تصريحات الست سنية

[نجمة الكتب 5]

في حوار مع المواطنة: سنية ع0 غ0 ف0ق0000

حول الأوضاع على الصعيدين المحلي والعالمي افادتنا سيادتها قائلة:

أنا مش عارفة بس الدنيا جري فيها إيه؟؟!!

بقي كل يوم يقعدوا يوجعوا دماغنا باخبار شوية عن لبنان و فلسطين و شوية عن العراق وأفغانستان وعن الديمقراطية اللي بالعافية وبالهنا والشفا، بقى ده اسمه كلام؟ يعني احنا نسيب المسلسلات والفيديو كليبات وماتشات الكورة والاعلانات ونقعد نتكلم في اللي لا يودى ولا يجيب؟

وكله كوم بقى والناس المحموقين دول كوم تانى000قال ايه زعلانين عشان العالم بيصرف شيء وشويات على الحاجات المهمة زي المحمول والاقمار الصناعية والمهرجانات الرياضية والقرى السياحية والأدهى من كده انهم شايفين ان الفلوس دي المفروض تتصرف على الفقرا والمساكين واللى مش لاقيين ياكلو وجزء منها يروح لتعمير الصحرا والحفاظ على البيئة

وبعدين هما مالهم هما ومال الناس اللي بتطلع المريخ؟؟ عايزين منهم ايه !! ما يسيبوهم في حالهم مش يمكن يعملوا هناك شاليهات تشطيب سوبر لوكس ويجيبوا عليها إعلانات من إللي بتفقع مرارة إخوانا البعدا وجايز كمان إللي يجمع 500 ألف غطا من أزايز مشروب (طنش تعش تنتعش) يفوز بشاليه من دول، لكن هتقول إيه بقى هما كدة موارهمش إلا أنهم يشتكوا عمال على بطال من رغيف العيش والمواصلات والغلا والكوا وفواتير الميه والكهربا والدروس الخصوصية والثانوية العامية، دا بدل ما يقعدوا يحلوا المسابقات إللي بتيجي في التليفزيون وإللي الحمد لله بتأمن للمواطن مستقبله وبتوفر له شاليه في مارينا وعربية وخلاط ومروحة كمان، بالذمة يعنى عايزين ايه تاني، لكن هاتقول ايه بقى ناس مش عارفة مصلحتها00 نهايته أنا ماشية بقي عشان مسلسل( كبر دماغك) زمانه جاي000000

[أحمد سيف 3]

اوه لا كده مش ممكن ما يصحش

الكلام ده مش كلام دي اللي اسمها سنيه ع.غ.ف.ق.

لا الكلام ده بتاعي انا وانا معايا حقوق اللي بيسموها المَلَكية المفترية

طبعا كلكم عارفين انا مين

انا الواد الروش المنفض هيثم

وصحابي بيقولولي سوسو

[عاشق الصداقه 525]

أتمنى ميكونش فيه من أمثال الست ثنيه كتييير ... علشان البلد متخربش أكتر ماهى خربانه

[نجمة الكتب 5]

انا مش بتمنى انه ميكونش فيه من امثال سوسو(هيثم الشاب الروش المنفض) ولا امثال الست سنية( بتاعة مسلسل كبر دماغك) كتير، انا بتمنى ميكونش فيه منهم خالص،بس مش عشان البلد متخربش000، لا ده عشان حرقة الدم بس ..... ،اصله بيتهيألي البلد ما تخربش من كتر الناس الوحشين اللي فيها و الا كانت انتهت من زمان ، لكن ممكن تخرب اكتر و تنتهي من قلة الكويسين اللي خايفين عليها0000 ربنا يستر0

[ABOTASNEEM 117]

نداء الى السيدة سنية القاطنة بدير النحاس

 

لا تشربى الدواء .... الدواء فيه سم قاتل

 

فعلا والله الدواء فيه سم قاتل ، فما يقدم الى الناس والشباب على انه ترويح لهم وتنفيس عن مشاكلهم ( الدواء ) ماهو الا سم قاتل

