على اسمك

[الجندى المجهول]

علي إسمك

علي اسمك

باغني أوتاري مشدوده ما بين قلبي وبين أمسك

علي بعدك

بحور العشق ممدوده ما بين عطشي وبين نهرك

وتنسيني في يوم فرحك

تلاقيني في يوم جرحك

أنا مغرم

وعارفك مغرمه بيه

حنونه بس بتداري

ومهما تقسي انا داري

يقولوا حضنها قاسي

أقول دافي

أعود ليها بيحضني التراب والأهل

تعود الشمس وتنور دروب القلب

وموج نيلها بيغسلني من الغربه وأحزانها

أعود احبي علي ترابها

أعود مهزوم ...

تأنبني وصوتها كله حنيه

يواسيني ويرسملي الطريق الصح

أعود تايه ...

تكون بر الأمان ليا

وضي عينيها يهديني في عرض البحر

أعود منهك من الأحزان

حطام انسان

تفتح للأماني بيبان

وتقبل مهرها كلمه.. ونظرة شوق.. وأغنيه

غريب مرغم علي بعدك

ولو بكره اتزرعلي حدود

ولو بكره ما جاش .. راح اعود

أعود ناصر .. أعود منصور .. أعود مهزوم

مادام ما خناكيش عارفك ..

هاتستنينا في المينا ..

وتبكي لما تشوفينا ..

وتجري عشان تضمينا

نكون جرحك . . نكون ضعفك . . ونغتالك ساعات فرحك

وعاشقينك تضمينا .. تحبينا .. ساعات تقسي وتنسينا

وعاشقينك ولو حتي بتنفينا