semsem111

عندما يبيض الانسان =========================== * سوف يكتب فى البطاقة تاريخ الفقس * وسيقول الواحد منا انا من مفاقسي شهر مايو * وسيحتفل الناس بعيد فقسهم * لن يكون هناك ولد ولا والدين سيكون هناك فقس وفاقس وفاقسة ( اللى هما الفاقسين ) * سوف يكون التخصص الطبي فى كليات الطب ( نسا وتفقيس ) * سوف تضطر الامهات الى الرقد على البيض بدلا من الحمل * سوف يتصل بك صديقك الذى واعدك بانه سياتيك اليوم للزيارة ( معلش والله اصل مراتى راحت موعد ضرورى وانا اضطريت ارقد على البيض لغاية مترجع لحسن البيض يتهوا ) وعندما يكون الموعد ضرورى جدا سيتصل بك صديقك ( معلش يا اخواننا يا ريت الموعد النهارده يكون عندى اصل مراتى بره وانا راقد على البيض لغاية ما تييجى ) * سيكون لحظة فقس البيض اجمل خبر فى حياتنا وسنحتفل جميعا للمفقوس الجديد * سنجد اعلانات امام الصيدليات تعلن عن الراقد الالى لا قلق بعد اليوم الراقد الالى سيحل لك المشكلة اذهبي الى عملك وانت مطمئنة سيقوم الراقد الالى بالرقد على البيض وكانه ام حنون لا داعى ان تطلبى من زوجك الرقد على البيض مؤقتا بدلا منك الراقد الالى حل لك المشكلة وحيبقى اللي اسمه وليد = "فقيس" ! وحيتحط العيل (قصدي الفقس ) في سلة بدل اللفة ! وممكن بدل ما المفاقيس يدخلوا حضانة يدخلوا عشة ! سالتنى بنت اختى ( لولا .. هكذا نسميها ) سؤالا وجيها لولا == خالو ممكن اسال سؤال انا == نعم لولا = هى ليه الفرخة بتبيض انا == علشان يطلع كتكوت بنت اختى = لا ان اقصد ليه بتبيض مش بتولد زى ماما وزى البنى ادمين وفورا جاء فى ذهنى سؤالا اكثر وجاهه وهو ليه الانسان ميبيضش اصلا ويبقى زي الفرخة لكن بالفعل ماذا يحدث عندما يبيض الانسان اكتشفت انه ستتغير بعض الامور فى حياتنا البشرية * الاهم من ذلك سوف تستمر الحكومة المصرية المبجلة كما هي تواصل مسيرة العطاء والبناء والغباء اقصد الرخاء ذلك لان بعض اصدقائي كل ما اشكو له زهقى الشديد من الحكومة يقول والله لو الشعب باض برضه هتفضل الحكومة زي ما هي وبالتالى لو كان الانسان يبيض فستظل الحكومة هى نفس الحكومة وسلم لى على الكتاكيت على العموم الحمد لله ان الانسان بيولد هاه حد لاحظ ان ممكن يكون فى تغيرا تانى عندما يبيض الانسان

ايه يا استاذة بسنت انت بتنصحينى ولا ناوية تروحي معاى اعتقد ان احنا لو رحنا سويسرا البلد فاكيد زورو او ابو تسنيم هيتصرفو فى العيش وممكن اي حد يتصرف فى الحلاوة لكن ايه المثل العبقري ده يا شيتوس

شبتوس يمر على مشاركتى يا دى الهنا يا دى الهنا لكن برضه يا شيتوس عاوز اعرف هي ايه القضية الميئوس منها أخيرا الست بسنت شرفتنا لكن ايه الكلام الكبير ده

تفتكر يا عارف بيه ان ممكن لو الواحد رزع الواد حمادة علقة ممكن يقر ويعترف بكل الاسرار الرياضية والله احاول شكرا يا ندى هانم على مرورك لكن هو الواد اللسعة حمادة بقاله خصوصيات

سوسنة الف شكر على المرور وطالما ان الموضوع بتاع خربانىة هيخلية يشوف الاعضاء اللى مش بيعتر فيهم كل شوية من نوعية زورو وعاشق يبقى نكتر منها لكن اتمنى من سيادتكم المرور على موضوع شرب الخرروب فى فنون الهروب لانه برضه بيمس حياة الطلبة والهروب من المذاكرة

