مغامرات سفروت في بلاد كتكوت

[ليالي اشواق 0]

 

بسم الله الرحمن الرحيم

 

 

في ليله ظلماء هيما هيفاء واليسا كمان ، وحشني ايام الانجليزي ، وايام حصه الانجليزي ، علشان اانا كنت شاطر جدا في الانجليزي بمعني ادق كنت فري جود ، قولت اعمل اي طيب ، راح شيطاني قالي طيب ما تروح منتديات انجليزيه

 

اشوف الجماعه الفرنجه علي راي اللي قال دول بيقولوا ااي في منتدياتهم وياتري شبابهم زي شبابنا وتفكيرهم زي تفكرينا ولا هناك فرق ، طبعا انا اول ما دخلت عرفت ان في فرق زي السماء وسابع ارض مش الارض بتاعتنا

 

اول مادخلت وشفت استايلات منتدياتهم لقيتها كلها استيلات افتراضيه مش زي الجماعه العرب استيلاتنا ملاينا صور

 

وورود وقلوب وسهام وعنتر وعبله وحاجات من دي كتير، زي ما يكون العرب خلصوا كل حاجه وفضيوا للرومانسيه بس ، تلاقي ياعم الاستايل الرومانسي اللي هيكهرب الدنيا، الاستايل الرومانسي اللي هيخرب الدنيا ، استايل حافيه القدمين مع الاعتذار للاخ كاظم الساهر اي دا انا خرجت بره الموضوع خالص المهم لقيت موقع اجنبي جميل جدا مش جميل راتب اي دا يعني احنا كل حاجه لازم نعلق عليها كدا

 

 

طيب خلاص ندخل في الموضوع علي طول الموقع دا اسمه حسب الترجمه اللي مش حرفيه خطوات لطريق النجاح

 

 

طبعا برهان اذا ما كان اسمع الموقع لا يمت للترجمه دي بصله (بصله وتومه) بس انا استنتجت الموضوع دا من محتوي الموقع وطبعا انا قولت لازم ارجع من الموقع دا بحاجه مفيده لاخوانا العرب فجبت معايا المقال دا

 

 

عنوان المقال" ست نصائح لمحادثه ناجحه"

 

 

طبعا كاتب المقال بدا بمقدمه طويله عن الجنس البشري وان هو المخلوق الوحيد اللي لديه القدره علي تكوين علاقاتت وتبادل خبرات مع الاشخاص الاخرين

 

 

وبعد كدا هيصدعك بنصايحه بيقولك اذا كنت( تبي) بعد الاستاذان من اخواتنا في الخليج تبي يعني ترغب في محادثه ناجحه وعمل علاقات قويه مع الاخرين وخاصه الجماعه دول اللي محيطين بيك واللي بتصطبح بيهم وبتتمسي بيهم

 

اذا كنت عاوز كدا دي اكيد حاجه سهله جدا اسهل من انك تجيب انبوبه بوتاجاز او تطلع بطاقه رقم قومي او حتي تحل امتحان فيزيا في الثانويه العامه المهم اذا كنت عاوز كدا يبقي عليك باتباع ست خطوات" دخلنا علي الجد"

 

1- ابدا بالسلام علي الاشخاص التي تقع اعينهم عليك دوما بمعني اصح الاشخاص اللي بتشوفهم دايما وطبعا الاخ دا معذور علشان ميعرفش ان رسولنا قالنا " الا ادلكم علي شي اذا فعلتموه تحاببتم افشوا السلام بينكم" طبعا دي الخطوه الاولي خلصنا منها وعرفنا اننا بديهيا بنطبقها عندنا علشان دينا امرنا بيها

 

 

2-اسال الاشخاص دول هما عاملين اي واخبار حياتهم ايه وعايشين ولا لا وكدا يعني مش اول ما تشوفو تقولوا شوفت جدو امبارح عمل ايه وطبعا صاحبك ممكن يكون شايل هموم الدنيا فوق دماغو ولسان حاله " جتك .....تاخدك"

 

 

