سلسلة صح وغلط وقصة طريفة {الحلقة التاسعة والعشرون}

[ali desoky 391]

سلسلة صح وغلط وقصة طريفة

{الحلقة التاسعة والعشرون}

 

 

 

 

 

 

الحمد لله وحده والصلاة والسلام على من لا نبى بعده

 

ومع الحلقة رقم 29

 

من سلسلة

 

" صح وغلط وقصة طريفة "

 

حلقة خاصة

 

بمناسبة عيد الفطر

 

بيتهيئلي بتشوفوا حلقة خاصة ديه بتتخضوا مش طويله قوى يعنى

 

________________________

1- صح :-

 

خلاص عيد الفطر كمان يوم

 

كل عام وأنتم بخير

 

اليوم حديثنا عن بعض أحكام العيد ببساطة ان شاء الله

 

ونبدأ ببعض أحكام العيد :-

 

1- النهي عن صومه :-

حرام صيام يوم العيد يعنى لازم تفطر يوم العيد .. اللى فيه صلاة العيد .. محدش بقه يسخن ويقول لا أنا نفسي أكمل صيام .. أفطر يا سيدي اليوم ده وبعدين أبدأ الست من شوال

 

2- صلاة العيد:-

سنة مؤكدة عند الجمهور وواجبة عند بعض العلماء .. يعنى كلنا نخرج نصليها

 

3- حكم خروج النساء والصبيان للصلاة:-

يشرع خروج النساء في العيدين .. ما لم تكن معتدّة -في العدّه يعنى من طلاق أو وفاة زوجها -، أو كان في خروجها فتنة، أو كان لها عذر .. بل يستحب خروجها إذا التزمت آدابه .. فتخرج غير متطيبه -بدون عطر يعنى - ولا تلبس ثوب زينة ملفت - لبس العيد الغريب ده بلوزات نص كم وبتاع وفوقيه الاسدال تخلص الصلاة يترمي الإسدال ويفضل النص كم .. مينفعش- .. وبالنسبة للصبيان فجائز خروجهم ..

 

4- وقت الخروج للصلاة:-

يستحب التبكير إلى العيد بعد صلاة الصبح .. يعنى نروح بدري .. مش والامام بيبدا الصلاة

 

5- الاغتسال للعيد ووقته:-

يستحب أن يغتسل للعيد وكان ابن عمر يغتسل يوم الفطر، ولم يثبت فيه حديث مرفوع -يعنى عن الرسول عليه الصلاة والسلام -يصلح للاحتجاج به .. يعنى مفيش حديث صحيح ثابت عن الرسول في الغسل للعيد

 

ووقت الإغتسال فيه قولان بعد صلاة الفجر والقول الأخر قبل أو بعد صلاة الفجر والأفضل أن يكون بعد صلاة الفجر

 

6- الأكل قبل الصلاة:-

يسن أكل تمرات وتراً -يعنى 1 او 3 او 5 او 7 او 99 زي اخينا بتاع امبارح - قبل الخروج إلى الصلاة في عيد الفطر

متقعدش بقه تاكل وتشرب كثير لحد متلاقى نفسك تقلت على الصبح كده ومش قادر تنزل

 

7- التكبير في الطريق للمصلى:-

ومن السنة التكبير في الطريق إلى المصلى ورفع الصوت بالتكبير للرجال .. والتكبير يكون حتى يأتي الإمام

 

8- صيغة التكبير:-

الله أكبر الله أكبر لا إله إلا الله، والله أكبر الله أكبر ولله الحمد .. وفي رواية أخرى صحيحه : الله أكبر الله أكبر الله أكبر لا إله إلا الله، والله أكبر الله أكبر ولله الحمد

 

9- صفة صلاة العيد:-

صلاة العيد مع الإمام ركعتان

 

10- التكبير في الصلاة:-

يستحب للإمام أن يكبر في الصلاة سبع مرات في الركعة الأولى وخمس تكبيرات في الركعة الثانية .. وطبعا بنكبر وراه

 

11- رفع اليدين مع التكبير:-

ليس في ذلك سنة لازمة اننا نرفع ايدنا في كل تكبيرة في الركعتين اللى هما ال 7 وال 5 .. فمن شاء رفع يديه في كل تكبيرة ومن شاء لا يرفع .. اللى عايز يرفع واللى مش عايز ميرفعش

 

12- خطبة العيد:-

الخطبة بعد صلاة العيد سنة والإستماع لها افضل .. بلاش الجرى ده بعد الصلاة .. نستنى نسمع الخطبة .. مجتش على الربع ساعة ديه

 

13- حكم الكلام اثناء الخطبة:-

يكره الكلام والإمام يخطب يوم العيد

 