 

فاللهم ابعدنا عن الدواء القاتل واحمينا واشغلنا بالدواء الاصلح لهذه الامة والذى يعمل على رفع شانها وعلو همتها وتقدمها

[صناع الحياه 14]

من هريدي ابن خالت ابو عمت جدت بنت عمت بنت خال مرات جاره

عجولك ايه ياسنيه

البلد لساهه بخير

ان مكونتيش مصدجاني

اسالي بنوك ساويسرا او رجال الاعمال الي بيستوردوا ويصدروا اللبان وفوانيس رمضان

يابنتي احنا الحمد لله صنعنا اول استيكه مصريه ميه في الميه بتمسح كل حاجه حتي الافكار من النفوخ

طيب انتي عارفه انا بكلمك من فين دلوجتي

من جدام مصنع هريدي للكراتيه

وعلي راي المثل

" حبيتك ومش بايدي وضيعت عليك رصيدي عبرني بميذد كوول او حتي بكيس هريدي"

سلام دلوجتي ادوبي الحج اتصل بزيرو تسعوميه عشان اكسب المليون

[نجمة الكتب 5]

يا هريدى انت فاهم غلط يا وِلد، الاستيكة دي مش مصرية الصنع ،

احنا بس ركبناها اهنه عندينا لكن الجطع مستوردنها والحمد لله

من حبايبنا اللى ما بيبخلوش علينا بحاجة واصل عارفهم ولا

عجولك عليهم عاد، عتلاجى اسمهم عالاساتيك كلاتها٠

اوعاك تنسانا لما تكسب الماليون يا ود العم ٠

وسلام كبير جوى لاهل جبلي و بحري

وكل اهل مصر المحروسة٠

[صناع الحياه 14]

بعد تفكير طويل جوي الحمد لله وصلت لحبايبنا اللي انتي بتجصديهم

بامارة اول حرف من اسمهم الصين

صح

علي فكره همه نويين يبنوا مصنع عندينا في قنا مصنع ابر خياطه

جال ايه اصل احنا مبنعرفش نخرم الابر كويس

فبعتنا للصين مخصوص لانهم خبره في صناعة الابر الصينيه

وكلام في سرك بيني وبينك متجوليهوش لحد واصل

حتي للي ميتسماش عاشج الصداجه والواد الوحش ابو تسنيم

انا وخمسين مليون من اصحابي العوطليه ناويين نبجي بزنس منز

هناخد خمسه مليار من البنك ونكت بيهم بره البلد واللي يتمسك فينا هيجول انه هيستورد بيهم ميه من الصين

يروحوا يسيبوه علي طول

شششششششششششششششششششششششششش اوعي تجولي لحد

[عاشق الصداقه 525]

وى وى وى .... عتقول ايه يا ولد .... كنًّك اتجنيت فى عجلك

 

كيف بتريد تهرب بره البلد بشوية فلوسات ... وكيف عتجول للبت سنيه متجولليش !!!!

 

انت ما عارفش آنِى ايه عاد .. كنك اتخبّلت يا جوين ... وبعدين عجوللك !

 

خد أقولك خد !!! ليش عتجول للبت سنيه ما تجولليشى انى بالذات وود خالتى ابو تسنيم انك ناوى تبقى بزبس مان

 

كله دى عشان متعزمناش تانى .. ولا عتحقد علىّ .. كنى حاجى أعبّى وشك قلامه يا ولد

 

********************************************************************************

*******

لحظوظه اظغنطره :/ لو مردش اهنه ولد أبو عرابى إعرفه انه اتخطف .. والفاعل مفعول "اللى عيعشق البت اللى اسمها

 

الصداجه " بس اوعاكم تقولو لحد عاد ؟؟؟

[نجمة الكتب 5]

وبعدهالكم يا ولد منك ليه ليه ليه له،

ايه الحديت الماسخ بتاعكم ده، واحد عايز يكت برة البلد و ياخد معاه الخمسة مليار

والتانى عاوز يخطف اخوه عاد....

