العيشة واللي عايشينها

[رجل من الصحراء 36]

جدو ياجدو ياجدو

 

اووه ابن بنتي اخيرا ظهرت عاش من شافك ياخي ليه الغيبة دي

 

معلش ياجد بس وقتي بعد الزواج اختلف انت عارف بقى ياراجل ياعجوز

 

ربنا يهنيكم ببعض يابن بنتي

 

الله يخليك ياجد ويحفظك اووه هتنسيني اقلك كل سنة وانت طيب ورمضان كريم

 

الله اكرم يابن بنتي ويارب رمضان الجاي تكون وسط ولادك وتفرح بيهم

 

تعيش ياجد المهم انت عامل ايه وصحتك اخبارها ايه

 

نحمد الله على كل حال يابن بنتي الواحد ميتمناش غير رضا ربنا والستر من عنده

 

ربنا يكرمنا جميعا بيه ياجد ان شاء الله

 

امين يابن بنتي طول مانت بتشكر ربنا وتحمده هيزيدك ويكرمك

 

ايوه ياجد والله لسه كنت بتكلم في الموضوع ده مع صحابي في الشغل

 

وبقلهم الرضا ده نعمة من عند ربنا واللي ميحسش بيها بيتعب قوي

 

طبعا يابن بنتي طالما رضيت بنعمة ربك ربنا هيرضى عنك ويزيدك

 

بس تصدق ياجد فيه ناس كتير مش حاسة بالنعمة دي يعني هقلك مثلا على حاجة انا عشتها شخصيا

 

كان عندنا عامل بوفيه في الشغل سنه في الاربعينات كده ومتزوج وعنده عيال وبيت واسرة

 

ومحتاج يصرف على بيته وعياله وكان بياخد مرتب معقول بالنسبة للحكومة او اي شركة تانية

 

بس للاسف كان متمرد عالوضع ومش متقبل ومن اول يوم بيدور عالزيادة ومش راضي ودايما يشتكي لدرجة انه في النهاية باع نفسه باسلوب رخيص عشان الفلوس وبقى ياخد فلوس من احد المسؤولين في الشركة عشان ينقله الاخبار يعني اشتغل عصفورة زي مابنقول وفي النهاية ايه ياترى

 

الراجل نفسه اللي كان بينقله الاخبار طرده من الشغل بعد مابقى كارت محروق وانكشف

 

يااه يابن بنتي يعني هو كمان مستكفاش بعدم رضاه وانه محمدش ربنا ده كمان خان الامانة معاكم

 

ماهو عدم الرضا ده يعمل كتير ياجد ويخلي الشيطان يلعب ويتفنن براحته

 

ربنا يغنينا بفضله يابن بنتي

 

امين ياجد, وعكسه تماما بقى ياجد واحد اتعين مكانه شاب عنده 24 سنة والده متوفي وامه ست كبيرة ومريضة ومعاه اخوات بنات ومرتبط وعايز يتزوج وهو اللي شايل مسؤولية دول كلهم وعايز يصرف عليهم

 

وراضي بالوظيفة وبيحمد ربنا ويشكر فضله وبيتصدق من مرتبه وبيكافح وبيشتغل اليوم كله الصبح عندنا وبعدالعصر في محل سندوتشات ومبينامش غير ساعات بسيطة ان لحق ينامهم وكل ده عشان لقمة العيش وعشان يعيش اهله مستورين وعلى الرغم من كل التعب ده الا انه راضي وسعيد ومبسوط ودايما يضحك ويهزر

 

يااه يابن بنتي ده حاجة صعبة جدا ربنا يعينه هو وباقي الشباب اللي زيه

 

بس فعلا عشان هو راضي باللي قسمه ربنا ليه عايش مرتاح ومبسوط ومفكرش لحظه يدور على الطرق الرخيصة عشان يجيب بيها فلوس زي الاخ اللي قبله.

