ابويا مات

[الجندى المجهول]

أبويا مات

 

على فكرة

 

الموضوع دا قديم

 

انا ابويا اصلا مات

 

من ست سنين

 

صحيح

 

باحس كتير أنه معايا

 

 

و باحسه ساعات

 

بيقوم من تانى

 

وبطول القامة الممدودة

 

ما اعرفشى أزاى

 

يتكعبش بين أحضانى

 

و يضحك

 

ثم.....

 

يبرق لى بعينه

 

و يخرج سره الربانى

 

و انا على طول

 

حاسس انى

 

على معاد وياه

 

حاسس انى

 

و انا لسة ما جيتش الدنيا

 

ما اخترتش م الخلق سواه

 

علشان اطلع شبهه

 

و اخضر ارضه

 

و اضرب

 

فرعينى المخابيل

 

ف سماه

 

حاسس ان جدورى الضاربة

 

ف ارض الدنيا

 

مزروعة ف بدنه

 

و شاربة دماه

 

حاسس ان ولادى

 

الحالى.......

 

و ال...محتملين

 

ثمرة فاكهة

 

كثيفة السكر

 

كل ما ادوقهاله

 

و هو اللى مريض بالسكر

 

تطلعله ف وشه المغضون

 

الغمازتين

 

و يقول بطريقته

 

الله

 

برافو عليك يا ابن ال......

 

أضحك لشتيمته

 

و اسيبه واجرى

 

اخرج من بيتنا

 

خلق الله ف بلاد الله

 

و مع انى

 

بابعد عنه كتيير

 

يفضل جوايا

 

و يوم ما اتنرفز

 

عروقه بتنبض ف رقبتى

 

و عروقى بتفور بدماه

 

أنما

 

أول.... ما اخسر نفسى

 

أول.... ماباتوه بين المقامات

 

أول.... ما بادوس على نفسى

 

و اسكت

 

و ابلع

 

سخافات الناس

 

شربات

 

احس بعينه

 

بتزغدنى ف جنبى

 

و صوته بيشخط فيا

 

ألحق

 

ألحق

 

ألحق

 

أنا أبويا مات

 

====

منقول