قلبى ام عقلى؟...راحتى ام شقائى؟

[aaneta]

السلام عليكم شباب"ياللا ياشباب"

انا بصراحه موش هنزل موضوع جديد يفيد بس لانكوا شباب بيساعد بعضه وبائيه انه يبأى احسن فانا بسألكوا واتمنى انى الائى عندكوا الاجابه ع سؤالى

انا بتعرض فى شغلى لمفترق طرق كتييير...خيارات...اما افضل زى ما انا او اكمل لمستوى ومكان اعلى بس هو فى مشكلة انا اخدت قرار العقل أبل كده وطلعت فعلا لاعلى بس تعبت

اتعرضت لصراعات شديدة وضرب تحت الحزام...انا حد دوغرى جاد مخلص بتهمنى الفايدة العامة....لكن لأيت حواليا بشر تانين....تعبت ....أضيت شهور فى عذاب وضغط نفسى

ودلوأتى.....دلوأتى...

بتعرض لنفس الخيار بس اشد من الاول ...المكان اللى رايحالوه صراعه اكبر....الناس اللى فيه اصلا اعدائى

اعمل اييييييييه

محتارة لازم آخد قرار

لو كنت قبل كده كنت همشى عقلى بس التعب اللى شفته فى آخر قرار مخلينى خايفه ساعدونى من فضلكوا

مستنيه ردكم

[رحمتك رجائي]

ممكن توضيح اكثر اختي لاني لم افهم جيدا

اي مواقف تتعرضين اليها وماذا تردين ان تختاري

عندك مشكلة في عمل مع زملائك في شغل

[رحمتك رجائي]

يبدو انك خرجتي الان وقت متاخر ومضطرة اروح اصلي الفجر

عدا ساعود وتفهينني وتشرحي مشكلتك وان شاء الله بقية اعضاء يلا شباب الطيببي سيساعدونك

تم تعديل July 3, 2010 بواسطه ريحانة الجنة

[aaneta]

اختى الكريمة ريحانة الجنه

بشكرك على ردك جدا

وعشان اوضح اكتر...مشكلتى ملهاش دعوة بقصص حب او مدايقات من زمايلى الشباب بسسبب اعجاب او غيره لكن فيها مدايقات منهم ومن حتى الزمايل البنات عشان يبأوا احسن منى...ممكن لو عندك فكرة يسرقوها

ميعرفوش الزوق ممكن يتكلموا معاكى بشكل قليل الزوق.....وطبعا اكيد بيقولوا عنك كلام موش ولابد لمديرك عشان يبعدوكى عنه....محدش ممكن يساعدنى...لازم اشتغل وحدى

بس ده امتى لو اشتغلت فى المكان ده وقبلت انى اعلى فى مستوايا المهنى على حساب راحه دماغى واعصابى وقلبى

زمايلى التانين اختاروا تكبير الدماغ واستمروا فى المكان اللى هم فيه.....وكل ماشوفهم الائيهم بيضحكوا ومعندهمش هم...زى ما كنت انا كده زمان...قبل ما ادخل سكة الطموح ...انا دلوأتى اتحطيت فى موقف جديد

بردو انى اروح لمكان اعلى...والمكان ده زى اللى حكيت لك عليه واكتر من ضرب تحت الحزام ومؤامرات.....اروح....ولا اكبر؟؟؟؟؟؟

واريح دماغى وعقلى؟

؟؟؟؟؟؟

بلا طموح ووجع دماغ؟؟؟؟

[Dr.A7MD]

السلام عليكم

 

أختى الكريمة ... أهلا بيكى فى المنتدى معانا

 

أنا قريت موضوع حضرتك وحابب أفيدك باللى أقدر عليه

 

أختى فى الله ..

 

كل مكان جديد وله شدته وله رهبته وله نظامه اللى بيفرق بيه عن غيره

 

كل مكان له نظام يختلف عن التانى .. مش شرط يكون هو الصح ولا شرط أنه لازم يكون النظام السائد

 

امشى عدل يحتار عدوك فيك .. تماااااااام !!!

 

لو ملكش سكة نضربك تحت الحزام .. ولو مترضاش بالنظام بتاعنا نركنك فى جمب لوحدك عشان تيجيلنا أنت فى الآخر

 

ده للأسف النظام الماشى فى أغلب أماكن الشغل على مستوى الدول العربية كلها للأسف

 

بعد عنك ثقافة [ عشان أطلع لازم أدوس على كل الناس ]

 

مش عيب أنك تكون بتعمل شغلك على أحسن وجه .. ومش عيب أنه يكون دايماً مخك شغال وتحاول توصل للأفضل

 

مهو عشان أوصل لكل ده أكيد شربت المر ... أكيد كل ده مجاش بالساهل

 

إنما بعض النفوس الضعيفة واللى واخده أماكن بدون أى استحقاق ميعجبهاش الحال العدل أبداً

 

نظام يا تكون معانا وويانا زى الفل يا أما تكون ضدنا

 

معانا معانا .. مش معانا تبقى علينا .. مفيش خيار تالت

 

==============================

 

دايماً اللى بيكون عاوز الأفضل يستحمل أى حاجة مدام مؤمن بالله وواثق فى قدراته اللى ربنا وهبهاله

 

عاجب مش عاجب الناس .... أنا مليش دعوة بالناس ... مدام شغالة بما يرضى الله تبقى الناس فى ستين ألف [ .... ] سلامة أكيد