الكوسة الحشية 0000000فى تضحيات الحكومة المصرية من المعروف أن كثيرا من الأمراض البدنية تظهر في المجتمعات عندما ( تلطش معاها الدنيا وتخبط معاها الحياة ) غير أن ثمة أمراض أخرى نفسية وعقلية (ترللي لا مؤاخذة ) تظهر مع تلطيشة الحياة ودهورة الحال ولا أخفيك حالا أن مصرنا الحبيبة أصبحت نموذجا رائعا للباحثين والمحللين النفسيين المعنيين برصد مثل هذه الأمراض عند تدهور المجتمعات والحضارات ولان مفيش على الكوكب ( دهورة ولا لخبطة) مثل التي تبدو في مصر فالفرصة في بلادنا أصبحت قوبة جدا والمنافسة عالية على الآخر لدرجة أن سياحة البحث العلمي ستشكل مستقبل السياحة في مصر الفترة القادمة وسيتحول المصريون إلى عينات مجانية وسهلة لإجراء البحوث والاختبارات ورصد الظواهر والأمراض بنوعيها النفسي والبدني (ومن غير حتى ما الباحثين الأفاضل يتعبوا ولا حتى يكلفوا روحهم وييجو ) الحكومة المصرية- بارك الله فيها - تقوم بدور صنع المؤثرات المختلفة ،وعلى الباحثين مجرد المتابعة على النت ثم الرصد وبهذه المناسبة أدعو المصريين إلى تجديد النية لله (لانهم بكده بياخدو ثواب من غير ما يدرو ) يعتقد الكثير من المصريين أن حكومتهم غير جيدة وأنها تظلمهم وتذيقهم من العذاب ألوانا لكن للأسف الشديد أن هذه نظرة متشائمة جدا وغير حيادية ومتحاملة كمان لماذا لا نحسن النية بحكوماتنا ورجالها الأفاضل (مش جاية الأفاضل دي ) لماذا لا يكون ما تفعله الحكومة هو نوع من خدمة العلم والبحث العلمي (وسعت منى شوية ) حيث تطوعت حكومتنا أن تقوم بدور الحكومة (الوحشة قليلة الأدب المتوحشة والنص كم ) حتى يرصد العلماء فى كل مكان نتيجة هذه الوحاشة وهذا الظلم على الشعوب ان ما تفعله حكومة مصر نوع من التضحية نوع من البطولة نوع من حب العلم إنها ضحت بسمعتها ومظهرها وشرفها وقبلت ان الشعب ياخد فكرة وحشة عنها ويشتمها ليل نهار وما لا يعرفه هذا الشعب المتحامل الشعب العير حيادي الشعب النفعي بتاع مصلحته ان حكومته تقوم بدورا هائلا وخدمة عظيمة للبشرية لكن ايييييييييييه اهو كله بحسابه ربنا يرزقهم الاخلاص دى حاجة بتاعة ربنا يا محترم ( لا نريد منكم جزاء ولا شكورا ) بس على الله يتمر والتجارب التي تجريها الحكومة المصرية على الشعب اللى مش بيتمر فيه كثيرة وعديدة وفريدة من نوعها وجريئة جدا وتاريخ هذه التجارب بدأت على الشعب من ييجى حاجه و وعشرين سنة وفى شتى مجالات الحياة تقريبا ففي مجال التعليم بدأت التجارب كثيرة منها يجرى ايه لما نحط 80 عيل في فصل معفن ونقعدهم لغاية 3 عصرا فى بلد الحر فيها ربنا يعلم به ومدى تأثير هذه التجربة على نفسية العيال لما يكونو مواطنيين وهل سيتقوس ظهر المواطن على مر الزمن عندما يجبر الطفل على حمل خمسة كيلوا على أم ظهره لمدة تتراوح من اتناشر لتلتاشر سنة ومنها تجربة المعلم القدوة وهى ماذا يحدث عندما يتقاضى المعلم راتبا لا يكفيه ورق تواليت ومدى تأثير التحطيم النفسي والمعنوي والقهر الإنساني على المعلم لما يقبض مرتبه ويستلف من بره علشان يدخل جمعية علشان فى الاخر يجيب جزمة وهل سيضطر ذلك المعلم إلى أن يحترف مهنا أخرى لسد رمقه يعنى مثلا هل سيدفعه ذلك إلى ان يكون (مِعلم )بالكسر على وزن (المعلم حنفي ) بدلا من أن يكون (معلم بالضم ) من نوعية(قف للمعلم وفه التبجيلا ) أما في مجال الصحة فالتجارب كانت جريئة حبتين يجرى ايه لما الشعب يدخل المستشفى عيان يخرج ميت وهل سيؤثر ذلك على التعريف اللغوي للمستشفى عند المواطن يعنى ممكن الناس بعد فنرة تسمى المستشفى مستوقد او عربخانة مثلا او حتى شفخانة او ممكن يسميها سلخانة وهل سيظل يفرق بين المستشفى والمقابر أم سيختلط لديه وتجده يتلو دعاء دخول المقابر عمد دخوله أي مستشفى (من باب ان مفيش فرق ) وهل سيظل المواطن يتعامل مع المستشفى على انه وسيلة للعلاج أم انه وسيلة لتغسيل وتكفين الميت في مشرحة المستشفى وهل سيظل يفرق بين الحانوتي والدكتور أم سيفهم ان كلاهما معلمين ( وكله تساهيل ولا دايم غير وجه الكريم ) وايه اللى ممكن يحصل لما الشعب يعرف ان حكومته بتوضب له أكياس دم ملوثة يعنى ايه اثر الصدمة عليه هل سيزعل الشعب ويرمى الدبلة في وش الحكومة ويقعد يسمع أغنية (حرمت احبك احبك متحبنيش ) أم سيحسن الظن بحكومته ويبعتلها أغنية مجسمة على الموبايل (ولو ولو اااه ولو) أما في مجال الزراعة فيا ترى هيجرى ايه لما الواحد من الشعب بيكون متأكد أن