 

كان فيه ست يابن بنتي متزوجة ومستورة وجوزها على قد حاله موظف بسيط بيصرف على قد ماربنا مديله

 

الست مكنتش راضيه ومش حامدة ربنا وبتبص دايما لغيرها ودول معاهم ودول جابوا واشمعنى احنا وكل يوم مشاكل مع جوزها اللي مكنش عارف يعمل معاها ايه ولا يرضيها وفضل يدور على وظيفة اضافيه عشان يسعدها

 

وفي يوم قبل مايرجع البيت قال اما عدي عالسوق اجيب فاكهة للبيت والعيال افرحهم واتفاجأ بمراته قاعدة في السوق وبتتسول وعاملة نفسها شحاته وبتقول يتيمة ومريضة وساكنة في الشارع ومحتاجة فلوس

 

الراجل مصدقش نفسه وقع من طوله ومات.

 

لا حول ولا قوة الا بالله ياجد يعني هو بيسعى ويكافح عشان يسعدها ويسترها في بيتها معززة مكرمة وهيا راحت تدعي الفقر وتهين نفسها وتهينه.

 

ايوه يابن بنتي ربنا سترها وكرمها وهيا زالت ستر ربنا بايديها.

 

ربنا يسترنا ياجد ويغنينا بفضله

 

امين يابن بنتي, وعكس ده تماما ست كبيرة في السن زوجها متوفي وبناتها متزوجين بعيد عنها وولدها الوحيد سافر وسايبها الست تعبت ومرضت وفقدت بصرها وعلى الرغم من كل ده عمرها مامدت ايديها لحد ولا حتى رضيت تطلب حاجة من حد وراضية بكل اللي هيا فيه وعايشة بعشرة جنيه بتطلعلها من الجامع كل شهر

 

ودايما على لسانها كلمة الحمدلله وربنا هو الكريم وهو العاطي.

 

يااااه ياجد الرضا ده فعلا نعمة كبيرة اوي احنا غافلين عنها وعواقبها كبيرة اوي

 

الحمدلله يارب على كل حال ده انا في نعمة كبيرة على كده.

 

ايوه يابن بنتي طبعا الحمدلله على كل حال وكل نعمه علينا

 

يابن بنتي خدها نصيحة من راجل عجوز الدنيا شالت وحطت فيه سنين

 

ارضى بقضاء الله وقدره ونصيبك هتعيش غني وهتملك الدنيا كلها في ايدك

 

وخليك واثق ان ربنا هو اللي خلقك وهو اللي متكفل برزقك وعمره ماهينساك ولا هيسيبك

[مي مادي 1]

رائع اخي

جزاك الله خيرا

[رجل من الصحراء 36]

شكرا جزيلا اختي مي وفقك الله الى رضاه دائما

نورتي الموضوع

[NADA 34]

ربنا يسترنا ياجد ويغنينا بفضله

 

آمين يارب العالمين

 

فعلاً الرضا اجمل نعمة ربنا يمن بيها على الإنسان

 

الحمد لله على كل شئ

 

شكراً لك رجل الصحرا ,, أسلوب مميز ورائع كالعادة

 

ربنا يخلي لك جدك وكل سنة وانتو طيبين

[ريحانة الربيع 1]

القناعة كنز لا يفني

[الرّام 173]

السلام عليكم

 

 

اشتقت لحكايات "جدنا" كما اشتقت للمنتدى و كل ما فيه

 

 

ربي يعينك خويا "رجل من الصحراء" و ربي يهنيك في حياتك و يخليلك جدك و يخليك ليه و يحفظكم و كل الأسرة الكريمة ان شاء الله

 

 

 

ارضى بقضاء الله و قدره و نصيبك هتعيش غني و هتملك الدنيا كلها في ايدك

 

و خليك واثق ان ربنا هو الي خلقك و هو المتكفل برزقك و عمره ما هينساك و لا هيسيبك

 

 

الحمد لله العلي العظيم

 

الحمد لله الرحمان الرحيم

 

الحمد لله رب العالمين

تم تعديل September 24, 2009 بواسطه الرّام

[رجل من الصحراء 36]

شكرا لمروركم جميعا شرفتم الموضوع