مشاهد من واقع حياتنا

[:: نبـ القلم ــض :: 8]

مع زحمة الحياة...

مع التوهه والتشتت والحيره..

واحنا غرقانين ومكلبشين فى الدنيا بأدينا وسننا ...

والدنيا معتمه وشايفين كله بلون اسود...

وكل واحد بيجرى ورا احتياجاته ...ومشغول بحاله...

دستل الستارة على العيون والقلوب ...

ولم نعد نرى النور... نبحث عنه ولم نجده ... تقسو القلوب...

ناس بتجرى ورا المال

وناس بتجرى ورا السلطه

وناس بتجرى ورا شهواتها

وناس بتجرى على اكل عيشها

 

فى وسط الزحمة...ومع كل هذا ...

**فجأه!!!!**

ينقشع الظلام ..تزال الستاره .. نرى النور..

ترق القلوب ..بحدوث مشهد او موقف يكون له أثر صافى فى نفوسنا

يصحى الضمير ... ينعش قلوبنا بحب الله ... وبتحس معاها ان الدنيا دى ولا حاجه ...

وترفع شعار...

اجرى يابن ادم جرى الوحوش غير رزقك لن تحوش..

 

أكيد فى حياة كل واحد فينا هذا المشهد المفاجئ... مشهد ترسل معه رساله ربانيه تهديك الى الطريق الصحيح ...تقربك من ربنا ... تجعل الرضا يملاء قلبك ...

 

سأبدا معكم بهذه المشاهد المؤثرة عسى الله ان ينفعنا بها وينفع بيها الجميع...واللى يحب يضيف مشاهد لعلنا نستفيد معه...

محتاجين نرقق قلوبنا من القسوة اللى اصبتها بسبب سرعه الحياه والاحداث

 

مشهد رقم واحد

 

المكان: سطح بيتنا

الزمان: بعد رجوعى من الكليه والمستشفى

الحاله: تعبانه وزهقانه من كل اللى بيحصل حواليا ... بعد زحمة مواصلات وتشاجر ومشاحنات ... وزعل وخصام وظلم

 

الاحداث: كان نفسى استنشق شويه هوا نضيف وارمى نفسى فى احضان الطبيعه ... اتفرج على الكون واحس ان لسه الدنيا بخير المس الوان الصفاء والنقاء وسط الضماير الميته والظلم المنتشر

 

مع البكاء وبتقول يارب سلم

 

وقع نظرى على بيت مجاور لينا ... لقيت طفله معاقه زهنيا (لديها تخلف عقلى) ... بتشاورلى وبتلوح باديها علامة للترحيب ... وماسكه فى اديها ورده ..شاروت على قلبها وحدفتها ليا...ومن خلال محادثتى لها عرفت انها لا بتسمع ولا بتتكلم ... فقط تصدر صوت وترى بعينها

وعند مغادرتى ... تلوح لى بعد الذهاب وتشير باديها انى اجيلها (فيما معناها تعالى ... تعالى) .. ومن يوميها واحنا بقينا اصحاب

 

 

يا الله ... سبحانك ياربى ...

ما اجمل هذا المشهد ...

ياااااه ... لسه الدنيا بخير .. الحمد لله...

لسه فى حد يبتسم فى وجهك .. لسه فيه طيبه ... لسه فيه حب ...

ومن طفله لا تسمع ولا تتكلم ...واحنا عندنا كل النعم دى وطايحين فى الخلق!!!!!!!!

ما اجمل براءتها ... سبحانك ياربى ...

صحيح لم تخلق شيئا عبثا ... وكل شئ ليه حكمه ... وكله مقدر بحساب منك...

 

هذه الدقائق البسيطه جعلتنى اضرب بالهموم عرض الحائط ..رجعتلى الاهداف والامال... جعلتنى اردد لسه الدنيا بخير ...

