سؤال وجواب فى الفوتوشوب

[sami66544 0]

[بنوتة رقيقة 0]

اولا....احب احيكم جدا جدا على المنتدى

 

الحقيقة دى اول مشاركة ليا وموش عارفة اشارك فين ولا فين الاقسام كلها احلى من بعض

 

بس الحقيقة انا عارفة نفسى جاهلة جدا جدا فى استخدام الفوتوشوب وكذا مرة احاول انزل نسخ يااما معرفش اسطبها وتكون تقيلة اوى على الجهاز يا اما اسطبها كويس وبعد كدا احذفها لانى مبفهمش فيها حاجة

 

اممممممم

 

الحقيقة انا ليا تلات طلبات

1/ بتمنى تعتبرونى اختكم الصغيرة ومحدش يزهق منى

2/ نفسى اعرف نسخة فوتوشوب سهلة التعامل وصغيرة وكويسة لمبتدأة من الصفر زى

3/ عاوزة اعرف لينك دورة فوتوشوب فيديو بس يكون سلس وسهل

 

 

[Dr.A7MD 130]

أهلا بيكى أختى بنوتة رقيقة

 

أهلا بيكى فى منتديات ياللا يا شباب - بيتك التانى على الإنترنت

 

/ بتمنى تعتبرونى اختكم الصغيرة ومحدش يزهق منى

 

ده حصل بمجرد دخولك موقع ياللا يا شباب ,,, ولا عمر حد بيزهق من حد أبداً ,,, كلنا هنا أخوة فى الله

 

2/ نفسى اعرف نسخة فوتوشوب سهلة التعامل وصغيرة وكويسة لمبتدأة من الصفر زى

 

والله بعض الناس بتشوف النسخ القديمة أحسن وبترتاح أكتر معاها ,,, وفى ناس بتشوف النسخ الأحدث هى الأحسن ولما بتحاول بتتعلم عليها بتبقى كأنها بتبدأ مع البرنامج خطوة خطوة بدون أى تعب

 

الحكاية كلها عشان تحددى أنهى نسخة تناسبك ,,, لازم تعرفى مواصفات جهازك الأول وتعرفى أنهى نسخة هتبقى شغالة كويس ومش تقيلة مع امكانيات جهازك

 

3/ عاوزة اعرف لينك دورة فوتوشوب فيديو بس يكون سلس وسهل

 

دورات تعليم الفوتوشوب مفيش أكتر منها ,,, فى منها [ فيديوهات عربى - فيديوهات أجنبية " ودى بصراحة أحسن من العربى " - وفى دورات تعليم كملفات بصيغة الفلاش swf ]

 

فلو اللغة مش مشكلة عندك ممكن تتعلمى من سلسلة دروس انجلش [ وده يعتمد على سرعة التحميل عندك ] ,,, لأن حجم الدروس دى بتكون كبيرة شوية

 

الفيديوهات العربية بتكون جايه من مواقع ومنتديات عربية فى أغلب الأحيان بتركز على حاجات بعينها فى الشرح وأسلوب شرحها يختلف عن الفيديوهات الأجنبية

 

كل ده بيعتمد على أنهى نسخة اللى هتستقرى عليها وهتستعمليها ,,, وبعد كدا ممكن تنزلى دورات ودروس للنسخة اللى نزلتيها

 

==============================================

 

إن شاء الله هنتابع معاكى ,,, ياريت بس تقوليلنا مواصفات جهازك ايه [ processor - Rams - Motherboard ]

 

وإن شاء الله نحاول نساعدك باللى نقدر عليه

 

ولو عاوزه حاجة من الآخر كدا ,,, ممكن تدخلى على المنتديات دى من طريق البحث فى جوجل

 

منتدى دبليو انتر - موقع إيديال ديزينر ,,, هتلاقى فى المواقع دى كلها كل حاجة من الإبرة للصاروخ فى الفوتوشوب

 

معلش اعذرينى مقدرش اجيبلك روابط المواقع دى عشان ده يخالف سياسة المنتدى

 

وفى الأول وفى الآخر احنا فى خدمتك ,,, وهتلاقى أكتر من أخ وأخت يفيدوكى فى أى وقت

 

تحياتى لكى أختى الكريمة وأهلا بيكى فى منتديات ياللا يا شباب

تم تعديل August 7, 2010 بواسطه Dr.A7MD

[بنوتة رقيقة 0]

طبعا يكرمك ويعزك يا دكتور احمد ..وحقيقى انا مبسوطة جدا انى لقيت منتدى محترم اوى كدا

اما بئا بالنسبة لنسخ برامج الفوتو فحقيقى انا لا افقه فيها شئ اهم حاجة تكون نسخة خفيفة وسهلة فى نفس الوقت...وبالنسبة لموضوع الكورسات فاعتقد ان الانجلش موش هيفدنى اوى لانى الحقيقة بعدى من الامتحانات بالعافية بس برده اناعاوزة حاجة تعلمنى صح حتى لو فيها شوية انجلش اهو مقدور عليهم

 

ودى امكانيات البى سى عندى

 

كارت الشارشة عندى 256 والرامات 960ميجا والبروسيسور intel® celeron® CPU2.66GHz والبورده عندى Default system BIOS

 

وان شاء الله هشوف المنتديات اللى حضرتك رشحتها

 