ايه اللى حصل فيكى يا بلد، بتتخانجو و البلد في خطر؟؟

كنكوا مش عارفين اياك...عموما انتو احرار خليكو اكده لحد ما في يوم تلاجو اخوانا

بعتولنا صعايدة ماركة ( ميد ان تشينا) صحيح عيبجوا جصيرين حبتين لاكين ماظنيش

عيتعاركو ويا بعض زييكو وابجو خلو الخناج ينفعكم بجى.

الصعايدة وصلوا

[صناع الحياه 14]

من كبير هوارة جراجوس الي سنيه المفتريه الحقي بسرعه وامشي من البلد عشان الصعايده جرروا قتلك بستين جنبله وعشرين صروخ ارض ارض

الحجي نفسك يابتي جبل ملفاس توجع في الراس

ايه اللي خلاكي تجيبي سيرت الصعايده الصينيين

انتي مش عارفه اننا بنكرهم لانهم اخترعوا شومه صيني بتبطح من غير متموت

وغير اختراعهم الاخير بتاع الجلاليب اللي مبتتحرجش من النار

بزمتك ده كلام

يعني يخلصك اخوكي يخش خناجه ميموتشي حد

بزمتك الجلبيه بتاعتي متتحرجش لما ادخل جمير الطوب اللي انا مجرف ارضي مخصوص عشان ابنيه

ده برده كلام ده يا سن سن

علي العموم الحجي نفسك واركبي اجرب طياره للجصر عشان همه هيجلبوا عليكي كل البلد من اولها لاخرها

فخليكي زكيه

والسلام ختام

حمدان الجط الشهير بمصدع

[ABOTASNEEM 117]

يابووووووووووووووووووووووووووووووى

كنك اجننت ياواد عرابى وعايز طربقها على دماغاتنا كلياتنا

صعايدة الصين ميين دول اللى يهددو سنسن هانم

انت مش عارف انو سنسن هى بت عمة مراة خالة ابن عم الحج عوضييين ابو النخل

اللى موكِل الدنيا كلياتها بلح (ومتنساش احنا فى رمضان)

وكمان الوحيد اللى حداه نخل عيجيب بلح من غير فصا ولا نوى

يعنى من عين اعيان كفر البلح

ياريت توصلهم انهم يسدووو خشهم خالص وميخبطوش فى اسيادهم " الصعايدة الصح " ياوِلد

[MidooDj 11]

موضوع جميل والله

بس اكتر حاجة عجابنى التعليقات وانا كمان

no comment

 

تحياتى

[صناع الحياه 14]

سؤال محير اخوكي هريدي ياسنيه يمكن عندك انتي الجواب

تلت اثار العالم

مصانع سكر

مصانع اسمنت وورق وحديد وصلب

سد عالي

اكبر مصنع المونيوم في الشرق الاوسط

اراضي خصبه وجبال مليانه ثروات

ايدي عامله كتيره

كل ده في صعيد مصر يا تري هل العائد بتاع ده كله بيتصرف علي الصعيد ولا علي القاهره ونواحيها ؟

اذا كان عندك اجابه متحرميش اخوكي هريدي انه يعرف حاجه في حياته قبل ميموت

امضاء هريدي عوضين الشهير بمصدع

[نجمة الكتب 5]

اخيرا حد فيكم افتكر يرجع لسنية ،عموما عملت خير يا هريدىيا اخويا انك سألتنى،

انت عارف طبعا انى متخرجة من تالتة ابتدائى وبتابع برامج صباح الخير يا مصر

وميت مسا يا مصر واقعدى بالعافية يا مصر دا طبعا غير انى متابعة ال CNLوال BBD

يعنى من الاخر ست متنورة ، واحب اقولك يا هريدى ان الخير دا كله اللى موجود في

الصعيد لو كان العائد اللى بييجى منه بيوصل للقاهرة مكنش فى مواطن واحد جري ورا

الاتوبيسات ولا كان في موظف واحد ارتشى وعلى رأى المثل :كل متلبلب بيفهم لو شاورتله،

وبكرة ان شاء الله هيعملولنا النظام اللى بيقولوا عليه فيدرالى ده ومش هيبقالكوا حجة ولا

هتقدروا تقولوا ان القاهرة ونواحيها واخدة خيركم.

