نصائح لطالب جامعي مستجد

[ali desoky 391]

نظرا لطول الموضوع فأنا قسمته على جزئين

 

النصيحة فى وسط الناس فضيحة، وأنت هنا لست أمام نصيحة واحدة، بل عشرين، وليس أمام الناس فقط، بل فى منتدي، وهو ما يعنى أننا نقدم لك نصيحة بجلاجل، فافهم واتعظ واعلم وتعلم، وكما قال المثل: انصح طالب الجامعة الجديد من الصبح إلى الظهر، فإن لم يأخذ بالنصيحة فالأفضل أن تضله عن الطريق القويم.

 

1 احمد الله على خروجك من المدرسة سليما معافى

الجامعة تاج على رءوس الطلاب لا يراه إلا تلاميذ المدارس. مرحبا بك يا أخى، وقد تحررت من يونى فورم المدرسة، وجئت إلى هنا مرتديا أبهى حللك، وقد رميت حقيبة المدرسة وأتيت ممسكا بكشكول سلك عليه قلب أحمر أو كلب أبيض، تستنشق عبير الحرية، وكنت قبل هذا لا تعرف أن للحرية عبيرا، من الآن فصاعدا، ما أشوفكش مكشر، خلاص، مفيش ناظر، ولا طابور، ولا تحية علم، ولا تذنيب، ولا ضرب، بقيت بيه يعنى، شوف بقى فى كام مليون تلميذ فى مراحل التعليم المختلفة بيحسدك على اللى إنت فيه، بوس إيدك وش وضهر، وإوعى تبقى قد المسئولية، قصدى خليك أكبر منها يعنى.

 

2 ليس بكليات القمة وحدها يتميز الإنسان

إذا كان مجموعك كبيرا وألقى بك التنسيق فى كليات القاع.. لا تحزن، فهذا التقسيم لم ينزل من السماء، ورب محاسب شاطر أفضل من طبيب فاشل، ورب مدرس يحصل على 20 ألف جنيه شهريا من الدروس الخصوصية أفضل من وزير الرى والموارد المائية، وإذا كنت لا تعمل ما تحب، فكبر دماغك، وعيش، احمد ربنا إنك دخلت ثانوية عامة وكلية أيا كانت مش أحسن من اللى أحلامهم اتكسرت بدرى ودخلوا دبلومات، خش إنت بس كده، ومتقلبش وشك، هتتبسط.

 

3 دعك من العبارات المتداولة والشائعات المغرضة والأقاويل المحبطة

إذا دخلت طب هيقولوك: طب من بقك، وإذا دخلت بيطرى، هيقولولك: يا بتاع البهايم، وإذا دخلت زراعة هيقولولك: عايزنها تبقى خضرا، وإذا دخلت تجارة هيقولوك: كلية الشعب، اشترى كيس قطن طبى أو حتى تنجيد، وسد ودانك، ما هؤلاء يا أخى إلا «منفسنين»، أو من دعاة الإحباط، هيقولولك عين شمس أصعب من القاهرة، وحلوان أرخم من جنوب الوادى، وهتسمع إن الدكتور ده بيسقّط، والتانى ده كتابه غالى، والتالت ده رخم مع الطلبة، فلوسك فى جيبك، وكيس قطنك فى إيدك، سد وامشى.

 

4 افتح عينيك، أغلق فمك، واتبع التعليمات

لا تأخذ الدنيا قفشا، ومتقعدش تعمل نفسك نائب رئيس الجامعة لشئون الكلام عمال على بطال، اهدى كده واستريح، وقبل ما تقعد تفتى، وتردد الكلام اللى بتسمعه، استوعب اللى بيحصل حواليك، أنت الآن فى مجتمع جديد، له قواعد وقوانين مختلفة، لسنا فى مدرسة، ولا فى أتوبيس عام، ولا فى سينما، التزم سلوك الطالب الجديد، ولا تقلد شباب اليومين فى سلوكياتهم المزرية، هتسألنى: يعنى إيه مزرية؟ وهقولك: دى بقى هتعرفها فى سنة تالتة على الأقل.