الخيار والكوسة اللى في أيده فيهم سرطان هل سيضعف إيمانه بالقضاء والقدر ويرمى الخيارة أم سيثبت أمام هذا الابتلاء وسيأكلها طيبة بها نفسه بل سيبدا أصحاب مصانع الكاراتيه والشيبسي يحصنوا ابناءنا تجاه الذلل فى هذا الاختبار وتنزل انواع جديدة من الكاراتيه والشيبسى مكتوب عليها شيبسى سرطوط بطعم السرطان الطازج سرطان طبيعي ميه في الميه أما في مجال السياسة فمطلوب معرفة تأثير استهبال الشعب واستغفاله واستعباطه والضحك على ذقنه وذقن الى خلفوه (ربنا يرحمهم ويبشبش الطوبة اللى تحت راسهم ) فالتوريث مثلا قضية مثارة لمعرفة مدى نفسية الشعب المصري هل هي نفسية واطية ووحشة وجعانه وباصة للقمة فى ايد غيرها ومستخسرة على الراجل اللى شقى طول عمره ان يساعد ابنه من البطالة ويشوف له شغلانه كده يشغل فيها نفسه أم هو شعب طيب القلب يحب الخير ويقدر تعب رئيسه ولا يمانع أن يفرح قلبه بتوظيف الجدع ابنه وظيفة رئيس صغنن تحت التمرين وبعدين ماهو برضه ابن الوز عوام أما مجال الأمن القومي فهو المجال المحظوظ لان الحكومة أجرت فيه تجارب من اندر واجرىء التجارب التي من الممكن أن تجريها حكومة مع شعب وهذا المجال له خصوصيته لان العينات من الشعب لا يجرى عليها التجارب بشكل عام ومفتوح بل لا بد أن تؤخذ العينة الى إحدى مختبرات البحث العلمي المخصصة لتجارب الأمن القومي والتي يعرفها المصريون باسم السجون والمعتقلات ولا ظوغلى وابن حيان وأقسام الشرطة (شوف الجهل يا أخي ) حيث تؤخذ العينة ويتم جراء اختبارات دقيقة عليها ومعرفة رد الفعل المباشر وغير المباشر وتسجل في دفاتر لتسلمها الحكومة بعد ذلك الى الباحثين ومحبي العلم في كل مكان أو على الأقل تترك نتائج الاختبارات تراثا للأجيال القادمة مثلا ماذا يحدث عندما يكهرب المواطن في مكان حساس وما هي الفولتات التي من الممكن أن يتحملها بنى أدم وما هو رد فعله عندما تحشر خشبة في مكان حساس برضه (بس المكان الحساس الأول غير المكان الحساس التانى ) وهل سيظل المكان الحساس حساس بعد اللى حصل فيه جدير بالذكر أن شركة (شكشكنى) العالمية المتخصصة في تجهيز وتصنيع أدوات التعذيب أبرمت تعاقدا مع الحكومة المصرية بشان أن تجرب الحكومة الوسائل التعذيبية المختلفة التي تصنعها وتطورها الشركة على المواطنين المصريين مقابل أجرا ماديا كبيرا عند نجاح الوسيلة وتسويقها بين الدول أما عن تشغيل الشباب والقوى العاملة فيا ترى ايه شعور المواطنة لما تعرف أن وزيرة القوى العاملة باعتها برخص التراب لبلدان شقيقة علشان تخدم في البيوت وهل ستزعل المواطنة المصرية عندما تعرف أن حكومتها عاوزه تشغلها فى البيوت وتاكل عرقها وهل سيقفظ الشك الى ذهنها وتفتكر ان حكومتها مش يعيد بعد فترة تبيع شرفها لدولة أخرى وبرخص التراب برضه (علما بان الشرف غالى ميقلش عن خمسين ستين الف دينار مثلا ) أم أن نوعا من الثقة سيحدث داخل كل فتاة مصرية وستحسن الظن تجاه حكومتها أما عن البطالة فمطلوب الإجابة على عدة أسئلة منها يجرى ايه لما نص شباب البلد مبيشتغلش ومش هيشتغل ومفيش امل انه يشتغل هل سيؤثر ذلك على القولون أم أن له علاقة مباشرة باللوز والجيوب الأنفية وهل من الممكن أن يصاب الشاب من دول بجلطة في المخ ويموت منقوط من حكومته أم أن مرض الجلطة لاقدر الله لا يصيب الشباب مهما حدث لهم وهل سيرتفع معدل الجريمة في الشارع المصري ام سيتدفع البطالة الشباب للاجتهاد والابتكار والنجاح في العاب البليستيشن ولعب الطاولة والديمنو على المقاهى البلدى أما عن العنوسة التي بلغت اكثر من عشرة ملايين مصري ومصرية تعدو الخامسة والثلاثين من العمر من غير زواج أو بارقة أمل بأنهم حتى ( يلبسو الدبل ) فإلى متى من الممكن ان يتحمل المواطن أن يعيش دون علاقة عاطفية وجنسية مع شريك حياة وهل سيظل عنده أمل أم سينقطع الأمل وسيدمر معه أعضاء معينة في جسم المواطن نظرا لانه لا يستخدمها أعتقد أن القارئ يستطيع استنباط تجارب أخرى لم اذكرها وفى مجالات متعددة كل ما ذكرته لا يستحق العجب أو الاستغراب لان العجيب والغريب بالفعل هو ردود الأفعال التى تم رصدها لدى هذا الشعب المرابط والنتائج رغم غرابتها وعدم توقعها بل ومخالفتها لكل ردور الفعل المماثلة في شعوب أخرى أو في حقب من الزمن سابقة إلا أن اغلبها يكاد يعطى نتيجة واحدة ألا وهى إن جتت الشعب نحست من زمان وان كل ما تجرى عليه تجربة يقول المواطن وباللهجة الصعيدي (كماني )