3-يجب الا تكتفي في اجابتك علي اسئله هولاء الاشخاص بكلمه واحده يعني تبقي رغاي مش كلامك طالع من تحت ضروسك بالعافيه علشان الشخص دا ميحسش انك مخنوق منه وعاوز تفك ونقول ان الشخص دا طبعا معذور علشان ميعرفش ان العرب شغلانتهم الكلام بيتكلموا وهما بياكلوا وهما نايمين وهم بيحلموا وبيتكلموا حتي وهما بيتكلموا"

 

 

4- اهتم بما يقوله هولا الاشخاص وبلاش تحسسهم انك مدايق من الكلام معاهم وانك عاوز تنهي الكلام معاهم حتي لو مدايق تعالي علي نفسك ياخي شويه اه هو في ناس تتكلم معاهم ضغطك يعلي ويوطي ويوقف في النص بس برده اتحمل

 

 

5- اسال الاشخاص دول اسئله تكون انت لازمك تعرف الاجابه عنها علشان تهتم بالاجابه ووبالتالي تفتح مجال للكلام والرغي" حد فاهم حاجه"

 

 

6- لما تكون في حوار مع اشخاص حسسهم انك بتهتم انك تتعلم نهم ومن خبراتهم وانك تتبادل معاهم النصيحه والمشوره

 

 

وفي الاخر الراجل بينهي كلامه وبيقول اذا انت نفذت الخطوات دي هتندهش بجد ويمكن تجيلك سكته قلبيه من حجم العلاقات اللي انت هتعملها هتكون كدا اشهر من تامر حسني وعمر ذكي بس اكيد مش اكتر من ابو تريكه

 

وفي النهايه الراجل بيقول اذا كان عندكو خبرات تانيه ياريت تعلقوا علي كلامي وتفيدونا بيه

 

 

الخلاصه:

 

 

كلنا بنحاول نعمل علاقات كويسه في محيط مجتمعنا سوا اصحابنا في العمل او الدراسه او حتي جيرانا الناس دي بنشوفها دايما علشن كدا لازم نفكر ازاي نكون معاها صداقات كويسه علشان الانسان مش ممكن يعيش من غير اصحاب واصدقاء

 

 

وفي النهايه نذكر قول الرسول صلي الله عليه وسلم" المرء ضعيف بنفسه قوي باخوانه"

 

 

ملحوظه : مقال الراجل دا اساسا كان بتاع 10اسطر بس هعمل ايه ما انا في الاخر عربي شعوب الكلام

 

 

وللحديث بقيه ما دام في العمر بقيه...

 

 

والسلام عليكم ورحمه الله وبركاته

 

 

 

 

 

التوقيع :سفرررررررروت

[شهد 2010 4]

جزاك الله خيرا

بجد هما بينفذوا كلام الاسلام اكتر من مسلمين كتير

ولاقوا ان فى الاتحاد قوه فاتحدوا

ولاقوا ان تبسمك فى وجهه اخيك صده فتبسموا

والتمس لاخيك سبعين عذر فصبروا على تعاملهم مع من حولهم

ودا سبب نجاحهم

انهم مشيوا على نصائح الاسلام ونفذوها بحذافيرها

جزاك الله خيرا اخى

ربنا يجعل كل ما تكتب فى ميزان حسناتك

[ليالي اشواق 0]

جزاك الله خيرا

بجد هما بينفذوا كلام الاسلام اكتر من مسلمين كتير

ولاقوا ان فى الاتحاد قوه فاتحدوا

ولاقوا ان تبسمك فى وجهه اخيك صده فتبسموا

والتمس لاخيك سبعين عذر فصبروا على تعاملهم مع من حولهم

ودا سبب نجاحهم

انهم مشيوا على نصائح الاسلام ونفذوها بحذافيرها

جزاك الله خيرا اخى

ربنا يجعل كل ما تكتب فى ميزان حسناتك

 

اكيد كلامك صح وصدق من قال

 

جسد الاسلام في الشرق وروحه الاسلام في الغرب

 

شكرا علي مرورك