Dr.A7MD 130 قام بنشر July 31, 2010 (تعديل) سلسلة نقطة ومن أول السطر الحلقة الثانية - ست الحسن والجمال قومى يا بت اعمليلى كوباية شاى - والله هكسر عضمك يا بت - متناميش واقعدى اسهرى معاى شوفى طلباتى عشان هذاكر واحد كان بيتفاخر فبيقول [ والله العظيم أنا ما بحط إيدى فى حاجة فى البيت .. لما بكون بذاكر وعاوز أشرب شاى بقوم أصحى أمى تعملى الشاى وترجع تنام ] السلام عليكم .. أهلا بيكم من جديد .. حلقة النهارده هتعجب البنات وجنس حواء بشكل عاااااااااااااااااااام .. أما الرجالة والولاد هيفكروا ألف مرة وهيحطوا نقطة ويتعاملوا من أول السطر بعد كدا اللى كان فوق ده نموذج صغير من تعامل الجنس الذكرى مع الجنس الأنثوى فى عالم الإنسان ومتقوليش ده حال العرب بس ... دلوقتى حال العرب والغرب وكل البنى آدمين .. الجهل رشق فى الكل تعال يا واد نشوف الفرق بينك وبين البنت .. خد منى واسمع أنت متفرقش عن أختك أو أمك أو أى بنت فى الدنيا غير فى حرف واااااااااااااااحد بس حرف فى اللغة الإنجليزية اسمه Y ... وتخيل شكل الحرف ده لو ضميت فرعيه اللى من فوق دول وفلطحتهم شويه وعملت شكل اسطوانى هيطلعلك شكل عباره عن اسطوانه [ راس صغيرة ] وخط [ ديل نازل منها ] حاجة اسمها الحيوان المنوى عامله زى البرص الصغير مش بتشوفه بالعين المجردة هو اللى بيخليك واد أهو عشان تعرف أن اللى بيتحكم فى نوعك بس هو البرص الصغير ده نتكلم كلام علمى بطريقة بسيطة أى أنثى فى الدنيا بنرمز ليها بالرمز الكروموسومى xx والذكر نرمز له xy أى كائن فى الدنيا عبارة عن اتحاد بويضة أنثوية مع حيوان منوى ذكرى البويضة الأنثوية دايماً تحمل الكروموسوم x والحيوان المنوى يحمل الكروموسوم x أو y يعنى لو اتحدت بيوضة مع حيوان منوى يحمل الكروموسوم x هيبقى الناتج xx يبقى الجنين أنثى ولو اتحدت البيوضة مع حيوان منوى يحمل الكروموسوم y هيبقى الناتج xy يبقى الجنين ذكر يعنى كدا نوع الجنين ده تبع الراجل مش الست ..... يعنى نبطل جهل ونبطل نتجوز مره واتنين وتلاته وأربعة وكل الحجة [ أصل أنا عاوز الواااااااااااااااااااااااااااااااد ] ايه رأيكم يا بنات لو نحرح الذكور أكتر !!! .. [ فى الأصل أنا بحرج نفسى ] " الأصل فى البشرية هى الأنثى إلى أن يتم التحويل للذكورية " العبارة غامضة بس هفسرها تفسير بسيط البيوضة لحالها ولوحدها كدا تحمل نصف المعلومات الوراثية والجنينية [ X ] يعنى خلايا الأنسجة والأعضاء التناسلية هى فى الأصل خلايا وأعضاء وأنسجة أنثوية ولما يجى الحيوان المنوى الحامل للكروموسوم y ويلقح البيوضة ... ساعتها يحصل التحويل والتبيدل لهذه الأنسجة والأعضاء عشان تخرج بشكلها الذكرى ووظيفتها الذكرية .. [ تأمل بعقلك هتلاقى الكلام صح ] وفى بعض الخلايا الإنثوية مش بتتحول فلازم تضمر وتختفى ...... طيب لو مضمرتش ومختفتش هتبقى ايه النتيجة !!!!! هتبقى جنين ذكرى وفيك بعض الأنسجة الإنثوية ... والعكس صحيح .. واللى يغلب تأثيره على التانى هتطلع صفاته الله !!! ... ده الموضوع كبير على كدا !!!! هاااااااااااا كفاية كدا ولا نكمل !!!!! ...... أظن نكمل أحسن فى عالم الإنسان والحيوان ... الأنثى هى الملكة المتوجة يسعى إليها العديد من الذكور قبل ما ندخل فى عالم الإنسان هديكم أمثلة بسيطة للأنثى فى عالم الحيوان غالبا فى عالم الثدييات الحيوانية ... الأنثى هى اللى بتختار الذكر [ بناء على قوته - رشاقته - قيادته - تنافسه مع الذكور الأخرى ] والذكر يا عينى يسعى ويروح ويجى ويشوف الويل ... كله ده عشان رضا الأنثى عنه وبعد لما تاخد الأنثى مصلحتها من الذكر ... تسيبه وتروح لحالها وتنتهى حياة الذكر يا اما بالموت أو بالضعف وبدل ما كان فى قيادة القبيلة يرجع للآخر فى ديلها عالم الحشرات بقى .... ملكة النحل كمثال .. تحتفظ بحوصلة بتجمع فيها كل السائل المنوى وعلى كيفها لما تحب أن الجيل اللى جاى يطلع فيه ذكور .. تدوس على الحوصلة تلقح بيها عدد من بيوضاتها عشان يطلعوا ذكور .. وإن معملتش كدا يطلع كل الجيل من الجنس الأنثوى فى عالم النحل [ هاتلى أتخن ست فى عالم الإنسان تقدر تعمل كدا ] وقبل ما ندخل للى بيحصل فى عالم الإنسان ... قوم اشرب كوباية شاى وتعالى رحلة من أمتع وأغرب الرحلات فى العالم .. رحلة الحيوانات المنوية داخل الأنثى .. رحلة فى عالم من الظلام الدامس عمرك وقفت فى بلكونة بيتكم ولقيت حيطة قدامك فيها شق وطالع منها طوبة فغمضت عينيك وتخيلت نفسك أنك الطوبة دى ودخلت بعقلك فيها عشان تشوف المنظر هيبقى ايه عاوزك بقى تتخيل نفسك حيوان منوى ضمن كتيبة تتكون من 300 مليون حيوان منوى هيتقتحموا العالم الأنثوى بعد شوية " ايوا كدا .... شد نفسك ... بطاريتك فى راسك ... أكلك وشربك وزادك فى ديلك ... هتقابل رياح وعواصف ... يا أما توصل يا يتقطع نفسك " استعـــــــــــــــــــــــــــــــــــــــــــــــد .... انطلق شوية بودرة ونفضتهم فى الهوا ... المنظر هيكون زى كدا بالظبط " يا عم فسح بلاش زق ... يووووووووووووووووه الجو حر ... غور من وشى لاقطع ديلك " حيز عرضه لا يتجاوز النص سم وطوله حوالى من 8 إلى 10 سم ... ده بس عشان توصل لعنق الرحم [ البوابة ] 300 مليون حيوان منوى .. طبعاً مش كلهم سليمين 100 % .... فيهم اللى ديله معووج واللى راسه مخبوطه واللى مشيته بطيئة واللى مش عارف يمشى أصلا واللى نفسه مقطوع .. إلخ طبعاً طول الرحلة دى أكيد فى عوامل مساعدة ... زى المحطات كدا [ سوائل وإنزيمات وإفرازات بتساعد فى تغذية الحيوانات المنوية وتسهيل رحلتها ] مفيش حد بيسأل حد يقوله والنبى احنا رايحين فين يا أخ ....... كله عارف طريقه بعلم الله سبحانه وتعالى ومفيش حاجة اسمها تهنا ولا دخلتنا فى سكة غلط يخرب بيت أبوك ولا شكلنا لبسنا فى حارة سد أنت تقول كدا أه عشان أنت بنى آدم ..... إنما دول الحيوانات المنوية على سن ورمح تدخل الحيوانات المنوية لتجويف الرحم بعد لما تكون مرت بعنق الرحم اللى هو زى نفق أحمد حلمى عندنا بعد لما تدخل الرحم يا باشا هتلاقى سكتين ... كأن الرحم مقسوم نصين ..... كل نص فيه أنبوبة اسمها قناة فالوب ومن ورا القناة دى المبيض يعنى قدامك قناتين فالوب ومبيضين ... طيب هتعرف منين أن المبيض ده هو اللى مطلع البويضة الشهر ده !!! مهو كل مبيض بيطلع بويضة كل شهر وبالتبادل ......... هتعرف إزاى أنت .. هل هو المبيض اليمين ولا الشمال !!! أنت متعرفش ...... بس الحيوانات المنوية بقدرة الله تعرف ..... قلتلك خليك حيوان منوى أحسن وكمل القصة يتجه ما تبقى من الحيوانات المنوية داخل تجويف الرحم يمين أو شمال على حسب البويضة طالعه منين الشهر ده تدخل قناة اسمها قناة فالوب ...... حاجة كدا عرضها بالمليمتر مش ماسورة صرف صحى يعنى تعاريج وتلافيف ومطبات وعراقيل وحفر ... زى الطرق