3sho

مرحبتين بيكم كل خوتي وخواتي _في مثل تعودنا نسمعوه من وقت مانحنا صغار هوا‏(‏فاقد الشئ لايعطيه‏)‏بلعكس فاقد الشئ يمكن يعطيه وبقوه امس كنت جالسه بمنزل جدي شفت النخلة عندها اشواك مؤذيه وقاسية بس مطلعه تمر حلو !!من بين اشواكها _فهى فاقده الحلاوة بس اعطتها‏_‏وشوفو غصن الورد مليان شوك بس يطلع ورد ريحته وشكله حلو‏_‏فكيف فاقد الشئ لايعطيه أنا أعتقد إن الأب لما يفقد حنان وهوا صغير يبقى يعطف على أولاده أكثر يحاول ايعوض الحنان إللي فقده _أنا بصراحه نشوف إن هالمثل مش صح بكل الأوقات إنتم شنو رايكم؟؟؟؟

أولا‏"‏كل عام وإنتم بخير وشكرا على شعوركم الطيب بس حبيت انوضح نقطة أنا بنت مش ولد لأن في كثير منكم يتكلم معايا بصيغة ولد كلكم أخواتي وخواتي وانحبكم في الله.

دائما‏‏"‏ الإنسان يركض ورا الحاجه الصعبه وإللي مش عاوزاه والبنات بذات دائما لما يبقى شب يركض وراها وشاريها بالحلال تلقاها ترفضه وتركض ورا واحد نيته مش نظيفه ويمشي وقت وخلاص مانكذبش عليكم أنا كنت هكي بمعنى‏(‏كده‏)‏ بس تغيرت وفكرة بعقلي وإللي باعك بيعه وعجبتني قصيده حلوه واجد اتقول‏‏_‏‏_‏إذا المرء لايرعاك إلا تكلفا فدعه ولاتكثر عليه التأسف‏_‏ففي الناس أبدال وفي الترك راحة وفي القلب صبرا على الحبيب ولوجفى‏_‏ولا كل من تهواه يهواك قلبه ولا كل من صافيته لك قد صفى‏_‏ولا خير في خل يخون خليله ويلقاه من بعد المودة بالجفا‏_‏لابارك الله في الدنيا إذ لم يكن بها صديق صدوق صادق العهد منصفا‏_‏‏_‏‏_‏‏_‏ياريت كل بنت تحط عقلها براسها وتتعض من هالقصيدة‏_‏‏_‏‏_‏إحترامي لكم جميعا‏"‏ وياريت تردو عليا بتعليقاتكم وهل كلامي صح أو غلط‏_‏شكرا

صدق من قال مصر أم الدنيا ويبقى كذاب إللي يروح لمصر ومايحبهاش مصر حلوة بزحمتها وببساطتها ونيلها وإهراماتها والناس الطيبين إللي فيها هما إللي مخليين لسه الدنيا بخير لو مصر مش حلوة مايجوهاش الناس من كل مكان بالعالم بالملايين بجد أنا من ليبيا بس لما نمشي لمصر نحس روحي كأني في بلادي الثانية نحبها هلبه وتقدير واحترامي لكل مصري ومهما انقال على مصر فالقافلة تسير والكلاب تنبح‏_‏مصر أم الدنيا وستبقى للأبد‏....

ماعندش موضوع بس حبيت انقوللكم كل عام وانتم بخير وانحبكم في الله‏أختكم عشو من ليبيا

اولا‏"‏ أهلا بيكم القصة ومافيها بسب الأخطاء الطبيه نعرف صديقة عندي انحرمت من إنها تسمع كلمة ماما وانحرمت من الزواج بسب قلت التطور وانعدام النظام والرقابه في الكثير من الدول العربيه وقصتها إنها كانت في المستشفى على أساس أنها بتعمل عملية (زائده‏‏)‏ وكان معاها في نفس الغرفة عجوز تبي تشيل رحمها فلما جاوقت العملية دخلو البنت في أمان الله على أساس عملية زايده فلما خلصت العملية وعيت البنت لقت إنهم شالولها الراحم والكارثه إنها كانت مخطوبه وفرحها بعد اسبوع من العملية وإللي صار إنهم غلطو بين البنت والعجوز وكانت البنت ضحيه لخطأ طبي فادح حرمها من أبسط حقوقها ومهما حاولو يعوضها ماكفوش حقها إللي انسلب منها فهى لحد الآن تعاني من حالة اكتئاب وعايشه بحبوب ومسكنات بالله عليكم مش حراااااااااام حسبي الله ونعم الوكيل.