والله انت اللى هايل يا زورو لكن انا مكنتش اعرف انك من عيلة قللية شهيرة وان الزلعة تبقي من بقيت عليتكم

أنا مقدر ان الموضوع طويل حبتين لكن واضح ان فى عدد بيقرا المشاركة طيب ليه ميردش يمكن ملهوش فى الهروب طيب لو ملهوش فى الخروب يبقى على الاقل يشرب معانا واحد خرروب وعندك واااااحد خرووووب وصلحووو

الله يعافيك يا بلاك دريم

افهم من كده ان موضوعى قصة حبي الاولى والاخيرة هى التى اثارت اشجان زورو لكن قصة انما ايه (اسات الظن بيك فى نص القصة وكنت ناوى اديلك كلمتين ) لكن 000 معقول000 مش ممكن معقول ان روفيدة بعد ما سابت البيت جنبنا وبعد قصة الحب الكبيرة تشاغل غيرى وبمنتهى البساطة الخاينة

أفضل لاعب على الاطلاق هو حمادة ابن اختى بالفعل معلافش غير وانا متاكد انه احرز بطولات هايلة اما فريقى المفضل فهو فريق الجوع كافر دا فريق حمادة ابن اختى الهى يحرسه من العين

الهروب من الهروب ====================================================== لأن الحياة مقلب كبير ولان إنهاء الحياة أمر لا يملكه أحد كما أن تفصيل الحياة على أمزجتنا أمر غاية في الصعوبة لجأ البشر من قديم الزمان إلى الهروب من هذا الخازوق وهذا المقلب الكبير والهروب هو الوسيلة الأسهل على الإنسان من إجراءات أخرى اكثر صعوبة مثل التكيف أو التعايش أو (والشر بره وبعيد ) التغيير والهروب هو الوسيلة الأكثر شيوعا عند البشر والهروب فنون ========== لكل شعب طريقته في الهروب ولكل عصر أسلوبه ولكل شريحة من المجتمع لونها المفضل في الهروب ولكل مشكلة أو ضغط نفسي له نوعه من الهروب المخصص له هناك الهروب الحلال وهناك الهروب الحرام هناك الهروب المحترم وهناك الهروب الخسيس هناك الهروب من المشكلات وهناك الهروب من الهروب دعنا نرصد في السطور القادمة (كيف يهرب الإنسان ) -------------------------------------- هناك هروب المليونيرات او الأثرياء ----------------------------------- وهو أسرع وسيلة للهروب على الإطلاق وهو (الانتحار ) وهو الوسيلة الوحيدة التي لا تراجع فيها ينتشر بكثرة في المجتمعات التي يزداد فيها المادة والثروة ويقل أو ينعدم الإيمان بالله ------------------------------------- وهناك الهروب إلى العمل أو الشغل --------------------------------------- وهى الطريقة الأكثر شيوعا للمتزوجين واصحاب الأسر واصحاب الضغوط العائلية والاخفاقات العاطفية وهى حالة من إدمان العمل وقضاء ساعات كثيرة فيه والانهماك في تفاصيله والانشغال العقلي والنفسي الكامل به ويلجا أيضا كثير من رجال الأعمال إلى هذه النوع من الهروب محاولة للهروب من الفشل في باقي جوانب حياتهم المختلفة كالأسرة أو محاولة للهروب من ضمائرهم التي أرهقوها وخالفوها كثيرا في جمع أموالهم -------------------------- أما المخدرات والخمور ------------------------ فهي الوسيلة الشعبية الأولى للبشر منذ العصور الأولى ومن أول ضغط نفسي على أول بنى آدم بدأ الإنسان يعرف طريق (هات الإزازة وتعالى لاعبني إهييىء ) ولا تزال تتصدر المخدرات المرتبة الأولى للهروب عند البشر الا انه رغم انتشارها واشتهارها لكن لا تزال شرائح كبيرة من البشر لا تفضلها نتيجة الضغوط والمحاذير الشديدة التي فرضها الدين وفرضتها القوانين البشرية وبشعتها عادات وقيم المجتمعات بالإضافة إلى قلة الحيلة وقصر اليدين =========================================== أما وسائل هروب الطلاب الشائعة فهي معروفة لكل من مر بهذه المرحلة ======================================== يبدأ احتياج الطالب في الهروب مع قرب الامتحانات ويختلف الطلاب في اختيارهم لنوع الهروب المفضل هناك من يشعر بهجمات أو نوبات نوم شرسة تجعله ينام (عمال على بطال) ويحطم الكثير من الطلاب أرقاما قياسية من النوم المتواصل قبيل الامتحانات تصل ل 12 ساعة عند البعض وينام( الطالب من دول ) كثيرا أثناء النهار محاولاً إقناع نفسه انه كان سهران طول الليل ليكتشف انه قد خدع نفسه وان إجمالي حصيلة مذاكرته لا تتعدى الثلاث ساعات وبدون تركيز(خاصة مع التوقيت الصيفي الذي يقلص فترة الليل) أما طلاب الفرقة الرابعة فلديهم نوع لذيذ من الهروب ----------------------------------------------------- وهو التفكير المستمر في الزواج وهو ما كنا نسميه ونحن طلاب (شوطة الجواز) وينتاب الطالب هذا الشعور بمناسبة قرب انتهاء أكبر سبب كان يمنعه لخوض هذا المشروع وهو الدراسة إلا أن نوعا آخر من الهروب الغير لذيذ بالمرة ينتاب طلاب الفرقة الرابعة- --------------------------------------------------------------------------- وهو التفكير في المستقبل والبطالة المتوحشة التي سيواجهها هذا الطالب بعد التخرج ولا داعي للغرابة عندما تجد الطالب (ربنا يفتح عليه) بعشرات الأفكار النيرة والألمعية للعمل بعد التخرج طالما انه سيهرب بهذه الأفكار من كابوس مذاكرة 15 كتاب على مذكرة أما طلاب الفرق الأولى والثانية -------------------------------------- فيحلو فجأة في أعينهم الكتب الخارجية وتتحرك ضمائرهم نحو الاهتمام بالثقافة العامة والمتخصصة ويا حبذا لو زيارة معرض أو اثنين من معارض الكتب والتي يحرص الطالب على زيارتها وقضاء( ييجي 3 ساعات ) في رحابها الطيبة ولا تكاد تجد لذة وتركيز واستمتاع بالقراءة اكثر منه في فترة قبيل الامتحانات لدرجة أن يشتاق الطالب لبدأ الإجازة ليلتهم بعض الكتب التي اشتراها خصيصا للقراءة في الإجازة والتي غالبا لا يراها مرة ثانية إلا في نفس التوقيت من كل تيرم أما الغير مهتمين بالثقافة ------------------------------ فيفاجأ بان علاقاته العاطفية قد تحسنت إلى حد كبير وان عقدة لسانه قد فكت وصار شاعرا ورومانسيا كبيرا (مع الحته الحلوة بتاعته ) كما أن( الحته الحلوة بتاعته ) اللي كانت (مطنشاه ومش مدياه ريق حلو ) تبدأ تلين وترق إليه (لأنها الأخرى بدأ معها موسوم الهروب ) ويهرب كليهما(الطالب و الحته الحلوة بتاعته ) إلى كبائن ميناتل أو تحويل الرصيد المستمر من زيرو حشرة (أيوة حشرة بالحاء مش بالعين ) أو شركة أم نبيل للاستمتاع بأوقات عاطفية نادرة ولذيذة لا تكاد تكرر إلا في نفس التوقيت من التيرم أما عامة الطلاب ------------------- فتشهد ساحات البليستيشن ومقاهي الإنترنت مسرحا كبيرا للهروب فتمتلأ المنتديات اللي كانت( بتهوي على نفسها طوال العام ) وتعمر غرف الدردشة بينما يفجر البلايستيشن مواهبا مدفونة وطاقات جبارة لدى أبناءنا الطلاب ----------------------- آما الآنسات الأمامير ----------------------- (جمع أمورة ) اللاتي يهاجم تفكيرهن شبح العنوسة (مش قلة حلاوة منهم والله لكن قلة رجالة ) فيكون العمل والبحث عن وظيفة وعمل المقابلات الشخصية واعداد السفيهات(جمع CV (مسكنا كبيرا يبعد شبح الأنوثة عن أذهانهن كما أن مباركة ماما تدفع وتشجع البنت ( اللي قعدتها في البيت ركنة )أما طلوعها برة خير محدش عارف يمكن ابن الحلال يشوفها رايحة مقابلة لشركة أو جاية من مقابلة في شركة واهو نصيب يا بنتي ======================================== بينما تمثل مراكز تعليم اللغات والكمبيوتر منتدى عاما للهاربين من الجنسين ======================================== الأولاد = الهاربين من شبح البطالة والذين اقنعوا أنفسهم تماما أنه باجتياز الرخصة الدولية لقيادة الحمير أو ما يسمى IDDL هي الفرصة الأكبر للعمل في