زغروطة يا ام فاروق .. لولولولولولولولولولولولى !!

[عاشق الصداقه 525]

زغروطة يا ام فاروق .. لولولولولولولولولولولولى !!

 

 

 

أم محمد: عقبال عندك يا ام فاروق البت ابتسام بنتي جالها عريس انما ايه ..يتاقل بالمال..والخطوبة الخميس اللى بعد الجاى ان شاء الله..

 

 

ام فاروق: الف الف مبروك يا ام محمد ..ربنا يتمملها بخير يارب..

 

 

ام محمد : الله يخليكي يا اختي ..عقبال بناتك كده ان شاء الله ..

 

 

دخلت ام فاروق بيتها ورزعت الباب وراها وهى هتفرقع من الغيظ...وبقت عماله تكلم فى نفسها..يعني انتى يا محمد بتغيظني يعني علشان جوزتي بناتك التلاته وانا لسه بناتي قاعدين ..!

 

 

أم فاروق (بأعلى صوت) : انتو يابنات ..

انتى يا بت منك ليها ..انتو يا مفاعيص..تعالوا هنا بسرعه..!

 

 

 

(الست ام فاروق عندها خمس بنات ما شاء الله ..ربنا يخلي.. )

 

 

رانيا 30 سنه كلية طب

رضوى 28 سنه كلية تربية

روعة 24 سنة كلية اداب

راجية 22 سنة كلية تجارة

رحمة 20 سنة كلية صيدله

 

 

اجتمع البنات بعد ما كانوا سمعوا الحوار بين امهم وام محمد وهما عارفين الكلمتين اللى هياخدوهم فى جنابهم من امهم!

 

أم فاروق: بصوا بقى يا بنات ..انا جالى الضغط والسكر والقلب منكو..وخلاص مرارتي هتفرقع ده ان ماكنتش فرقعت !

 

 

بنات المنطقه كلهم اتجوزوا وانتو لسه قاعدين ..اعمل ايه بس ياربي؟!

قالوا ذوقي البنات

جبتلكوا اغلى ميك اب واحسن لبس ودولاب كل واحده فيكوا يشهد..

وانتو اصلا قمرات من غير حاجه..

وبرده مفيش فايده!

 

 

قالوا ورى الناس بضاعتك

سيبتكوا تلفوا وتخرجوا وتروحوا الافراح والحفلات ..وبرده مفيش فايده !

 

 

 

قالوا محسدوين ومعملكوا عمل

جبتلكوا شيوخ وعملنلكوا احجبة ورقيناكوا ..وبرده مفيش فايده!

 

 

قالوا مكاتب الجواز

قدمنلكوا فى 1000 مكتب ومكتب وبرده مفيش فايده!

 

 

قالوا يبقى التليفزيون هو الحل

اتصلنا ببرنامج (بدل العريس الف) فى قناة (النصب العلني) ..وبرده مفيش فايده!

 

 

قالوا يبقى مفيش غير النت

جيبنلكوا نت واشتركتنا فى كل مواقع الجواز ..وبرده مفيش فايده!

 

 

قالوا مواقع الجواز موضه قديمة , الفيس بوك هو الحل

 

سييبتكوا تدخلوا على الفيس بوك على امل تعلقوا اى عريس..وبرده مفيش فايده!

 

قولولي اعمل ايه بس يا ناس؟؟!!!!

 

يلا انتى وهى غوروا من قدامى..كل واحده تنزل دلوقتى ومترجعش البيت الا بعريس فى ايديها والا مش هتدخل البيت!!

 

قوموا ..مش طايقه اشوف وش حد فيكوا!!

صبرني يارب!

 

 

 

نسيب الست ام فاروق على ما تهدى شوية..

 

 

 

وتعالوا بينا ندردش حبتين ..

 

 

 

 

واكيد طبعا عرفتوا هتكلم معاكم فى ايه ..مش محتاجه مفهوميه يعني ..

 

 

مشكلة العنوسة..!!

 

 

البنت بقت ليل نهار تحلم بالعريس اللى هيجي ياخدها على الحصان الابيض فى ليلة بيضا ويعيشوا عيشه كلها ابيض فى ابيض

 

 

 

 

تعالوا الاول نعرف يعني ايه كلمة عنوسة (لغويا)..؟

 

 

معنى العنوسة : قال أهل اللغة : (( عنست البنت البكر تعنُس بالضم، وعنوسا وعناسا؛ أي طال مكثها في بيت أهلها بعد إدراكها ولم تتزوج فهي عانس، والرجل اذا أسن ولم يتزوج فهو أيضا عانس، وأكثر ما يستعمل في النساء ))

 

 

يعني العنوسة للولد والبنت..

 

 

بس انا جاى انهارده اكلم البنات وبسسسسسسسسس..!

 

 

 

ده انت غتت اوى

..انت تكلم البنات بمناسبة ايه يعني؟؟

 

 

اولا : انا بكلمك لاني مسلم وليكي عليا حق النصيحة ..

 

 

ثانيا: بكلمك كأخ ليا اخوات بنات وحاسس بيهم ومسئول عنهم..

 

 

ثالثا: بكلمك كشاب عايش بين الشباب وشايف سلوكهم وتفكيرهم ..

 

 

 

رابعا: بكلمك كشاب عايز يتجوز وبيدور على عروسه

..

 

 

 

 

الجواز يا بنات سُنة ربنا فى الأرض..يعني مش عيب ولا حرام اني اتمنى الجواز..

 

بالعكس ده من وصايا النبي صلى الله عليه وسلم:

(تزوجوا فإني مكاثر بكم الأمم ، و لا تكونوا كرهبانية النصارى)

صححه الألباني

 

 

 

 

ومشكلة العنوسة موجوده من زمااااان بس مكنتش ظاهرة بالدرجه ..ولكن فى زماننا تفشت وانتشرت واصبحت ظاهرة بشكل واضح لاسباب كتييييييييييييييير جدااااااااااا مش موضوعنا اننا نتكلم فيها..

 

 

والاحصائيات الاخيره بتوضح مدى السوء اللى المشكله بتتجه ليه كل يوم ويوم..

 

كشفت دراسة حديثة صادرة عن الجهاز المركزي للتعبئة والإحصاء في مصر عن أن عدد العوانس في مصر بلغ 13.3 مليون، وأن عدد الذكور يصل إلى 7.6 عانس، مقابل 5.7 مليون عانس من الاناث..!!