وبعدين يا هريدى متبقاش متشائم كدة مصر بخير وزى الفل ولا الصينى بعد غسيله

.... بلاش الصينى عشان بيعملكم ارتيكاريا .

والصعيد زيه زي بقيت نواحى مصر مفيهوش مشاكل خالص، هية بس مشكلة ظغنطوطة

وبسيطة خالص عارف ايه هى يا هريدي؟؟

ان مفيهوش عقول بتفكر للبلد،

فيه عقول....اه،

بتفكر........ جايز،

لكن الاكادة انها عقول مبتفكرش تفكير جماعى،كل واحد بيفكر ناقصه ايه، مبيفكرش البلد ناقصها ايه...

خايبين مش عارفين يعملوا زي المعلم عبده فهلوة ، عقبال امالتك فتح فى الحارة عندنا سوبر

ماركو قد الدنيا صحيح الحارة فيها اكتر من ٥٠ سوبر ماركو وبقالة لكن الراجل عمل اللى عليه.

وعلى اى حال يا هريدي انا مش عايزاك تحمل هم خالص لأننا لو نفذنا خطتنا الطموحة اللى هتنهض

باقتصاد البلد ، هنقدر نستورد عقول من اياها دي اللى بتدرس السوق واحتياجات البلد وبتخطط

وبتشتغل على اساسها وطبعا مش هقولك يا هريدي يا اخويا هنستوردهم منين، وعايزة افرحك...

عارف ده لو حصل ان شاء الله هنقدر في خلال ييجى ٥٠٠ سنة كدة بالكتير نصدرلهم احنا فوانيس رمضان

بس اللى محيرنى بقى ساعتها الفوانيس دى هتقول وحوى يا وحوي بالصيني ازاى؟؟؟

كل سنة وانت طيب يا هريدي ومتنساش تسلملى على ابن خالت ابو عمت جدت بنت عمت بنت خال مرات جاره

ويبعث بالتحية جدو وتيتة وعمو ابراهيم وخالته انصاف مع ارق التهاني بالنجاح ونحب نسمع اغنية

يا عيني يا عيني ~~ يا عينى عالبلد

وفتحت الهاويس ليه يا هريدى؟؟؟

[صناع الحياه 14]

انا سمعت عنك اشاعه ماليه الدنيا يا سنيه

يا ريت توضحيلي هل هيه صح ولا الناس بتغير منك اكمنك ناجحه ومشهوره

سمعت انك مبتستخدميش السمنه الصناعي عشان عملية الهدرجه ليها بتسيب مخلفات ضاره جدا بالانسان

عشان كده انتي بتستخدمي السمنه البلدي

ياتري الكلام ده صح ولا انتي زعلانه من شركات السمنه عشان طلعوا جارتك الحج وانتي ادولك بس طقم حلل

علي العمو م قوليلي الحقيقه وانااوعدك اني مش هقول للخمسين الف شركة سمنه الموجودين في مصر انك زعلانه منهم

هريدي صاحب اكبر شركة استيراد كبريت وابر في مصر

[الحسناء 0]