وفى الاول والاخر تحياتى لحضرتك ولكل الموجودين على سعة الصدر وحقيقى اسفة على انى تعباكم معايا

[Dr.A7MD 130]

كارت الشارشة عندى 256 والرامات 960ميجا والبروسيسور intel® celeron® CPU2.66GHz والبورده عندى Default system BIOS

 

حلووووووووووووووو اوى

 

كدا ممكن أقولك وأرشحلك نسخة Adobe Photoshop CS3 Extended ME الداعمة للغة العربية

 

امكانيات جهازك بتفكرنى بجهازى الزمانى ,,, كان برضه 1 جيجا رامات والبروسيسور كان 3 بس كارت الشاشة كان بلت أن 128 ميجا بس

 

وكنت بشتغل اصدار CS3

 

أنتى جهازك بعون الله هيشتغل تمام مع الـ CS3

 

ولحسن حظك كمان فى موضوع خاص بالنسخة دى فى المنتدى عندنا بشرح التنصيب وكمان لينكات مرفوعة فى مكتبة البرامج للمنتدى

 

ممكن تتفضلى لموضوع أخونا عاشق الصداقة من خلال اللينك ده

 

http://forums.yallagroup.net/1779

 

اقرى الموضوع كويس وخلى بالك من تفعيل البرنامج بعد ما تسطبيه

 

ولحسن حظك كمان ,,, حظك حلو الليلة دى ,,, فى موضوع متكامل لأخونا دكتور ميدو فيه اسطوانات شرح للنسخة دى باللغة العربية

 

خمس اسطوانات [ مبتدىء - متوسط - متقدم - خبير - محترف ]

 

ادخلى الموضوع من هنا http://forums.yallagroup.net/28515

 

====================================

 

أظن كدا الأمور تمام !!!

 

وفى الاول والاخر تحياتى لحضرتك ولكل الموجودين على سعة الصدر وحقيقى اسفة على انى تعباكم معايا

 

لا تعب ولا حاجة والله ,,, احنا دايماً بنسعد لما أى حد بيكون عاوز مساعدة ونقدر نساعده ,,, خاصة الأشخاص اللى عاوزين يتعلموا البرامج بنفسهم

 

على الأقل كسبنا من وراكى ثواب ,,,, ولا مش عوزانا ناخد ثواب من وراكى

 

أى استفسار ,,, أى مشكلة لا قدر الله ,,, أى طلب ,,, قسم التصميم والجرافيك مفتوح 24 ساعة

 

فى خدمتك دايماً أختى بنوتة رقيقة

[بنوتة رقيقة 0]

لا بجد كدا ماليش اى حجة

 

حقيقى ربنا يكرمك ويجعله فى ميزان حسناتك...وانا باذن الله هنزل البرنامج ولو صادفتنى اى مشكلة موش هتردد

[waheedzero 0]

السلام عليكم

بداية انا مبتدئ فوتوشوب

باستخدم فوتوشوب cs5 عربي ومع ذلك خط Monotype Koufi لا يظهر عندي في انواع الخطوط مع اني متأكد انه موجود و شغال معايا في برامج أخرى

فهل

الخط مش شغال في الفوتوشوب

أو بيكون موجود باسم تاني

مش عارف

ارجو المساعدة

[El-Saher Fantasy 21]

بسم الله الرحمن الرحيم

أخي الكريم أنا لا استخدم فوتوشوب cs5

ولكن من خبرتي في الإصدارات السابقة له أن الأسس لا تتغير

وبالتالي قد تفيدك إجابتي التالية

وأرجو من الرد عن الإفادة من عدمها حتى نتمكن من إجابتك كما يجب

----------------------------------------

أولاً أخي عندي الخط موجود ويعمل بشكل جيد كما هو موضح بالصورة التالية

 

 

ولكن المشكلة قد تكون موجودة لديك بسبب الإعدادت

وعليه برجاء اتباع الخطوات التالية

من قائمة edit

تختار الأمر preferences

ثم general

وتأكد من تنشيط الاختيار التالي

 

---------------------

إذا كان الاختيار غير منشط فقم بتنشيطه

وإن كان منشط بالفعل برجاء الإبلاغ بذلك

-------------------------

[waheedzero 0]

بسم الله الرحمن الرحيم

السلام عليكم و رحمة الله

أخي الكريم الساهر

شكرا جزيلا على الرد و التوضيح

ولكن الختيار منشط بالفعل ولكنه موجود بقايمة كتابة بدل من general وهو بالفعل منشط

ومع ذلك الخط غير موجود زي الاصدار cs3 كما في الصورة إللي حضرتك وضعتها

وشكرا مرة ثانية و أرجو تساعدني

[rima00 0]

ساعيدوني ......عندما اريد تصميم خلفية عالية الجودة يظهر لي خطوط لا ترى بالعين المجردة بس ابيها ماتظهر.........

تم تعديل November 24, 2014 بواسطه rima00

[rima00 0]

ارجو المساعدة 

انا ليست محترفة  فالفوتوشوب لكن عندي مشكلة لا استطيع حلها

عندما اريد تصميم خلفية بجودة عالية وبتدرج الالوان بيظهر في تدرج خطوط لا ترى بعين المجردة الا ادا كبرت الصورة بتظهر

ساعدوني  ارجوكم