 

 

 

 

وفيه احصائيات كتير جدا بتقول ان عدد البنات فى مقابل الولاد اصبح كبير وده من علامات الساعه زى ما النبي صلى الله عليه وسلم قال:

 

ليأتين على الناس زمان يرى الرجل الواحد يتبعه أربعون امرأة يلذن به ، من قلة الرجال وكثرة النساء

صحيح البخاري

 

 

 

 

 

يمكن أغلب البنات عندنا فى مصر سن الجواز فيهم بيتراوح بين سن (18-24) تقريبا ..طبعا فى بنات بيتجوزوا اقل او اكبر بس مش كتير..

نظرة المجتمع طبعا اللى الكل يعرفها للبنت اللى وصلت 25 سنة ولسه متجوزتش انها خلاص بقت عانس وجوازها اصبح شبه مستحيل خاصة فى الزمن ده ..ليه؟

اصل فيه غيرها كتييييييير ..نفس المميزات تقريبا وكمان اصغر منها سننا ..!

 

 

 

 

ويمكن نظرة المجتمع دى بيشبها البعض تشبيه سئ زى البضاعة فى السوق..العمليه عملية عرض وطلب!

 

 

المكشله الكبرى اللى بتقابل اى بنت هى مشكلة الضغوط من عدة اتجاهات ..اهمها..ضغوط من البنت نفسها..وضغوط من الاهل ..وضغوط من الناس..

 

 

اولا: ضغوط من نفس البنت:

 

وده غصب عنها مش بمزاجها..زى ما قولنا ان الزواج سنة ربنا فى الارض , وربنا سبحانه وتعالى خلق المراة ضعيفة وميالة للعاطفة محتاجه راجل يكون جنبها يعطف عليها ويحسسها بالحنان والامان ده غير فطرة الامومة اللى ربنا وجدها فيها..فالبنت جواها زيها اى بنت صاحبتها نفسها تتجوز وتبقى ربة بيت وتبقى ام وتعيش الحب الحلال..

 

 

 

 

ثانيا: ضغوط من الاهل:

 

ودى من الضغوط الكبيره على الاهل قبل ما يكون على البنت خاصة فى الزمن ده وفى ظل الظروف الصعبة اللى بيعشها الأهل..بتلاقى الاهل وخصوا الامهات نفسها تشوف بنتها عروسه وتفرح بيها ونفسها تشيل ولادها وتلاعبهم ..دى مشاعر معظم الامهات ..بجوار ان فيه بعض الناس نفسها بناتها تتجوز علشان تخف عليهم المصاريف والاعباء شوية وناس تانيه حكم الاعادات والتقاليد مش راضية تجوز الصغيره قبل الكبيره فنفسها الكبيرة تتجوز علشان توسع الطريق لاخواتها..وهكذا..ده بيخلى الاهل مضغوطين وكمان بيضغطوا على البنت وزى ما شوفتوا فى اول الموضوع الست ام فاروق..!

 

 

 

 

ثالثا: ضغوط الناس:

 

الناس الناس الناس..الناس مش بتسيب حد فى حاله ابداااا ..وخصوصا فى الارياف وبين الستات وبالذات موضوع الجواز ده..مش عارفه فلانه لسه متجوزتش لحد دلوقتى ياترى ايه السبب يكونش مش عارف ايه ؟؟

وفلانه خطوبتها اتفركشت وعريسها عمل مش عارف ايه وفلانه وفلانه.....

وكلام الناس بيجرح ومش بيخلص!

 

 

الضغوط دى مع الشيطان مع النفس الاماره بالسوء بيدفعوا البنت انها توصل لدرجة انها عايزة تعمل اى حاجه مقابل انها تتجوز..او تشيل الضغوط دى عنها باى طريقه حتى ولو كانت الانتحار!!!!

 

 

 

يعني بعض البنات زى ما بنشوف وبنسمع كتير.. تكون ملتزمه وصاينة نفسها ومش عايزه تغضب ربنا ومع ذلك برده مجالهاش عريس لحد دلوقتى مع ان زميلاتها اللى مش ملتزمين او لبسهم على الاقل منيل بنيلة بيجلهم عريس واتنين وعشره وهى محدش قالها تلت التلاته كام ولا فكر يدق الباب..فيبدأ الشيطان يشكك البنت فى نفسها ..هو انا صح ولا غلط..طب لو صح امال ليه انا كده وهما كده؟؟

 

 

ويبدأ الشيطان يشوف شغله ويخيلها تتنازل واحده واحده ..من خمار لعباية وطرحة قصيرة ..وبعدين جيبة وبلوزه وميك اب خفيف ..وبعدين بنطلون ...وهكذا .........وبرده مفيش عريس..!

 

تبدأ تخرج وتلف وتروح هنا وهناك على امل ان حد يشوفها ويتقدم لها ..وبرده مفيش فايده!

 

 

تبدأ ترخص نفسها لو كانت فى كلية مثلا او فى شغل وتروح هى اللى تكلم الولاد وتتصاحب عليهم وده طبعا بنشوفه كتير ..وبرده مفيش فايده!

 

 

تدخل النت وتحط صورها على الفيس بوك وتكلم ده وتشيت مع ده وتدى ده رقم موبايلها ..وبرده مفيش فايدة!

 

 

ولو البنت مكنتش جميلة مثلا او مش واثقه فى نفسها ممكن تتنازل وتعمل اكتر من كده عياذا بالله ..

 

وانتو شايفين اكتر منى!

 

 

 

 

طيب ليه كده مفيش جواز برده؟؟!

 

 

المشكله ان البنت مش عارفه ان كل اللى بتعمله ده اسمه اخذ بالاسباب ..حتى ولو كانت الاسباب دى صح او غلط ..هى فاكره ان الاسباب دى ..الجمال

واللبس والخروجات والشات هى اللى هتجيب العريس..

 

 

ونسيت ان رب الاسباب سبحانه وتعالى هو اللى لازم يأذن علشان الاسباب تشتغل ..

 

ومن غير ده يبقى حتى لو خدت باسباب الارض كلها مش هيجلها عريس برده..

 

 

 

 

ابقوا اسمعوا المقطع ده..

 

 

هو الشباب ( انطسوا ) فى نظرهم ؟؟!! ‏

 

 

طيب ايه الحل دلوقتى؟؟؟؟

 

 

قبل ما نتكلم فى الحل..لازم الفت نظر البنات لعدة نقط..

 

 

اولا: انا كشاب زى اى شاب (والناس بتقول عليا محترم وكويس ) لما اجى ادور على زوجه ليا عمرى ما هختار زوجتى من ع النت ..او من الشات ..او بمكالمة موبايل..وعمرى ما هفكر فى يوم فى واحده متبرجه لبسها مش زى ما ربنا ورسوله امر ولو كانت أجمل واحده فى الكون..

