4
الراجل العجوز!!
يااااه يخرب عقلك ازيك ياد يا عريس فينك يابن بنتي من ساعة مااتجوزت وانت محدش عارف يتلم عليك
ولا العروسة خلاص بقت هيا الاساس واحنا راحت علينا
لالا برده كده ياجد ده انت الخير والبركة بس انت عارف يعني عريس جديد بقى وباخدلي يومين
ربنا يكرمك يابن بنتي
تعيش ياجد ربنا يخليك لينا
اه قلي بقى الجواز حلو
والله الحمدلله ياجد بس احسن حاجة اني نهيت القصة الطويلة واتجوزت
لا يابن بنتي قصدك تقول بديت القصة الطويلة
ازاي يعني احنا كنا بنحب بعض وانتهت القصة الحمدلله بالزواج
بتحبوا بعض ماشي انما انتهت القصة دي مش ماشي خالص
ليه يعني ياجد
اقلك يابن بنتي: كل الناس فاهمة ان العلاقة بتنتهي بالزواج وخلاص بقى اتجوزنا وبقينا مع بعض والعلاقة تتقلب تقليدية جدا وممكن حتى متفتكرش انك تقول لمراتك انك بتحبها بعكس ماكنت قبل الجواز مبتعديش دقيقة الا لما تقلهالها وطبعا ده موضوع غلط جدا وللاسف كل الناس بتقع فيه.
تصدق ياجد شوقتني اسمعك مع اني مستعجل بس قول هات ماعندك ايها الشيخ
ههه ماشي ياعم المثقف هتفضل شقي طول عمرك مهما كبرت مفيش فايدة فيك.
ايه بقى ياجد فهمني انت عايز تقول ايه؟
بص يابن بنتي الزواج ده بداية مش نهاية زي مانت فاكر
انت بتتجوز عشان تبتدي قصة حب وود وعشرة ومشاركة, بتبتدي حياة جديدة مع شريكة حياتك تنظموها مع بعض و تبتدوا تبنوها طوبة طوبة مع بعض وتكبروا مع بعض وبايديكم تخلوها حلوة وناجحة وبايديكم برده تخلوها وحشة وفاشلة لا قدر الله.
يااه ياجد شكلك هتقلقني ده انت فتحت موضوع مهم جدا بس معلش وضحلي اكتر
بص يابن بنتي: لو انت وواحد من زمايلك كان ليكم حلم تعملوا شركة مع بعض وفضلتوا تخططوا وتبحثوا وتسعوا لغاية ماربنا كرمكم و وعملتوا الشركة وفي احسن موقع في البلد وباحسن ديكورات وكل حاجة وبقت بتاعتكم وملك كل واحد فيكم . تتوقع كده انكم خلاص انتهيتوا وحققتوا حلمكم وكل واحد بقى يقعد في بيته.
لا طبعا هيا العملية يعني كانت واقفة على المبنى والديكورات وشوية الكراسي
اديك قلتها يبقى الحلم هنا متحققش بانك عملت شركة بس لا الحلم هيتحقق لما الشركة تشتغل وتنجح وتكبر ويبقى ليها اسم وشغل كبير وده لازمه تعاون ومشاركة ومحبة وود عشان كل حاجة تتم على خير بدون خلافات يعني من الاخر البداية هيا افتتاح الشركة بس النهاية بايديكم انتوا الاتنين.
صح ولا انا خرفت وكبرت؟؟
برده كده ياجد ده انت صح الصح ياحج
اهو الجواز زي كده بالضبط يابن بنتي عمره ماكان نهاية العلاقة و لا نهاية قصة الحب لا بالعكس ده بداية قصة الحب وبداية حياتكم اللي لازم تبنوها انتوا الاتنين بالتعاون والمشاركة والمودة والحب المتبادل.
ياعيني عليك ياجد حكيم طول عمرك ودايما بستفيد منك
بص يابن بنتي اعتبر بيتك هو حلمك وشركتك, ومراتك هيا شريكتك وفكر ازاي تنجح شركتك وتخليها تكبر وتخليها مستقرة واقفة على ارض صلبة ميهزهاش اي حاجة وازاي هتتفق انت وشريكتك وتتفاهموا عشان تنجحوا شكرتكم سوا, وفكر ازاي هتتفادى اي اخطاء او عقبات ممكن تسبب فشل الشركة او حتى تعطل استمرارية نجاحها وعلى فكرة عمر ماربنا خلق حاجة الا وليها حل بس الانسان يسعى والحل هيجيلوا لغاية عنده ويخبط على باب بيته.
