المحتاسة تكتب فى السياسة

[:: عاشقة الرحمن :: 2]

من سلسلة المحتاسة تكتب فى السياسة

 

السلام عليكم ورحمة الله وبركاته اخواني الاعزاء.

 

النهاردة بإذن الله هنتكلم عن السياسة

 

يعنى هو احنا قبل كده ماكناش بنتكلم عنها..!!

 

ماعلينا

السياسة يا شباب هى.....!!

 

والله مش عارفة اقولكم ايه

 

بس اللى اقدر اقوله ان الدنيا حوالينا كلها سياسة

 

انك تنزل الصبح وعشان تاخد مصروفك

 

-- بما انك طبعا طالب جامعى--

 

لازم تسايس بابا وماما

 

وصباح الخير وصباح الورد وصباح كل حاجة حلوة

 

برغم انك ممكن يكون انك تصبح على حد دى مش من طبعك في الاساس

 

... دى سياسة

 

 

وانك تروح الكلية وتغتت على واحد زميلك او واحدة زميلتك وتطلب محاضرة امبارح

 

على اعتبار انك محضرتهاش

 

وانا معرفتش احضر وربنا يخليك للامة وللبشرية يا صاحبى ويا حبيبي

 

.... دى برده سياسة

 

 

وانك لما ترجع البيت

 

يا حبيبي يا خويا – وانت في نيتك انك تطلب منه طلب –

 

برغم انك مش طايقه عشان عمل فيك مقلب امبارح

 

وتكب على نفسك جردل لمون وبتجز على سنانك

 

عشان عنده الحاجة اللى انت عايزها

 

.... دى سياسة

 

 

حياتنا كلها سياسة

 

من ساعة ما نقوم من النوم لغاية منتخمد تانى

 

عمالين نسايس

 

زى السايس كده

 

 

دى السياسة عندنا

 

انك تسايس امورك عشان حياتك تمشي

 

بغض النظر بقا عن التصرفات غلط او صح

 

 

معظمنا بيعمل كده بيسايس اموره

 

 

لكن السياسة بقا عند الناس التانيين

 

-- يجعل كلامنا خفيف عليهم --

 

موضوع تانى خالص

 

المعنى تقريبا واحد

 

بس التصرفات تختلف

 

السياسة بيمارسوها برده عشان ياخدوا اللى هما عايزينه

 

بغض النظر عن الطريقة

 

وحتى سياستهم مع دولة معينة بتختلف عن سياستهم مع دولة تانية

 

حسب وجه المصلحة والاستفادة

 

ممكن يكونوا عايزين بترول مثلا

 

فمع دولة صديقة – على حد قولهم – يعملوا زيارات

 

واجتماعات تبادل تجارى ويوقعوا بروتوكولات

 

ومرة يقولوا ان الدولة دى دولة ارهابية وزعيمها مصاص دماء

 

ومجرم حرب

 

وهينسف العالم

 

عشان عنده نووى

 

فيدخلوا البلد عشان يسقطوا النظام الفاسد اللى مبهدل اهل بلده يا عيني

 

ولما دخلوا بقوا شايلينهم على كفوف الراحة

 

وجايبين لهم كل وسائل الرفاهية

 

دش وتلفزيون

 

وفيديو جيم

 

والدنيا ماشية ايه؟؟!! اخر انسجام وكل حاجة متوفرة والامن مستتب

 

وهيعملوها فيدرالية برده

 

بما ان شكل الدولة دولة شكل عصري ومتحضر للدول

 

على اعتبار انهم شايفين انهم بيفهموا اكتر مننا

 

وساعات بقا لما بيخافوا على نفسهم

 

يقولولك ممنوع النووى

 

والعمل على قانون

 

"الحد من انتشار السلاح النووي"

 

فزى ما قلت

 

يدخلوها مرة ويعملوا ما بدالهم

 

ومع حد تانى يشجب ويندد بالتجربة النووية بتاعته

 

وعندهم السياسة بقا

 

خيار وفاقوس

 

وزى ما احنا لينا اصحاب هما برده ليهم اصحاب

 

واصحابهم دول عشان يدافعوا عن نفسهم

 

مش مشكلة انهم يكون عندهم نووى

 

والمصنع بتاعه كمان اللى هو مصنع الطماطم

 

وهاصت بقا

 

وعشان الناس دى ناس مسالمة ومش ارهابيين ولا حاجة

 

فهما مش خايفين منهم في يوم انهم يستخدموا النووى ده

 