 

اهم حاجه عندى الدين ..اولا واخيرا..الدين والحياء هو اللى هيخليكي اجمل واحده فى نظر اى شاب ملتزم..

 

 

 

 

طيب ده كلامك انت

..انما اللى بنشوفه على ارض الواقع ان كل الناس بقت تختار بالجمال واللبس والشياكه واكبر دليل ان كل اصحابي اللى مش ملتزمين اتجوزا وانا الحمد لله كويسه ولابسه اسدال ولسه قاعده؟!

 

 

طيب هسألك شوية اسئله وعايزك تفكرى فيها كويس جداا..

 

تفتكرى الشاب اللى اختار بنت علشان جمالها ..لو حصلها اى حاجه ..مثلا طلعلها شوية حبوب فى وشها ومراحوش ..او لاقدر الله حصلها حرق او اى حاجه ..هيطيق يعيش معاها ؟؟!

 

 

تفتكري اللى اختار بنت علشان عجبته فى فرح او حفلة مش هيبص لغيرها ..ده بص لالف واحده زي ما بصلها ..ولا تفتكرى ده واحد ملتزم علشان يختار بالشكل ده؟

 

 

تفتكرى ان البنت اللى راحلها شاب عنده عربيه وعماره وفلوس وافقت عليه وهو حتى مش بيصلى هيعاملها بما يرضى الله وهيتقى الله فيها وهتكون عيشتهم سعيده؟؟

 

 

تفتكرى ان العريس اللى اختار الجمال وقلع عروسته الحجاب فى ليلة الفرح وخلاها ترقص قدام الناس ده راجل اصلا عنده نخوه هيحافظ على مراته ويصونها ويخاف عليها ؟؟

 

 

اه بنات كتير بيتجوزوا ..بس ايه اللى بيحصل بعد الجواز؟؟

 

 

مصايب وبلاوى ..وعيشه هباب..وده اللى بنشوفه وبنسمعه وما خفى خلف ابواب البيوت كان اعظم!!!

 

كام حالة طلاق فى المحاكم وكام مشكله وكام خناقه ..!

 

لان البيت اتبنى غلط من الاول..!

 

 

يا فرحتي البنت اتجوزت..!!!

 

سنة او سنتين او كام شهر حتى وتلاقيها اتطلقت!!

والمكشله تبقى اكبر من الاول لو معاها اولاد..!

 

 

والأدهى انها ممكن تكون عايشه عيشه لا تطاق ..نكد وهم وغم وضرب وخناقات ..ومجبره على كده علشان خاطر الاهل او مش عارفه تتطلق او لاى سبب كان..!

 

لينا ناس جيراننا ..الراجل مراته طيبه جدا والناس كلها بتشهدلها ومع ذلك مطلع روحها وكل يوم يضربها ويبهدلها قدام الناس ومعيشها فى جحيم !

 

 

يا ترى تحبي تتجوزى زى صحابك وتبقى دى عيشتك؟؟

 

 

اسمعى حديث النبي صلى الله عليه وسلم علشان تعرفي ربنا بيرزق المتبرجات بعرسان ليه وانت لأ..!

قال النبي صلى الله عليه وسلم :

(إذا رأيت الله يعطي العبد من الدنيا على معاصيه ما يحب فإنما هو استدراج ثم تلا قول الله تعالى

 

[ فَلَمَّا نَسُوا مَا ذُكِّرُوا بِهِ فَتَحْنَا عَلَيْهِمْ أَبْوَابَ كُلِّ شَيْءٍ حَتَّى إِذَا فَرِحُوا بِمَا أُوتُوا أَخَذْنَاهُمْ بَغْتَةً فَإِذَا هُمْ مُبْلِسُونَ ] سورة الأنعام )

 

المحدث: الألباني - المصدر: صحيح الجامع

 

ربنا بيستدرجهم وهما مش حاسيين..ربنا يتوب علينا وعليهم قبل فوات الاوان..

 

 

ثانيا: اوعى علشان كبرتي فى السن او جوازك اتأخر ..اول ما عريس يجيلك ترضى بيه لو كان غير ملتزم ..انتي ممكن تتنازلى عن اى شئ ..عفش ,دهب , فرح..انما الدين لاء..احنا عايزين عريس صالح ياخد بايدك للطاعه ويعيش معاكى بالمعروف ويعاملك زى ما النبي كان بيعامل زوجاته صلى الله عليه وسلم..وتربوا ذرية صالحه تكون صدقة جارية ليكوا بعد وفاتكم..

 

 

 

ثالثا: اوعى تفتكرى ان كل واحد قالك بحبك وبموت فيكي يبقى صادق ومش بيكدب؟؟!!!

 

من كام يوم كنت قاعد مع جماعه زمايلي فلقيت واحد فيهم بيقول للتاني ..البت (فلانه) انا زهقت منها خلاص ..وهديلك رقمها تشتغلها وتعيشلك معاها يومين..التانى قالوا ليه بس ده انت بقالك معاها كام سنه ووعدتها بالجواز والبنت متعلقه بيك..قاله انت هتعيش انت كمان ..او عى تكون فاكر انى بحبها بجد ..ولا ممكن اتجوزها اصلا..يومين بنقضيهم وغيرنا يستلم ..!

ومن ده كتييييييييييييييييير..!!!

 

 

طيب ايه الحل ؟؟؟؟؟؟؟؟

 

 

انا زهقت من نفسى ومش عارفه اتصرف ازاى مع بابا وماما او مع الناس؟؟!

 

 

بصي يا اختي ركزى فى الكلام..

 

 

اولا مع نفسك :

 

لازم قبل كل شئ تجديد التوبة لربنا سبحانه وتعالى ..

عايزين يبقى عندنا شوية يقين ..

هندخل بقى فى كلام الشيوخ يقين ومش عارف ايه..!

ده مش كلام شيوخ .. ده كلام ربنا اللى خلقنا وعارف مصلحتنا وكلام النبي الذى لا ينطق عن الهوى اللى ربنا ارسله رحمة لينا وللعالمين.. ده الدين بتاعنا ..اللى هدفه اننا نعيش أحلى حياه ..

 

انتى اكيد عارفه ان من شروط الايمان ..

الايمان بالقدر خيره وشره..

يعني ايه؟؟

يعني كل اللى يجيبه ربنا كويس..

يعني اتجوزت الحمد لله ..خير ..

الجواز اتأخر ..الحمد لله خير..