تسلم ياجد بس تصدق خفت
خفت من ايه
بصراحة نفسي نفضل انا ومراتي نحب بعض على طول وميبقاش بينا مشاكل ونفسي نبقى متفاهمين ونفسي ونفسي ونفسي نفسي في حاجات كتير تخلي العلاقة تدوم من غير اي مشاكل بس خايف ومش عارف اعمل ايه بصراحة؟
والله يابن بنتي طول ماانت خايف يبقى هتنجح وطول ماانت قلقان يبقى هتفكر وهتوصل ان شاء الله
ازاي بس ياجد؟
بص يابن بنتي: في البداية خلي نيتك من جوازك خير هو رضى الله و عفة النفس وذرية صالحة تعبده وتطيعه وبتوكلك على الحي القيوم وتقربك منه وعباداتك قلبك هيصفى وهيبقى عايز يعمل الصح دايما.
ونعم بالله ياجد وايه كمان؟؟
ربنا لما خلقنا يابن بنتي مخلقناش كلنا زي بعض في كل حاجة خلى مننا الابيض والاسمر والفقير والغني والطويل والقصير والعصبي والهادي وغيره وغيره , يعني مختلفين عن بعض في كل شيء بس كله متفق على حاجة واحدة بس هي عبادته وحده وعدم الشرك به.
وانت يابن بنتي لازم تلعب على النقطة دي
يعني ايه ياجد
يعني شوف مراتك مختلفة عنك في ايه وحاول تطبع نفسك عليه
وهيا كمان تحاول تكتشف اختلافاتك وواحدة بواحدة هتلاقي التفاهم والحب بينكم جذوره بقت قوية وثابتة
جميل جدا ياجد بس دي مش صعبة شوية
معلش ياولدي مش كل حاجة مطلوبة منك لازم تبقى سهلة احنا بس اللي اتعودنا اننا منفكرش حتى نمشي في الصعب, بس انت لو عايز هتنجح ومعلش ياسيدي دي مراتك وانت جوزها يعني مفهاش اي مشكلة لو كل واحد فيكم جيه على نفسه مره في سبيل ارضاء التاني لان هدفكم في النهاية ان الحب والتفاهم يدوم.
بس اياك حد فيكم يقول التاني انا عملتلك كذا عشان خاطرك يبقى انت تعملي كذا بدل منه
لان العملية يابن بنتي مش سوق او تجارة لا دي حياة زوجية يعني اعمل الحاجة ونيتك مع الله فاهمني ؟؟
فاهمك ياراجل ياكبارة هعامل ربنا وهرضي مراتي ومش هقولها عملتك وعملتلك عشان ربنا يكرمنا ان شاء الله , اه وايه تاني شوقتني.
يا بن بنتي الواحد مننا لما يكبر بيبقى عامل زي الزرع اللي سبته دبل من غير ماتسقيه بيبقى عايز ولو نقطة مياه يحس حتى بطعمها ويحس ان حد مهتم بيه.
خير ياجد وضحلي اكتر
ابوك وامك يابن بنتي اياك تنساهم وتلتهي مع مراتك وبيتك واياك مهما حصل تيجي على حد فيهم
خد رضاهم ياولدي ووصي مراتك عليهم تاخد رضاهم وانت كمان خد رضا ابوها وامها وخليكم كلكم كويسين مع بعض
ده رضا الوالدين من رضا الرب يابن بنتي.
ربنا يرزقنا رضا الوالدين ياجد
زمان يابن بنتي كان يقولو لنا اياك ترمي ودانك لغير خلانك
يعني ايه ياجد
يعني بيتك انت ومراتك مقفول عليكم حلوكم ومركم مع بعض محدش يسمع بيه بره
لان اي مشكلة لا قدر الله بينكم طلعت بره يبقى مش هتخلص من كلام الناس والزن واللي يكبرلك الموضوع واللي هيحكي وينشره وكل ده بيزود المشكلة ويخليها تكبر وتزيد.
عشان كده قالولنا اياك ترمي ودانك لغير خلانك.
الله عليك ياجد تسلم يارب وتعيش , لكن هيا الساعة كام دلوقتي ياجد
هههههه خلص خلص متبصش كتير في ساعتك عارفك مستعجل عالعروسة ومش قاعد على بعضك من الصبح
ههههه يووووه ياجد عيبك انك دايما فاهمني
روح يابن بنتي ربنا يكرمك انت ومراتك ان شاء الله ويرزقكم الذرية الصالحة وتعيشوا دايما في حب وود وتفاهم وطاعة لربنا سبحانه وتعالى
الله يخليك ياجد ويطولنا في عمرك مش عايز حاجة مني قبل ماامشي
سلامتك ياولدي بس اقلك كلمة قبل ماتمشي
(بيتك مدينتك ومراتك انت اميرها وهيا اميرتك , صونها بحبك وطاعتك لربك واياك تتعبها بمشاكلك وكتر غيرتك)