مصر والدول العربية والإفريقية والبنات = الراجيات (العتور) في ابن الحلال (أنا شخصيا أشجع جدا هذا النوع من الهروب المحترم ) ============================================================== أنا شخصيا مارست ألوانا من الهروب اعتقد أن الكثير يشاركني في بعضه بينما أظل متفردا في البعض الآخر =========================================================== عندما تشتد الأزمات الداخلية في المنزل الذي يتحول في أغلب الاحيان إلى فرع من السرايا الصفرا اهرب وبقوة إلى العمل المتواصل والذي يصل إلى 14 ساعة عمل يوميا بعد فترة ومع الركود الاقتصادي والروتين المتعفن في هذه البلدة اللي يوقف المراكب السايرة وبمساعدة أولاد الحلال (الداخلية أو وكالة الحاج حبيب العادلي وولده ) يبدا الفتور ينتابني من العمل المستمر لابدأ أنا في هروب جديد الهروب إلى النوم ----------------- وبكثرة وبعمق وبقوة وبأمانة واخلاص شديدين أياما وينتابني الملل من هذا النوع من الهروب الكائن في أول غرفة شمال في شقتنا وهى غرفتي الخاصة لينتقل مقر الهروب إلى الصالة حيث اكثر من 240 قناة على قمري النايل سات والعرب سات لتبدأا الدراما المصرية والسورية تلعب الدور الأكبر للهروب من واقع الحياة الكئيب إلى أحداث هذه المسلسلات الممتعة التي تجعلك تعيش في عبق الماضي وأيام الزمن الجميل بعد فترة من متابعة بعض المسلسلات الممتعة مثل (حديث الصباح والمساء – رأفت الهجان – ليالي الحلمية – باب الحارة – ليالي الصالحية – صلاح الدين الأيوبي – وأحيانا ميزو أو كابتن جودة ) لاحظت أن هذا النوع من الهروب مؤلم وله آثار جانبية مش حلوة وهو المرارة القاسية التي أفيق عليها بعد غفلة ساعة أو اكثر مع أبطال المسلسل لاكتشف أن شيئا مما كنت أعيش فيه لم يكن ولن يكن وان الواقع مرير لهذا عدلت هذا النوع من الهروب نعم (أفلام الرعب والخيال العلمي ) ------------------------------------- إن الشعور الذي سأشعر به عند متابعة هذا اللون من الدراما من خوف وقلق وهلع ونكد سوف يتلاشى ويتبدد عقب انتهاء الفيلم من دول لآخذ نفسا عميقا عقب انتهاء الفيلم و أقول ياااه الحمد لله انه كان فيلم ويحل على شعور آخر جميل ومطمئن واحساس بالسعادة(إني ممتش من الوحش العملاق في الفيلم ) قناة MBC2 شاركت بمجهود رائع ومشكور لمساعدتي في هذا النوع من الهروب المفتكس إلا أنى احب أن اوجه الشكر إلى الكاتب والأديب الكبير أنيس منصور صاحب كتاب (أرواح وأشباح) حيث كان كتابه جرعة مساعدة مع أفلام الرعب إلا أنى بعد فترة أدمنت هذا النوع من الهروب وفقدت تأثيره الهروبي علي حفظت اغلب أفلام الرعب أتستطيع التنبؤ بأحداث الفيلم قبل أن يبدأ انتهيت من قراءة اغلب كتب القصص المرعبة المباعة عند ( عم خليل بتاع الجرايد اللي على أول الشارع ) لذلك وجب على وفورا إيجاد نوع آخر من الهروب المفتكس خاصة وأنى جربت أنواع الهروب التقليدية الكلاسيكية ثمة نوعين محترمين ومبتكرين من الهروب توصلت إليهما قريبا سأذكرهما آخر مقالتي (اللى مش عاوزة تخلص) ========================= ======================== المصريون هم اكثر شعوب الأرض ممارسة للهروب ظروف حياتهم اليومية وظروف حكومتهم ألجأتهم إلى ذلك لا ينكر أحد دور الحكومة في مساعدة الشعب المسكين على الهروب وللحكومة المصرية تجارب رائدة في مساعدة الشعوب على الهروب إن زراعة مئات الأفدنة من أرض سيناء بالحشيش والماريجوانا وتسهيل استيراد أنواع جديدة من البودرة وبرشام الخيال العلمي التي لم تعد تحوق في أم أدمغة هذا الشعب الحديدي المصفح لم تعد هذه التسهيلات بالزراعة والاستيراد مجدية الان ولم تعد تسد حاجة هذا الشعب على الهروب وبدأت إبداعات الحكومة المصرية تتوالى فكرة بطاقات التموين --------------------- أو مهزلة بطاقات التموين التي تستدعى عمل بطاقة رقم قومي بسبعة جنيه ونص كانت إحدى الأفكار البديعة للحكومة في وسائل الهروب واقسم بالله العظيم أنى رأيت وشاهدت وعاينت بنفسي مبيت الناس والعجائز والمرضى أمام السجقات المدنية (على رأى عوكل ابن بنت بنت الست أطاطا ) في عز برد الشتاء على الرصيف انتظارا لفتح السجل المدني ليكونوا أول المتقدمين ورأيت طوابير تصل والله العظيم لاثنين كيلو متر برغم اعتبار البعض أن هذه الطوابير مهزلة إلا أنني اعتبرها من إحدى وسائل الهروب طوابير العيش أيضا ---------------------- لا شك أنها وسيلة مدروسة لمساعدة الشعب على الهروب فقضاء المواطن عدة أسابيع أمام الطابور من دول نوعا من تغيير الجو كما أن للطوابير ميزة أخرى لم يلتفت إليها أحد الطوابير لها بعد اجتماعي إن الطوابير فرصة ممتازة ليعيد المواطن علاقته لجيرانه وأصدقاء منطقته بل هي فرصة ليتعود هذا الشعب على التعايش والتلاحم والتحابب ثمة معاني تربوية أيضا تريد أن توصلها الحكومة للشعب عبر الطوابير كوسيلة تربوية وهى أن ينقطع الإنسان عن دنياه وأولاده وعائلته ومشاكله وكل البلاوي اللي في الدنيا وأهي فرصة ليحاسب الإنسان نفسه ويندم على أخطاء الماضي ويجدد عزمه وعهده مع الله ويعيد التفكير في حياته من جديد كما أن الطوابير لها دور في التربية الجهادية والعسكرية للمواطنين وقوف المواطن ساعات وأيام طويلة تحت أشعة الشمس وأمام حرارة الفرن وفى وسط رائحة العرق المنبعثة من إبط المواطنين زملائه نوع من التعود على الخشونة وكما قال واحد صاحبي (اخشوشنوا فان النعمة قد لا تدوم ) حتى موضوع التوريث ما هو إلا موضوع اختلقته الحكومة محاولة أن نهرب فيها من مشاكلنا (لكن ما بيطمرش فينا ) شوفت بقى إحنا كنا ظالمين الحكومة اد إيه أخيرا سأعلن أمام حضراتكم عن أحدث وسائل الهروب (الفجوة) !!!!!!!!!!!!!! وهى احدث أنواع الهروب فهو الهروب من الهروب نفسه لأن بعد فترة يمل الإنسان من وسائل الهروب المتعددة فيلجا إلى وسيلة ممتازة ليهرب فيها من الهروب نفسه وهى فجوة عبر الزمان والمكان بمعنى هي منطقة غير موجودة في الزمن يعنى لا في الماضي ولا في الحاضر ولا في المستقبل وكمان فجوة عبر المكان يعنى مش موجودة في حتة (آه بدينا الجنان ) لا والله الصبر شويه الفجوة دى أهم حاجة فيها ان اللي يدخلها لن يشعر بأية مشاكل على الإطلاق لان ببساطة مفيش حاجة أصلا عشان تعمل مشاكل أنا عارف ان الموضوع صعب حبتين لكن سأحاول التوضيح يعنى يا بطل مفيش مشكلة امتحانات لان مفيش أصلا جامعة و مفيش جامعة لان مفيش لا ثانوية ولا حتى ابتدائية لانه مفيش تعليم من أساسه و مفيش مشكلة بطالة لان مفيش حاجة اسمها شغل أصلا ومفيش أزمات اقتصادية لان مفيش فلوس أصلا ولا حد يعرفها ولا يتعامل معها ومفيش أكل لان مفيش جوع ومفيش عكننة مراتك ولا قرف جوزك لان مفيش جواز أصلا ومفيش مشكلة حكومة لان مفيش ريس ومفيش جمال لان مفيش مبارك أساسا يعنى مفيش حاجة أصلا علشان يتعمل عليها مشكلة فقط حالة من السلام والوئام والسكينة والراحة الفجوة دى موجودة داخل كل عقل بشري ؟!! يا بخت اللي يوصلها لكن مشكلة صغير أو ضريبة بسيطة اللي يوصل للفجوة دى بيتغير شويتين ؟؟؟؟؟ يعنى محدش يتخض !!!!!!!!!!!1 تقريبا بيتقال عنه انه مجنون لكن دا كلام الناس المجانين اللي مش فاهمين ومش حاسيين بالنعيم اللي هم فيه أما العقلاء اللي زيينا فعارفين إنها الفجوة أو الهروب من الهروب أما الوسيلة الثانية ففي المقالة التالية ان شاء الله والسؤال الان ما هي وسيلتك المفضلة في الهروب ؟؟؟؟؟؟؟؟؟؟