14- مخالفة الطريق:-

يستحب انك تروح للصلاة من طريق وترجع بيتك من طريق تانى

 

15- التهنئة بالعيد:-

التهنئة التي يتبادلها الناس فيما بينهم أيا كان لفظها، مثل قول بعضهم لبعض: تقبل الله منا ومنكم، والتهانئ اللى زي كده . فهذا قد ورد عن طائفة من السلف أنهم كانوا يفعلونه

ومفيش مشكلة ان نقول : كل عام وأنتم بخير - كل سنة وانتم طيبين

 

عايزين ننشر حالة الفرح بيننا في العيد .. أظهروا فرحكم

 

بس كفاية كده علشان محدش يتخانق معايا واحنا داخلين على العيد

 

 

_________________________________

2 - غلط :-

 

كثير أوى نسمع من أئمة مساجد أو خطباء خطبة العيد أو في إذاعة القرآن الكريم

 

أو كثير ممكن حتى نسمع في التلفزيون في برامج

 

وممكن تسمعوه في خطبة العيد بكره .. لو مكنش الخطيب بياخد باله من صحة الأحاديث قوي

 

يقولك يوم العيد هو يوم الجائزة

 

ويروح قايل قال رسول الله صلى الله عليه وسلم :

 

" اذا كان يوم الفطر وقفت الملائكة علي أبواب الطرقات فنادوا : " اغدوا يا معشر المسلمين إلي رب كريم يمن بالخير ثم يثيب عليه الجزيل ، لقد أمرتم بقيام الليل فقمتم ،وأمرتم بصيام النهار فصمتم و أطعتم ربكم فقبضوا جوائزكم ،فإذا صلوا نادي مناد : الا إن ربكم قد غفر لكم فارجعوا راشدين الي رحالكم فهو يوم الجائزة ويسمي ذلك اليوم في السماء يوم الجائزة"

 

..............................

 

والحديث ده : ضعيف

انظر السلسلة الضعيفه حديث رقم 5470 وضعيف الترغيب والترهيب حديث رقم 670

 

فتسمية يوم العيد .. بيوم الجائزة .. تسمية غير صحيحة ولا دليل عليها غير الحديث ده وهو غير صحيح

 

ولو سمعنا خطيب العيد بيقوله

 

اكيد مش حنقوم نضربه ونقوله

 

بعد ميخلّص خطبة بينك وبينه قله

 

وكل سنة وانت طيبين .. والمسامح كريم

 

 

_____________________________

3- قصة طريفة :-

 

ذكر ابن الجوزي -رحمه الله- :-

 

" وعن أبي على النميري قال : تراءينا هلال شوال -شافوا الهلال يعني - ، فأتينا سوار بن عبد الله -الأمير- لنشهد عنده -يشهدوا انهم شافوا الهلال - ، فقال حاجبه : أنتم مجانين الأمير لم يختضب بعد ولم يتهيأ -متشيكش وظبط نفسه - ولئن وقعت عينه عليكم ليضربنكم مائتين انطلقوا فانصرفنا وصام الناس يوم الفطر "

 

يعنى مع انه يوم العيد بس الناس في البلد ديه صامته على انه 30 من الشهر علشان اللى قريتوه

 

 

مش عارف الموضوع ده بيفكرنى بحاجه كده اليومين دول !!ا

 

أوعوا تفهمونى غلط .. مش قصدي حاجه .. أنا عايز أعيّد مع أهلى

 

 

بس بمناسبة اللى عمّال يتشيك ده علشان العيد .. أكيد مش غلط ان الواحد يتزين للعيد .. الرجاله هاه

 

عايزين نتكلم عن شوية أخطاء ومشاكل بتحصل في العيد

..زي ايه بقه ؟؟

 

خدوا عندكم بقه

 

1-

تخصيص يوم العيد لزيارة المقابر والسلام على الأموات .. يا جماعه بلاش كآبه .. ده يوم فرح

 

2-

اختلاط النساء بالرجال في بعض ساحات الصلاة .. كله مع بعضه .. البنت جنب الولد .. مهياش كمالة عدد .. الصف بنتين وجنبهم ولد وبعدين بنت وبعدين 3 ولاد وكمل بقه الصف .. على أساس اننا واقفين لتذاكر سينما

وخروج بقه الولاد مع البنات للجناين ودريم بارك و السينمات وغييييييييره .. مينفعش الكلام ده

 

3-

بمناسبة العيد تعلن سلسلة مطاعم السمكة الرشيقه عن حفلة النجمة تافهاء شلبي

 

