أول أخر حكاية حب في حياتي(حب غير تقليدي)

[semsem111]

أول أخر حكاية حب في حياتي

حكاية حقا ممتعة

كنت يومها في الصف الثاني الثانوي سافرت مع أبى وأمي إلى الإسكندرية صيفا لقضاء صيفا شبه سعيدا بالنسبة لهم وصيفا مملا بالنسبة لي لان أنا الوحيد من أخواتي اللي كنت باوافق أروح معاهم والباقي برفض رفضا باتا أو بيكون مشغول وطبعا عائلتنا عائلة ديمقراطية وده جه على راسى

 

المهم نرجع لنسيم الإسكندرية

وبين شطين وميه

وياجى على الليل ممل كالعادة

خرجت إلى البالكونة التي لا تطل على الشارع الرئيسي

بل التي تطل على شارع جانبي

وتطل على الجيران

دخلت البلكونة

 

وزعت بصري على كل ما هو أمامي بسرعة شديدة كعادتي لاستكشاف سريع للمنطقة

فجأة وقعت عيني على واحد قاعد قدامى في البلكونة اللي قدامنا

اتكسفت أوى

حسيت انه كان شايفنى وأنا عامل فيها بريمو في البلكونة

اتكسفت وحطيت عيني في الأرض

وبراحة بصيت تانى لاكتشف انه مش واحد دى واحدة

بنوته

 

لعب نسيم إسكندرية في دماغي وقلت

ياواد اهى حاجه حلوة ممكن تسليك شوية

ضميرى طلع فجأة من بنطلوني وزعق وقل لي

أنت بتعمل ايه

أنت هتبصبص

ريحت ضميرى شوية وقلت له

لا معاذ الله

لكن لكن ..!!

ضميري قال

لكن ايه ؟

قلت لا ولا حاجة مقصدش دى صدفه

 

غلبني ضميري وأجبرني على أن أحط راسى وعيني في الأرض شاعرا في كل لحظة ان ضميري ماسك سنجه لو رفعت عيني هيطير راسى

دخلت الشقة ونمت

 

 

وتانى يوم بالليل قلت ادخل اشم شوية هوا (طبعا انا كان نفسى اتملى من الامورة الحلوة أو اللى اظن انها اكيد حلوة بسرعة قبل ما يهجم ضميرى) قعدت افكر في الحكايات اللى كنت باسمعها عن بنت الجيران وان كل ابن جيران لا زم يحب بنت الجيران بتاعته كانه عرف وتقليد ثابت

 

كل شوية اغفل ضميرى وابص بصة صغيرة على الامورة

كل مرة بحجة

مرة اعمل فيها باهرش

مرة مش واخد بالى مرة عاوز ابص في السما

وكل مرة اشوف شوية

النور كان خافت قوى

لكن كنت كل شوية ادقق اكتر واحاول اكتشف جمال البنونه

عجبنى قوى شعرها الجميل

اجمل ما فيه انه كان بيتحرك مع الهوا ذى الحرير

عجبتنى وقفتها المايلة وحطة ايديها على خدها

عجبنى هدوءها

شوية بشوية

بقيت ابص قولى عليها

نفسى اعرف تفاصيل اكتر عنها

غلبنى النوم ودخلت نمت افكر فيها

 

رأيتها فى منامي

عشت معاها فيلما رومانسيا طويلا اقصد حلما طويلا

تالت يوم وبسرعة بعد التمشية مع باب زماما

دخلت البلكونة شوفتها قاعده

استغربت

قلت هى عارفه ان انا هادخل البلكونة دلوقت

يا ترى دى صدفى ولا انا برضه عجبتها

فضلت ابص عليها

 

ورغم الضوء البسيط استطعت ان اكتشف تفاصيل اكتر فيها

استطعت ان ارى جمالها وحسنها وبراءتها

العجيبة انها دايما موجودة في الوقت دهودايما مايلة على سور البلكونة

ودايما حطة ايديها على خدها

 

يوم ورا يوم ونفس الحال بس كل مرة اتخيل انى باكلمها وانها بترد علي لدرحة انى سمعت منها مشاكلها

كنت حاسس انها جميلة بس حزينة

بعد 15 يوم قررت

انا مش هادخل انام هستناها لما تدخل هى

وقعد

الوقت اتاخر

 

بس اصريت

 

الفجر اذن

 

برضه قعدت

 

وقلت لنفسى

اخيرا الصبح هيشقشق

اخيرا هشوف حبيبتى في النور

قلبى بدا يدف يخفق بفوة

بدا النور ييجى من بعيد قوى

 

شوية شوية

 