السريعة بتاعه مصر حيوانات منوية تشوفها جمبك بدأت تقطع النفس ..... والتانى وقع منك فى الطريق والتالت استهلك كل زاده طول الرحلة وعدد الحيوانات المنوية يقل يقل ... [ فلترة طبيعية عشان اللى يوصلوا للبويضة هم أنشط وأفضل السلالة ] طوووووووووول الرحلة دى واحنا مجبناش سيرة البويضة خالص نسيب الحيوانات المنوية شوية فى رحلتها ونروح نشوف البويضة أخبارها ايه بإختصار شديد ... يتم إنتاج البويضات من المبيضين بالتبادل [ كل شهر مبيض يطلع بويضة ] أول ما تطلع البويضة من المبيض تلقطها أهداب قناة فالوب [ حاجة كدا زى الشفاطة ] تقعد تتمخطر البويضة بالراحة زى البنت المدلعة .. تمشى بشويش بشويش يدوبك تقطع مسافة 1/3 قناة فالوب بس من آخرها ... عشان تقابل الحيوانات المنوية اللى قطعت حوالى 2/3 مسافة قناة فالوب من بدايتها حوالين البويضة غشاء وجدار سميك بيحفظها داخل قناة فالوب نرجع للحيوانات المنوية ... الحيوانات دلوقتى وصلت لنقطة الإلتقاء مع البويضة ساعتها لا حد هيعرفك ولا تعالى يا صاحبى ساعدنى ولا نساعد بعض والمكسب بالنص لالالالالا .. مفيش الكلام ده خالص الحيوانات المنوية تحوط البويضة زى الفراش حوالين النور تهبط الحيوانات المنوية على جدار البويضة .. هتلاقى اللى مطلع شاكوش وعمال يخبط بيه .. واللى جايب معاه أزميل وعمال يحفر .. واللى بيضرب برجله ويقول " افتحى الله يرضى عنك .. افتحى ابوس ايديكى " مفيش حد ساكت أبداً ... كله بيحاول يخترق الجدار ده عشان يلقح البويضة والبويضة منتظرة حيوان معين بقدرة الله عز وجل فجأة تحصلك أنت حاجة غريبة [ حد بيتحكم بيك عن بعد ] .. طاقة متعرفش جيالك منين وتخليك الحيوان المنوى المنتظر تنطلق كالشهاب .. [ اوعى يا واااااااااااااااد ... احنا القادمون من الخلف ] .. تنطلق ويدوب بس تلمس جدار البويضة هتلاقى راسك بتفرز إفرازات تدوب الحته اللى هتدخل منها البويضة اختراق الحيوان المنوى لجدار البويضة ... فى رأيى المتواضع بسميها [ الشفرة الآلهية ] بعد ما يخترق الحيوان المنوى المنتظر جدار البويضة ... استحااااااااااااااااالة [ فى الظروف الطبيعية ] أن حيوان منوى تانى يخترق الحيوان اللى هيدخل البيوضة .. بيسيب ديله بره [ اللى هو مصدر الطاقة ] وتدخل راسه بس اللى فيها كل المعلومات الوراثية والجينية وكله بعد كدا بمشيئة ربك ... الجنين ده ولد ولا بنت ؟؟؟ وتكمل البويضة المخصبة الرحلة من قناة فالوب فى نفس الطريق اللى جات منه الحيوانات المنوية مشوار متقدرش تقطعه البيوضة لوحدها .. لازم تكون مخصبة عشان تقطع المشوار ده ... ولو مش مخصبة يدوب توصل جدار الرحم وتحصل تغيرات فى الرحم نحن فى غنى عنها لتنتج فى النهاية بما يعرف بـ [ الدورة الشهرية ] ولو البويضة مخصبة تبدأ تزرع نفسها فى جدار الرحم لتبدأ مشوار تكوين الجنين وساعتها تنقطع الدورة الشهرية إلى أن يتم ولادة الجنين يا ترى وأنت بتقرى الرحلة دى قدرت تتدبر فى حاجات بعينها وتعرف ايه الحكمة منها !!! قدرت تعرف وضعك الحقيقى كأنسان وسط عوالم الغير بنى آدمين !!! عرفت توصيف كلمة الأنثى !!! ... قدرت تعرف أنت كنت ايه وبقيت ايه !!! عرفت قيمة أمك أو أختك أو مراتك !!! .... ياريت تتذكر كل ده قبل ما تشوح بإيدك وتقول أنا الراااااااااااااااااااجل هنا قال الله تعالى " إنا كل شىء خلقناه بقدر " أتحداك تجيبلى أى حاجة فى الدنيا دى مفهاش