سلسلة صح وغلط وقصة طريفة {الحلقة السابعة والعشرون}

[ali desoky 391]

سلسلة صح وغلط وقصة طريفة

{الحلقة السابعة والعشرون}

 

 

 

 

 

الحمد لله وحده والصلاة والسلام على من لا نبى بعده

 

 

ومع الحلقة رقم 27

 

من سلسلة

 

" صح وغلط وقصة طريفة "

 

حلقة خاصة

 

بمناسبة زكاة الفطر

 

حنركز قوىىىى في جزء صح

 

______________________________________

1- صح :-

 

أوشك رمضان على الرحيل

 

وانقضت أيامه سريعا ..نسأل الله أن نكون من المقبولين ولا نكون من المحرومين

 

وبما أن رمضان أوشك على الرحيل فحديثنا اليوم عن :

 

زكاة الفطر

 

عن ابن عمر رضى الله عنه قال :

 

فرض رسول الله صلى الله عليه وسلم زكاة الفطر من رمضان صاعاً من تمر ، أو صاعاً من شعير ؛ على العبد والحر ، والذكر والأنثى ، والصغير والكبير من المسلمين . و أمر بها أن تؤدى قبل خروج الناس إلى الصلاة -صلاة العيد-

 

و عن ابن عباس رضى الله عنه قال :

 

زكاة الفطر طهرة للصائم من اللغو و الرفث و طعمة للمساكين من أداها قبل الصلاة فهي زكاة مقبولة و من أداها بعد الصلاة فهي صدقة من الصدقات

وحنتكلم شوية عن زكاة الفطر علشان كلنا نعرفها كويس ان شاء الله

حكمها :-

واجبه على كل مسلم يجد ما يفضل عن قوته وقوت عياله يوم العيد -يعنى عنده الاكل بتاع يومه وأكثر- .. وكلنا ذلك الرجل أو المراة بفضل الله

 

و مبيتهيئليش يعنى حد فينا بيخش على النت ويشوف الايميل ويفتح المنتديات وهو مش لاقي ياكل

 

ولا ايه النظام ؟؟ اصل فيه حاجات غريبة بتحصل اليومين دول وانا مش متابع

 

ولا طلّعوا شعار جديد

 

وقفه مصرية .. نحكم عقلنا .. ندخل عالنت كلنا

 

المهم .. هي فريضة على كل واحد منا .. فرض يعنى

وبتخرج عن الصغير والكبير يعنى حتى الصغير اللى لسه مبدأش يصوم .. الطفل الصغير بتخرج عنه .. بيخرجها اللى بيعوله .. بيصرف عليه

قيمتها :-

في الأصل هي مقادر صاع من تمر او من زبيب أو من شعير أو من أرز

 

يعنى ببساطه هى صاع من غالب قوت البلد

 

في مصر مثلا أظن أن الغالب هو : الفول والأرز .. يمكن فيه حاجات تانية بس أظن ان دول اكثر حاجتين في مصر يعنى

وكل بلد تشوف غالب قوتها يعنى

 

والصاع مختلف .. يعنى الأرز تقريبا 3.2 كيلو ، السكر 3.5 كيلو ، الفول 2.75 كيلو .. تقريبا والله أعلم

 

ممكن أزيد أو اقل قليلا

واللى مش حيروح يشترى بنفسه وعايز يطلع فلوس

يبقى الأفضل انه يعطى النقود لحد يشترى هو الحبوب ويوزعها على مستحقيها

 

وقيمتها تقريبا 10 جنيهات .. وممكن أكثر حسب نوع الحاجة اللى حتطلعها

 

يعنى ثمن الأرز غير الفول غير الزبيب غير العدس غير الفاصوليا غير اللوبيا غير التمر

 

والأرز تقريبا من أرخص الأشياء ثمنا .. أظن تقريبا ب 9 جنيهات

 

ويمكن نحط ال 10 جنيه فى صناديق زكاة الفطر في المساجد ..بس مش أى مساجد

 

المساجد المعروفه بصلاح القائمين عليها وأنهم فعلا بيروحوا يشتروا بيها حبوب ويوزعوها على مستحقيها

 

وأسألهم برضه قبل متحط انتوا حتجيبوا ايه بالظبط وتقريبا أحط كام علشان تجيبوا بيه أرز مثلا

 

بس علشان تتأكد انهم حيروحوا يشتروا بيها الحبوب أو كده ويوزعوها على مستحقيها

 

لإن فيه مساجد بتخلط فلوس زكاة الفطر على إفطار الصائم على زكاة المال وتجمعهم على بعض وتوزع فلوس

 

وده مينفعش

وقت اخراجها :-

 

قبل العيد بيوم أو يومين كما كان الصحابة يفعلون

 

يعنى نبدأ من دلوقتى .. علشان نلحق وتلحق الناس توصلها لمستحقيها قبل صلاة العيد

 

واخر وقت اخراجها هو بداية صلاة العيد .. لكن ابدأ على طول لو كنت حتضعها فى صندوق زكاة الفطر في المسجد -بس زي مقلنا مسجد موثوق في القائمين عليه - علشان يلحق الناس يشتروا بيها ويوزعوها قبل صلاة العيد أو لو كنت حتدّي الفلوس لحد ثقه يشترى لك الحبوب ويوزعها

 

ولو حد عدّى عليه وقتها والصلاة بدأت ومطلعهاش .. مش معنى كده انه خلاص يكبر دماغه وميطلعهاش

 

لأ .. يطلعها قضاء .. لأنها دين في رقبته

 

المستحقون لزكاة الفطر :

 

هم الفقراء والمساكين من المسلمين ؛ لحديث ابن عباس رضي الله عنهما السابق : " .. وطعمة للمساكين " .

