نـــــــــــور

صبرك علي بلواك راه شجاعه.ايقولوا ولايصبر عليك الغير

وطاعة الله ماخير منها طاعه.الخالق اللي بالخافيات خبير

وعيش كيف ماتلقي بكل قناعه.وعلي مهلك ديما في طريقك سير

عزيز نفس لاتبقي من التباعه.ولاتخش في مسرب يكون خطير

ورفيقك ان ريته تم مالخداعه.قص رفقته واترك طريقه خير

ان ماهضا تاخذهن جميع اطباعه.واللي دايره كيفه اساع ادير

واسحي التهور من اريا الجماعه.يرخوك وين ماتوصل القاع البير

ولاتخالط العفنين والدشاعه.ارقاق الغرض فيهم اساع اتحير

واحذر وخوذ الحذر مالطماعه.امفيت المصالح مالهم تفكير

ولاتصدق اللي رددوا الاشاعه.نقالة كلام ايشهروا تشهير

ولايرهبك سفاح جاب اتباعه.ان تما ايمانك بالعظيم كبير

واللي تفقده تبقي حتمت اضياعه.وتريد عطوتا محال كيف يسير

وان تمت اموية جدوله دفاعه.الوادي امحركله اشبوب غزير

وكل يوم تلفي عالبلاد ابضاعه.والشاطر القي لبضاعته تدبير

ويطيع الذكير الصلب للصناعه.واللي هضا بافكاره اشكال ايدير

ومعروف كل حد يشكي ابضيم اوجاعه.ويسمر الجرح ان دال بيه سطير

ويقولوا خطاها جيهة الزعزاعه.والطير مايجيبه انكان طار صفير

ودارك ان تمت ريحها بوزاعه.واجب عليك اتعول فالتغيير

وحتي النمل يبني بيت طرح القاعه.تقصير للتعب ياجد احذاه المير

وبيتت ضنا جاره احذاه جواعه.يرضابها امفيت اللي عديم ضمير

وخاصه ان تمن باهيات اوضاعه.ميسور حال متفرش افراش حرير

والمال راه مايشفع نهار شفاعه.ولايحول دونك ساعة التقصير

مهما كان واجد كاثرات اوضاعه.ان خشه اربا رزق السطير ايطير

واتجرك الدنيا شورها تداعه.واتجي معاك تزهالك اتعيش امير

واتخليك سيد وكلمتك مطاعه.واتزيد ترفعك يبقي نباك شهير

واللي قبل هايب دعكته واصراعه.ايطيعلك ويبقي في ضراك اجير

وابسبله انك داير اخطوط ازراعه.اتضيق بياح الله بالتحجير

وتنساه ثوب الفقر بورقاعه.وتنسي جميع الحزن والتقهير

فالخير والنعيم اتغرق للقباعه.ظلام الحياه ايردلك تنوير

وان لطت امعاك تضيعك في ساعه.بالهم والكدا غفله عليك اتغير

رباية مصايب للشقا وزاعه.تقنيد كسرها مايلايمه تجبير

وبوعقل مالساهل عليك اقناعه.ولا مستحق لشرح ولاتفسير

وهالوقت حتي الطفل بورضاعه.واقظ الكل اللي احذاه يسير

انكان مركبك تما قديم اشراعه.مانك اللي مجبور عالتبحير

اذكر اللي قبلك حضرت اوداعه.وكيد المعزي جاي عالتصيير

وراهي الناس ابطبعها شناعه.ابسرك يعولولك علي تدمير

بين الحبايب للفتن زراعه.خرابه ايزيدوا فالعلل تطوير

مواقف ايمرن فالحياة ابشاعه.الميت امسجل حي بالتزوير

وحق اليتيم اوكل ابكل جشاعه.وهو مهلكه يفتح ابواب سعير

شافقين تحلف واحيين مجاعه.ايريدوا زها زايل مداه قصير

الناس كيلي نسيوا قيام الساعه.وناسيين ضيق القبر واتغسوير

يوم فيه تفشل فزعة الفزاعه.باستجواب منكر عالخطا ونكير

وياعون من وفي العمر ابطاعه.يستبشر ابخير وهن اعماله خير

ومسك الختام يكون للسماعه.نصلي عليه رسولنا البشير

صلى الله على اشرف المرسلين محمد وعلى اهلة واصحابة اجمعين

اختكم فى الله نور