عروسة .......ديلفري

[اعتز بحجابى 0]

 

 

 

عروسة .......ديلفري

 

 

 

 

يرن جرس الباب , ويتجه الحاج محمود لكي يفتح ليجد أمامه شريف وأسرته , فيرحب بهم ويدخلهم للصالون قائلا : يا ألف خطوة عزيزة ......... اتفضلو يا جماعة .

وتجلس أسرة شريف في الصالون مع الحاج محمود .......... ويبدأ والد شريف في التحدث : والله يا حاج محمود احنا ما جينا هنا إلا لما عرفنا إن كل الناس بتتشكر فيك .......... ويكمل شريف : أي والله يا حاج , دا أنا حتى قلت للوالد إن الحاج محمود عنده حتة أصلي كده تقفيل بلاد بره .

الحاج محمود باندهاش : حتة ايه يا بني! ......... مش انتو برضه جايين تطلبو ايد مي بنتي .

وينظر والد شريف إلي شريف في غيظ موجها كلامه للحاج محمود وهو يبتسم ابتسامة صفراء : هههههه ...... طول عمر شريف هليس و بيحب يهزر ........ يا حج احنا فعلا جايين نطلب الحتة الاصلي.......... أصدي بنت حضرتك لشريف ابني .

الحج محمود : دا احنا لينا الشرف ........... دا احنا نجهزوهالكو ونشحنها على بيتكم يا ابو شريف ........ وأجرة النقل والمشال علينا كمان ........... طب تصدق وتآمن بالله , مي من أسبوع حلمت انها كانت عند محل جزم وكانت بتجرب جزمة عجبتها أوي بس ملاقيتش الفردة التانية , سألنا الشيخ : قال لسه ربنا مأذنش بالعريس , لكن لو لقت الفردة التانية هتلاقيه ............. معداش خمس أيام ومي حلمت إنها لقت الفردة التانية .......... وأدي الحلم اتحقق والفردة ............ أصدي العريس جه .

شريف في سره ( أنا جزمه يا ابن ال ............ ) .

والدة شريف : أمال العروسة فين , مش هنعاين البضاعة بقى ؟

يميل والد شريف ناحيتها ويقول بصوت خافت : اتكتمي يا ولية ......... بضاعة ايه إلي هتعاينيها .

وينادي الحاج محمود على مي : يا مي ......... يا مي ........... تعالي يابنتي .

 

( تدخل أم مي علي مي في غرفتها وتقول لها : انت لسه ماجهزتيش ......... يلا العريس عاوز يشوفك .......... وبعدين مال وشك أحمر قوي كده ؟! ).

- اعمل ايه يا ماما , علبة المكياج خلصت , فخليت سارة تسكعني كفين على وشي.

- يا نهار ........... دا انت على ما تطلعي يكون وشك ابتدا يزرق .

- اهئ اهئ اهئ .......... يعني العريس هيضيع يا ماما ؟

- الله يخرب بيت شورتك انت واختك ....... روحي اغسلي وشك بشوية مية , وربنا يستر .

(تمسح مي دموعها وتذهب لتغسل وجهها وتعود لغرفتها )

- كده وشك بقى كويس .......... يلا أنا هطلع دلوقتي , وابقي هاتي العصير وتعالي .

 

في الخارج يدخل ميمو ( أخو مي الصغير ) ويسلم على الموجودين , ويذهب ناحية شريف ويقول له : ازيك يا عمو ........ أخيرا هتيجي تاخد مي وتريحنا من أرفها , وبالله عليك يا عمو ابقى خدها معاك وانت مروح , وسيبلنا مكانها مروحة .

ويشخط الحاج محمود في ميمو : خد يلا ....... عيب كده .

شريف : سيبه يا عمي دا شكله دمه خفيف قوي .......... انت في سنة كم يا ميمو ؟

ميمو : رايح كيجي تو .

الحج محمود موجها كلامه لشريف : ولا قولي يابني , انت خريج ايه ؟

شريف : تالتة ابتدائي .

- نعم !

- في الحقيقة يا عمي .......... أنا وقفت عند تالتة ابتدائي , وبعد كده ما كملتش تعليمي .

- طب وبتشتغل ايه ؟

- بشتغل في ايطاليا .

وما أن يسمع الحج محمود كلمة ايطاليا حتى يطمئن قلبه , ويكمل حواره : والله يا ابني انت دخلت قلبي من أول ما شفتك .......... ويقاطعه ميمو : وأنا كمان يا بابا حبيته أوي ......... بس يا عمو شريف هي كلية تالتة ابتدائي دي كم سنة ؟, وبتتخرج تبقى ايه ؟

يصرخ الحج محمود في ميمو : وبعدين معاك يلا ......... عيب كده , ولكن تقاطعه أم مي : يوه يا حج ........ ما تسيب الواد يتسقف .

يرد شريف بسخرية : بص يا ميمو ........... مش هي اسمها تالتة ابتدائي ...... يبقى تلات سنين ....... وبتخرج اشتغل في ايطاليا علطول .

ميمو : أنا لما أكبر هخش الكلية دي عشان تبقى تذاكرلي .

 

وفجأة يعم المكان صمت رهيب , حيث تظهر من بعيد مي حاملة صينية العصير , وتدخل عليهم بخجل ................... ولكن تتعثر قدميها في السجادة فيتطاير الصينية والاكواب , ليستقر أحد الاكواب على رأس العريس ............تشششششششششش.............آآآآآآآآآآآآآه , ويتناثر العصير على ملابس العريس ............. وسريعا يقف الحج محمود وينظر إلي ابنته في غضب ويعتذر للعريس : معلش ...... معلش يا شريف يا ابني .........

