i'll write down my diary...ازيكم بقى!!

[لمياء الخطيب سوهاج 0]

Hey guys…I'll write down my diary..

 

ازيكم بقى!!!

 

 

 

النهردا ومن غير فشر كنت بيس أوى وقررت انى احضر اى فيلم ع تى. فى. وائضيها...وفعلا حضرت فيلم البطلة فيه كانت بتكتب مذكراتها...ملفتش انتباهى فى الفيلم كله الا الموضوع ده مع ان الفيلم فيه حاجات كتير جميلة...بس النهردا كنت عماله افكر..هى بتكتب مذكراتها ليه؟؟...

 

بس ياخسارة التفكير اتئطع ومطولش اصل عمامى ورجالة البلد كلهم كانوا عندنا...ايييه..كانت لمة..اصل بابا كان بعافيه شويه وساعتها انشغلت بالزيارات وافتكرت ان موضوع المذكرات خلاص راح من بالى وموش هرجع افكر فيه لحد ما أعدت مع أرايبنا...وحصل اللى حصل

 

تعرفوا ان فى حاجه غريبه لاحظتها فى اهل البلد دول...انهم فى حكاويهم فاكرين كل حاجه..كل تفصيلة...كل موقف مهما كان مهم او تافه...وموش بس كده...دول فاكرين اليوم والساعة ...حتى لو مرت عليه سنين..فاكرين الموقف بكل تفاصيله...دا انت حتى لو سألتهم كان فلان الفلانى لابس ايه وبيعمل ايه هيأولك!!...ههههه..وانا اللى

 

لو سألتنى عن اللى حصل امبارح ممكن ائولك موش فاكرة بالظبط ايه كان!!!...طاب هو انت سألتنى عن ايه؟!...

 

فكرت مع نفسى وكان ع لسانى ائطع حديثهم مع بابا واسألهم : هو انتوا كده ازاى؟ طاب اكلكوا ايه؟...بتشربوا ايه؟....يعنى الذاكرة القوية دى جت منيييييييين؟؟...ادويه يعنى...ولا صحيتوا لأيتوا نفسكوا..كده؟....ولا انتوا معندكوش هم ولا اييه؟؟....

 

بتأولوا ايه؟...بتسألونى وردوا عليا آلوا ايه؟....هههههه...احنا فينا من تدبيس ولا اييييه؟؟..انتوا عايزين الناس يأولوا انى بنوأ عليهم ولا حاجه!! ..لاسمح الله..ده كلام!!... لا طبعا انا مرضيتش اسألهم...بس هو انا سألت نفسى انتى ليه بتنسى تفاصيل كتير ؟ ومعروف عنك انك نسايه؟....بتنسى المفاتيح حطيتيها فين...السى دى اللى فلانه اديتهالك وانتى شغاله سيبتيها فيييين؟...الجيب او الترحه اللى اشتريتيها من كام يوم لو صحابك سألوكى...موش بتفتكرى بكام ويبأى كويس لو افتكرتى ساعتها اشتريتيها منين!!

 

وبصراحة فى الاجابه افتكرت رأى بعض العلماء فى الموضوع ده : ان بعض القدرات العقلية لما تكون شغاله اكتر بتأخد حيز من تفكير الانسان وبالتالى بنلائى الذاكرة موش قويه زى مثلا مع المبدعين لانهم دايما يبئوا يفكروا وتفكيرهم مشغول وموش بيركزوا فى التفاصيل...بس بصراحه وبينى وبينكوا رأى العلماء ع أد ما هو منطقى مطفاش النار اللى جوايا لانى ببساطة....لسه نسااااايه!!

 

يعنى ببساطة ممكن لما أئعد مع حد موش هفتكر لو سألنى ع حاجه...وولادى بكرة وبعده موش هفتكر حياتى وخبرتى كلها عشان اديهالهم!!!....ايه يسوى البنى آدم من غير ذاكرة..من غير ماضى!!...

 

عشان كده ..عشان كده...انا قررت انى هكتب مذكراتى...خلاص انا هكتب مذكراتى...ايه بتأولوا ايه؟...

 

هكتب ازاى وانا اصلا نسايه؟...ههههههه ..واضح ان دى موش تريئة خااااالص...ع العموم انا هعتبرها كده وهفهمكم..

 

بصوا ماهو عشان انا بنسى انا قررت انى اكتب....هكتب اللى فاكراه وهحكيه وائوله أبل ما يجى اليوم اللى ميبآش فيه اى زكريات....اى ماضى!!

