاً مش لاقيين ياكلو.. فراحت قالت لأصحابها عالبلد دي.. وجت واحدة بنت حلال قالتلها إنها هتتبرع بأكل عشان الناس دي.. بس هي مش هتقدر تودّيه.. فراحت رشا بنفسها وأخدت الأكل .. لكن مقدرتش تاخد كل الأكل طبعًا لأنها كانت بنت ولوحدها.. وكمان أهلها اعترضو إنها تروح حتة بعيدة كدة لوحدها كتير ..

رشا كانت زعلانة جدًا لأن فيه ناس كتير عرضو عليها إنهم يتبرعو بأكل بس بشرط إن حد يوصله.. ومكانش فيه حد غيرها..

تفتكر عشان القصة دي تنتهي نهاية سعيدة.. والناس الفقيرة دي يوصللها الأكل.. كان مين اللي ناقص ؟

ا-------الحل

*********

article-page3_tcm6-1475861.jpg

دار أيتام عملت رحلة للأطفال اللي موجودين فيها وطلع معاهم بنات متطوعات عشان يفرحوهم في اليوم ده، بس للأسف معرفوش يلبّو أهم طلب الولاد طلبوه منهم وهما إنهم يلعبو معاهم ماتش كورة ! ده بغض النظر إن أفكار اللعب اللي عند البنات خلصت على نص اليوم..

تفتكر مين الشخص اللي كان ناقص عشان اليوم ده يكمل بشكل يفرّح الأيتام فعلاً؟

الحـ-----

***********

نشاط المكفوفين في الجمعية الخيرية الفلانية

article-page4_tcm6-1475862.jpg

نشاط المكفوفين في الجمعية الخيرية الفلانية حد اتبرعله ببرينتر يطبع بطريقة برايل اللي المكفوفين بيقدرو يقرو بيها..

المشكلة الوحيدة إنهم كانو محتاجين يكتبلهم الكتب اللي المكفوفين محتاجينها على الكمبيوتر عشان يقدرو يطبعوها..

تفتكر مين الشخص اللي كان ممكن يساعد المكفوفين في دراستهم وفي إنهم يقرو زي أي حد تاني؟

الحل ----

**********

 

لحاج سامي

article-page5_tcm6-1475863.jpg

الحاج سامي اللي عايش في دار مسنين كان بيشتكي زمان من إن ولاده مش بيزوروه إلا في المواسم..

بس دلوقتي اتعوّد عالوضع وبقى عنده شكوى جديدة.. إن مفيش حد يلعب معاه طاولة (بعد ما غلب كل اللي في الدار وزهق منهم) !

سهى المسئولة عن الدار بتقول إن رغم إن دي مشكلة تافهة.. بس هو عشان كبير في السن الموضوع كبر في دماغه وقَلَب باكتئاب بجد..

تفتكر مين اللي يقدر يخرج الحاج سامي من اكتئابه ؟

الحل.....

**********

أميرة اشتركت في حملة توعية

article-page6_tcm6-1475866.jpg

أميرة اشتركت في حملة توعية ضد مرض شلل الأطفال، وفي الحملة قرروا إنهم يعملو مسرحية في مدرسة علشان يوصلو للأطفال معلومات عن المرض وخطورته والوقاية منه..

أميرة بتعرف تكتب سيناريو حلو.. لكن مبتعرفش تمثل.. رغم إن الأدوار المطلوبة كانت بسيطة جدًا ومش محتاجة أكتر من حد حافظ كام سطر..

تفتكر مين اللي كان ممكن يساعد أميرة في إن مسرحيتها توصل لأطفال المدارس ؟

الحل...

*********

هدوم كتير

article-page7_tcm6-1475869.jpg

هدوم كتير جت لجمعية خيرية كتبرع من الناس.. لكن المشكلة إن الهدوم اتكوّمت واتلخبطت ومبقاش حد عارف الكومة دي تنفع أطفال ولا كبار ولا إيه بالظبط..

تفتكر مين اللي كان ممكن يساعد في فرز الهدوم دي عشان توصل للي يستحقها بسهولة وبسرعة ؟

*********

دكتور مشهور

article-page8_tcm6-1475872.jpg

دكتور مشهور قرر إنه يروح يعالج عيانين بالمجان لمدة يوم واحد في الجمعية الخيرية الفلانية..

بس على الرغم من إنهم كانو فاكرين إنهم كده حلّو مشكلة العيانين الفقرا.. إلا إنهم لقو نفسهم قدام مشكلة أكبر وهي تنظيم دخول الناس اللي جت بالكوم عشان الدكتور المشهور يكشف عليها..

حتى لو مش محتاجة.. وحتى لو معندهاش حاجة أساسًا ! تفتكر مين اللي كان ممكن يقعد عالباب وينظم دخول الناس اللي الجمعية ادّتهم إذن بالكشف لأنهم محتاجين فعلاً ويمنع دخول الناس التانية ؟

********

الـــــــــــــــحل

أنـــــــــت

article-page9_tcm6-1475874.jpg

متستغربش إن الحل إنت .. وإن عدم وجودك هو اللي خنق الراجل الغلبان ده ...

كل القصص اللي قريتها فوق دي.. انت الشخص اللي كان ناقص..