 

الناس اللى بتريح دماغها وتحب تفضل فى مستوى واحد خوفاً أنها تفقد مركز ما أو حاشية ما أو عزوة ما

 

هتلف وتدور الأيام عليهم ... هيسيبوا أماكنهم ومولد الناس هينفض من حواليها وتتحسر وتقول [ ياريتنى كنت عملت كذا ]

 

فى الزمن ده متعتمديش على الناس فى أى حاجة .. أنا مش بقول أن كل الناس وحشه .. إنما الزمن اللى احنا فيه ده أكيد حضرتك عرفاه

 

==============================

 

ماشية صح .. مبتغية مرضاة الله فى كل حاجة .. مش بتأذى حد .. بتعملى شغلك تمام

 

يبقى كدا أنتى عداكى العيب

 

فى شوية ناس مش عاجبها الحال العدل وبتحاول تحفرلك من تحت لتحت .. حلها بسيط جداً

 

الحكاية بس عاوزة قلب جامد وصبر وتحمل

 

استعملى نظام [ العصاية فى ايدى أدافع بيها مضربش ]

 

الناس دى أكيد بتعمل بلاوى كتيرة ... لو فكر حد يتعرضلك بأى حاجة .. هتبقى بلاويهم تحت إيدك

 

مع العلم بشىء مهم جداً .. الغلط متسكتيش عليه أيا كان .. تحاولى تغيريه بكل السبل [ بإيدك .. بلسانك ] وأضعف الإيمان بقلبك [ إنكار هذه الأفعال ]

 

وخليكى واثقة .. مفيش حال دايم أبداً .. ولا فى وحش مستمر .. ولا فى شر مستفحل لأمد الدهر

 

إذا كان الإنسان ذات نفسه بيموت ... حال الناس مش هيتغير !!!

 

=================================

 

فى النهاية هقولك حاجة .. اقعدى مع نفسك وفكرى فى كل حاجة بالراحة وبعد تفكير عميق استقرى على رأى معين .. وبعد كل ده اعملى استخارة

 

خلى بالك فى الإستخارة الصحيحة لازم حضرتك تكونى مطمئنة لحد كبير ومرتاحة لأى من الأمرين .. وبعدها تعملى استخارتك

 

مش تكونى محتارة بين الأمرين وتقولى اعمل استخارة .. لا .. لازم قلبك يكون مرتاح وميال لأى من الأمرين

 

=================================

 

متغفليش قيمة الدعاء .. فهو من الأسلحة الخفية التى لا يعلم مداها الإ الله [ مجرب تجربة شخصية والله ]

 

=================================

 

شكل الحوار قلب جد زيادة عن اللزوم ... نكتة بسيطة لها دلالة كبيرة فى الزمن ده

 

مقولة الكل عارف أكيد مين قالها .. [ فى الزمن الأغبر ده .. الجنيه غلب الكرنيه ]

 

تحياتى ليكى أختى فى الله ..... وأهلا بيكى فى منتديات ياللا يا شباب

 

تم تعديل July 4, 2010 بواسطه Dr.A7md

[رحمتك رجائي]

بارك الله في الاخ الذي قام بتقديم رايه وانا اوافقه تماما اختي الحل مشابه في كل دول العربية والاجنبية ايضا

قانون المصالح والغيرة والحسد

يعني لازم اتفوق واكون انا الاول وادوس علي زميلي في شغل واعمل منو درجة او سلمة للصعود ويا سلام علي الحيل للتقرب من رب العمل

اختي انتي اهتمي بشغلك حاولي انك تتقنيه ولا تخطئي ابدا لان كل غلطة ممكن تاذيك ويستغلها البعض

اعملي كما قال الاخ لمرضاة الله وليس الناس لان الناس اصبحو هكذا للاسف الغيرة المهنية والحسد تاكل اشلاءهم

سلام

[aaneta]

السلام عليكم اخوتى الكرام

جزيل الشكر لكى اختى ريحانة الجنة واخى د.احمد

شكرا يعجز عن وصفه لسانى

حقا استفدت منكم...واسعى فى الحاضر لما نصحتونى به....رغم نفسيتى المتدمرة واللتى تتضح لاى من يرانى

واللتى جعلتنى فى حالة نفسية سيئة اخسر بها كل من اعرفه وكل مسئول بالعمل...اصبحت" متنشنة"

النهردا وانا فى الشغل تنشنت مع رئيس مجلس الادارة المكان اللى انا شغاله فيه ...كنت بطلب منه حاجه حسيت فيها انه اتهضم حقى فيها....معرفش ليه كلمته بعصبيه

لدرجه خلته قالى نكمل بكرة"طردنى بالزوق"......

صدقونى انا بحاول اكون قويه.....بس نفسيا مدمرة....انا موش ببالغ بس انا فعلا خسرت اغلب او كل علاقاتى فى الشغل بسبب نفسيتى دى ..ياريت

اتمنى ان اكون بالقوة اللتى نصحتنى بها

ارجو لى الدعاء

تفتكروا ممكن ارجع للاول وارجع علاقاتى؟

واقدر فعلا احسن مستوايا؟

تفتكروا هقدر؟

يارب آمييييييييين

مرة تانيه اشكركم جزيلا على كرم اخلاقكم وحسن تواضعكم فى الاجابة على سؤالى