متجوزتش ..برده الحمد لله خير..

لو ربنا كاتبلى عريس يبقى هيجلي هيجيلي ..انهارده ..بكره ..بعد شهر ..بعد سنه ..المهم انه هيجي وقت ما ربنا يشاء..

احد السلف كان بيقول كلام جميل اوى (علمت ان رزقي لن يأخذه غيري فاطمأن قلبي)

رزقى مكتوب من يوم ما اتولدت ..محدش هيأخده غيري..يبقى اشيل الهم ليه؟؟؟؟؟

 

بل فيه حديث من اعجب الاحاديث اللى قريتها وناس كتير لو عرفوه المفروض يغير من تفكيرهم..ويخيلهم يبطلوا يشيلوا هم الرزق ..

يقول النبي صلى الله عليه وسلم :

إن الرزق ليطلب العبد كما يطلبه أجله

 

المحدث: الألباني - المصدر: صحيح الترغيب

 

 

يعني الرزق هو اللى بيجري ورانا علشان يوصلنا زى ما الموت بيجري وراكي ..!

 

يعني انتى عماله تلفي ورا العريس وهو بيلف وراكي ..

 

 

 

ولو حد قالك مثلا انتى ازاى هتتخطبي او تتجوزى من غير ما حد يشوفك ؟؟

لازم تخرجي وتروحى هنا وهناك وتفرجي الناس !

قوليله انا عندي يقين ان عريسى مقسوملى ..

يجي ازاى دى مش بتاعتي ..

دى ربنا سبحانه وتعالى اللى بيسبب الاسباب علشانها ..

زى الاكل ما بيجيلي كل يوم وانا قاعده فى بيتي لحد عندي..بابا بيجيبه ..اى حد يجيبه ..المهم انه بيجي!

كذلك موضوع العريس..

 

واوعي تفتكري انك مهما لبستي او اتشيكتي او كنتى جميلة او كلمتى ولاد كل ده هيسرع جوازك..

 

اسمعى الحديث ده ..

قال رسول الله صلى الله عليه وسلم :

إن روح القدس نفث في روعي ، أن نفسا لن تموت حتى تستكمل أجلها ، وتستوعب رزقها ، فاتقوا الله ، وأجملوا في الطلب ،

ولا يحملن أحدكم استبطاء الرزق أن يطلبه بمعصية الله ، فإن الله تعالى لا ينال ما عنده إلا بطاعته

 

المحدث: الألباني - المصدر: صحيح الجامع

 

يعني اوعي علشان الرزق اتأخر شوية تعصي ربنا علشان تطلبيه..!

 

خليكي فاكره كويس ..

(ما عند الله لا ينال إلا بطاعته)

 

 

طيب انا ملتزمه او كنت مش ملتزمه وبفضل الله التزمت وغيرّت لبسي وحياتى وبقيت بطيع ربنا ..

وصبرت كتير وجوازى متاخر برده؟؟؟!

 

يبقى لازم تعرفى ان ده هو الخير ليكي..

ان جوازك يتاخر او (لا قدر الله ) انك متتجوزيش هو ده الخير ..

زى ما قولتلك قبل كده ترضى انك تتجوزى وتعيشى فى هم وغم وجحيم وهتتمنى ساعتها انك تقعدى طول عمرك ولا انك تكونى اتجوزتى!

 

خلى الايه دى فى قلبك على طول :

(وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ)

 

ربنا هو اللى عالم الخير فين ..

وهو ارحم بيكي من امك وابوكي..

لو عالم ان الجواز خير كان قدمه ليكي..

ولكنه يعلم ان تاخيره هو اللى خير علشان كده أخره ..

يبقى خليكي فاكره..

(وَاللَّهُ يَعْلَمُ وَأَنْتُمْ لَا تَعْلَمُونَ)

 

 

 

 

ثانيا: مع الأهل:

 

الام والأب..فكرهم غير فكرك..بس ممكن تقنعيهم بالكلام اللى فات ده ..

بس ناس كتير ايمانها ضعيف وبرده مش بيقتنعوا ..

اعمل معاهم ايه؟

اصبرى عليهم واوعي تزعقى معاهم او تزعليهم..

واتعاملى معاهم بكل ادب واحترام ورحمة ..

ومتجادليش كتير علشان متتعبيش..

وادعى ربنا انه يهديهم ويرزقك الصبر عليهم والبر بيهم..

 

 

ثالثا: مع الناس :

 

اوعى تلتفتى لكلام اى حد ..

الناس عمرهم ما هيبطلوا كلام سواء اتجوزتي او متجوزتيش!

سيبي الناس يقولوا زى ما يقولوا..

ولا يهز شعره فيكي..

انتي مؤمنه وعندك يقين وثقه فى الله انه عمره ما هيضيعك ..

 

 

واخيرا ..

 

ولكنه ليس بأخير ..بل قبل كل شئ..

عليكي بــ الدعــــــــاء ..

 

ربنا قال (ادْعُونِي أَسْتَجِبْ لَكُمْ) ..

يعني الدعاء مستجاب ..خاصة بقى لو فى قيام الليل او بين الاذان والاقامه او الدعاء بظهر الغيب او دعاء الام لبنتها ..

 

قولي يارب..واطلبي الزوج الصالح من الله ..

خزائن ربنا مليانة عرسان ..بس انتي قولي يا رب..

 

طيب ...انا بدعي بقالى كام سنه وحاسه انه مش بيستجاب ليا؟؟!

مين قال كده ..لو انت فعلا بتدعي بعد تجديد التوبه وباخلاص وبتاكلى من حلال يبقى ان شاء الله دعاءك مستجاب مستجاب مستجاب ..بس الاستجابه دى ازاى؟؟

 

اسمعى حديث النبي صلى الله عليه وسلم :

(ما من مسلم يدعو ليس بإثم ولا بقطيعة رحم الا أعطاه إحدى ثلاث

اما أن يعجل له دعوته

واما أن يدخرها له في الآخرة

واما أن يدفع عنه من السوء مثلها

قال إذا نكثر قال الله أكثر)

 

صححه الألباني

 

يعني الدعاء مستجاب مستجاب..

ادعي ربنا وانتي على يقين بالاجابه..

اوعي تيأسي..

واوعي تعصي ربنا علشان الزواج..

انتي عايزه تتجوزي علشان تعيشي احلى حياة ..

وأحلى حياه مش هتلاقيها الا فى طاعة الله ..

