توقعات الأخطبوط " عين الشكروت " !

[ali desoky 391]

توقعات الأخطبوط " عين الشكروت " !

 

إمبارح كنت فى البيت بضيع وقت كالعادة فى قراءة جرنال تقريباً محدش بيقراه غيرى ،

وكان فيه خبر عن تنبؤ اخطبوط فى استراليا اسمه " كساندرا " بنتيجة الانتخابات هناك ،

وفى نفس الصفحة كان " بول " بيواصل توقعاته وغير مجاله ودخل السياسة وإتنبأ بنتيجة الانتخابات فى روسيا واللى هتم بعد سنتين .

 

 

 

 

 

 

 

 

 

 

 

 

 

فجأة سرحت وتخيلت إن مصر هي كمان دخلت في السرب وبقى عندنا أخطبوط ..

أشمعنا احنا يعنى ،

فإذا كان العالم بتاع المادية والعلم والفيمتو ثانية منبهر بهذه الخرافات ويصدقها ..

 

فمابالنا بملوك الجدل والشعوذة وأساتذة الـ3 ورقات والحنجل والمنجل وفك الأعمال السفلية والعلوية والذين ينفقون المليارات سنوياً على الدجل والشعوذة والبيضة والحجر ،

 

وسرحت أكثر وتخيلت ظهور الأخطبوط " عين الشكروت " بطلنا الجديد فى مونديال الهيافة ..

هو ده الاسم ولا بلاش ، إحنا لا بتوع بول ولا جاك ولا كساندرا ولا الاسماء دي .. لازم حاجة تعبر عن المجهول وتكون " شعبى " فى نفس الوقت ، وكمان قصدت " في خيالي طبعاً " إنه يكون أخطبوط لإنه غلبان فى أكله .. لكن لو عملنا مؤتمر صحفى عالمى عشان مثلاً توقعات الحمار بخصوص الفائز بلقب دورة بشتيل الرمضانية .. بالتأكيد هيفضحنا ويأكل البرسيم في الصندوقين ومعاهم الأعلام وأي حاجة يلاقيها ويضحك علينا الأمم المتقدمة ..

ده غير إن كونه " حيوان مستورد " هيكون من الصعب مثلاً في توقعاته في الانتخابات إنه " يتأبج " ويقبل حق الشاى ! .

 

 

 

 

 

 

 

 

طبعا لازم يكون شكله فلكلوري .. مثلاً غويشة بلاستيك فى زراعة وباروكة شعر حمرا وفوقخ منديل بلدي حلو كده بترتر ..

 

وحال البلد هيتغير بعدها ، الغويشة الثعبان هتروح عليها وهيبقي الخلخال الاخطبوط هو الاصل .. وغالباً هيكون عندنا خبر دائم في النشرات بعنوان " الأخطبوط الآن "

وعمرو اديب هيطلع يقولك " الشكروت ده موز موز موز " ..

 

وكمان الجرايد هتهتم بردود الأفعال العالمية ..

مثلاً " أوباما يشكر عين الشكروت لمساندته لعملية السلام وعدم اختياره للحرب " ،

 

وطبعا الحكومة ما هتصدق وتعلن تسريح نصف سكان حديقة الحيوانات لإن الكبير وصل خلاص وتذكرة الفرجة عليه مش هتقل عن 2 جنيه ونص ، وعلي طول هيبقي طبق سلطة الاخطبوط منتشر في كل محلات مصر ومراجيح السبتية هتبقي على شكل اخطبوط ..

 

واحتمال تطلع عربية جديدة صيني هتتباع في مصر بس اسمها " اخبطوطو إكس زيرو " ،

والحضري هياكل أخطبوط بدل البطيخة - ده لو كسب مع الزمالك يعني -

 

وهيظهر لنا مسلسل " ليالي الاخطبوط " وفيلم " الاخطبوط .. 9 جيجا "

ومسرحية " انا والاخطبوط وهواك " ..

 

 

ومجلس الشعب مش هيفوت الموضوع مع أول قرار علاج للاخطبوط علي نفقة الدولة ..

 

واحتمال يستعينوا بيه في احتفالات ليالي التلفزيون ووضع اسئلة الثانوية العامة والكشف عن المجرمين

 

..والاكيد ان مصر هتختار طعمها وهيظهر لنا تين شوكي بطعم كلاوي الاخطبوط ..

 

وكمان موضة فساتين المرأة أم الأزرع الاخطبوطية ..

