هل فعلا احنا شباب الندامة

[بحلم اكون وبحاول 14]

السلام عليكم ورحمة الله وبركاتة

احبائى جميع اعضاء المنتدى الكريم

بصراحة انا متغاظ جدا جدا جدا عقب احد الحوارات بالمواصلات العامة واثناء الحوار تحدث احد الموجودين وطبعا كان الحوار عن حال الشباب بمصر وبمنهى العفوية قال انتوا شباب الندامة لا فيكم فايدة ولا عايدة عدد على الفاضى لا حد سمعلكم صوت ولا حد معبركم مفلحينش الا على الفيس بوك والشات وسايبين البلد لمن هب ودب من اخوانا البعدا واول محد يكلمكم تقولوا واحنا هنعمل اية طيب خليكم لما الواحد يعجز وهو مش لاقى نفسة ويلعن ابو الظروف اللى جابتة على الدنيا والبلد بلدهم ومن الكلام الفاضى دة كتيييييييييييييييير

المهم الواحد اتوكس لانى لقيت جزء كبير من الكلام اللى بيقولوا صح

المهم علشان مصدعكوش

انا طلعت باكتر من نقطة من الموضوع دة

اولا : احنا فعلا كشباب عددنا كبير جدا فى مصر بالرغم من كدة ملناش صوت

عندنا كلنا ودى من وجهه نظرى لامبالاة بشكل مرضى وخاصة فى فيما يتعلق بالنواحى السياسية رغم ان كستور البلد اسف دستور البلد بينص على اننا نشارك

الناس كلهم وخاصة السادة المسئومين بقولوا ان الشباب لية الاولوية فى المشروعات ودعم الشباب وحب الشباب ولا حياه لمن تنادى

فى النهاية علشان مطولش عليكم وطبعا مش هتقولوا طول تعالوا كاعضاء بالمنتدى نفكر مع بعض ازاى نقدر نقول ان احنا موجودين ولينا صوت

وسلملى على الاتوبيس

[mona ahmed 19]

نقول ان احنا موجودين بأننا نغير النظرة التشائمية اللى احنا بنبص بيها على كل حاجة وحاول نغير من نفسنا

مشكلتنا اننا بنعتب على غيرنا قبل نفسنا

يعنى بنلوم الحكومة على كل حاجة...............عاملينها شماعة

بس لو احنا بصينا الاول لنفسنا هنلقينا مش بنعمل حاجة ايجابية

لو عايزيين نتغير بجد ونغير بلدنا للاحسن لازم نفكر ممكن نعمل ايه

نخطط هنعمل ايه فى الاجازة ؟؟؟

هنقعد على الفيس بوك والنت لغاية 6 الصبح وننام لغاية العصر؟؟

ولا هنتطوع فى عمل خيرى يساعد الناس ويسلعد بلدنا؟؟..........تخيل لو كل شباب مصر او حتى نصهم او ربعهم استغلوا الاجازة صح ونفعوا بلدهم البلد دى هتبقى عملة ازاى

تخيل بدل مانقعد نتفرج على استار اكاديمى نتفرج على مجددون بتاع عمرو خالد

كل اللى سمعتوا من الناس اللى فى الاوتوبيس كان صح وكان عندهم حق

بس طالما عرفنا ان فينا عيب او خطا لازم نصلحة ونتغير

واسفة انى طولت

[روح و ريحان 0]

موضوع مهم و حيوي

قال النبي صَلَّى اللهُ عَلَيْهِ وَسَلَّمَ «من قال فسد الناس فهو أفسَدَهم» وفي ضبط «فهو أفسَدُهم»

عايزين نبطل نحكم على الناس المهم اننا نكون بنعمل احنا حاجه

خاصة و ان فيه شباب فعلا في منتهى الجمال شباب بمعنى الكلمه

ناس بتعمل اللي عليها و بتحاول تصلح اللي حولها مش مجرد متفرج او مشجع في المباراه

و دول مش قليليين على فكره

المهم بس ان اللي بيكون شاطر في الانتقاد يكون شاطر بردو في الاصلاح

جزاك الله خيرا

[اعتز بحجابى 0]

احنا مش بنظهر غير الوحش بس

 

فيه مليون حاجه بتتعمل كويسه فى البلد ومن الشباب