أولا‏"‏ كل عام وإنتم بخير __شهر رمضان خلاص جا وللأسف كل الناس شغالين ليل نهار يتسوقو ويجيبو كل مالذ وطاب من أنواع الأكل استعدادا لشهر رمضان وكانه شهر‏(‏أكلان‏)‏مش‏(‏رمضان‏)‏ وللأسف لو تجي تشوف تلقاه حتى مصحف ماعنداش في بيته وقاعدين يحطو عشرات العشرات على الأكل ومش قادرين يتذكرو يشترو مصحف أو سبحه أو صلايه لشهر رمضان كل الدول العربيه بنفس الطريقة تلقى النساء طول اليوم بالمطبخ ويشكلن ويحمرن ويشمرن كله عشان الفطور وتلقاها تأخر صلاتها عشان قاعده تعمل كنافه حاطتها بالفرن تخاف تنحرق بس ماتفكرش في حرق جسدها يوم القيامة على تأخير صلاتها ياعالم هوا شهر بالسنة ليش مانصيمو صح ونصلو صح لاحقين عاالأكل والشرب سنة كاملة ياريت مع كثرة الدعايات على تانج وفيمتو وماجي...وغيرها يحطو دعايات يذكرو إللي ماعنده مصحف يشتري مصحف وبلا هالخيام الرمضانية بشهر فضيل زي رمضان بجد عيب وعسى الله أن يعيننا على صوم رمضان بطاعة وثبات‏_‏‏_‏‏_‏االموضوع طويل بس يلا كل سنة وانتم طيبين‏_‏‏_‏‏_‏‏_‏أختكم عشو من ليبيا

سؤال دائما‏"‏ أسأله لنفسي ليش نحنا نبقو نخافو من أي شخص قريب منا أخ أو أب أو أم الأهل والناس إللي نحبوهم بصفه عامة رغم إنهم لما كانو عايشين كنا نتمنو كل لحظه تمر جنبهم ومعاهم ونحسو بالأمان جنبهم بس لما يموتو نبقو نخافو منهم ومانقدروش حتى نشوفو جثتهم هل لأن نخافو من الموت أو لأن مانبوش نتقبلو فكرة رحيلهم وخايفين من الوحده وألم الفراق ؟؟ أنا انشوف إن الإثني هما إللي يخلونا نخافو (خوف الموت وخوف لفراق‏)‏ ‏ياريت كل حد يقول ليش يخاف؟؟منكم نستفيد....

السلام عليكــم ورحمـة الله وبركاتــة ،، فكرتي ياأختي أن نحط شاشه مثل شاشات الدعايت والإعلان جنب أو فوق أي أشارة مرور تظل طول اليوم تمر بيها الأذكار اليومية أذكار الصباح والمساء وجمل تذكير مثل استغفر الله عشان يقراها أي حد ماشي لشغله أو مدرسته وبالتالي من كثر مايشوفها راح يحفظها ويصير يقولها بنفسه وهكي كل الناس راح يستفيدو هذي فكره بس تبي استثمار إن شاء الله نقدرو انطبقوها، وشكرا جزيلا عالردود

تهبل القصيدة تجنن بجد عجزت عالتعبير وإنت ذووووووق هلبه لأنك اخترتها‏(‏بنوته ليبيه‏)‏

بونا العز وبونا الخير ،بونا ماهو كيف الغير،بحنيته وقلبه الكبير،ربي يدومه تاج علينا،ولا في يوم لغيره ايخلينا،دومه بصحه ودومه بخير،هلي ماهو كيف الغير،،‏(‏اتمنى اشوف تعليقاتكم بس ماتقسوش عليا أنا مش شاعره‏)‏ د

كيف حالك إن شاء الله دائمــاً بخير ؟موضوعي عن عادتنا وتقاليدنا إللي كثير منها أصبحت باليه ومانقصدش بكلامي إن كل عادتنا وتقاليدنا ماتنفعش بس في كثير منها مالش علاقه بالدين الإسلامي وضده في أشياء كثيرة ففي محيط بلدي وأسرتي وعادتنا وتقاليد إن الزواج بغير جنسيتي عيب؟؟؟ومش فاهمه ليش؟؟؟لو نرجع للدين مش حرام والرسول قال جوزو من ترضون دينه وخلقه فا ليش نحنا في وقت زي وقتنارغم كل هاالتطور والثقافه مازلنا نحملو بداخلنا هالعادات الخاطئة؟؟وفوقها نعلمو أطفالنا نفس الأفكار ؟؟ أمتى نتغيرو الله أعلم ياريت تقولو رايكم في هالموضوع هل معايا حق والا لأ‏(‏شكرا‏)

الحمدلله والصلاة والسلام على رسول الله وعلى آله وصحبه أجمعين‏موضوعي بسيط ومفيد وهوا فكرة شخصية تجيني كل ماأطلع الشارع وأوقف عند إشارة المرور كم دقيقة وانظر للناس ألقاهم كل حد سارح بشي ينتظر الإشارة الخضرا بلا فايده فا ليش مانعمل شاشات جنب الإشارة أو فوقها تمر بيها أذكار يومية شوف كم شخص يوقف على هاالإشارات وكل مره راح يقرها يحفظها ويصبح أغلب الناس يقولو الأذكار ويكون لهم ولنا الأجر والثواب بدال هالدعايات والصور إللي ماليه الشوارع اتمنى تكون عجبتكم الفكره والسلام عليكــم ورحمـة الله وبركاتــة ،،