[قبل منحاكم الحاجات اللى حوالينا لازم نحاكم نفسينا لان احنا السبب فى اللى بيحصل ومفيش حد بيعترض مش من حق الست سنيه تطالب بتغيير اللى حواليها الا لما تبدا تغير فى نفسها معتقدش ان المواطنه دى فكرت تاخد حقها او يكون ليها دور فى اللى بيحصل حواليها قبل كدا لانها مشجعه من مشجعى مشروب طنش تعيش انا مش مع سنيه خالص لان كل انسان هو اللى بيحدد مصيره وهو برضو اللى يقدر يغير اللى حواليه زى ما جمال عبد الناصر ثار ومان وامم القناه اظن من حق المواطنين تثور على غلاء الاسعار ولو ان مفيش وجه للمقارنه لان جمال عبد الناصر مكنش بيسمع روبى

[نجمة الكتب 5]

بشكر كل اللى شارك فى الموضوع ده واحب اهديلكم كلكوا كلمات اغنية ( حدوتة مصرية)

ويا ريت لحد ما سنية تخلص امتحانات القبول وترجع ،نتناقش سوا وكل واحد يقول رأيه وتصوره

عن اللى ممكن نعمله عشان نخلى مصر احسن واحسن.

قولولى شايفين الغلط فين وشايفين ممكن يتصلح ازاى بس خدوا بالكم اللى هيقول على حاجة هينفذها

والا هنبقى بتوع كلام وبس وهيبقى مش من حقنا نطالب بأى تغيير لو مبدأناش بنفسنا زى ما الحسناء قالت.

 

 

حدوتة مصرية

منرضــــاش يخاصم القمر سمــــاه

منرضــــاش تدوس البشر بعضــها

منرضــــاش يموت جوا قلبى نـداه

منرضــــاش تهاجر الجذور ارضها

منرضــــاش قلبى جـــواى يغنى

واجراس تدق لصرخه ميـــــــــــلاد

تمـــــــــــوت حتـه مــــــــنــى

الاجراس بتعلن

نهايه بشر من العباد

دي الحكمه قتلتنى وحيتنى

وخلتنى اغوص فى قلب السر

قلب الكـــــــــــــــــــون

قبل الطوفان ما ييجى

خلتنى اخاف عليكى يا مصر

واحكيلك ع المكنـــــون

مين اللي العاقل فينا

مين مجنــــــــــــون

مين اللي مدبوح من الالم

مين اللي الظالم فينا

مين مظلــــــــــوم

مين اللى مايعرفش غير

كلمه نـــعم

مين اللى محنيلك خضار ؟؟

الفلاحين الغلابه

مين اللى محنيلك عمار؟؟

عمالك الطيابه

مين اللى بيبيع الضمير

...ويشتري بيه الدمار

مين هو صاحب المسأله

والمشكله

والحكايه والقلم؟؟

رايت كل شئ

وتعبت على الحقيقه

قابلت فى الطريق

عيون كتير بريئه

اعرف بشر عرفونى لأ

لأ ماعرفونيش

قبلونى وقبلتهم

بمد ايدى لك

طب ليه ما تقبلنيش

لا يهمنى اسمك

لا يهمنى عنوانك

لا يهمنى لونك

ولا بلادك مكانك

يهمنى الانســـــــــان

ولو مالوش عنـــــــوان

ياناس ياناس يا مكبوتة

هى دى الحدوته

حــدوته مصريــــــــــــه

[عاشق الصداقه 525]

أولاً أحب أهنىء سنيه علشان الموضوع ده أول موضوع ياخد تقدير موضوع ساخن فى المنتدى .. يعنى الموضوع يعد أكبر موضوع فى المنتدى ينال هذا العدد من الردود ... وبضم صوتى لصوتك .. نتكلم جد شويه ونشوف الحل فين ..

ومن رأيى العيوب كتيره وفى كل مكان ومعروفه ... والحلول .إحنا اللى حنحطها بإذن الله ... جيلنا ده حاجه من الإتنين :

ليكون زى اللى قبله واللى قبله .. اللى منهم سكتو وكل واحد فى حاله وسابوها تخرب ... ومنهم اللى إهتموا برفعة شأن البلد ونجاحها ... أو نكون " وياريت نكون " كلنا نكون على غرار اللى بيهتموا برفعة شأن البلد ونجاحها .. ومش مصر بس .. لأ وكل الدول العربيه والإسلاميه .. كلنا عاوزين بلدنا تكون بخير وتكون ناجحه جدا .. أنا متأكد إن كلنا عاوزين كده ؟؟

لكن السؤال .. عملنا إيه علشان نحقق ده .. مش بالكلام نقدر نحقق كل اللى بنحلم بيه .. على رأى الى قال .!!