بدا اول شعاع نور يشق الضلمة

 

وشوية ة

 

 

ياااه

 

ايه ده

 

مش معقول

 

 

 

 

مش ممكن

 

 

ايه اللى بيحصل ده

 

 

لالا

 

 

معقول ده

 

 

ادعك عنيه اتكتر واكتر

 

ايه ده

 

ايه اللى انا شايفه ده

انا هعيط

يا لهووىىىىى

عارفين انا كنت بحب ايه

زلعة مسنودة على الحيطة متغطية بشال نصفه مربوط عليها ونصفه طاير في الهوا

لكن والله بالليل شكلها يوحى تماما انها بنوته

حاولت امتصاص الصدمة

قررت بعدها الا احب بل لا انظر اساسا لاى زلعة

من عارف مش يمكن اى زلعة من بعيد تطلع بنوتة وانا مش عارف

[Shetos]

يعنى ممكن نقول انى ده اول حب فى حياتك يا سمسم

 

 

:llll:

[Shetos]

يعنى ممكن نقول انى ده اول حب فى حياتك يا سمسم

 

 

:llll:

[حنان القلب]

تعيش وتاخد بلاص المره الجايه

عشان نسميك زير النسا

وده جزاة الي يبصبص يا روميو

هههههههههههههههههههههه

[أحمد سيف]

سمسم العزيز الغالي

 

اولا

خيرها في غيرها

 

ثانيا

اسلوبك في سر القصة رائع جدا تنفع مؤلف

 

 

ثالثا

ما تجرب اطلب ايدها يمكن الزعزوع ابوها يوافق

 

 

 

هههههههههههههههههههه

ضحكتني كتير

[bassant]

نشينت يا فالح تعيش وتاخد غيرها

بس كتاباتك غايه فى الجمال والابداع

شكرا لك

[semsem111]

اولا

متشكرين اوى يا عم شيتوس على مرورك

وتقدر تعتبر اللى تعتبره اول حب او اخر حب ميضرش

 

 

الف شكر يا حنان القلب

وعلى رايك انا كده ساتحول الى زير النسا

 

 

احمد سيف

الف شكر على تشجيعك الجميل

وهاعتبر ان لك الشرف الكبير لانك واضح انك اللى هتكتشفنى

بكره وبعده هتحلف ميت يمين انك انت اللى اكتشفتنى

 

متقلقش

عمولتك من كل قصة محفوظة

 

 

 

اما بسنت الحلوة

والله احرجتينى بمجاملتك الرقيقة

تم تعديل April 4, 2008 بواسطه semsem111

[بنت مصرية]

هههههههههههههههههههههههه

ايه المغامرة الحلوة دي ياسمسم

علي فكرة انا وانا بقراها في النص كده اتصورت فعلا انها في الاخر مش هتطلع بنت

شوفن ازاي انا مؤلفة برضوا وبعرف

هههههههههههه بس بجد حلوة اوي

[semsem111]

شكرا على المرور يا بنتمصرية

 

والله واضح ان عندك حس تايفى

ما تيجى نعمل شركة تاليف

انا االف وانت تتوقعى الاحداث اللى بالفها

واللى نكسبه بالنص

[بنت مصرية]

هههههههههههههه

خلاص ماعنديش مانع

بس ياتري ايه راي فريق يلا نجاح

[BLACKDREAM]

[semsem111]

الله يعافيك يا بلاك دريم

[zoro_hf]

هههههههههههههههههههههههههههههههههههههههههه

هايله القصة والله يا سمسم

بس كده انا اغير على الزلعة داى تعتبر بنت عمى يارجل

بس بجد خطيره

[semsem111]

والله انت اللى هايل يا زورو

 

لكن انا مكنتش اعرف انك من عيلة قللية شهيرة وان الزلعة تبقي من بقيت عليتكم

[zoro_hf]

ههههههههههههههههههههههههههههههههههههههههههههههههههههه

ههههههههههههههههههههههههههههههههههههههههههههههههههههههه

شكرا يا سيدى

[NADA]

لا بجد صعب يعنى

 

بس انت ليه تخليت عنها كده

 

كنت لازم تصر على موقفك

 

انا عارفه انها غلطت وزعلتك

 

بس يعنى ميبقاش قلبك اسود

 

وعديها يعنى ,,الناس لبعضيها

 

بعيد عن الموضوع ده بس بجد

 

انا كنت عادى بس عايزة اقول حاجه بسيطه

 

بس ان شاء الله فرصة تانيه

 

بس بقىىىىىىىىىىىى

 

صدعتكوووووووووووووووووووو

 

 

 

 

 

سلااااااااااااااااام