واقول ربى لك الحمد كما ينبغى لجلال وجهك وعظيم سلطانك

[BLACKDREAM 5]

السلام عليكم و رحمه اله و بركاته

اختي الغاليه :

 

كلامك جميل و مشاعرك اجمل وصفكي دقيق و برائتكي اعزب

ولكن يا اختاه لان الفتاه مريضه لا تسمع و لا تتكلم فانها بريئه لانها

لم تخالط الناس و تعرف حقيقتهم صدقيني لا يوجد في الحياه شيء

فالنكن في الدنيا عابريين سبيل و لتكن الحياه مجرد موقف لحظه

[MOSTAFA_SHA3RAWY 0]

شكرا علي الموضوع الجميل ده بجد احساس جميل اوي وربنا يخليكي ليها وتبقوا اصحاب للابد لان فعلا صديقه زي دي اكيد متعرفش غش ولا خداع ولا ظلم زي اللي بنشوفه اليومين دول من اعز اصدقائنا للاسف

[سبرتو 2]

انا بقى هحكى حكاية غريبة حصلت فى يوم كنت ساخط على نفسى حاسس انى ربنا فى حاجات مش مديهانى

اول حاجة كنت راكب الاتوبيس اللى بيطلع الجامعةوانا فى الاتوبيس شوفت بنت ماشاء الله فى الجمال ولا اجمل من كدة عندها حوالى سبع سنوات وعندها شعر جميل جدا جدا ولون عيون ازرق ولا ينقصها من نعم الله شئوكنت بتمنى لو لو ان انا فى نصف جمالها

لكن للاسف حينما نزلت من الاتوبيس كانت مش بتعرف تمشى لانها كان عندها كرم فى الرجل يعنى عجز فى الرجل

قلت الحمدلله انى بمشى كويس

 

وبعد كام يوم كنت ماشى فى الشارع كان فى ولاد بيلعبو فى لاشارع وكان فى طفل قاعد لوحدة ما كانش بيلعب معاهم لما سالتة لية طلع مش بيسمع

قلت الحمد لله انى بسمع كويس

 

 

وبعد كام يوم شفت ولد لون عيونة جميل قوى قوى وشكلهمحلو خااااااالص

[BLACKDREAM 5]

مالك يا سبيرتو انا م نيوم ما سبتك لحد اليوم و انت مش عارف تركز

في اي شي خالص يا ابني مالك في ايه ماله الولد الشفته ماله ؟ ؟

[:: نبـ القلم ــض :: 8]

أخى بلاك دريم .. سبيرتو .. اخى الفاضل مصطفى

 

اشكركم على مروركم الكريم ... وردودكم الجميله ... التى اسعدتنى حقا

 

أكمل معكم هذه المشاهد

 

المكان

دار المسنين

 

 

الزمان

حيث يتوقف الزمن والساعات ودقات قلبك

 

الاحداث

 

صحيت الصبح بجرى بسرعه عشان الحق زيارات الكوميونتى الممله اللى ملهاش لازمة وبعد معاناه طويله مع المواصلات وصلت لمكان الزيارة التى تخرجها كليه طب للطلبه الفرقه الرابعه

 

وصلت للمكان ومليت اسئله الكتاب اللى المفروض تجاوب عليها وتمشى بعد بهدلتك مع المواصلات

 

وعند الانتهاء .. كله خلص ومشى

 

كنت شغوفه انى اشوف الناس العواجيز دوول ... واقعد معاهم واسمع قصه كل واحد منهم ... واحسسهم انهم لسه عايشين ...

 

فاتفقت مع احدى صديقاتى اننا لن نغادر المكان الا لما نسلم على الناس الموجوده

 

فتسللت خلسه أنا وهى لاحدى الغرف لاحد الناس الذى يسكنها بين اربع جدران ... لانه غير مسموح لنا بذلك ... وقولت دى فرصه اتعرف على قلوب وعقول على مشارف الهاويه قد خلعنا منها ثوب الحياة بسبب جحودنا نحن الابناء

وربنا يستر وميتقبضش علينا

 

وفجأة وبدون اى مقدمات

 

قابلت شخصيه لها العجب ...

 

السيد محمد (اتفقت معه انى اندهله يا جدو )

 

وبمجرد استطرادنا له فى الحديث قام بفتح ملف ذكرياته مع ابنته الوحيده التى تركته وتزوجت وسافرت واحفاده الذى لم يعد يراهم واخذ يتصفح الصور وارى الدموع فى عينه

 

رأينا فى عينه فرحة جلوسنا له ومأنسته وحدته

 

تخيلو اقعد يحكيلنا عن تاريخ مصر الحقيقى ... وقد قام بتاليف كتاب عن مصر اساس الحضارة ... وتاريخها الفرعونى ولكن لم يستجيب له احد لطبع الكتاب ...