 

وبدل الالقاب القديمة بتاعة نجم الجيل والهضبة والملك والعندليب ..

جه الدور خلاص علي المطرب الاخطبوط وارشح له طبعاً نجم المرحلة القادمة وصاحب الايادي البيضاء على أطباء الأنف والأذن والحنجرة " سيد أبو ذراع " ..

 

ده غير عشرات الجروبات على النت التى تروج لعين الشكروت باعتباره رمز مصر الجديد ..

 

طبعا ده غير إن كل واحد هيربي أخطبوط في بيته عشان مسابقات 0900..

 

 

 

 

 

 

 

 

 

بس المشكلة في حاجة ..

 

 

 

 

 

 

 

احنا عندنا اختيارات كتيرة ممكن الاخطبوط لغاية ما يموت يفضل واقف بين الصندوقين ..

وممكن يريح نفسه وينتحر لان عارف مصيره لو غلط ! .

 

 

 

[eman elsoudy 0]

والله ياعلى عندك حق

بس مش ناس هايفه احنا بس سايبنها بالبركه

يعنى زى ماتيجى تيجى

انما الناس التانيين دول ناس فضيه مورهاش حاجه انما احنا مركزين فى حاجات تانيه اهم بكتيييييييييييييييير

مش كده ولا اييييييييييييييييه

[حياتى من اجل ربى 22]

احنا عندنا اختيارات كتيرة ممكن الاخطبوط لغاية ما يموت يفضل واقف بين الصندوقين ..

وممكن يريح نفسه وينتحر لان عارف مصيره لو غلط ! .

 

 

يا على احنا مش محتاجين اخطبوط فى مصر

 

احنا عندنا تعابين مدربه وعارفه كويس اوى هى بتعمل ايه

 

 

يالا ربنا يصلح الاحوال

 

جزاك الله خيرا اخى على موضوع جميل

 

اسال الله ان يجعل كل ما تكتب فى ميزان حسناتك

 

وان يحقق لك كل ما تتمنى

 

وان يبلغك رمضان وهو راضى عنك يااااااااااااااااااارب

[ali desoky 391]

والله ياعلى عندك حق

بس مش ناس هايفه احنا بس سايبنها بالبركه

يعنى زى ماتيجى تيجى

انما الناس التانيين دول ناس فضيه مورهاش حاجه انما احنا مركزين فى حاجات تانيه اهم بكتيييييييييييييييير

مش كده ولا اييييييييييييييييه

 

 

 

 

 

 

أختي ايمان اولا دعيني ارحب بك معنا في منتدتمت يللاياشباب ارجو ان تفيدي وتستفيدي معنا دائما وثانيا اشكرك علي مرورك الكريم وردك المتميز بارك الله فيك

واكرمك بكل خير

ان شاء الله

يا على احنا مش محتاجين اخطبوط فى مصر

احنا عندنا تعابين مدربه وعارفه كويس اوى هى بتعمل ايه

يالا ربنا يصلح الاحوال

جزاك الله خيرا اخى على موضوع جميل

 

اسال الله ان يجعل كل ما تكتب فى ميزان حسناتك

 

وان يحقق لك كل ما تتمنى

 

وان يبلغك رمضان وهو راضى عنك يااااااااااااااااااارب

 

 

 

 

 

أختي حياتي من اجل ربي

صاحبة الردرو المتميزه

سعدي جدا بمرورك بموضوعي وردك المتميز كالعاده

بارك الله فيك

واكرمك بكل خير ان شاء الله

بلغنا الله واياك شهر رمضان وهو راضي عنا

ان شاء الله

[بسمة الاقصى 78]

يقولون دائماً إن التخلف والجهل والعبط والهيافة عندنا احنا بس

 

بس بعد مولانا سيدى بول قلت لا كلنا فى الهوا سوا

 

على فكرة كان فى صورة تحفة كسلت ما انزلها عندى كان فيها سيدنا بول حاطينله صندوقين واحد عليه لوجو الأهلى والتانى للزمالك وبول توقع الزمالك هياخد الدورى

[ali desoky 391]

على فكرة كان فى صورة تحفة كسلت ما انزلها عندى كان فيها سيدنا بول حاطينله صندوقين واحد عليه لوجو الأهلى والتانى للزمالك وبول توقع الزمالك هيا

خد الدورى

 

 

 

 

 

ياااااااه

كده يبقي دي اول غلطه هيوقع فيها بول

لانه استحاله توقعه يحصل المرادي

واضح انه بدا يخرف