 

5 قم للدكتور ووفه التبجيلا.. أحسن لك

حضرتك الآن فى حرم، والاحترام واجب، سيبك بقى من حركات المدارس اللى من نوعية إنك تهزر مع المدرس، أو تتريق عليه، ولا تحطله بودرة عفريت على الكرسى، شغل مدرسة المشاغبين ده ملوش مكان هنا، لأن دكتورك ببساطة شديدة ممكن فى أى تغيير وزارى يتحول لوزير أو رئيس وزرا، عمرك إنت سمعت عن رئيس وزرا حد حطله بودرة العفريت، طبعا كل ده بجوار إن دكتور الجامعة أفضل عمليا من رئيس الجمهورية ومن المحافظ ومن تامر أمين، لكن تعمل إيه بقى، هى الدنيا كده.

 

6 المعيد عن العين معيد عن القلب

من هو المعيد؟ هو طالب شاطر، كان زملاؤه مطنشين، ويجلسون فى الكافيتريات، ويزوغون من المحاضرات، بينما هو قابع فوق الكتاب، يأكله ويشربه ويلبسه، حتى خرج من الكلية بمرتبة الشرف الرفيع الذى لا يسلم من الأذى إلا بإجراءات روتينية صعبة، والمعيد لديه مشكلة أساسية هى أن الطلاب يتعاملون معه باعتباره حتة طالب بس شايف نفسه شوية، وهو يريد أن يتم التعامل معه باعتباره دكتورا، ومن هنا تنشأ المشكلة، وأنا هنا أنصحك بأن تعطى للمعيد برستيجه، سواء استحقه أم لا، وهذا لسبب بسيط، لأن البرستيج لا بياكل ولا بيشرب ولا بيتدفع فيه فلوس.

 

7 لا تتسرع

يعنى بالعربى متستعجلش على حاجة، أى حاجة، كل شىء هييجى فى وقته، الكتب هتيجى فى وقتها، والكارنيه هييجى فى وقته، والأصحاب هييجوا فى وقتهم، وهتفهم كل حاجة فى وقتها، ولما تبقى مستعجل هتبقى مرتبك، وهتقع فى أخطاء أكتر، اهدى على نفسك، وخليك تقيل، واعرف كويس أنه ما طار طير وارتفع إلا كما طار وقع.

 

8 سلام مربع للحرس الجامعى

الجامعة مثل العين تماما بتمام، فكما أن العين عليها حارس، فالجامعة أيضا عليها حارس، لكن الأخير يختلف فى أنه يطلب الكارنيه عند الدخول، ويتلقى التقارير من الطلبة المخبرين، ويتدخل فى كل شىء فى العملية التعليمية بدءا من قبول الطلاب وحتى تعيين العمداء، ولهم دور جلل فى سلق وشى وتحمير انتخابات اتحاد الطلاب. من البداية حدد موقفك، فأنت إما مع الأمن أو ضد الأمن أو ملكش دعوة، فإذا كان ملكش دعوة، فقد أرحت واسترحت، أما إذا اخترت أن تكون «مع» فألف مبروك، وإذا اخترت أن تكون ضد، فلا يسعنا فى هذا المقام إلا أن نقول لك: فرصة سعيدة وإلى اللقاء.

 

9 كل الأوراق كاذبة

بمجرد أن يلمحوك وقد دخلت الجامعة، واستقرت قدماك بها سينهالون عليك بالأوراق، لا تسألنى من هم، فتقريبا كل الذين فى الجامعة باستثنائك سيحاولون بشكل أو بآخر أن يعطوك ورقة ومعها ابتسامة آلية يمنحونها لكل المستجدين من أمثالك، لأنك بالنسبة لأصحاب هذه الأوراق إما زبون أو صوت انتخابى أو عضو فى الجماعة، ستجد إعلانات عن مراكز تعليمية بإمكانها أن تحولك إلى عالم فى الذرة فى أسبوع وربما بدون معلم، وإعلانات عن مكتبات تضرب كتب الأساتذة وتبيعها بربع الثمن، وعن مكاتب تصوير المستندات بأسعار خاصة للطلبة، وعن غرف مفروشة للمغتربين، وعن أسرة الديك الفكسان، وعن ساندوتش المعلم الذى يقضى على الجوع والطلاب نهائيا.