عنصر أنثوى ... أتحداك من هنا للصبح وافتكر دايماً أنك فى الأصل بنت إلى أن أراد ربك كونك ذكراً فى بداية الخلق .. ربنا خلق حواء من ضلع سيدنا آدم دلوقتى عشان يتم تخليق جنين ... لازم يكون للأنثى دور بنسبة 70 % .... يا ترى ايه الحكمة من كدا !!!! حاول تفكر وتتدبر بعقلك أخى الكريم ... احمد ربك كونك ذكراً أختى الكريمة ... لكى الحق أن تفخرى .. فأنتى ملكة على عرش الذكور تعبناكم ودوشناكم ... نحط نقطة ومن أول السطر . هسيبكم تتابعوا الرحلة فى قاعة السينما العلمية :: رسالة فكاهية :: - لما كنت صغير والدتى كانت بتاخدنى على البلكونة لما أخلع سِنة .. كانت بتقول [ دعابة طبعاً ] .. يا شمس خدى سِن حمار وهاتى سِن غزال .. وطبعاً أنا مكنتش فاهم حاجة وكنت زى الأبله الصغير .. الحاجة الوحيدة اللى أدركتها لما كبرت أنى أمى أكيد غلطت ودعت ولو مرة بالعكس - بيقولك الطبيب البيطرى ممكن يفك زنقة فى أى حالة بشرية ... طيب مغلبين نفسهم ليه وعاملين طب بشرى !!! - الحمار ميبقاش حمار إلا لو كان ابن حمار ... والبغل ميبقاش بغل إلا لو دخل الحصان يحل خلاف الحمارين - واحد مسك واحد وقاله " الحق الحق مراتك ماشيه مع الكهربائى " .. رد عليه قاله " عليا الطلاق بالتلاتة مهو الكهربائى " - واحد بيقول لمراته " أنا الراجل هنا فى البيت " .... قالتله " وأنا الست هنا فى البيت ولو متعرفش اسال موضوع ست الحسن والجمال فى يالا يا شباب " ... قالها " الله يخرب بيت اللى فتح عينيكى " :: المنتدى اليوم :: - نقدم التعازى فى وفاة جدة الأخت بنت مصرية ... وندعو الله أن يتغمد الفقيدة بالرحمة والغفران - من يومين كدا .. طبت عليا الشرطة الإدارية فى قهوتى الشخصية .. دخل عليا اللواء يقول " أنت يا عضو .. احنا هنحجز 5 كراسى وبالمجان وعاوزينك تظبط القعدة وترش ميه وتجيب 10 سحلب " .. قلتله " يا فندم كل عضو له كرسيين بس " .. قالى " اسم الله عليك .. اديك قلت عضو .. واحنا إدارة يا حلو .. اشمعنى أمين السياسات .. هو احنا منشبهش .. وبعدين احنا طماعين " .. بعدها كل اللى كان منى جبت الكراسى وقلت فى نفسى نقطة ومن أول السطر - بيقولك من شروط الإلتحاق بفريق عمل ياللا يا شباب أنك " تتجوز نملة أو نحلة " ... طيب ليه !!! .. قالولك عشان تعلمك النظام والترتيب والعمل المستمر .. ويوم ما تيجى تخرج متقدرش تطلقها عشان تطلع عينك وتربيك طول حياتك ولو مخلف منها عيالك هيشتغلوا خدامين فى قلب الخلية .. هتسألنى وتقولى يا خفيف هتخلف إزاى من النملة !!! .. هقولك يا تقيل عرفت إزاى أنك بتخلف أساساً - من يوم ما دخلت المنتدى وأنا بقول حااااااااااضر .. حاااااااااااضر .. حاااااااااااضر .. خمس مرات قبل الأكل وبعده ... نفسى يا ناس أسمع حد بيقولى حااااااااضر ... هموت عليها وربنا - أختى حياتى من أجل ربى نجحت يا ناس وبإمتياز كمان ... ألف ألف ألف مبروك وعقبال الجواز ... ويارب ربنا يرزقها الذرية الصالحة " حياتنا من أجل ربنا " .. حياتنا 1 حياتنا 2 حياتنا 3 ...... حياتنا 12 " النبى عليه الصلاة والسلام يتفاخر بتكاثر أمته يوم القيامة " وبعدين تكتب نقطة ومن أول السطر . - طول عمرى ووالدتى تقولى أنت داهية مش أحمد ... صدقت بس يوم ما دخلت ياللا يا شباب تحيا جمهورية مصر العربية تم تعديل August 1, 2010 بواسطه Dr.A7MD شارك هذه المشاركه رابط المشاركه شار ك علي موقع اخر
