أوكورديون

[ناصر دويدار]

أوكورديون

ـــــــــــــــــــــ

 

أوكورديون وبنت بملايه

بتونسه على كعب كوباية

عيال بتلعب بلى وعيال تلف النحل

وعيال بتلعب استغمايه

بنت وولد واقفين من الشبابيك

وبيبدأوا حكايه

بنت وولد تانين عطوا ضهرهم للبحر

وبيبدأوا نهايه

وعيون بتشكى واد شقى لأمه زغللها بمرايه

راجل على عكاز

جورنال بيجرى من تحت نضارته الإزاز

على الجدار الجير

واقف ف برواز كبير أبويا بعصايا

ريحة الطعمية فايحه

والزيت بيغلى قرن شطة إسرائيلى

ولمونه بتنزل دموعها ف صحن فول

راديو قديم وصوت حليم بيقول

(أنا لك على طول)