فرش دايب

[الجندى المجهول]

مزيكا .. بتدق ليك إنت وحدك ..

وصوت " فايزه أحمد " ..

من الراديو يسأل :

”ـ يا " خد وردي " .. " يا سنَّه لولي "

مين اللي قال لليالي طولي ؟ ”

تنام الشوارع ..

وتسهر لوحدك ..

ما بين باب موارب وأربع حيطان ..

وألوانك اللي ابتدت تبتسم لك ..

بترسم ملامح خروجك بحلمك ..

من الدايره وحدك لأروع سفينه

وبين بحر وردي وبين شط زينه ..

وموجه تودِّيك .. وموجه تجيبك

ولا حد حاسس .. ولا حد سامع ..

يهيج بحر روحك .. يتوه اتجاهك ..

ولا حد عارف ولا حد شايف

شبح جي يهجم عليك غصب عنك ..

يفتش جيوب بنطلونك ويهرب

يسيبك على فرش دايب ويجري ..

وتجري كلاب الشوارع وتنبح ..

ورا ضل واحد حرامي

بياخد ف إيده ..

مفاتيح هروبك من اللي انت فيه !!