 

10 إياك والمدبلرين

من هو المدبلر؟ المدبلر هو طالب يمتلك شهادة خبرة فى الكلية، يأخذ السنة فى سنتين وثلاث وأربع، لخمول فى نفسه، وضعف فى تحصيله، وكسل فى ذهنه، وتراخ فى أدائه، والدبلرة إن كنت لا تعلم مرض معد فتاك، ينتقل بالمصاحبة والمرافقة والمجالسة على الكافيتريات والمقاهى، وحتى بالمرافقة فى المواصلات. انقذ نفسك من المصير المظلم، واسمع ماقاله الحكيم لابنه، قال له: لا تصاحب المدبلر ولا تخلى المدبلر يصاحبك، لو كان نفع نفسه مكنش فضل جنبك

تم تعديل August 12, 2009 بواسطه alidesoky

[نودي 41]

والله ياعلي فعلا نصائح في غاية الروعة لكل طالب مستجد

واهم مافي الموضوع تخرجنا من المدارس يومها بيبقي ممل طابور و6 او 7 حصص والمدرس ده غايب والمدرس ده مش عارف ماله يوم روتيني جدا

الحمد لله

 

وإذا دخلت بيطرى، هيقولولك: يا بتاع البهايم، وإذا دخلت زراعة هيقولولك: عايزنها تبقى خضرا، وإذا دخلت تجارة هيقولوك: كلية الشعب، اشترى كيس قطن طبى أو حتى تنجيد،

 

فعلا احسن حل للموضوع ده هو كيس القطن

[orgowan 0]

والله نصائح ذهبيه

فعلا منذ ان دخلت الجامعه فى عامى الاول وانا كرهتها

لاننى لم اكن اعرف شىء

ولكن هذا عامى الثانى ارجو ان يكون افضل

[ali desoky 391]

والله ياعلي فعلا نصائح في غاية الروعة لكل طالب مستجد

واهم مافي الموضوع تخرجنا من المدارس يومها بيبقي ممل طابور و6 او 7 حصص والمدرس ده غايب والمدرس ده مش عارف ماله يوم روتيني جدا

الحمد لله

 

 

شكرا لمرورك وردك نودي

جزاك الله خيرا ان شاء الله

 

 

والله نصائح ذهبيه

فعلا منذ ان دخلت الجامعه فى عامى الاول وانا كرهتها

لاننى لم اكن اعرف شىء

ولكن هذا عامى الثانى ارجو ان يكون افضل

 

شكرا لمرورك ارجوان

ربنا يكرمك في عامك الثاني وفي باقي سنوات دراستك

بارك الله فيك

[حياتى من اجل ربى 22]

طالب مستجد

يااااااااااااااه

ده انا قربت اخرج

بس فعلا نصائح رائعه

هبقى اخلى اختى تقراها علشان الجامعه السنه الجايه

هتكون طالبه مستجده

مع ان اصلا مافيش حد بيسمع الكلام

جزاك الله خيرا اخى على

دائما تاتى بالجديد

مبدع ومتميز دائما

اسال الله ان يجعل مجهودك فى ميزان حسناتك

وان يوفقك الى كل خير

وان يعينك على افضل الطاعات فى رمضان

ويتقبل منك صالح الاعمال

احترامى وتقديرى

[ali desoky 391]

اختي الفاضله

 

 

جزاك الله خيرا

 

 

ان شاء الله

 

 

واكرمك بالخير والصحه والعافيه

[mona ahmed 19]

جامد جدا بس كيس القطن هيبقى عليك

[ali desoky 391]

جامد جدا بس كيس القطن هيبقى عليك

 

 

 

 

طيب كده المحصول بتاع القطن كله مش هيكفي كل الطلبه

بس نحاول نتصرف