والله يا جماعة لخجلتم تواضعى طيب لما الكل متفق انه موضوع جميل طيب ما تدونى جايزه انشلله حتى خمسة جنيه اهى تنفع ولا اقوللكم ادونى بيهم عيش احسن استاذى العارف طيب ما تيجي نعمل فريق مخصوص يتولى تربية ابناء الاعضاء بعد ما يتحبسوا لكن مين اللى فى بالك يا عارف والله واضح انك بتشبه على على العموم لو معرقتنيش يبقى احتمال اتنين غيرنا شيتوس الجميل ربنا ما يجيب حبس لكن بالفعل ربنا يجعل حياتنا بطاعغته عمرانه عمرانه

شكرا على المرور يا بنتمصرية والله واضح ان عندك حس تايفى ما تيجى نعمل شركة تاليف انا االف وانت تتوقعى الاحداث اللى بالفها واللى نكسبه بالنص

الف شكر لعمنا الزعيم الكبير قو ابو تسنيم (الا هو اخبار تسنيم ايه ) شكرا على مرورك وتشجيعك (انا حاسس انك هتكتشفتى ) عم زورو راضى عنى يا دى الهنا لكن بجد يا جماعة هو حمادة زعل ليه

لا زلت مستغربا ومسبهلا من المصيبة اللى وصل لها الناس ومدى تعصبهم الغير معقول رغم برود اعصابهم نحو قضايا للامة اهم واعظم بمليون مرة والمصيبة تبقى اكبر ولكبر لما واحد مثلى ميفهمش حاجة فى الكورة وكل علاقته بها ان لما يجيب قناة فيها ماتش يبقى لازم يحول القناة انا بقى مصيبتى وحيرتى اشد ومش قادر اعرف ايه اللغز العجيب ومش مصدق كل ردور الافعال الغريبة من الجمهور لدرجة انى شكيت ان الامر مهم بالفعل وانا مش واخد بالي وقررت ان اكون اهلاويا او زملكاويا (بس مش عارف لانى قررت على كبر) وقررت اعمل ورد اسبوعى لمشاهدة مباريتان كرة قدم على الاقل ونظرا لانى مدرب واقدر قيمة التدريب طلبت من حمادة (ابن اختى ولا عب الكرة المشهور فى الشارع بتاعه) بعد ما قدمت كارت شحن لموبايله هديه لزوم الرضا عنى وطلبت منه انه يدينى كورس مكثف فى الكورة نظر حمادة (فى الصف الثانى الاعدادي ودونجوان المدرسة بلا منافس) نظرة كلها شذر وقال مينفعش يا خالوا رديت وقد دق قلبى وتحشرج لسانى ليه يا دودو بص لى بصة اكثر احتقارا من الاول يشوبها شوية اشفاق يعنى يا خالوا كنت فين السنين دى كلها بعد ما كبرت وبقيت كبير وضيعت عمرك فى التعليم والدراسات اللى ملهاش لزوم (هو بصراحة لم يقل كده بالنص انما فيما معناه) جى دلوقت وتقول علمنى كورة اخرجت الموبايل من جيبى فى حركة اغراء (الموبايل طبعا هو اللى عامل اغراء مش انا يا محترم) فى تلميح مغرض انه من الممكن ان اتركه له الموبايل بتاعى كام يوم لزوم الرسم والشياكة على اللى بالى بالك بص لى بصة اخرى وقال والله يا خالوا هو انت علمتنى زمان ان مفيش حاجة صعبة وان كل شىء ممكن بس بالصبر والمذاكرة يلا يا خالوا قلت على فين قال لى اول درس قلتله هاه هنلعب مباراة قال لى لا مش للدرجه دى اسال وانا اجاوبك قلتله بصراحة يا حمادة انا عندى سؤال محيرنى حبتين ومحرج اسال قال اسال متتكسفشى يا ابو السماسم (عدتها طبعا لان لما تكون ليك عند حمادة حاجة تقوللوا يا كابتن) قلتلوا هو ليه دايما باحس ان الماتش كانه خناقه على كورة واحدة ونص اللى بيلعبوا عاوزين يدخلوها فى الشبكة والنص التانى على جثته ما هى داخله ليه يا كابتن حمادة متكونش فى الملعب كورتين ولا تلاته بص حمادة مبحلقا واكملت وليه ياكابتن بدل الزنقه والبهدله ميعملوش 3 او 4 اجوان ولا حتى يتفقوا كل فريق يدخل الكورة فى الشبكة مرة ذادت حملقة الكابتن حمادة طيب وكمان ليه الذل اللى بيعملوه فى نفسيهم ليه ميمسكوش الكورة باديهم احسن وافضل احمر وجه حمادة وانتفخت اوداجه وظهرت عليه علامات الغضب وبقوة دفع الموبايل بتاعى اللى كان معاه رشوة منى دفعه لى وقال بيتهيا لى يا خالوا انك مشغول دلوقت ومعاك مذاكرة ربنا يكون فى عونك اجيلك مرة تانيه (كان بيتكلم وهو بيجز على اسنانه) الواد على كخة زابراهيم بكتريا بينادو على اسف يا خالوا علشان معانا ماتش مهم ولا زم نفوت دلوقت على سيد زلمكة وفتحى تيفود مشى من امامى وهو يتمتم لا حول ولا قوة الا بالله مفيش منه فايده ضيع نفسه بالدراسات العيا بتاعته طبعا زعلت جدا لانى كان نفسى اقابل الابطال العظام اللى ذكرهم يللا مفيش نصيب لكن الا هو صحيح حمادة زعل ليه ؟؟؟؟؟؟؟؟؟؟ --------------------

ليه تدفع اكتر لما ممكن تدفع اقل ليه نرد على اسالتك لما ممكن نريح دماغنا ومنجاوبش عليها ليه انت اصلا سالت الاسالة دى لما انت عارف ان احنا زينا زيك على العموم اليك بعض الردود كما اجتهدت فيها (لو إسمك (ماجد) وطلعت طيّار، هتفضل مستحمل قد ايه الناس وهيا بتندهلك (كابتن ماجد)؟ ) احسن بكتير لما يكون نصيبك ان اسمك (مبارك ) ============= الأخرس بيكلم نفسه إزاى؟ بيشاور لنفسه علشان يفهم =========== ليه البنات بتفتح بقها وهيا بتحط (ماسكرا) ؟ نوع من انواع العبط البناتى ودا يختلف طبعا عن العنب البناتى لكن كله مندرج تحت دلع البنات ============= ليه اللي سايق عربية ومشغل الكاسيت أو الراديو.. أول ما يدخل شارع ضلمة يروح موطى الصوت فوراً؟! لان الباشمهندس نظامه التمثيلي سمعي (يعنى بيشوف بودانه ) ================== الجملة مخالفة تم التعديل بواسطة الأدارة لانها بتستهبل وعاوزة طخها عيارين =========================

الشعور او رد الفعل الاقرب لى بعد سماع وصلة رفع الضغط دى هى ان العملية خربانة خربانة للمزيد من الاستفادة من نظرية ان العملية خربانة خربانة (اللى هى من اختراعي) http://forums.yallagroup.net/index.php?showtopic=3554

شكرا يا حنان القلب على المرور لكن مين المطرب المصري الاصيل ده براعة ايه يا حنان القلب دا بعض ما عندكم

سبحان الله الله لكن انا مش شايف بتنا

خلاص يا عم من النهاردة مفيش طرقعة صوابع ولا اقوللك سيبنى اخر مرة اطرقعها تك تك تك تك تك خلاص بقى مش هطرقعهم

والسؤال الان ماذا نفعل بعد قراءة هذه المشاركة اضحك ام ابكي ام الطم الجواب ولا حاجة روح نام

