كيف تكسب ود أى شخص فى الكون

[ABOTASNEEM 117]

بسم الله والحمد لله والصلاة والسلام على رسول الله

 

أنا فلان دا لما شفته حسيت أنى نفسى أصاحبه راجل وشهم وجذاب ووسيم ومهندم ومحترم جدا جداً ومتدين كمان و و و و من الأخر باااااااشا.......بس المشكلة أنى مش عارف أصاحبه ومش عارف ليه مش عارف أصاحبه ........

 

 

* لكل واحد فى الدنيا مدخل كل واحد فى الدنيا أى واحد مدخل مفتاح والمفتاح دا فى أيد اللى معاه المعلومات فركز أوى فى المعلومات دى:-

 

1_ الأنطباع الأول, مهم جدا جدا وغالبا بيفضل راكز فى الذهن حاول بقدر الإمكان أنه يكون متميز.

 

2- النظر فى عينه بود , ليها أثر السحر غمض عينك وتخيل معى مشهدك وانت تتحدث إليه وعينك تضحك فى حين أنك فى مشهد أخر تتحدث وأنت تنظر خلفه أو لا تنظر إلى عينيه خوفا من الارتباك أواواوا....أكيد الاولى هتسيب أنطباع هايل ومتنساش بود (eye contact).

 

3- أظهر الشوق والبسمة الصادقة عند ملاقاته(genuin smile):فعندما تراه تقف فورا وتتجه له وتشد على يديه ولا تترك يده حتى يتركها هو كما كان يفعلى المصطفى .

 

4_ لا تتعالى أو تتكبر عليه فالبعض يستخدم هذه الطريقة أعتقادا منه ان الشخص سينجذب إليه إذا تركه هو بتعالى او تكبر (ولا أخفى عليكم سرا هذه الطريقة تنجح ولكن مع الأشخاص المهمشين وعديمى الشخصية ولا أعتقد ان أحدكم يريد التعرف بهم).

 

5_ الإطراء عليه دون تكلف أو مزايده كالإطراء على ملابسه أو تقول له مثلا على بطريقة ودية ومازحة فى نفس الوقت(أخبار سموك أيه يا باشا) , ولو كان حد معاك عرفهم ببعض إذا ما كانش اللقاء عابر يعنى لو هتقعدم مع بعض عرفهم ببعض لكى تكسر الثليج فى هذه الجلسة .

 

6_ لا تتلفت وانت تصافحه وانظر مباشرة له بكامل جسدك.

 

7- حاول تعمل تحريات ....أيوة تحريات عن الشخص دا أسأل بيحب أيه بيكره أيه بيلعب رياضة ولا لأ ولو بيلعب بيلعب أيه وفين مين أعز أصدقاءه ساكن فين كل دى تفاصيل هتفيدك أوى بعدين.

 

8_ حضر موضوع معين تكلمه فيه قبل ما تقف معاه يعنى مثلا اللى أنا عايز أصاحبه دا بيحب .....مممم.....كمال الأجسام مثلا(زيى ) يبقى تفتح موضوع كمال الأجسام دا بطريقة غير مباشرة وتكون حضرت طبعا عنه معلومات كفايه عشان متبقاش قاعد معاه ولا مؤاخذة بطيخة , معلومات بقى من كتب من النت من واحد صاحبك كدا ....تبتدى بقى تسأله فى الموضوع اللى هو مهتم بيه دا وتبينله انك مهتم بيه انت كمان.

 

9_ إياااك إياك إياك تبقى ثرثاااار لو الطبع دا فيك أعمل (Back) للصفحة دى أو كل اللى انت قريته دا ملهوش لازمة, بالمناسبة الثرثار مبيعرفش انه ثرثار فهتعرف نفسك لما تلاقيك كل لما تيجى تتكلم اللى قدامك بيرد عليك بإقتضاب يعنى مش معنى الثرثرة الكلام الكتير السريع لأ معناها الكلام الكتير الفاضى التفه فى معظم الأحيان لدرجة تخلى اللى قدامك يعد الثوانى لما تقوم .

 

10_ مظهرك ودى كان المفروض أذكرها مع الانطباع الأول والمظهر مهم جدا مش شرط لبس غالى أو مستورد بس شرط النظافة والذوق فى اللبس يعنى ملاقيش واحد جاى لابسلى اخضر فى أخضر ويقولى دا جاى من باريس أقولك لا دا جاى من الأناية,شعرك دايما متسرح وأبوس أيدك بلاش الجيل لو حكمت أوى أستخدم كريم ,شعر الباط والعانة بيتحلقم كل أسبوع الرسول قال ميزدوش عن أربعين يوم ودا طبعا عشان العرق والريحة ,دايما ملمع جزمتك ولو كوتشى يبقى بتغسله ,وخاليك فاكر وشك دا هو مظهرك مرايتك أهتم بيه أغسل سنانك أعمل مسكات مش عيب ولا حرام أشرب ماء كتير عشان الرطوبة فى الوش (بطل العادة السرية عشان ...ولا بلاش دى مصايبها فى الجسم كله مش الوش بس!!),دايما بتحط برفان ومش هطول فى النقطة دى أظن معظمكم ادرى منى بيها ,بس خليك فاكر بلاش تبقى متكلف فى لبسك.

