Dr.A7MD 130 قام بنشر July 26, 2010 (تعديل) سلسلة نقطة ومن أول السطر الحلقة الأولى - ما وراء العقل طول وعرض وارتفاع ... دى المقاييس اللى عايشين بيها واللى بنظبط بيها كل نظرياتنا وفرضياتنا اللى قايمة عليهم كل ثقافتنا وتقدمنا وتطورنا إنما لما تيجى تبص للأبعاد دى كويس ... مش هتلاقيها كافية أبداً لتفسير حاجات كتير بنصادفها فى حياتنا أبعاد تلاتة بس ... قام عليهم العلم الهندسى القديم وللأسف مع تقدم العلم لقينا أن الأبعاد التلاتة دول مش كفاية أنا أو أنت ... كل واحد فينا له طول وعرض وارتفاع ... بطاقة شخصية بتتعرف بيها فى علم التشريح والهندسة وبمرور الوقت لو ربنا رزقك العمر بتلاقى أن أبعادك دى بتتغير سواء بالزيادة أو بالنقصان يبقى الزمن هنا له عامل مهم فى التأثير على الأبعاد التلاتة دى بعد تحركات العلماء ولإختصار الوقت .. تم اعتماد البعد الرابع [ البعد الزمنى ] .. عشان يكون عندنا أربع أبعاد من خلالهم نقدر نفسر بيهم حاجات أكتر وبتفصيل أوضح طول - عرض - ارتفاع - زمن ... تلات أبعاد مرئيين ومحسوسين وبعد غير مرئى بس تقدر تحس بوجوده من خلال تأثيره على الأبعاد التلاتة اللى قبله طيب كدا تمااااااااااااام اوى ... وطلعنا نقول بعدها أن مجموع زوايا المثلت = 180 درجة والخطين المتوازيين لا يلتقيان أبداً وبقية نظريات الهندسة اللى عارفينها كلنا لكن لو جيت تطبق الكلام ده على الكرة الأرضية ككل .. هتلاقى حاجة تانية خالص هتلاقى أنك لو رسمت مثلث نقاطه على الكرة الأرضية ... هتلاقى مجموع زواياه أكبر من 180 ومفيش وجود للخطوط المتوازية على الكرة الأرضية لأن أى امتداد لأى نقطة على الكرة لازم يمر بمركز الكرة الله !!! ... دى الحكاية مش ماشية كدا بالهندسة التقليدية ... يبقى لازم فى نظام جديد لقياس أبعاد الكون اللى أهون حاجة فيه الكرة الأرضية طلع علينا عالم وقال " لا ... دول مش 4 أبعاد بس ... لازم نفرض وجود بعد خامس عشان نقدر نحل الإشكال ده " ومن خلال معادلات رياضية وحسابات معقدة قدر يضيق فجوة التناقض الحاصل قبل كدا عالم تانى قال " ايه يا جماعة ... هو دلوقتى احنا بنقيس حاجتين مرتبطين ببعض [ عالم الإنسان وعالم الكون ] بمقياسيين مختلفين !!! ... دى حاجة مش منطقية خالص " وقال عشان نحل المشكلة دى يبقى لازم نفرض وجود بعد سادس ... وبرضه بالمعادلات والحسابات الرياضيات حاول يضيق الفجوة الحسابية دى بعد كدا علماء الحساب بدأوا يتعمقوا فى الحكاية دى لغاية لما وصلوا وقالوا أن الكون له 13 بعد ... نقدر نشوف منهم 3 أبعاد بس وبعد واحد بس نقدر نحس بوجوده ومش شايفيه [ بعد الزمن ] و9 أبعاد لا قادرين نشوفهم ولا نحس بوجودهم ومع تقدم العلم واستخدام الحواسب الآلية الذكية ... الـ 13 بعد أصبحوا 16 بعد ... [ 13 بعد مش شايفينهم خالص ] ومفيش حاجة اسمها خطوط مستقيمة ولا متوازية ... وكل الحسابات والفرضيات اللى من خلالها ممكن نتعامل مع الكون تتعامل فقط مع الخطوط الدائرية والحلزوينة معنى كدا مدام فى 13 بعد للكون مش شايفينهم يبقى كل الكائنات والمخلوقات اللى فى الـ 13 بعد دول مش شايفينهم ولا حاسيين بوجودهم ومدام نقدر نعمل أنفاق ومسارات وخطوط من الـ 3 أبعاد اللى نقدر نحس بيهم ... يبقى أكيد فى أنقاق ومسارات ومخارج ومداخل لا نقدر نشوفها ولا ندركها فى الكون طيب المداخل والمخارج والأنفاق والمسارات دى فين ؟؟؟ وبتبدأ فين وتنتهى فين ؟؟؟ طيب بتوصل منين ولفين ؟؟؟ طيب يا ترى احنا وحدنا فى الكون !!! ... استحالة لا طيب يا ترى ايه الكائنات اللى ممكن تكون موجودة واحنا مش شايفينها !!! يعنى ممكن وأنا قاعد كدا يكون فى مخلوقات بتتخانق وبتتشاكل وبتضحك حواليا وأنا مش حاسس !!! طيب فى حد قاعد معايا على الكرسى وأنا مش حاسس !!! حاجات تجنن بجد ========================== ساعات أفكر وأقول ... هو ربنا خلق العلم بس عشان الإنسان يقدر يمشى بيه أموره فى الدنيا ولا العلم هو المفتاح لفهم كل حاجة ؟؟؟ طيب مهو عدم علمك بالعلم نفسه مش مبرر ولا برهان أن فى حاجة غيره تقدر تفسر أمور معينة ربنا لما أخفى علوم بعض الأشياء عن الإنسان ... أخفاها بحكمة معينة ولغرض معين أو أخفاها عشان عقل الإنسان فى الزمن ده ميقدرش يستوعب هذه العلوم ========================== من القرآن والأحاديث النبوية الشريفة عرفنا أن السماوات مسالك ودروب وعشان تطلع من سما لسما فى مسلك ودرب معين طيب حاول تربط ده بالكلام اللى قلناه فوق ايه تفسيرك للمثل المتداول اللى بيقول " العين عليها حارس " !!! مين اللى بيحرس العيل الصغير لما يقع مثلا من الدور الأول وأمه مش واخده بالها ويقوم العيل بيطنطط زى العفريت !!! ساعات بنسمع فى بعض حوادث الطرق أن فلان كان هيروح فى الحادثة لولا أنه حس أن حاجة بتزقه زق وترميه بعيد [ سمعتها بودانى ] الملائكة بتحرس البنى آدم بكيفية لا يعلمها إلا الله ... فهل يكون الدرع الواقى الذى يحميك من الشياطين هو درع من الملائكة !!! الذكر والتسبيح والصلاة وسر الكيفية التى تؤديها بها ... هل هى مفاتيح لهذه المسالك والدروب !!! وفى الآخر نقول " الحمد لله رب العالميـــــــــــــــــــــــــــــــــــــــــــــــــن " ... نقطة ومن أول السطر . :: رسالة إلى العرب :: - العرب ماشيين بالمثل اللى بيقول " لا تصاحب الأقرع ولا تاخد منه نصيحة ... إن كان ربك بيحبه كان خلهاله صحيحة " ... والظاهر أن كل العرب شايفين نفسهم قرع ... محدش عاوز ياخد حاجة من حد - المتمعن لحال العرب فى الفترة دى هيلاقيه زى فترة التتار زمان ... والدين والتاريخ وكل الأحداث بتقول أن مصر هتكون حائط الصد القادم ... فهتكون مع مصر ولا مع التتار !!! - بيقولك الطقس شديد الحرارة عشان فى حالة حراك وسخونة سياسية ووخم دبلوماسى ... ميعرفوش أن كل مواطن عمل تكييف ذاتى داخلى ماركة فكك وكبر دماغك ... صناعة مصرية - حماس وفتح ... فتح وحماس ... حماس وفتح ... فتح وحماس .. مغلبين نفسكم ليه مهى جايه جايه فى الآخر [ مصر واسرائيل ] كلاكيت تانى مرة :: المنتدى اليوم :: - حمداً لله على سلامة أختنا الرام ... كانت