 

***

الموضوع منقول ومن إعداد أخونا الفاضل ..هنعيشها صح .. جزاه الله كل الخير

[Mohammed Dwy 2010 35]

نقل موفق مبارك ان شاء الله اخي احمد

 

واللهم ارزق بنات المسلمين جميعا بالازواج الصالحين

 

وارزقنا نحن بالزوجات الصالحات

 

جزاك الله خيرا

[الدرة المصونة 3]

جزاك الله خيرا أخي الفاضل

 

 

بجد والله ............موضوع في قمة وغاية الرواعة

 

بجد أخي كل الأسئلة ديه بتطرأ في عقل البنات الملتزمين

 

 

بس أنا أحب أقول حاجة إن الشباب الملتزمين ...... في شوية منهم متشددين جدا جدا ........ فبيرفضوا العرايس علشان اسباب تافهة ...مثلا والله علشان عندنا تلفزيون ...؟؟؟؟؟؟؟؟ ايه يعني انت سيادتك شايفنا مشغلينه على الافلام ومايعصي الخالق عز وجل ..... الزواج قسمة ونصيب

 

 

وايه الكلام اللي يسم البدن اللي بنسمعه : إدردحوا كده علشان يجلكم ولاد الحلال ..((ولاد الحلال )) في في فرح كله زفت أغاني ؟؟؟؟ .......إيه التفكير الغريب بتاع الناس ده ....سبحان الله ....ليه كل ده

 

 

فاسمعي حبيبتي واختي في الله :

 

ان الله قد أخر لك الزواج لكي يرزقك بشاب لم تكوني تحلمي به أبدا أيتها الدرة المصونة ..واللؤلؤة المكنونة ...صوني جمالك ...

 

ولما الحزن "فنصيبك هيصيبك"

 

 

وبجد ... ربنا يكرمك أخي الكبير الفاضل ...ربنا يرزقك وكل شباب الـأمة الإسلامية بزوجات صالحات معينات على امور الدين يارب العالمين

 

وربنا يسعدك دنيا وآخرة ويرزقك الإخلاص في القول والعمل ..وربنا يجعل لك القبول في الدنيا والآخرة ..وربنا يرزقك النجاح والفلاح في الدنيا والآخرة يارب

 

وتقبل مروري ..وتقديري لك أخي الفاضل

[Mr Hamdy Ahmad 36]

موضوع أكثر من رائع أخي الكريم أحمد

 

 

جزاك الله خيرا

[بسمة الاقصى 78]

جزاك الله كل خير أخى أحمد وجزى صاحب الموضوع كل الخير

 

فعلاً موضوع الساعة بس عندى ملاحظة مش عارفة ليه كل اللى بيتجوز اليومين دول من الشباب بيختار بنانيت صغنططين يعنى 16 17 18 بصراحة مش عارفة إيه السر فى الموضوع ده

 

بالنسبة لموضوع العنوسة اللى استفحل وانتشر بصورة وحشة فى مجتمعاتنا عندى

 

وجهة نظر تانية فى موضوع العنوسة وهى عن أخت لى أحبها كثيراً فى الله هى ملتزمة ما شاء الله نحسبها على خير ولا نزكيها على الله بيتقدملها كذا عريس ولكن

 

مشكلتها مش مادية ولا حاجة مشكلتها إنها تبحث عن صاحب الديــــن اللى هما نادرين اليومين دول وكل ما بترفض بيزيد طبعاً ضغط الأهل إنه يعنى هتفضلى ترفضى لحد امتى هى 24 سنة لسه بدرى برضه

 

كل مشكلتها إنها تخشى على دينها هى تريد إنسان ملتزم حتى لا تخسر دينها

 

قالوا لها خديه مش ملتزم وخليه يلتزم قالت ما يمكن هو اللى ياخدنى فى سكته

 

آخر واحد تقدم لها مهندس من فترة قريبة ومقتدر جدا ولما راح زارهم هى قالت هو طيب جدا وغلبان بس انا ما ارتحتلوش

 

طيب سألتيه فى ايه قالت عن الصلاة قالها بصلى لما اكون فى البلد لكن فى الشغل ما فيش مسجد قريب و سألته عن الشقة قالها معايا شقة بس فى بيت أهلى واحنا كلنا قاعدين مع بعض وهو معاه اخوات ولاد قالتله لا انا مش هختلط باخواتك ما ردش عليها بعدين قالتله أنا مش هعمل فرح فيه أغانى قالها عادى ممكن اعمل وممكن لا

 

قالتله بتتفرج على مسلسلات وأفلام قالها فى الشغل مش بكون فاضى لكن لما باجى البيت ممكن اتفرج

 

باختصار ما عجبهاش لأنه ما عندوش مبدأ ومعاهم معاهم عليهم عليهم

 

بس بعدها علطول سافر عمرة مع والده ووالدته وبعد ما رجعوا بكام يوم والده تعب

 

وتوفاه اللــــــــه من اسبوعين كده

 

على فكرة انا بكتبلكم دلوقتى وجمبى فرح ابن عمى فى الشارع والدى جى طبعا فى ودانى وأختكم قررت مقاطعة

 

الأفراح اللى من النوعية دى طبعاً أغانى واختلاط وخلافه وبيقولوا عليا دلوقتى معقدة وربنا يثبتنا وإياكم

 

ويرزق كل بنات المسلمين بالأزواج الصالحين ويزوج شباب المسلمين بالزوجات الصالحات

[عاشق الصداقه 525]

نقل موفق مبارك ان شاء الله اخي احمد

 

واللهم ارزق بنات المسلمين جميعا بالازواج الصالحين

 

وارزقنا نحن بالزوجات الصالحات

 

جزاك الله خيرا

 

آمين يا رب ،، وجزاك الله كل الخير حبيبى للمرور الجميل

 

جزاك الله خيرا أخي الفاضل

 

 

بجد والله ............موضوع في قمة وغاية الرواعة

 

بجد أخي كل الأسئلة ديه بتطرأ في عقل البنات الملتزمين

 

 

بس أنا أحب أقول حاجة إن الشباب الملتزمين ...... في شوية منهم متشددين جدا جدا ........ فبيرفضوا العرايس علشان اسباب تافهة ...مثلا والله علشان عندنا تلفزيون ...؟؟؟؟؟؟؟؟ ايه يعني انت سيادتك شايفنا مشغلينه على الافلام ومايعصي الخالق عز وجل ..... الزواج قسمة ونصيب

 

 

وايه الكلام اللي يسم البدن اللي بنسمعه : إدردحوا كده علشان يجلكم ولاد الحلال ..((ولاد الحلال )) في في فرح كله زفت أغاني ؟؟؟؟ .......إيه التفكير الغريب بتاع الناس ده ....سبحان الله ....ليه كل ده

 

 

فاسمعي حبيبتي واختي في الله :

 

ان الله قد أخر لك الزواج لكي يرزقك بشاب لم تكوني تحلمي به أبدا أيتها الدرة المصونة ..واللؤلؤة المكنونة ...صوني جمالك ...