هما بيستخدموه في الاغراض السلمية بس

 

بيولدوا بيه الطاقة اللى بيستخدموها في شحن الموبايلات

 

ويولعوا الفرن بتاعهم عشان يعملوا اكلة من اللى محتاجة نار عالية شوية

 

ويشغلوا بيه كل الجيمز بتاعتهم

 

زى ما انتو شايفين

 

كلها اغراض سلمية

 

واتحداكم انه اتقال في يوم

 

انه بيستعملوها في اغراض غير كده

 

ولو قلنا ولا فتحنا بقنا

 

يا سلااااااااااااااااااام

 

بقينا بنعادى السامية

 

مع اننا كلنا من اصل واحد على فكرة

 

احنا كمان ساميين

 

ازاى تقدر تقولى بنعادى نفسنا

 

ممكن ؟؟!! ممكن

 

بس مش على طول الخط هنقعد نعادى نفسنا الا لو كنا مجانين

 

كل دى سياسات

نقدر نقول إن السياسة هى طريقة الوصول إلى تنفيذ المصلحة

 

بغض النظر عن الطريقة والاسلوب

 

ولو بصينا في مقولة اتقالت زمان ولسة بتتقال طبعا

 

" الغاية تبرر الوسيلة"

 

اللى قالها ميكافيللى – الملقب بالثعلب--

 

واللى فيها اوجز فأنجز

 

هنلاقى ان معناها كل يوم بيتكرر

 

وان دى سياسة السياسة

 

واللى يعرفه منكم

 

تبقا الامور دى كلها بالنسبة له واضحة

 

والى ميعرفهموش

 

فيه كتاب له اسمه "الاميـــر"

 

هتعرفوه من خلاله

 

طيب دى السياسة بمنتهى البساطة

 

وعشان هى بسيطة كده لازم يعملولها "عِلم"

 

يضم كل التعريفات الخاصة بيها

 

ويعرفوها من الاول للأخر

 

ويقولوا على مدى ارتباطها بالعلوم التانية

 

زى الاقتصاد والاجتماع

 

والتاريخ وكمان الجغرافيا

 

ده بالنسبة للعلوم المرتبطة بيها

 

وفيه كمان علوم متفرعة من العلم ده

 

زى علم الادارة العامة اللى هو ادارة الكوارث والازمات

 

وزى علم الراي العام والاعلام

 

دى جزء من علوم فرعية

 

اساسهم

 

جزئين

 

الجزء الاول التنظير السياسي

 

والجزء التانى العلاقات الدولية

 

في الحلقات الجاية ان شاء الله

 

هنعرف السياسة بقا زى ماعرفها الاكاديميين

 

ويارب ماكونش طولت عليكم

 

بما اننا داخلين على عيد ومشغولين وحاجات كده

 

كل سنة وانتم طيبين

 

والمديرين والاعضاء في المنتدى كلهم في جنان دايما– أقصد في خير-

 

والسنة اللى جاية ان شاء الله تيجي ومعاها الخير كله

 

ربنا يعود علينا الايام بخير

 

اشوفكم على خير

 

منقول

[ABOTASNEEM 116]

كل سياسة وانتى طيبة

اووووووووووووووه

اقصد كل سنة وانتى طيبة

[عاشق الصداقه 525]

موضوع خطيييييييييييييييييييييير بجد ...

 

واسلوب الكلام فيه عجبنى جدا جدا..

 

شكرا كثيرا لنقلك للموضوع الجميل ... أختى عاشقة الرحمن

[عميد كلية الحب 1]

انا عايز قلك انو سياستك في الكلام رائعة حتى طريقة الكلام فيها سياسة عشان تعرفي انو لولا السياسة لكنا الآن في غابة من الذئاب القوي يأكل الضعيف و على كل حال شكرا على هذا الموضوع الذي اسمحي لي ان اصفه با الخطير جدا

-----------------------------------------

اذا اردت الدمار لقلبك ابحث عن الحب و اذا اردت الانتحار حاول ان تحب أما اذا اردت الجنون فأخلص لمن تحب

[NADA 34]

فيدخلوا البلد عشان يسقطوا النظام الفاسد اللى مبهدل اهل بلده يا عيني

 

فيهم الخير والله

 

علشان بس تبقو تصدقو

 

انتو اصلا مش فاهمين حاه يا خايبين

 

هما بردو بيحبوكو وان كانو بيعملو كده

 

فمن عشمهم بردو,,ده حتى الناس لبعضيها

 

ولا أيه ده الناس كلها محتاسه,,,