شربه ملح

[الجندى المجهول 37]

البحر مالح ..

وطعم الموج .. أكيد مالح

فما بالك ..

وموج البحر رغم الملح .. متعافي

لا بيسامح .. ولا يصالح

وبيعاند .. وبيجافي

ف مش كافي ..

تشيل شْباكك الموجه

وتطرحلك ..

أمل صالح .. وغير صالح

ومش كافي ..

تدوس الشط باقدامك ..

وقُدَّامك ..

بساط البحر ممدودلك ..

ومفرودلك شراع الفجر ..

ونسمة بحر تدعيلك ..

ف ليلة قدر !!

ف واقف ليه ومستني ..

تشيل شباكك الموجه ..

وتطرح لك ..

أمل صالح .. وغير صالح

ومستني ..

تداوي عجزك الموجه ..

.. بشربة ملح ؟!