 

مش زي زكاة المال بتخرج للأصناف الثمانيه .. لأ .. ديه للفقراء والمساكين خصوصا يعنى اللى معندهومش قوت يومهم

 

تنبيه مهم :

 

من الخطأ دفعها لغير الفقراء و المساكين ، كما جرت به عادة بعض الناس من إعطاء الزكاة للأقارب أو الجيران أو دفعها لأسر معينة كل سنة دون نظر في حال تلك الأسر هل هي من أهل الزكاة أو لا ؟ أو لعسكري المرور .

ده تقريبا ملخص لزكاة الفطر .. أرجو أننا كلنا نكون فهمناه بسهوله

و نبدأ من الآاااان .. واسال الله ان يتقبل منا ومنكم

 

تنبيه : كثير مما كتب فى هذا الموضوع مجموع بتصرف من مقالات .. فجزى الله خيرا كل من كتب شيئا افاد المسلمين

 

____________________________

2 - غلط :-

 

علشان منطولش وكفاية التطويل اللى حصل في جزء صح .. وبعتذر عنه

 

فيه حديث كثيييييير جداااا بنسمعه من خطباء وائمة مساجد و ساعات بنسمعه في إذاعه القرآن

 

وهو بيتكلم عن زكاة الفطر .. يروح قايل :

 

قال رسول الله صلى الله عليه وسلم :

 

" شهر رمضان معلق بين السماء والأرض ولا يرفع إلى الله إلا بزكاة الفطر "

 

...................

 

الحديث ده سمعناه كثيييير

 

والحديث ده : ضعيف

وانظر السلسلة الضعيفة رقم 43 وضعيف الجامع الصغير حديث رقم 3413 و 1868

 

ولو سمعنا حد بيقوله :

 

حتضربوني انا .. لأنه حيفكركم بالحلقة الطوييييله ديه

 

مقلنا خلاص طوّلنا و آسفين

 

 

_________________________________

3- قصة طريفة :-

 

ذكر ابن الجوزي -رحمه الله- :-

 

" جاء رجل إلى قاص وهو يقرأ : ( يَتَجَرَّعُهُ وَلَا يَكَادُ يُسِيغُهُ ) فقال : اللهم اجعلنا ممن يتجرعه ويسيغه . "

 

 

يعنى هي خلاص المشكلة كلها بقه في انه يسيغه ولا لا !!ا

 

ياعم الكلام عن الماء الصديد في جهنم

 

نسأل الله أن يعافينا ويجيرنا من النار ولا نتجرعه أصلا

 

ده اللى كنت بقوله ان فيه ناس مبتبقاش مركّزه أصلا في الدعاء .. ومش عارف ايه اللى بيتقال أو مش مركز

 

فعايزين نركز في الدعاء ونستمع ونعرف ايه اللى بيتقال

كنت عايز أتكلم عن أخطاء في الدعاء لكن علشان طوّلت جامد

نتكلم عنها في حلقة تانية إن شاء الله

 

ايه ده طوب !! لأ طوب لأ

 

 

________________________

كده خلصت الحلقة الخاصة الطويييييييييييييييييييييييييله جدا

 

الحلقة السابعة والعشرون يارب متكونوش زهقتوا ومتكونوش حتتخانقوا معايا

 

وبكره إن شاء الله نلتقى في الثامنة والعشرين إن شاء الله

 

وجزاكم الله خيرا

 

لمتابعة السلسة كامله

هنا

 

سلسلة صح وغلط وقصة طريفة

 

 

__________________________________________

ابسط ما تساهم به نشر الحلقات ولو بالايميل

 

[فخورة بنقابي 30]

السلام عليكم ورحمة اللة وبركاتة واللة أنا مش عارفة أقولك أية علي موضوعاتك الجميلة اللي بنستفيد منها كتير موضوع حضرتك دة جميل وجة في توقيت رائع أعزك اللة وتقبل اللة منك وجعلك اللة نافعا ومؤثرا للغير وأعانك اللة علي فعل الخير وجزاك اللة خيرا والسلام عليكم ورحمة اللة وبركاتة

[ali desoky 391]

السلام عليكم ورحمة اللة وبركاتة واللة أنا مش عارفة أقولك أية علي موضوعاتك الجميلة اللي بنستفيد منها كتير موضوع حضرتك دة جميل وجة في توقيت رائع أعزك اللة وتقبل اللة منك وجعلك اللة نافعا ومؤثرا للغير وأعانك اللة علي فعل الخير وجزاك اللة خيرا والسلام عليكم ورحمة اللة وبركاتة

 

 

 

 

 

 

وعليكم سلام الله ورحمته وبركاته

سعيد جدا اختي سما احمد بمرورك الكريم بموضوعاتي

وردودك المتميزه التي تضيف لموضوعاتي رونقا وجمالا

 

بارك الله فيك

واكرمك بكل خير

وجعلنا واياكي من عتقاء شهر رمضان