...................................................قانون البقرة.......................................... هل سمعت عن هذا القانون من قبل اذا كنت من الكثيرين الذين لم يحالفهم الحظ للتعرف على معلومات حول هذا القانون العبقري فاكيد انت من الكثيرين جدا الذين حالفهم الحظ وتم استخدامه معهم خلفية تاريخية ------------------- هو القانون العبقري او قل النظرية الرائعة التى تستخدمها معنا الحكومة المصرية منذ السيد الرئيس الراحل بيبي الاول فى عصر الاسرات المتاخرة وحتى حفيده السيد الرئيس حمادة حسنين امبارك ومتوقع ان يستمر هذال القانون حتى السيد الرئيس على زكى جمعة جمال حمادة حسنين امبارك ما هو قانون البقرة ------------------- قانون البقرة باختصار شديد هو تطبيق او محاكاة لهذه القصة التى ساذكرها حالا يروى ان حمدان فلاح بسيط من كفر الغلابة - قرية المطحونين - مركز شد حيلك - باحدى محافظات مصر يحتكم حمدان العلبان على ييجي نص فدان ورثهم عن ابوه الحاج متولى الله يرحمه تعب فيهم ورعاهم لغاية ما وصلهم لفدانين ونص (بسم الله ما شاء الله ) ومعاهم فضلة خيرك بقرة ( لا مؤاخذة ) فضل العمدة وشيخ الغفر يضايقوا فى عيشته وعيشة ناسه زيه زى باقية اهل البلد ويفرضوا عليه الاتاوة ورا الاتاوه وهو يصبر ويقول (يمكن ربنا يعدلها - بكرة تفرج - اهو عمدتنا برضه وهو اولى من الغريب ) لغاية ما الظلم عمى عنيهم وطمعوا فى فدانين الارض اللى معاه واخذوهم منه غصب واقتدار ومع كده صبر وقال (يا واد مصير الحق يرجع لاصحابه - يمكن ربنا يعدلها - بكرة تفرج - اهو عمدتنا برضه وهو اولى من الغريب ) وبعد يومين خبطوا عليه اتنين غفر فى ليلة سووخة وقالولو بكرة الصبح تلملم كراكيبك تغور وتنكشح من هنا لان العمدة عاجبه موقع دوارك وناوىياخده حمدان = يا ناس دوارى وبيتى حرام عليكم الغفر = بتقول ايه يا وله انت فاكر ان العمدة محتاجلك واللا فاكره محتاج لك .. يا حمار العمدة عاةز مصلحتك ومصلحة البلد العمدة هيعمل مشروعات وطنية وقومية فى البلد حمدان == هيعمل ايه يعنى الغفر = كافى شوب وانترنت كافيه وترابيزة بلياردو على اتنين بلايستيشن ووصلة دش علشان يخدم اهل البلد ويساعد فى القضاء على البطالة ويدخل البلد عصر التكنولوجيا والفضائيات والنت خبط حمدان ايد على التانيه وقال حكمتك يا رب حسبنا الله ونعم الوكيل خرج قبل الفجر ومعاه كراكيبه وبقرته وكانت كل اللى فاضله من الدنيا مشى حمدان حزين وهيموت حسرة من الظلم العمدة شخط فى شيخ الغفر وقاللو = عملتوا ايه فى الواد حمدان شيخ الغفر = غار من البيت وخد كراكيبه وبقرته معاه انفجر العمدة فيه غاضبا يا ابن الفرطوسة ولما انت عارف ان معاه بقرة يا بقرة مخدتهاش منه ليه انت مش عارف ان احنا عاوزين بقرة تحلب لبن علشات الكابتشينوا اللى هنعملوا فى المشروع القومى للقرية الذكيه بتاعتنا شيخ الغفر = راحت على يا كبير معلش انا جاموسة انا بقرة العمدة = فز غور اتصرف خدها منه بعت شيخ الغفر اتنين من مطاريد الجبل يقطعوا الطريق على حمدان بص حمدان لقى اتنين ماسكين بنادق طلعولو من نص الطريق قالو له = انت رايح فين حمدان = غاير .. ماشي هاجج ... سايب البلد باللى فيها قالولو - انت مش عارف ان بتعمل ايه حمدان -- باعمل ايه يعنى .. مطرود ومظلوم قالولو - انت مش عارف ان اللى يعدى من الطريق ده فى الساعة دى ومعاه بقرة او حمار يحصل ايه حمدان = يحصل ايه يعنى قالولو = يتقتل فى الحال ويتاخد حماره او بقرته نظر حمدان باستغراب وقال == فى شرع مين ده قالولو = القانون يا محترم القانون انت متعرفش القانون ولا ايه حمدان مستغيثا = يا نااااااس ..يا هووووو .. حرام عليكوو المطاريد = مفيش فايده اتشهد على روحك ومرة واحدة ظهر شيخ البلد = فيه ايه يا ولا منك له حمدان - الحقنى يا شيخ البلد الحقنى هيموتوتنى .. هيقتلووونىىى شيخ البلد == فيه ايه يا رجاله وحكو له الموضوع وقف شيخ البلد مبرما لشنبه والله يا اخونا طالما ان ده قانون يبقى القانون لازم يحترم لكن انا شايف ان احنا نحاكمه ونعمل له محكمة سريعة ( تيك اوى) علشان ظروفه حمدان = ايوه يا شيخ البلد محاكمة قلهم شيخ البلد = وانا اللى هدافع عنه بنفسى انبسطت اسارير حمدان وتنفس الصعداء وقال = ينصر دينك يا شيخ البلد .. ربنا يكرمك يا شيخ البلد .. ربنا يخليك لينا يا شيخ البلد .. قام شيخ البلد نافخا صدره == يا سيادة المطاريد بما ان الواد حمدان حمار وعبيط وميعرفش فى القانون وبما انه اول مره يعمل كده انا شايف ان احنا نخفف له الحكم شوية والتمس من عدالتكم ان حمدان يغور لسبيل حالة وكفايه انكم تاخدوا البقرة نظر المطاريد كل واحد للتانى وقالو حكمت المحكمة حضوريا على حمدان العبيط الغلبان ان احنا كفاية ناخد بقرته ويروح هو لحال سبيله نط حمدان فرحان يحى العدل يحي العدل يحي العدل الله اكبر الحمد لله يا رب ومشى حمدان فرحان وكل ما يقابل واحد يزغرد ويقول له انا براءه براءه ربنا يخلى العمدة ربنا يكرمك يا شيخ الغفر كنت هروح فى شربة ميه لولا حكومتنا الله يديها الصحة انتهت ومن يومها تحكم مصر والمصريون بنظرية البقرة نسبة للبقرة بتاعة الواد حمدان حد فهم حاجه اللى فهم يقول علشان انا مش فاهم حاجة --------------------

جمل متزعلش حد الا لو سمعتها من دكتور كلمات و جمل ماتزعلش حد ، إلا لو سمعتها من دكتور و انت فى أوضة العمليات يعنى الجمل دى ممكن تكون عادية خالص لكن عاوزك تتخيل انك تعبت شوية لا قدر الله ورحت تكشف عند جراح كبير قالولك اتفضل استريح الدكتور دلوقت فى غرفة العمليات وانت قاعد بدات تسمع الكلام ده خارج من غرفة العمليات - يالهوى! - هيييييه النور جه! - طيب اذا كان ده البنكرياس ، أمال اللى طلعناه ده يبقى ايه؟ - حد شاف الدبله بتاعتى؟ - طب أقوله ايه لما يفوق؟ و زعلان انى سقطتك 3 مرات فى الماجستير! - إلحق يابنى القطه اللى جريت بالعضمه دى ، خلينا نرجعها للراجل من سكات! - ياما ربنا بيخلق عجايب ، ماحدش معاه كاميرا يا اخوننا؟ - ولا حركه ماحدش يخيط ، أنا مش لاقى الكونتاكت لنسز بتاعتى! - ياجماعه تعرفوا إذا كان حد عاش بعد ما خد 500 مللى من الهباب ده؟ - شيل ايدك ، الحاله دى بتاعتى أنا ، ولا هى الكحكه فى إيد اليتيم عجبه؟ - آه ياعينى! والله مانا سايبك! - حد يسكت الزفت اللى بيدق ده ، مش مخلينى عارف أركز! - لأ حاشتغل ، أنا صحيح نسيتها ، بس يعنى باعرف اشوف طشاشا من غيرها ياأخى سيبك من دلع الخواجات ده، المشرط مش تلم ولا حاجه! - أنا مش عارف ده ايه بالضبط، بس حطه فى التلج و هات لنا واحد بتاع جراحه أوعيه بسرعه! - ياللآ يابنى خلص ، الماتش هايبتدى بعد ربع ساعه! - ياجدع انت شيل الملايه من على وشه ، ده لسه له نفس و بيتكرع! - إنت متأكد إن الحاله عارفه ان شكلها حيبقى كده بعد العمليه؟ - ريحة شياط؟ ...حريقه......حريقه....!! - سدوا مناخيركوا، خلاص حاتتفقع!! - طيب ده شريان ، وده وريد ، وده عصب ، أمال ده يطلع ايه؟ حبل غسيل؟ - مسمار بلاتين مين يابه، شوف له أى مسمار من الوكاله ، عياله أولى! - ياراجل توكل على الله ، ماهى الأرضيه برضه معقمه! - عقمى السباك و دخليه بسرعه ، النيله ده بيخر الله يخرب بيتك ، ده عصب يابنى مش أستك بتاع نبله!! - يامامى، دم؟ - اطلب البت بتاعة الحسابات خليها تدفع أهله قبل ما يعرفوا !! - هوه فيه عصفوره برتقانى واقفه على الروب ولا دى تهيؤات بسبب سهرة امبارح؟ - هو كل واح يسافر له شهرين بره يرجع يقول لى طلع القطط من أوضة العمليات؟ - متخدر؟ خلينا نتفق على النسبه وما تحاولش تغير الموضوع ، يعنى هو هايهرب! - لأ ياست الحكيمات ، مش أول مره أعمل النوع ده من العمليات ، ليه بقى السؤال ده؟