 

ولما الحزن "فنصيبك هيصيبك"

 

 

وبجد ... ربنا يكرمك أخي الكبير الفاضل ...ربنا يرزقك وكل شباب الـأمة الإسلامية بزوجات صالحات معينات على امور الدين يارب العالمين

 

وربنا يسعدك دنيا وآخرة ويرزقك الإخلاص في القول والعمل ..وربنا يجعل لك القبول في الدنيا والآخرة ..وربنا يرزقك النجاح والفلاح في الدنيا والآخرة يارب

 

وتقبل مروري ..وتقديري لك أخي الفاضل

 

ما شاء الله ولا قوة إلا بالله ..

أولاً .. جزاكى الله كل الخير أختى الفاضله على مرورك وتحليلك الجميل

ثانياً .. ما شاء الله على حضرتك ،، ربنا يزيدك تقوى وإيمان ،، وهى دى العقول السليمه بإذن الله ..

أنا مش بقول إنى بحس وأنا فى ياللا يا شباب هنا بين الأعضاء دول وفكرهم السليم وسط العالم الغريب اللى احنا عايشينه - إنى فى كوكب تانى !!

بجد ما شاء الله على حضرتك وربنا يثبتك يا أختى ..

وربنا يهدى الشباب والفتيات لكل ما يحب ويرضى

 

موضوع أكثر من رائع أخي الكريم أحمد

 

 

جزاك الله خيرا

 

جزاك الله خيراً حبيبى .. وبارك الله فيك للمرور العطر

 

جزاك الله كل خير أخى أحمد وجزى صاحب الموضوع كل الخير

 

فعلاً موضوع الساعة بس عندى ملاحظة مش عارفة ليه كل اللى بيتجوز اليومين دول من الشباب بيختار بنانيت صغنططين يعنى 16 17 18 بصراحة مش عارفة إيه السر فى الموضوع ده

 

بالنسبة لموضوع العنوسة اللى استفحل وانتشر بصورة وحشة فى مجتمعاتنا عندى

 

وجهة نظر تانية فى موضوع العنوسة وهى عن أخت لى أحبها كثيراً فى الله هى ملتزمة ما شاء الله نحسبها على خير ولا نزكيها على الله بيتقدملها كذا عريس ولكن

 

مشكلتها مش مادية ولا حاجة مشكلتها إنها تبحث عن صاحب الديــــن اللى هما نادرين اليومين دول وكل ما بترفض بيزيد طبعاً ضغط الأهل إنه يعنى هتفضلى ترفضى لحد امتى هى 24 سنة لسه بدرى برضه

 

كل مشكلتها إنها تخشى على دينها هى تريد إنسان ملتزم حتى لا تخسر دينها

 

قالوا لها خديه مش ملتزم وخليه يلتزم قالت ما يمكن هو اللى ياخدنى فى سكته

 

آخر واحد تقدم لها مهندس من فترة قريبة ومقتدر جدا ولما راح زارهم هى قالت هو طيب جدا وغلبان بس انا ما ارتحتلوش

 

طيب سألتيه فى ايه قالت عن الصلاة قالها بصلى لما اكون فى البلد لكن فى الشغل ما فيش مسجد قريب و سألته عن الشقة قالها معايا شقة بس فى بيت أهلى واحنا كلنا قاعدين مع بعض وهو معاه اخوات ولاد قالتله لا انا مش هختلط باخواتك ما ردش عليها بعدين قالتله أنا مش هعمل فرح فيه أغانى قالها عادى ممكن اعمل وممكن لا

 

قالتله بتتفرج على مسلسلات وأفلام قالها فى الشغل مش بكون فاضى لكن لما باجى البيت ممكن اتفرج

 

باختصار ما عجبهاش لأنه ما عندوش مبدأ ومعاهم معاهم عليهم عليهم

 

بس بعدها علطول سافر عمرة مع والده ووالدته وبعد ما رجعوا بكام يوم والده تعب

 

وتوفاه اللــــــــه من اسبوعين كده

 

على فكرة انا بكتبلكم دلوقتى وجمبى فرح ابن عمى فى الشارع والدى جى طبعا فى ودانى وأختكم قررت مقاطعة

 

الأفراح اللى من النوعية دى طبعاً أغانى واختلاط وخلافه وبيقولوا عليا دلوقتى معقدة وربنا يثبتنا وإياكم

 

ويرزق كل بنات المسلمين بالأزواج الصالحين ويزوج شباب المسلمين بالزوجات الصالحات

 

 

جزاكى الله كل الخير أختى الفاضله .. ما شاء الله رد مليااااااااااااان جواهر ودرر .. ربنا يحفظك ويثبتك على الحق ..

بجد بجد - ما شاء الله ولا قوة إلا بالله .. هى دى بنات المسلمين اللى تفرح القلب .. بعد ما بيتحرق على حال بنات أمتنا واللى وصلوله ..

الحمد لله فيه عقول سليمه ،، ربنا يثبتك على الحق أنتى وكل ملتزمه أختى الفاضله

 

 

فعلاً موضوع الساعة بس عندى ملاحظة مش عارفة ليه كل اللى بيتجوز اليومين دول من الشباب بيختار بنانيت صغنططين يعنى 16 17 18 بصراحة مش عارفة إيه السر فى الموضوع ده

 

هقول لحضرتك بس متقوليش لحد !!

ده بيحصل لسببين :

 

1 - إن الشباب شايفين إن حال البنات بعد دخول الكليات ،، لا حول ولا قوة إلا بالله ،، وربنا يهدى ،، فبيحاول يشوف واحده لسه طازه .. متكلمتش مع ولاد ولا لبست وحش ولا عاشت قصص حب ولا ....

ولا البلاوى الزرقه - ربنا يعافينا وإياكم ،، واللى واقع فيها بنات كتير (مش بقول كل البنات) .. لكن بجد نسبه كبيره جداً ولا حول ولا قوة إلا بالله .