بتمر بوعكة صحيحة والحمد لله ربنا شفاها وندعو الله لها بتمام الصحة والعافية - ياخى فى أقسام أول ما تدخلها تشرح القلب وفى أقسام تدخلها تتنح فيها كأنك فى امتحان باطنة وفى أقسام تدخلها تقول يا قلبى لا تحزن وفى أقسام تدخلها تقول " نقطة ومن أول السطر " - بيقولك العرض القادم للملفات الشخصية " فتح مقهى من أول المنتدى العام لغااااااااااااااااية منتدى الشكاوى والاقتراحات لمناقشة كتاب أبلة نظرية فى فنون الطبخ " - الوصف الدقيق لياللا يا شباب " ......... " هسيبهالك تفكر فيها بمزاجك بس أنا هقول [ نقطة ومن أول السطر . ] واللى يفهم أجره على الله تحيا جمهورية مصر العربية تم تعديل July 31, 2010 بواسطه Dr.A7MD شارك هذه المشاركه رابط المشاركه شار ك علي موقع اخر
عاشق الصداقه 525 قام بنشر July 26, 2010 ايه يا عم الكلام الكبير ده !! جاااااااااامد جداً جداً جداً والله - ما شاء الله عليك يا حبى هتلاقى أنك لو رسمت مثلث نقاطه على الكرة الأرضية ... هتلاقى مجموع زواياه أكبر من 180 ومفيش وجود للخطوط المتوازية على الكرة الأرضية لأن أى امتداد لأى نقطة على الكرة لازم يمر بمركز الكرة ومع تقدم العلم واستخدام الحواسب الآلية الذكية ... الـ 13 بعد أصبحوا 16 بعد ... [ 13 بعد مش شايفينهم خالص ] على فكره إنت لفيتلى دماغى بقى عندنا (صناع الحياه) تانى فى المنتدى ! طيب المداخل والمخارج والأنفاق والمسارات دى فين ؟؟؟ وبتبدأ فين وتنتهى فين ؟؟؟ طيب بتوصل منين ولفين ؟؟؟ طيب يا ترى احنا وحدنا فى الكون !!! ... استحالة لا طيب يا ترى ايه الكائنات اللى ممكن تكون موجودة واحنا مش شايفينها !!! يعنى ممكن وأنا قاعد كدا يكون فى مخلوقات بتتخانق وبتتشاكل وبتضحك حواليا وأنا مش حاسس !!! الموضوع ده فضل شاغلنى فتره كبيره جداً ،، وقريت فيه كتب كتييييييييييييييييير ،، لدرجة إنى جبت جرايد كان بيقراها والدى .. والله قبل ما أتولد وقريت فيها كلام عن ظاهرة الأطباق الطائره اللى شافوها ،، وآاراء وإختلافات العلماء فى الموضوع ده ،، وكلام كتير خلانى قربت أشت بجد .. ووصلت لحل ريحنى .. بس مش هقولك عليه - الوصف الدقيق لياللا يا شباب " ......... " هسيبهالك تفكر فيها بمزاجك بس أنا هقول [ نقطة ومن أول السطر . ] واللى يفهم أجره على الله موضوع الوصف الدقيق لياللا يا شباب ده - فكره طرأت فى دماغى من كام شهر ،، وحبيت أنفذها فى التحديث الأخير للمنتدى والموقع ككل واللى كلكم شايفينه دلوقتى .. فإخترت الجزء اللى فوق خالص .. والإعلان الموجود فيه للتعبير عن (تعريف ياللا يا شباب) ،، والفكره غن التصميم ده هيتغير بشكل شهرى بإذن الله لتعريفات تانيه - كلها تصلح لمنتديات ياللا يا شباب طبعاً ده من وجهة نظرى .. لكن ياريت نعرف تعريف ياللا يا شباب بالنسبه لكل عضو ! ==== بجد بجد .. حاجه فوق الممتازه ،، جزاك الله كل الخير يا حبيبى على الإبداع اللى هو جزء منك من يوم ما عرفتك احبك فى الله ،، ومتابع بإذن الله شارك هذه المشاركه رابط المشاركه شار ك علي موقع اخر