لازم ناخد خطوه يا شباب ... وإتطمنى يا نجمة الكتب أول خطوه أخدناها بإذن الله ..

وهى إننا كلنا هنا فى المنتدى ده منتدى ياللا يا شباب

علشان ندعو الشباب .. شباب الخير ... إننا نكون أحسن .. إننا ننجح وده حيبقى نجاح لبلدنا ... ربنا يوفقنا ويوفقك فى الوصول لكده ... كلنا بنتعب من أجل نفس الهدف .. يبقى بإذن الله أكيد حيتحقق .. وننتظر باقى الاراء والإقتراحات ...

إحنا ممكن نعمل ايه ... علشان نرفع شأن بلدنا ونصلح العيوب اللى فيها ونوصل لأفضل مستوى؟؟؟ ...

ومن رأيى التغيير للأفضل هو الحل .. فليبدأ كل منا بنفسه .. وفى النهايه أتمنالك التوفيق يا سنيه فى الإمتحانات .. وترجعيلنا بالسلامه .. ونستفيد منكك أكتر وأكتر .. بارك الله فيكى .. ونجحك ووفقك بإذن الله

 

================================================================

[نجمة الكتب 5]

بشكرك اخى عاشق الصداقة على تشجيعك المستمر والموضوع ده مبقاش موضوع ساخن

إلا بمشاركتكم وارائكم وتعليقاتكم الجميلة وانتو اللى تستاهلو التهنئة .

 

انا بضم صوتى لصوتك فى ان كل واحد فينا لازم يبدأ بنفسه بس برضه فى حاجات

لازم تكون جماعية ومينفعش فيها كل واحد لوحده يعنى في تغيير على مستوى الفرد

وفي تغيير على مستوى المجتمع ولازم الاتنين يحصلوا في نفس الوقت.

 

بجد انا مبسوطة جدا وانا شايفة المنتدى بيكبر

شوية شوية واتمنى انه يبقى فعلا زى ما بتقول اول خطوة

فى طريق هنكمله عشان نبقى احسن واحسن بإذن الله.

[Soldier_Of_Allah 0]

إن الله لا يغير ما بقوم حتى يغيروا ما بانفسهم

[صناع الحياه 14]

لو سمحتي يا سنيه تديني اتنين كيلو هوا من الي جبتيهم معاكي من المريخ

عشان ادرس الاثير السلبي ليه علي صدور سكان المريخ

اصلهم يا حرام هواهم مفهوش اي تلوث

ربنا يكون في عونهم

بس وعد مني هبعتلهم كام مصنع اسمنت ومصنعين تلاته حديد وصلب وسيراميك

يمكن هواهم يتعدل شويه

[عاشق الصداقه 525]

ياريت الموضوع ميجيش عند الجديه ويوقف .. عاوزين نشوف حلول علشان نكون إيجابيين

ولا انتوا رأيكم ايه ؟؟

[AMR DAWAM 7]

يا جماعة الست سنية اتشغلت بالتليفزيون والمسلسل الجديد

وتقريبا شغل المطبخ كتر عليها

ربنا معاها وتخلص وترجعلنا تانى

*********************************************

[BLACKDREAM 5]

للاسف ان موضوع الامه العربيه و الاسلاميه بقا بالشكل السخيف دا

يعني طبعا انا مش بتكلم عل الموضوع المكتوب هنا لا انا بتكلم على

الست سنيه و على ردها . . .

 

الانانيه - النيو لوك - الفشل - الضعف - كل حاجه بيئول ان سنيه دي

انسانه مختله عقليا