 

2 - بعض الشباب بيختار (بنوته صغنونه) .. علشان (يربيها على إيديه) .. يعنى تبقى بالعاميه كده داخله الكليه خاااااام .. لسه متشكلتش .. ولا عرفت ولاد وبنات يخلوها تشكل شخصيتها بفكرهم ،،

البنت من إحتكاكها بصحباتها (زى الولد تمام) . بتاخد منهم فى احيان كتير صفات كتير .. زى العنجهيه ، التبرج ، الإنفتاح ، العند ، .... وهكذا ،، دول بقى بيختاروا البنوته صغيره لسه محدش شكلها دماغها ،، وغالباً الشباب دول بيبقوا كبار شويه - فى آخر سنوات الكليه أو خريجين .

 

فيه سبب تالت مش بيكون كتير ..

إن الواحد بيشوف بنوته اموره يخاف (تتخطف) .. فينشن على واحده تكون لسه داخله كليه وهو لسه طالع منها .. علشان يا دوب فى آخر فترة الخطوبه تكون هى لسه مخلصه دراسه ،، ويكون هو لحق يعرفها وياخد عليها ويكون خلص جيشه وشاف شغل وظبط نفسه يعنى ،،

 

===

جاوبت حضرتك من باب إن أعرف حضرتك الرد على سؤالك .. مش من باب إنى موافق على كل اللى فات ده ،،

فما عند الله لا ينال إلا بطاعة الله ،، وأنا أساساً ضد موضوع الخطوبة ده واللى بيحصل فيه ،، لأنى ضد أى شىء يغضب الله عز وجل ،، والله أسأل أن يهدينى الى ما يحب ويرضى وجميع شباب المسلمين

 

مشكلتها إنها تبحث عن صاحب الديــــن اللى هما نادرين اليومين دول

 

حضرتك تقصدى .. أكبر نهمه ربنا أنعمها عليها .. مش مشكلتها !!

(مشكلتها) - ده بمفهوم أغلب الناس .. هدانا الله وإياهم .. لكن اللى بتدور على صاحب الدين ،، واللى بيدور على ذات الدين .. والله والله هو وهى الكاسبانين بإذن الله

ربنا يثبتها على الحق ويرزقها خير زوج تتمناه ،، ويرضاه الله لها .. إنه ولى ذلك ومولاه

قولى لصديقتك يا اختى الفاضله .. إن والله ربنا هيكرمها بإذن الله بما يسعدها ويهون عليها كل المتاعب اللى عايشه فيها .. شرف لها ولكل ملتزمه أنهن من (القابضات على الجمر)

 

طيب سألتيه فى ايه قالت عن الصلاة

قالتله بتتفرج على مسلسلات وأفلام

قالتله لا انا مش هختلط باخواتك قالتله أنا مش هعمل فرح فيه أغانى

 

والله العظيم - كنز من الكنوز الموجوده على الأرض - ما شاء الله ولا قوة إلا بالله

كلمات تكتب بماء الذهب والله - فى أسألة أخت شابه لعريس متقدملها

ياااااااااااااارب إحفظها وإهدينا وشباب المسلمين إلى ما تحب وترضى

 

 

على فكرة انا بكتبلكم دلوقتى وجمبى فرح ابن عمى فى الشارع والدى جى طبعا فى ودانى وأختكم قررت مقاطعة الأفراح اللى من النوعية دى طبعاً أغانى واختلاط وخلافه وبيقولوا عليا دلوقتى معقدة وربنا يثبتنا وإياكم

 

ربنا يثبتك على الحق يا أختى ..

خاللى شعارك يا اختى (فليقولوا عن حجابى - لا وربى لن ابالى) ..

أو إجعليها (فليقولوا عن إلتزامى - لا وربى لن أبالى)

 

يرضيكى يقولوا معقده ،، وتكونى بصحبة الحبيب محمد فى الجنة !!

الله أسأل أن ينولها لكِ وإيانا .. برحمته إنه على كل شىء قدير

[حياتى من اجل ربى 22]

 

بجد موضوع شامل ومميز وواخد المشكله من كل جوانبها

 

جزاك الله خيرا اخى عاشق الصداقه

 

جزاه الله خيرا هنعيشها صح

 

الموضوع عجبنى جداااااااااااا ان هو مش سايب نقطه تقريبا غير اما اتكلم فيها

 

رااااااااااااااااااااااااااااااااائع

 

ياااااااااااااااااااااااااارب يجعله فى ميزان حسناتكم

 

ويهديكم الى كل خير ويجعلكم من الشباب الذين يفخر بهم محمد صلى الله عليه وسلم

 

ويارب كلنا نعيشها صح وربنا يرضى عنا يااااااااااااااااااااااارب

 

 

ويرزق كل شباب المسلمين التقوى وحسن القول والعمل

 

ويرزقهم بالازواج الصالحين والزوجات الصالحات والذريه الصالحه

 

والحياه الكريمه الصالحه التى يرضى الله بها عنا

 

كل احترامى وتقدرى لكم

 

[بسمة الاقصى 78]

يمكن عندك حق فى موضوع اللى بيتجوزوا صغنتتين بس رأيى إنه الأفلام والمسلسلات والنت ما خلتش فى بنات قطط مغمضة كل العيون اتفتحت دلوقتى ولا حول ولا قوة إلا بالله

 

حضرتك تقصدى .. أكبر نهمه ربنا أنعمها عليها .. مش مشكلتها !!

(مشكلتها) - ده بمفهوم أغلب الناس .. هدانا الله وإياهم .. لكن اللى بتدور على صاحب الدين ،، واللى بيدور على ذات الدين .. والله والله هو وهى الكاسبانين بإذن الله

ربنا يثبتها على الحق ويرزقها خير زوج تتمناه ،، ويرضاه الله لها .. إنه ولى ذلك ومولاه

قولى لصديقتك يا اختى الفاضله .. إن والله ربنا هيكرمها بإذن الله بما يسعدها ويهون عليها كل المتاعب اللى عايشه فيها .. شرف لها ولكل ملتزمه أنهن من (القابضات على الجمر)

 

 

آه والله حضرتك عندك حق هى نعمة وبالنسبة للناس تهمة

 

علشان احنا بعدنا جدا عن ربنا بقى اللى مفروض يحصل هو اللى غلط وعيب والآية اتقلبت عارف حضرتك معانا اخت تانية اتخطبت لواحد نحسبه على خير وهى كمان البنات بيقولوها إزاى ما أخدتوش تليفونات بعض

فى واحدة ما تكلمش خطيبها طبعاً ولا أثر فيها كلامهم

 

هى والله ما شاء الله ربنا مثبتها وإن شاء الله هيرزقها باللى تتمنى وترضى على أنها على خير إن شاء الله

 

ويارب الناس تسيبها فى حالها بقى وتغير التفكير المتخلف اللى اتعودنا عليه ده

 