مش ديه الفرحة بالعيد !! الفرحة تكون بالحلال .. بلاش الحفلات والغناء والرقص والكلام ده .. العيد مش لمعصية ربنا

العيد للفرحة بان ربنا اتم علينا نعمة الصيام واعاننا على الصيام والقيام والله الفرح بيكون بالطاعه مش بالمعصية

 

وتلاحظوا ان العيدين بتوعنا بعد طاعات

 

4-

تبرج النساء وخلع الحجاب بعد رمضان .. ديه مصيبه والله .. يعنى من علامات قبول الطاعه الثبات عليها .. والمفروض البنت المسلمة تلتزم باللبس الشرعي خصوصا احنا لسه خارجين من رمضان .. لأن عزها وشرفها في دينها وعفتها وده اللى بيميزها عن غيرها .. يعنى واحد متبرجة لو شفتها في الشارع تفرقها ازاى عن كريستين وماري !!ا

 

5-

خروج النساء لصلاة العيد بلبس بقه .. لابسه طرحه ومغطية شعرها بس مفيش فرق بينها وبين المتبرجة غير الطرحة .. ده مش حجاب .. وده لبس زينة .. وكمان متخرجش وهى حاطه عطر .. مش اللى بيشم ريحها من على بعد ميل

 

6-

البعض بيظهر عليه الفرح بالعيد لأن شهر رمضان انتهى وتخلص من العبادة فيه وكأنه حمل ثقيل على ظهره..وده اتكلمنا عنه قبل كده وقلنا ده على خطر عظيم .. الفرح يكون بتمام نعمة الله علينا

 

7-

بلاش السهر ليلة الوقفة للدرجة اللى تخلي كثير يناموا عن صلاة الفجر وصلاة العيد .. مبيقدروش يصحوا.

 

8-

اللى فات بقه كوم والبمب والصواريخ كوم تانى .. تحس ان فيه غاره جوية فوقيك .. ببقى ماشي في الشارع وانا مقلق في أى ثانية تنزل قذيفه فوق دماغي .. طلوعى من مدخل العمارة ده بيبقى ليه ألف حساب .. وممكن نحط خطط علشان نخرج بسلام

 

يا جماعه ده عيد مش حرب .. بلاش البمب والصواريخ ديه بالله عليكم

 

علشان خاطري أنا طيب

 

ولو ان علشان خاطري ديه .. حتروحوا بنفسكم تشتروا البمب وتدوه للعيال عندنا في العماره

 

وكل سنة وانت طيبين

 

 

________________________________

كده خلصت الحلقة الخاصة الطويييييييييييييييييييييييييله جدا

 

الحلقة التاسعة والعشرون

 

يارب متكونوش زهقتوا ومتكونوش حتتخانقوا معايا

 

وبكره إن شاء الله

نلتقى في

الثلاثين والأخيرة

إن شاء الله

 

وجزاكم الله خيرا

 

 

لمتابعة السلسة كامله

هنا

 

سلسلة صح وغلط وقصة طريفة

 

 

_________________________________________

__________________________________________

ابسط ما تساهم به نشر الحلقات ولو بالايميل

[فخورة بنقابي 30]

سلسلة رائعة جدا وقصة طريفة بس غريبة شوية وعلي فكرة العيد بعد بكرة مش بكرة ولا اية رأي حضرتك

[ali desoky 391]

سلسلة رائعة جدا وقصة طريفة بس غريبة شوية

 

شكرا لمرورك يا اختي

وجزاك الله كل خير

ان شاء الله

 

 

وعلي فكرة العيد بعد بكرة مش بكرة ولا اية رأي حضرتك

 

 

 

اهو خلاص بقي بكره

كل عام وانت بخير يا اختي

 

 

[الرّام 173]

كل عام وأنتم بخير

العيد للفرحة بان ربنا اتم علينا نعمة الصيام واعاننا على الصيام والقيام والله الفرح بيكون بالطاعه مش بالمعصية

 

.. الفرح يكون بتمام نعمة الله علينا

 

وكل سنة وانت طيبين

 

 

تقبل الله منا اجمعين

وجعل القلوب بذكره معمورة. والذنوب بعفوه ورحمته و باذنه و مشيئته مغفورة

.

 

 

تم تعديل September 9, 2010 بواسطه الرّام

[ali desoky 391]

تقبل الله منا اجمعين

وجعل القلوب بذكره معمورة. والذنوب بعفوه ورحمته و باذنه و مشيئته مغفورة

 

 

 

 

أختي الرام

سعيد جدا لمرورك باحد حلقات السلسلة

بارك الله فيك يا اختي

واكرمك بكل خير

وكل عام وانت بخير

ان شاء الله