اجمل ان تكون الطرفة واقعية وحدثت بالفعل واللهجات المختلفة قد تحدث مواقف كوميدية مهلكة من الضحك ودون قصد فى هذه المشاركة جمعت لكم مجموعة من الطرائف الواقعية التى حدثت بسببب اللهجات واختلافها بين المحافظات المختلفة او بين الاقطار المختلفة واليك بعضا منها ارجو من السادة القراء ان يحاولوا قراءة ونطق ما ساكتبه ================================== فى قرى نجع حمادى بمحافظة قنا ، لا تزال لهجات بعض قرى نجع حمادى غريبة ومختلفة كما سترون خاصة كبار السن ذهب صديقى الى بعض اصحابه ليزوره بقريته طرق الباب وفتحت له الست الحاجة صديقى : السلام عليكم يا حاجة الست الحاجة : وعليكم السلام يا وليدي صديقى : مصطفى موجود يا حاجة الست الحاجة : مصطفى دركييت مشكه ابيييييين هواتي (نطقتها بسرعة شديدة ) صديقى : نعم يا حاجة بتكلميني الست الحاجة : بجولك (بقول لك ) مصطفى دركيت مشكه ابييييييين هواتي صديقى (وهو فى قمة الاحراج لانه لم يفهم ماذا تقصد ) : طيب فين سيد يا حاجه الحاجة : سيد ابللكوتي صديقى : نعم الحاجة (وهى فى حالة من الضيق لهذا الغبىالذى لا يفهم او الاطرش الذى لا يسمع ) : سيد ابللكوتي صديقى : طيب مع السلامة يا حاجة وسلميلى عليهم ، وانصرف وهو لم يفهم ماذا حدث الترجمة (دركيت ) دلوقت (مشكه ) كلمة من مقطعين الولى (مشا ) اى مشى يعنى ذهب ، الثانيه (كه) اسم اشارة بمعنى هكذا (ابيييين هواتى ) بعييد هناك ابللكوتى ) يعنى موجود قريب من هنا وعجبا على اللهجات ========================== سمع بعض اصدقائى هذا الحوار بين اثنين من قري نجع حمادى الاول : مرجبتش كربان (والجيم هنا من نوع جلنا وجالوا اى قلنا وقالوا ) الثاني : دكهيتي هنيكه ابينو ( بتشديد الكاف والباء ) الترجمة (مرجبتش ) اى مشفتش /من المراقبة يقصد( الم ترقب ) (كربان ) واحد ماشى مستعجل (دكهيتي ) ضمير يعود على الرجل الكربان او المستعجل اى (هاهو ) (هنيكه ) اسم اشارة بمعنى هناك (ابينو ) من البيان والظهور اى مر من قريب ولا يزال يبان ويرى من بعيد ================================== دخل احد المرضى فى احدى قرى محافظة قنا على الدكتور الجديد فى الوحدة الصحية والدكتور بحراوي كما يقول اهل الصعيد على اهل الدلتا ةالقاهرة الكبرى المريض : دكتور انا عندي سعال الطبيب : الف سلامة عليك ودخل الطبيب ليناوله زجاجة دواء شرب مهدئ للسعال والكحة ، بينما الفرحة من داخله ان اهل هذه البلده مثقفون ويتكلمون بشكل علمي الطبيب ( وهو يناوله الزجاجة ) : اتفضل يا سيدي المريض : يا دكتور بجوللك عندى سعااال عندي سعااال الطبيب : ايوه ما انا عارف الدوا ده ان شاء الله هيريحك المريض : يا دكتور بقولك عندى سعال عاوز اسعلهولك (اى عندى سؤال عاوز اساله لك ) ========================================= اتصل الطبيب الذى جاء لتوه فى القافلة الطبية بصديقه الاخر الصيدلى واخبره انه ربما يصادف بعض العبارات التى لا بفسر معناها من لهجة اهل القرية لذا سيتنصل به ويستشيره اذا لزم الامر ورد الصيدلي انه مستعد طبعا لانه من اهل الصعيد ويعرف لهجتهم ودخلت احدى العجائز على الكتور العجوز : يا دكتور الظيظ مللحضة مندللو المشروع اتحميو واتجيو الكتور : ايوه يا حاجة بتشتكي من ايه العجوز : يا دكتور الظيظ مللحضة مندللو المشروع اتحميو واتجيو الدكتور : يعنى ايه اللى واجعك بالضبط العجوز (وهى قمة فى الغيظ لغباء هذا الدكتور) يا دكتور الظيظ مللحضة مندللو المشروع اتحميو واتجيو استدعى الدكتور صديقه الصيدلى ليترجم له الصيدلي : ايوه يا حاجة العجوز : مش تجبولنا دكتور بيتكلم عربي كل ما اجلله يا دكتور الظيظ مللحضة مندللو المشروع اتحميو واتجيو يجوللى مش فاهم وبعد برهة بدا يفهم الصيدلى كلام العجوز وترجم للدكتور (الظيظ) اولادى الصغار (مللحضة) من ساعة (مندللو) ما نزلو (المشروع) الترعة (اتحميو) ارتفعت حرارتهم كانها حمى (واتجيو ) تقيئو ما فى بطونهم وقال الصيدلى للكتور : بتقول لك اولادها الصغار من ساعة ما نزلوا يستحمو فى الترعة ارتفعت حرارتهم وتقيئو ردت العجوز : اهو كل ما اجله كده يا ولدى يجولى مش فاهم امال دكتور ازاى بجى ====================================== فتح احدهم صيدلية فى احدى قرى الصعيد وكان شكل الصيدلية بلافتتها الضوئية وفاترينة الزجاج اللامعة ومستحضرات التجميل التى تعرض فى فتارينها كل هذا كان حدثا فريدا فى القرية دخل احدهم على الدكتور الرجل :السلام عليكم الصيدلي :وعليكم السلام الرجل : عندك ( اهديد تسديل ) الصيدلي : نعم الرجل بجولك عندك ( اهديد تسديل ) الصيدلى : حضرتك عاوز ايه الرجل بصوت مرتفع : بجوللك عندك ( اهديد تسديل ) ايه معتفهمش ولا اييه اخبره المساعد الذى يقف مع الدكتور فى الصيدلية بيقولك عندك هد تسجيل كاسيت الصيدلى : يا بلدينا دى صيدلية الرجل : يعنى عندك ولا معندكش الصيدلى : لا معنديش الرجل : طيب عوز (دخلي عدل) الكتور (مسبهلا ) : نعم !!!!!!!!!! الرجل : بجولك (دخلى عدل دخلي عدل ) اييه مفهمهاش دى كمان الصيدلى : ايوه انا فاهم ان حضرتك عاوز تاخد حاجة فى العضل بس ايه اسم الحقنة ) الرجل : يا بووووى ، بقولك (دخلى عدل) يعنى الدواااانى الدوااااني الدواني بتاع العدلة فهمت اخبره المساعد انه يريد الاطار الداخلي لعجلات السيارة (جوانى العجلة ) الصيدلي : يا بلدينا دى صيدلية الرجل : ايوه ، يعنى عندك ولا معندكش الصيدلى : لا والله معنديش الرجل : ايوه كده جول معنديش كل هبابه تجوللى سيدلية سيدلية تجولش يعنى فاتح ازدخانه يا اخوى (اى اجزخانة ) ================================================== دخل احدهم على الصيدلية البيطرية حاملا فوق كتفيه عنزته يا دكتور الاجيلها علاج عنك ولا اطلع بيها على اسيوط =============================== نختم بعبارة غريبة سمعتها من بعض اصدقائي من الفيوم شفت الجنزورة واقفة على الشوحة سكعتها بالشِكِل وقعت على جدور رقبتها انكسرت الترجمة الجنزورة / العصفورة الشوحة / عامود النور ( ومتسالتيش ايه العلاقة ) سكعتها / ضربتها الشكل (بكسر الشين والكاف )/ قطعة من الخشب واللى يعيش يا ما يشوف ارجو من السادة الاعضاء يشاركونا بطرائف من هذا النوع