نسخه منك

[الجندى المجهول]

نسخة منك

" ع " المحطه ..

وانت واقف ..

من قصاد شباك تذاكر

فجأة تلمح ..

طفل نط بسرعه من وشَّك ..

وحاول إنه يجري ..

جنب بنت جميله تشبه " ليلى " أختك .

إيدها تحضن يد تشبه يد ماما

وانت ماشي جنب منهم

حضن إيدك كان بيحضن يد بابا

فجأة وسط الزحمه تهت وتاهوا عنك

ضعت منهم .. ضاعوا منك

وانت بتدوَّر عليهم

فجأة تلمح ..

شاب كان ساكن قلبك ..

افتكرته ..

وافتكرت ازاي هرب من كل حاجه ..

من أثاث بيته ، عياله ، قعدته فوق القهاوي ..

مظهره قدَّام صحابه ، المشاكل ..

اللي بينه وبين مراته ..

- غلطِتك

- مش غلطتي ..

ـ أنا مش بقولك . عيشه تقرف ..

ـ بكرهك .. طلقني ..

روحي .. إنتي طالق بالتلاته !!

وامَّا راحت منه راحت كل حاجه !

فجأة قرر ..

إنه يسكن برَّه منك

بس عاش ساكن قصادك

من ساعتها ..

عمره ما فكَّر يزورك ..

كان يدوبك بس أحياناً يشاورلك ..

تشاور ..

بابتسامه باهته منك !!

فجأة تسمع

شخص يشبهلك ندهلك ..

 

 

ع المحطه ..

وانت واقف من قصاد شباك تذاكر ..

كان بيقطع تذكرة " عودة " لواحد ..

نسخة منك ..

شعره شايب .. ضهره محني ..

حتى أسنانه اللي وقعت غصب عنه ..

.. سنَّه

.. سِنَّه !!

[الجندى المجهول]

انا اسف

الموضوع نزل غلط فى الحوار العام

[Shetos]

رائع أخى الجندى المجهول,,

 

تم نقل الموضوع لقسم الشعر مع فائق الإحترام والتقدير

تم تعديل March 22, 2009 بواسطه Shetos

[الجندى المجهول]

تسلملى يا شيتوس