 

المهم ولما جيت اكتب أولت اكتب اللى هيجى ع بالى....استنوا....هههههه....اصلى افتكرت...افتكرت احد الفعاليات الجامعيه اللى سافرت فيها كممثلة عن جامعتى وكنت متحدثه عنها فى مؤتمرات ولقاءات الوزراء وكبار الشخصيات.....افتكرت مناقشتى معاهم واسئلتى ليهم...افتكرت لماكان الحضور بيسأفلى متواصل....افتكرت اشادة اساتذة الجامعات المختلفة بيا....افتكرت لما كانت مى الاردنيه الوافده لاحد الجامعات المصرية واللى اتعرفت عليها تأولى: شوو...كتيير انتى جريئة!!..بس مكنتش شايفه الا ان دى مجاملة خاصة انى كنت شايفه ان اسئلتى بسيطة وواقعيه وعادى انها تتسأل...اوك؟

 

ولحد هنا والحياة كانت بيس ومفيش اى مشاكل لحد...لحد...لحد ما حصل وجه"احد" الوزراء وتكلم عما يجب ان يفعله من يهضم حقه فى المجال المختص بيها وزارته ولكنى وجدت الحل الذى طرحه غير منطقى فقمت بعدما انهى كلامه لاتناقش( لا لانقد)...لأسأل ( لا لاستدرجه فى الكلام او استفزه ) فسألته: اذا كانت الحاله التى طرحتها من اغتصاب حق ما " لعم محمد" المواطن البسيط....كيف سيقوم بكذ وكذا....؟؟؟؟ فهل هناك طريقه او حل آخر لمثل هؤلاء المواطنين البسطاء.....وساعتها لأيت منظم من المنظمين الشباب للمؤتمر بيشاور لبعض الشخصيات فى القاعه وما هى ثوانى الا وان عدت ادراجى....

 

نعم؟.....بتسألونى وايه حصل بعد كده؟.....هههههه.....ابدا تم تجاهل السؤال من قبل الوزير ...بس اللى بيضحكنى اول ما افتكرت الحكايه حتى ان بعد المؤتمركان المفروض اننا هنزور المتحف المصرى وهنا حصل اللى حصل واللى خلانى سعتها اضحك من كل قلبى...انى لأيت حد بيمشى ورايا ومتابعنى وبيحاول يسمع دردشتى مع اصحابى ولا ياسلام لو اتكلمت مع حد من السياح....بيبأى بجد تحفه!! كان ورايا خطوة بخطوة ومعاه نوته بيدون فيها كل حاجه....بس عارفين بجد كان حاجه تضحك...كنت ابص عليه وارجع الف عشان افتح فى الضحك...كنت بضحك وانا بتعجب واسأل نفسى ليه كل ده؟

 

بتأولوا ايه؟ اكيد كان متهيألى؟...هههههه...احمم ...احممم...طبعا طبعا ياجماعه وانا أولت غير كده!! ده انا حتى فكرت ساعتها انه ممكن يكون حد معجب......موش كده بردو؟!

 

ان جيتوا للحقانا اتعلمت من الموقف ده والذكرى دى...انك مهما كنت فاهم حاول تفهم اكتر...مهما كنت جرئ وكنت متحدث بارع او ماهر فى اى شئ ....خليك دايما فى نفس المحاولة للتحسين من نفسك والاحتراف اكثر واكثر..."من ظن انه يعلم كل شئ...لا يعلم اى شئ"

 

كمان ياشباب حرية التفكير لازم تبدأ جوانا.....جوانا الاول.....صدأونى وافهموا كلمتى صح.....حتى الوزراء والحكومة ومصر محتاجه مننا ...اننا الاول نكون فاهمين وواعين...واعيين بجد..مصر محتاجه مننا كده عشان نفسنا...عشان بلدنا...عشان ولادنا اللى جايين.......

 

آه ...فكرتونى صحيح ولادنا اللى جايين...موش كده انا ممكن احكى لولادى حكايه؟yes!! انا فرحانه أوى...

 

بس تفتكروا ائولهم انه كان معجب ولا.......

 

اصل المهم انى بردو لما تبآلى ذكرياتى تبأى زكريات ليها معنى وقيمة ...بس تعرفوا ؟..انا ممكن اعوض زكرياتى اللى نسيتها بانى هعمل زكريات جديده....موش بس كده...ده انا هعمل زى المؤلف اللى بيرسم شكل حكايته وهرسم شكل زكرياتى...هرسمها مليانه نجاح وفرحه وحب وسعاده ورضا وايمان بالله.....