ويرزقكم الزوجات الصالحات اللهم آميــــــــــــــــن

[الفقيرة الى الله 77]

اولا:الموضوع مدهش للغايه ومفيد جدااااااااااااااااااااااااااااااااااااااااااااااااااا لكل فتاة وانا لو صحفية كنت نشرتة فى جريدة عشان كل البنات تاخد بالها من نفسها

 

 

وتتقى لله وتؤمن بالقضاء والقدر وتصبر على نصبها وزى ما ذكرت حضرتك سابقا النصيب ده ربنا كاتبه من يوم متولدنا

 

 

 

احب اوجة بعض النصائح

 

 

 

"*يجب ان يعرف كل شاب وبنت انه لا يوجد انسان كامل الكمال لله وحده سيحانه وتعالى

 

 

 

*ان لا يكون هدف الشاب هو جمال البنت والبنت وسامه الشاب الجمال جمال العقل والروح

 

 

 

 

*التخفيف من غلاء المهور .وعدم اثقا ل على اهل الشاب بالمصاريف الزائدة

 

 

 

*الاقتداء بقول النبى"اذا جاءكم ما ترضون دينه وخلقه فزوجوه

 

 

 

*عقد جلسه بين اهل العروسه والعريس ووضع الحلول المناسبه

 

 

 

*على الاباء تقوى الله فى ابنا ءهم فهم يدمرون مستقبل حياه ابناءهم وهم لا يشعرون

 

 

 

*الموافقه على قبول المتزوج لان هذا هو الاصل كما ورد فى القران الكريم

 

 

 

نعم اخى اتذكر :اتذكر قول الاعرابيه لوالدها عندما اصر على الا يزوجها الا على فارس من القبيله قالت له يابه :العمر يمضى ؛والوحدة عذاب

 

 

[mercy 2]

جزاك الله خيرا

موضوع اكثر من رائع

رغم انه فى بدايته حس فكاهى ودى طبعا لجذب الانتباه للموضوع

الا انه بجد رائع

وبجد امثال ام فاروق كتروا النهارده

ربنا يهديهم (قصدى الاهل )

عموما بجد الموضوع رائع جدا

اللهم ارزق بنات المسلمين جميعا بالازواج الصالحين

 

وارزق شباب المسلمين بالزوجات الصالحات

امين

 

 

[galaxy ahmed 0]

بسم الله ما شاء الله علي موضوعك أخي في الله

ربنا يكرمك علي النصائح الغالية والحكم اللي عطيتنا اياها ويارب كلنا نستفيد

ربنا يجعل هذا الخير في ميزان حسناتك يا أخي ويرزقك وكل شباب المسلمين بزوجات يحفظن الدين والسنة

ويساعدون في رفع الغمة وازالتها ويرزق بنات المسلمين وانا منهم بشباب صالحين يراعون الله تعالي ويعاملوهم بالحسني

شكرا لك أخي في الله وتقبل مروري

لا اله الا الله

[بنت مصرية 65]

طبعا انا قريت الموضوع ورائع جدا جدا

جزاك خير عاشق اصداقة علي النقل

وجزا الرائع هنعيشها صح علي الابداع والخير ده

انا مش هضيف اي حاجة لانه مافيش كلام يتقل بعد

الموضوع ولا حتي بعد ردود درر ياللا ياشباب :present:

وبالنسبة لرد بسمة الاقصي اختك في الله الملتزمة دي

هو ده الصح اللي عملته

وتخيلي ان الموضوع ده بيتكرركتير

وباذن الله هبقي احط موضوع جميل بخصوص الحكاية دي

والمفروض يتعمل ايه في الموقف اللي زي كدا

ده حاجة مكملة للموضوع الرائع ده

ربنا يرزقنا جميعا بالازواج والزوجات الصالحات

[عاشقة الفردوس 161]

موضوع راااااااااااااائع اللهم يسر كل مافيه الخير لبناتنا واولادنا

[بسمة الاقصى 78]

لى عودة هنا إن شاء الله لأحكى لكم ما حدث لصديقتى التى ذكرتها فى ردى

 

فاصل ونعود إن شاء الله

 

انتظرونا

[ابن تيميــــة 158]

بسم الله الرحمن الرحيم

 

اخي الحبيب الغالي موضوع قيم جدا جدا

 

فعلا بيتناول جوانب كثيرة

 

والعنوسه بجد شاعت وفاحت رائحتها

 

يبقي الحل ايه بقي؟؟؟؟؟؟؟؟؟؟؟؟؟

 

الشباب الايام دي كلهم بيدورا زي ماذكرتم علي البنات الصغيرة

 

وانا من الشباب وفعلا ده مذهبي برده

 

طب هنجوز البنات اللي عنست دي ازاااااااااي؟؟؟؟؟

 

لازم نلاقي حل

 

 

دول خمسه مليون

 

 

امممممممممممممم

 

الحل عندي ومؤمن بيه بس مقدرش اعمله لاسباب :-

 

 

 

- انا عايز اتجوز انسانه وحده بس

 

 

- وانا فقير مش هقدر اوفي بينهم كلهم

 

 

- وعندي شقه واحده

 

 

اممممممممممممممم اكيد عرفتم انا قصدي ايه

 

 

او الحل ايه

 

الحل هو التعدد ...............

 

ايه يعني لما تبقي زوجه تانيه؟

 

او تالته ؟؟؟

 

او رابعه ؟؟؟

 

 

؟؟؟؟ بس كفايه كده

 

يااختي هو عيب انك تبقي زوجه تانيه؟؟؟

 

طب هو حرام ؟؟؟؟

 

ولا صحباتك هيشمتوا فيكي؟؟؟

 

 

المشكله ان معظم البنات اللي عدوا سن الجواز

 

مش عيزين يبقوا زوجه تانيه

 

انا والله مؤمن بتعدد الزوجات

 

بس انا امنية حياتي زوجه وحده بس وبعدها هقول وندمنا علي مافعلنا

 

ربنا يرزق كل بناتنا ازواج صالحين يارب

 

جزيت الجنة حبيبي احمد ونتجوز انا وانت هناك بقي ان شاء الله

 

حوووور عين حاجه فوق الوصف والخيال

 

ايه يعني لما انا وانت مانتجوز الخمسه مليون هيزيدوا بنتين هههههههههههه

 

ونشوف حالنا احنا بقي ف الجنه مع الحور الحسان

 

ياخاطب الحور الحسان ان شاء الله

 

انا خطبتلك واحده اتجدعن انت بقي وجمع مهرها يلا بسرعه من دلوقت