عجبا لحال البشر

[رجل من الصحراء 36]

سبحان الله على حالنا كبشر، مررت بمواقف كتير حصلت معايا شخصيا ومع اصدقائي وزملائي ومعارفي اكتشفت فيها ان احنا بداخلنا تناقضات كتيرة جدا.

 

فمثلا واحنا اولاد صغيرين كنا بنحلم ان احنا نكبر في السن و نعتمد على انفسنا ونتزوج ونخلف ويبقى عندنا عيلة واسرة وشوية شوية نكبر اكتر واكتر ويبقى عندنا احفاد وبمرور الزمن نكبر اكتر في السن لغاية مانوصل للسن اللي بنحتاج فيه لمساعدة كتير من الناس مساعدة في الاكل والشرب والحركة والنوم وكل حاجة لان خلاص وصلنا لسن الشيخوخة وبقى السن كبير مايسمحش ان احنا نعمل حاجة بنفسنا زي زمان.وساعتها نتمنى لو رجعنا تاني شباب زي زمان عشان نعرف نخدم نفسنا بنفسنا ونعمل كل حاجة بنشاط وحيوية الشباب.

 

حتى في الدراسة بعد مانتخرج نبدا ندور على شغل ومش عايزين قعدة البيت وعايزين نشتغل اي حاجة المهم الواحد ميقعدش ويجيلنا الشغل ونسيبه ودور على غيره ونسيبه ونفكر في شغل الحكومة اه مرتب قليل بس ياعم ده حكومة ان فاتك الميري اتمردغ في ترابه ده استقرار مفيش بعد كده ويجي شغل الحكومة ونتمردغ في التراب بس مع مرور الوقت نزهق من قلة الشغل او كتره ونبقى عايزين نرتاح ونقول الواحد لما كان طالب وكان بيتصرف عليه كان احسن او الواحد لو شغال شغل حر وعمله مشروع احسن بدل مايبقى موظف .

 

ولا الفلوس ، لما الواحد مننا يبقى معهوش فلوس يبقى زعلان ومضايق ونفسه يبقى معاه فلوس اكتر عشان يرتاح ماديا ويعرف يصرف عليه وعلى اولاده ويشتري متطلباته وميبقاش مديون لفلان ولا لصاحب السوبر ماركت وغيره وغيره وسرعان ما الاحوال تتغير والعملية تزهزه معاه والفلوس تكتر وتكتر معاه المتطلبات والاعباء اه في فلوس كتير بس برده الاعباء كتير ويبدا يفكر في حاجات كتير عايز اشتري عربية وبيت واعمل مشروع واطلع الحج واجوز الاولاد واعمل كذا وكذا وكذا ويلاقي نفسه دخل في دوامة ورجع تاني مهموم ورجع تاني يقول ده الواحد لما مكنش معاه فلوس مكنش مهموم بالصورة دي وكنت بصرف باقل من كده ....الخ.

 

وغيره وغيره من المواقف اللي تبين التناقض اللي بداخل الانسان ، يمكن يكون فعلا طموحنا هو اللي بيدفعنا لحاجات زي كده وان احنا عايزين نبقى احسن ونحسن معيشتنا ونسعى للافضل بس في النهاية لازم نثبت في دماغنا حاجة واحدة بس ونؤمن بيها ايمان كامل وهي ان الرضا هو اجمل نعمة ربنا بينعم علينا بيها ومهما كان طموحنا وسعينا ومهما وصلنا لاعلى المناصب ومهما بقى معانا نفوذ وسلطة ومال لازم نعرف ان الرزق ربنا قسمه على عباده بالتساوي ولازم نرضا بيه ونحمده ونشكره عليه ونرضا بما قسم الله لنا نكن اغنى الناس.

 

واعجبتني ابيات من الشعر فيها حكمة جميلة لنفس الموضوع ده اعرضها عليكم:

 

صغير يطلب الكبرا......... وشيخ ودّ لو صغرا

 

وخال يشتهي عملاً....... وذو عمل به ضجرا

 

ورب المال في تعب..... وفي تعب من افتقرا

 

وذو الأولاد مهموم......... وطالبهم قد انفطرا

 

ومن فقد الجمال شكى... وقد يشكو الذي بهرا

 

ويشقى المرء منهزماً.... ولا يرتاح منتصرا

 

ويبغي المجد في لهف.... فإن يظفر به فترا

 

شكاة مالها حكم... سوي الخصمين إن حضرا

 

فهل هم حاروا مع الاقدار ..أم هل هم حيروا القدرا؟

 

ولكم مني كل التحية والتقدير

[NADA 34]

عندك حق و الله يا أبو بتول

 

هي الدنيا كده للأسف ,, دنيا بقى تقول ايه!!

 

""فهل هم حاروا مع الاقدار ..أم هل هم حيروا القدرا

 

جميل أوووى البيت ده

 

ربنا يوفقك و دايماً تكون راض ومرتاح ف حياتك