عمرك ما سألت نفسك.. أنا ليه مخلوق أساسًا ؟

طب بلاش السؤال العالي ده.. ننزل شوية ونسأل.. هل أنا وجودي في الحياة يفرق ؟ يعني لو مُت بكرة مثلاً بعد الشر يعني.. هل في أي حد هيتأثر ؟ هل في حاجة هتقف ؟

للأسف ممكن أوي تكون من الناس اللي هتجاوب عالسؤال ده بلأ.. أنا فعلاً وجودي زي عدمه في الدنيا.. لا بصرف على عيلة فهتتأثر بغيابي.. ولا بعمل حاجة محدش يقدر يعملها غيري فالحاجة تبوظ.. يعني مالآخر لو مُت بكرة هيعيطو عليا يوميها وخلاص !

من هنا طلعت فكرة العمل التطوعي.. إنك تعمل حاجة انت مش مضطر ليها.. بس عشان تحس إنك ليك فايدة.. لو تفتكر المثال الأولاني..

تخيل لو انت بدل ما تطلع رحلة مع صحابك.. رحتو قرية زي دي.. هتاخد نفس وقت الرحلة.. ويمكن جهدها كمان (لو انت من النوع اللي بيهيّس بذمة في الرحلات يعني).. بس أكيد تأثير وجودك فيها مش هيبقى زي وجودك في الرحلة..

وفي القصة التانية.. تخيل كانت هتفرق قد إيه مع الجمعية دي لو انت اديتلهم الورق اللي انت مش محتاجه.. مجلات وجرايد قديمة..

ورق ذاكرت فيه السنة اللي فاتت وخلاص ملوش لازمة.. فيه ناس محتاجة كان ممكن تستفيد بفلوس بيع الحاجات اللي هترميها دي..

تيجي تقوللي طب أنا معنديش مواهب خاصة يعني عشان أشتغل في العمل التطوعي.. هقوللك مبتعرفش تلعب ؟! تخيل لعبك ده ممكن يفرق قد إيه مع طفل يتيم مش لاقي حد يلعب معاه.. أو راجل عجوز مبقاش عايز من الدنيا غير حد يلعب معاه ؟!

وبعدين مفيش حد معندوش مواهب.. إنك تعرف تتعامل مع الناس دي في حد ذاته موهبة تقتدر تستخدمها في إنك تشارك في الأنشطة اللي فيها تعامل مع الناس زي المعارض الخيرية أو الحاجات اللي محتاجة تنظيم..

إنك بتعرف تعمل تشات عالنت ده في حد ذاته موهبة.. لأن معناه إنك بتكتب بسرعة عالكيبورد فممكن تكتب ورقة ولا اتنين لواحد كفيف يفيدوه بقيت عمره..

لو انتي بتحبي ترتبي هدومك أو بتحبي الخروج دي موهبة.. ممكن تشتركي في فرز الهدوم اللي بتيجي للجمعيات الخيرية.. وممكن تسنّدي واحدة في مشوار سواء بالمواصلات أو بالعربية..

يعني مالآخر.. مفيش حد معندوش حاجة يقدمها لمجتمعه.. كلنا عندنا.. بس السؤال بقى.. هل احنا مهتمين إننا نأثر في الحياة.. وإننا منبقاش زي -وسوري في الكلمة- الحيوانات جينا الأرض عشان ناكل ونشرب ونتجوز ونموت وخلاص..

ولا إيه ؟.....

سؤال من ناس حبت التطوع وبتقلكم والله هو كلام في المفيد

م ن ق و ل

تم تعديل بواسطه بنت مصرية

شارك هذه المشاركه


رابط المشاركه
شار ك علي موقع اخر
متستغربش إن الحل إنت .. وإن عدم وجودك هو اللي خنق الراجل الغلبان ده

 

والله معكي كل الحق بنت مصرية التراخي عن فعل الواجب هو من سيخنقنا

ربنا يبارك فيكي ويجعل الموضوع في ميزان حسناتك ونكون معا للأفضل إن شاء الله

شارك هذه المشاركه


رابط المشاركه
شار ك علي موقع اخر

رائع بكل المقاييس

 

العمل التطوعي..

 

احب ان اضع وصف بيسط للعمل التطوعى

 

وهو انه عبارة عن .....

 

3G

 

G= give

G= get

G= go away

 

ولتعلم جيداً

 

انك فى العمل التطوعى

 

انت ... المستفيد الاول من هذا العمل

 

من خلال ثقل المهارات واكتساب الخبرات

 

ولو مش مصدقنى ... جرب !!!!

 

--------------------------

 

احترامى وتقديرى

شارك هذه المشاركه


رابط المشاركه
شار ك علي موقع اخر

حب التطوع حب المشاركه

 

حتي مواضيعك فيها EVC

 

بس برضه حلو اوي يا بنت مصريه

ربنا يكرمك يا رب

شارك هذه المشاركه


رابط المشاركه
شار ك علي موقع اخر

Join the conversation

You can post now and register later. If you have an account, sign in now to post with your account.

زائر
اضف رد علي هذا الموضوع....

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.


×
×
  • اضف...

Important Information

By using this site, you agree to our Terms of Use, اتفاقيه الخصوصيه, قوانين الموقع, We have placed cookies on your device to help make this website better. You can adjust your cookie settings, otherwise we'll assume you're okay to continue..