شريف وقد عصر على نفسه شجرة لمون : ما حصلش حاجة يا عمي , دا حتى دلق العصير على العريس خير .

يرد الحج محمود : عندك حق يا ابني ........ بقولك ايه , ما تقلع الجاكته واديها لأم مي تغسلها ........ اقلع يا راجل , دا حتى الجو حر .

ويقلع شريف الجاكتة , وكمان القميص , ويجلس بالفانلة , وتحاول أم مي ومي اخفاء ضحكاتهم من منظر العريس وهو يجلس بالفانلة ........ ويردد الحج محمود : ها ...ايه رأيك دلوقتي ........ مش كده أحسن , وبعدين جاكتة ايه وقميص ايه إلي أنت جاي بيهم , دي كانت موضة أديمة .

ويرد شريف :ولا يهمك ياعمي........ بص بقى على بلاطة كده ........ الشقة وموجودة , والشبكة تطلب إلي هيا عاوزاه ........ العفش تنقي إلي عاوزاه ......... والحمد لله أنا راجل كسيب وبشتغل في ايطاليا , يعني إلي مي هتطلبو , مش هتأخر عليها....... ومش عايز منكم غير مي بالكارتونة بتاعتها وعليها شهادة ضمان خمس سنين .

الحج محمود : ضمان ايه يا ابني , دي مي واخدا شهادة الأيزو 9001, و إذا كان عالضمان , فأنا أضمنهالك مدى الحياة , بس أنا مش مسؤول عن سوء التخزين أو الاستخدام .

شريف : اطمن يا عمي , أنا استخدامي نضيف .......... دا حتى الموبايل إلي معايا ده بقالو أربع سنين , عمره ما عطل مني .

ينظر الحج محمود إلي مي ويقول : ها إيه رأيك يا مي .

وتنظر مي إلى الأرض في خجل وتصمت قليلا , ثم تقول : عليا النعمة يا دادي ده عريس لقطة , وأنا مستعدة أروح معاه دلوقتي .......... ثم تنظر إلي شريف وتقول : خلاص يا شرشوري , اعتبرني من دلوقتي مراتك .

ويرد شريف : خلاص نقرا الفاتحة .

لكن تقف مي وتقول بصوت عالي : استنو هو احنا لسه هنقرا الفاتحة ....... احنا نجيب المؤذون حالا , وخير البر عاجله .

 

 

 

 

 

تفتكروا ممكن يوصل بينا الحال لكده

[نودة 41]

السلام عليكــم ورحمـة الله وبركاتــة

،، موضوعك يا اختي اكثر من رائع

بس انتي ايه موصفات فتي احلامك

[eng_alaa 114]

الموضوع جميل جداً ودمه خفيف .. ويخوف كمان ..

 

ياتري هيوصل بينا الحال لكده .. ؟؟

 

ربنا يستر ...

 

شكراً اعتز بحجابي للموضوع المتميز ...

 

=================

 

بس انتي ايه موصفات فتي احلامك

 

ياريت بلاش السؤال ده خالص ..

 

جزاكم الله خيراً ...

 

* تم وضع الموضوع في القسم الصحيح ...

[ali desoky 391]

يرد شريف بسخرية : بص يا ميمو ........... مش هي اسمها تالتة ابتدائي ...... يبقى تلات سنين ....... وبتخرج اشتغل في ايطاليا علطول .

 

 

طيب كنا دخلناها الكليه دي

كانت نفعت معانا

 

ومش عايز منكم غير مي بالكارتونة بتاعتها وعليها شهادة ضمان خمس سنين .

 

 

 

 

 

جميله جدا

 

تم تعديل October 9, 2009 بواسطه alidesoky

[اعتز بحجابى 0]

شكرا نوده على الرد

بس انتي ايه موصفات فتي احلامك

انا خلاص يا حبيبتى متجوزه اصلا

والحمد لله كمان قريب هكون ام

الدور والباقى عليكم بقى

انا عايزه افرح بالمنتدى كله السنه دى

 

وشكرا مستر على وشكرا المهندس علاء

وان شاء الله نهنيكم بفرحكم قريب

تم تعديل October 9, 2009 بواسطه اعتز بحجابى

[بنت مصرية 65]

جميل جدا يماما يمني الموضوع خطير ودمه خفيف جدا

ممكن نوصل بس برضوا هيفضل فيه ناس محافظة علي الدين صح

ان مع العسر يسر

ربنا يكرمك بكل خير انتي وعيلتك ويبارك عليكم ورزقكم الصلاح والتقوي

تفبلي مروري

[رجل من الصحراء 36]

موضوع جميل جدا

جزيتي خيرا اختي الفاضلة

[Amany Gaber 0]

اولا ميرسى اووووووى على التوبيك الجميل ده

وبارك الله فيك

وربنا يستر بعد كده محدش يعرف نهاية الطريق اللى هو ماشى فيه وتقبلى مرورى

[الرّام 173]

تفتكروا ممكن يوصل بينا الحال لكده

 

 

لا حول و لا قوة الا بالله

 

يا بنتي شنوّة هالكلام

 

اكيييد طبعا لا .. موش لها الدرجة هذي طبعا

 

 

على كل .. الله اعلم ..

 

المهم ربي يسترنا ان شاء الله

 

 

****

 

شكرا ليكي حبيبتي على الموضوع الحلو .. و اللّهي خلّى الواحد يضحك بالسّيف عليه (غصب يعني)

 

يعطيك الصحّة و ربي يخليك ان شاء الله

 

و ان شاء الله تجيك بنوتة تحفونة و تكبر و تولّيلك عروسة و يجي "شريف" يخطبها

 

لكن شريف يكون شريف بالحق ... موش زي شريف متاع مي

 

 

:) :crying: :) :crying: :) :) :) :) :)