 

دى زكرياتى الجايه بالتخطيط والاراده والتوكل ع الله اولا واخيرا

 

وهفتكرها بأنى هبطل ادى لنفسى توكيدات واحياءات بانى نسايه وكلما اصحى من النوم هأوول لنفسى : انا زاكرتى حديد...انا زاكرتى حديد...زى ما بيأولوا فى التنمية البشرية....

 

وهبدأ من النهردا فيها " فما تعيشه من حاضرك اليوم سيصبح ماضيك غدا.....

 

فكما تحب من ماضيك ان يكون اسرع وافعله الآن فى الحاضر"

 

ها؟ انتوا بأى ماضيكموا عامل ازاى؟ ....................... طاب هتعملوه ازاى؟؟؟؟

 

بس تعرفوا انا بأوول خلى موضوع معجب ولا........ده بعدين..المهم انى بأى ليا ذكريات ..ليا ماضى

 

شششش...استنوا....استنوا....اصلهم بينادموا عليا...وانتوا عارفين ميصحش اسيب الضيوف كده.....يالا هأووم ارجعلهم.....بس اعمللهم ايه؟ ايه؟.....كوفى ميكس؟...لا لا كابتشينو تشوكلت....ولا اى جوز ولا صودا احنا بردو فى الصيف...

 

ائولكم...لا ده ولا ده

 

انا دلوأتى نفسى فى...فى....

 

شاى صعيدى انما ايه!!....ويحيا اهل البلد

 

 

ازيكم بقى!!!

 

[دعوه للجنه 457]

اسلوب مالوووووووووش حل

 

 

بادئة بتسلسل وحاجات كتيييييييييير

 

دوختيى معاكى والله ههههههههه

 

وخاتمة بتسلسل أجمل

 

 

ماشاء الله

 

بجد تسلم ايدك على الكتابه واسلوبها.

 

 

فى انتظار المزيد المزيد ..

 

 

أهلا وسهلا بيكى يا لمياء فى اسرة ياللا يا شباب..

 

نورتى المنتدى

 

 

 

تحياتى..

[ابن تيميــــة 158]

[عاشق الصداقه 525]

ما شاء الله

واضح إن المنتدى إكتسب كاتبه فذه بأسلوب رائع

 

جزاكى الله كل الخير اختى الفاضله ، وبارك الله فى موهبتك ورزقكى حسن إستخدامها فيما يرضيه

 

ان جيتوا للحقانا اتعلمت من الموقف ده والذكرى دى...انك مهما كنت فاهم حاول تفهم اكتر...مهما كنت جرئ وكنت متحدث بارع او ماهر فى اى شئ ....خليك دايما فى نفس المحاولة للتحسين من نفسك والاحتراف اكثر واكثر..."من ظن انه يعلم كل شئ...لا يعلم اى شئ"

 

وددت لو إقتبست الموضوع كله ،، ما شاء الله كلمات فى غاية الروعه

بس حضرتك زى ما بيقولوا (قلبتى المواجع) ..

لأن قصة النسيان دى .. من أكبر المشكلات اللى بتواجهنى فى حياتى

بجد بجد .. أنا لو حكيت عن نسيانى ممكن الناس هنا متصدقش ،، وكتر خير اللى عندى فى البيت فى إنهم مستحملين الموضوع ده ،، والله المستعان

 

أهلاً ومرحباً بك معنا فى بيتك على الانترنت وأسرتك الثانيه - ياللا يا شباب

أسلوب كتابتك يأخذ العقول بالفعل ،، وننتظر المزيد من مشاركاتك الرائعه أختى الفاضله

 

تحيتى وتقديرى

[لمياء الخطيب سوهاج 0]

السلام عليكم...

كيف حالكم جميعا اخوتى فى الله...اهلا بك اختى دفء الاحساس واخى الدمياطى ومشرف المنتديات الموقر

شكرا جزيلا على مروركم الكريم

وتأكدوا انه يشرفنى قراءتكم لكتابتى...

شكرا مرة اخرى لكلامكم الراقى والمشجع الذى سيدفعنى دوما لتقديم المذيد

بس على الله مانساش اسم المستخدم والرقم السرىوانا داخله المرة الجايه!! ههههههه

وان شاء الله اللى جاى هيبأى احسن

ورمضان كريم عليكوا