 

* عن أنس رضي الله عنه قال‏:‏ قال رجل‏:‏ يا رسول الله، الرجل منا يلقي أخاه أو صديقه، أينحني له قال‏:‏ ‏"‏لا‏"‏ قال‏:‏ أفيلتزمه ويقبله‏؟‏ قال‏:‏ ‏"‏لا‏"‏ قال‏:‏ فيأخذ بيده ويصافحه‏؟‏ قال‏:‏‏"‏نعم‏"‏ ‏(‏‏(‏رواه الترمذي ، حديث حسن‏)‏

 

 

* حدثني أبو غسان المسمعي، حدثنا عثمان بن عمر، حدثنا أبو عامر، - يعني الخزاز - عن أبي عمران الجوني، عن عبد الله بن الصامت، عن أبي ذر، قال قال لي النبي صلى الله عليه وسلم ‏"‏ لا تحقرن من المعروف شيئا ولو أن تلقى أخاك بوجه طلق "

 

 

 

* حدثنا يحيى بن أيوب، وقتيبة، وابن، حجر قالوا حدثنا إسماعيل، - وهو ابن جعفر عن العلاء، عن أبيه، عن أبي هريرة، عن رسول الله صلى الله عليه وسلم قال ‏"‏

ما نقصت صدقة من مال وما زاد الله عبدا بعفو إلا عزا وما تواضع أحد لله إلا رفعه الله ‏"‏

 

 

* تقول عائشه عن اخلاق النبى "وكان أشد الناس تواضعاً، وأبعدهم عن الكبر، يمنع عن القيام له كما يقومون للملوك، وكان يعود المساكين، ويجالس الفقراء، ويجيب دعوة العبد،ويجلس في أصحابه كأحدهم "

[أحمد سيف 3]

أنا عندي طريقة أسهل من الكلام ده كله

إنت عايز تكسب ود شخص ما .

اتبع الخطوات التالية:-

1. مد يدك إليه لتصافحه

2. عرفه بنفسك وتعرف عليه

3. قل له كلاما يعجبه "كلمتين حلوين على كام نكته"

4.خذه إلى أقرب مطعم واعزمه "أقرب طريق إلى قلب الرجل معدته"

5. تأكد أن هذه العزومة ستكون الأولى والأخيرة "لا تقلق"

6.بعد ذلك ستكون قد كسبت وده وبالتالي سيعزمك لرد عزومتك " استغل الفرصة"

7. كلما تقابله ذكره بانك عزمته أول مره واطلب منه انه يعزمك "لا تتردد"

 

 

طريقة فعاله جدا يمكنكم تجربتها

[نجمة الكتب 5]

موضوع جميل جدا

بس انا كمان عندى طريقة اسهل و اسهل هو احنا لسة هنعزم ونتعزم

لا انت اول ما تشوف حد و تحب تكسب وده روح على طول واتخانق

معاه... مش بيقولوا ما محبة الا من بعد عداوة.

وبعدين الخناق اسهل حاجة الواحد يعملها اليومين دول بسبب او من

غير سبب وما تخافش لو الخناقة سخنت وقلبت بضرب هتكسب وده يعنى هتكسبه

لان ساعتها هيكون فيه قضايا ومحاكم وعشره بقى و هيكون بينكم عيش و ضرب.

اوعوا حد يسمع كلامى .

[عاشق الصداقه 525]

أولا .. أحب أوضح لأبو تسنيم .... موضوعك جميل جدا .. ويهمنى شخصيا اكثر من أى أحد .. تسلم ايدك !!

 

ثانيا .. ردا على احمد سيف .. متفتكرش كل الناس زيك يا ولدى همها على بطنها وبس .. طول عمرك كده تموت وتتعزم!!

 

ثالثا .. الى نجمة الكتب .. أنا أعرف ان الشباب هما اللى فى بالهم افكار المشاكل .. لكن ما شاء الله واضح ان فى تقدم هائل!!

[ABOTASNEEM 117]

اخوتى فى .... والله انى احبكم فى الله

ممنون جدا من مشاراكاتكم واتمنى ان تكونوا قد حققت لكم الاستفادة حقا

الاستاذ ( معدة وبس ) اقصد احمد سيف ، اكيد انا اتفق معاك على طريقتك المسجلة باسمك واتمنى ان تنتشر بين الشباب علشان يمكن يشبعوا

 

الانسة ( شِجار ) الحمد لله انى حتى الان لم يحدث لقاء وجها لوجه بيننا تفاديا للاثار الجانبية المترتبة على هذا اللقاء

( اصلى انا امى عايزانى )

 

اخى ( عاشق الصداقة ) اشكرك على تحفيزك واتمنى ان اكون عند حسن ظنكم بنا

 

واشكركم مرة اخرى للمشاركة واتمنى دوامها