انه فى يوم واحد تلاته

[الجندى المجهول]

إنه فى واحد تلاتة

عبد المنعم بيه شحاته

حب يبنى بيت كبير

راح لواحد صاحبه جداً

اسمه فتحى بيه المدير

ده مدير بنك البنوك

خد قروض

والقرود

وافقوا عليها

بس ناقص امضا واحده

من موظف كان صغير

اللى اسمه نصر افندى

وشهرته صوت الضمير

نصر قالوا فين ضمانك

قالوا اخرس لاقطع لسانك

ده انا واسطة من عند الكبير

 

قصره نصر افندى قاوح

رد واحد صاحبه قاله

انت هتخسر ايه يافالح

صاحبه كان بايع ضميره

وكان هيهبش مالعموله

قاله الباشا حصانه جامح

بلاش تتبت فى الرجوله

وكان رد سيادة المدير

خصم للعبد الفقير

ونفسه يدبه ميت رصاصة

رد عبده بيه وقاله

قابله نخده بالسياسة

هاته هنا عندك نقابله

ولو طاوعنا تتحسب له

قاله لأ يا عبده بيه

سى زفت مش زى اللى قابله

انا ياما حاولت معاه كتير

 

وهوبا راحوا اتنين جابوه

من قفاه وبهدلوه

رد عبده بيه وقال

ايه ياناس حرام سيبوه

ده زى ابنى بالتبنى

زعلته لكن غصب عنى

يا حبيبى يانصر افندى

لا انت سعد ولا انت غاندى

ولا هتغير شكل الكون

يانصر يابنى اهدى وطاوعنى

جر القلم واديك مليون

قاله طز فى الفلوس

قاله اما انت صحيح ملحوس

رد فتحى بيه المدير

يابنى طاوع عبده بيه

ده فى مقام سيدنا الوزير

وبعد ما تعبوا معاه مناهده

من يومين حد النهارده

صقف فتحى بيه وقالوا

برافو برافو يا نصر يابنى

احنا بنضحك ده اختبار

اما ليك عندى مكافأة

على اخلاصك الشديد

اول قرار نبدأ بيه بكرة

نقلك للوادى الجديد

واكتشفنا بالدليل

ان اللى أسمه نصر افندى

وشهرته صوت الضمير

بينتمى لأغبى فصيلة

أى فصيلة الحمير

أى فصيلة الحمير

تم تعديل September 27, 2009 بواسطه الجندى المجهول

[حياتى من اجل ربى]

تفتكر لسه فيه نصر افندى لحد دلوقتى

ربنا يستر

جزاك الله خيرا اخى شاعر المنتدى

وربنا يكرمك

[الجندى المجهول]

زى مافى اعضاء فى منتدى يالاشباب اكيد فى كتير نصر افندى

(الخير فى وفى امتى الى يو م القيامه )

صدق رسول الله صلى الله عليه وسلم

جزاكى الله خيرا اختى

ربنا يجعل الخير فيكى الى يوم القيامه