 

وهو بيحكلنا محستش انى درست تاريخ قبل كده لان معظم اللى كان بيقوله محذوف من كتب التعليم .. وظل يردد جمل طول الوقت وهى

 

انا زعلان ان الشباب اللى طالع جديد مش عارف تاريخ بلده ... والشاب من دوول طالع وهو بيلعن البلد اللى هى اساس كل الحضارات... وعايز يغمض ويفتخ يلاقى نفسه وصل لنهاية السلم ... بدون صبر ولا كفاح ... يجى ويشوف جدوده عاونوا ازاى عشان يوصلوا ...

وورانا ورقه عن ** امة على مشارف الانهيار **

وكتاب عن اسباب انهيار الامه .. واخذ يحكى عن تفكير اليهود اللعين وازاى بيحاولوا جاهدين لتدمير هذه الامه

 

وعن علماء الدين اللى عمالين يفتوا بفتاوى عن الحلال والحرام ليس لها اساس شرعى وكل همهم عدد مرات الوضوء وسايبن المصيبه التى تنبأ بها فى 2008 !!!!!!!

 

وعن عفو وتسامح الدين وعن الاحاديث التى ليس لها اساس من الصحه واحنا عمالين نصدق بدون بحث .. وادانى ورقه عن تكريم المرأة للاسلام

 

ياااااااااااااااااااااااااااااااااااااااااااااااااه

 

كل ده واحنا نايمين على ودانا ... وساكتين !!!!

قد ايه العواجيز دووول كنز ... ازاى سايبينهم ورامينهم بين اربع جدران ... مش حرام الحكمه دى كلها تترمى ويموتوا وهما دافيننها فى صدورهم ... ولم يحملها الاجيال القادمه !!!!

 

قد ايه احنا بنصدق اى حاجه تتقال بدون تفكير وننساق وراء أراء بدون عقل ... وازاى الغرب بيصنع افلام مفبركه عشان ينسب الحضارة ليه !!!!!

 

واتفقت معه اننا هنجمع تبرعات عشان الكتاب يطبع .. لانه كنز حرام يترمى .. قالكتاب يحتوى على نظريات علميه لم يكتشفها العلم الحديث حتى الان

 

بجد مين هيتحااااااااااااااااااااسب على كل اللى احنا فيه ده !!!!

 

لكن للاسف اتقفشنا فى نهاية الجلسه واتقبض علينا واتطردنا شر طرده من الدار وكأن مفيش حد عاوزنا نعرف عن الناس دى حاجه ولا ناخد منهم العلم والحكمه !!!!!

[BLACKDREAM 5]

 

 

 

و الله يا اختي الغاليه بالفعل زي ما اتفضلي بكلامك :

 

العجايز دول كنز و عندنا مثل قديم بيئول :

 

المعندهوش كبير يشتري له كبير

 

و دا مثل بيقدر العجايز و قدر حكمتهم المهمه في الحياه

 

[Shetos 2]

انك لا تهدى من احببت ولكن الله يهدى من يشاء .... احنا بس محتاجين ننظر للنعم الكنيييييييييييييير اللى ربنا سبحانه وتعالى انعم بيها علينا وصدقونى هنقول كلنا الف حمد والف شكر مشاكل الناس كتير واللى يشوف مشاكل الناس تهون عليه مشاكلة بس احنا بنفكر دايما وببنظر دايما للى حالتة احسن منا سواء ماديا او اجتماعيا او لاى سبب اخر دون ان ندرى انى فى ناس لا تحلم بعشر المستوى المادى والاجتماعى اللى احنا فيه موضوع رائع اختى الغالية وردود رائعة من الاعضاء ربنا يهدينا جميعا ويجمعنا مع بعضنا فى الفردوس الاعلى ان شاء الله

تم تعديل January 16, 2008 بواسطه Shetos

[رجل من الصحراء 36]

جميل جدا