Dr.A7MD 130 قام بنشر September 12, 2010 (تعديل) سلسلة نقطة ومن أول السطر الحلقة الثالثة - جزرة وقضمها جحش سرب من أسراب النمل كان ماشى على فرع مصرف جمب الأرض الزراعية بتاعه الحاج أحمد ,,, ماشى راجع من مهمة التخزين الشتوى بتاعه كل سنة ساكى وساهى تعبهم المشى لمسافة عشرات الكيلومترات خصوصاً أن المرادى واخدين عيالهم معاهم ساكى :- " هو الموال ده مش هيخلص ,,, لازم كل سنة العلقة دى !!! " ساهى :- " معلش أهى هانت الحكاية ,,, كلها كيلو ونوصل " ساكى :- " بس احنا جوعنا وعطشنا والعيال شكلها هتقع مننا " ساهى :- " يا فرج الله ,,, ربك مش بينسى حد أبداً ,,, بصى بصى ,,, فى جزرة قدامنا أهى وكل السرب طاير عليها ,,, شدى حيلك يا ولية " ويطير سرب النمل على الجزرة اللى تُعتبر وليمة كبيرة جداً جداً ومفيش دقايق ويحصل زلزال كبير يهز المكان كله قائد السرب وحكيم النمل :- " بسرعة بسرعة ,,, الكل ياخد ساتر ,,, ديناصور البلد هيدوسنا فى رجليه " يطير كل واحد من سرب النمل فى ناحية عشان يفسح الطريق لديناصور البلد ويقف ديناصور البلد قدام الجزرة ويبص شمال ويمين وياخد الجزرة فى بؤه وكل واحد فى سرب النمل باصص على الجزرة ومش مصدق اللى حصل معقول ده !!! ,,, دى كانت لينا خلاص ومفيش ثوانى وتسمع قائد الديناصور بيقول " اه يا جحش يا ابن الجحش ,,, واقف على حتة جزرة !!! ,,, امشى يا ابن الجحش " ديناصور البلد " جحش الحاج أحمد - يبلغ من العمر 7 سنين بس - أبوه الحمار لما شافه شد حيله خلى الحاج أحمد ياخده معاه ويريحه من تعب الروح والجى " وعلى بعد خطوات من ترك الجحش لمكانه وقف حكيم النمل وقال " يا سبحان الله ,,, جزرة وقضمها جحش " جزرة وقضمها جحش ,,, مثل ومقولة مصرية طالعه من ريف مصر بتوصف كتير من الأمور اللى بتحصل فى حياتنا بشكل يومى دايماً بنسمعها من الناس الكبيرة ,,, أبهاتنا - أمهاتنا - جدودنا ,,, وكتير بنسمع حاجات منهم مضحكة بمجرد سماعها بس بتوصف الحال بدقة شديدة أمور كتير فى حياتنا لما نبص ليها نستغرب ودايما نقول " ايه جاب ده لده وإزاى ده يركب على ده !!! " ومن قمة ذهولنا واستغرابنا ودهشتنا نقول الأمثلة والمقولات المعتادة فى المواقف اللى زى دى " سمعت النهارده ,,, بيقولوا أن الواد الفلانى ابن فلان هيتجوز البت فلانة بت فلان " " لا يا راجل بتقول ايه ,,,, بقى الواد ده هيتجوز البت دى ,,, متجيش أصلاً ولا ينفع ,,, اه والله صحيح [ جزرة وقضمها جحش ] " " اسكت ده الواد سمير جاتله حته شغلانه إنما ايه ,,, محدش كان مصدق أنه هيوصلها ولا هو كان يحلم بيها أساساً " " اه والله معاك حق ,,, بس نعمل ايه .... إلخ " مين قال أن جوازة فلان من فلانة جايه بشكل اعتباطى وغير متكافىء ,,, ومين قالك أن فلان لازم ياخد الوظيفة اللى تناسب وضعه وحجمه اللى أنت بتفكر فيه !!! ميكونش ليه ربك رايد أن فلان يتجوز فلانة عشان يتعدل حاله المايل على ايديها !!! ,,, أو فلانة لما تتجوز فلان ربنا يجعله سبب فى هدايتها !!! أو فلان لما ياخد وظيفة وشغلانة ضخمة فى نظرك يكون ده حكمة من ربك لحاجة محتاجها الشخص ده أو أى حد من عيلته !!! فى الحقيقة كل اللى بيحصل ده يندرج تحت مسمى كلمة رزق ولو نفهم معنى الرزق كويس هتتسع مداركنا بشكل غير عادى رزق فلان أنه يتجوز فلانه عشان رزقها أنها تخلف منه واد رزقه أنه يحفظ القرآن على ايد شيخ رزقه أنه ياخد ثواب الواد ويدخل بيه الجنة ويروح ويجى الرزق ده على الأربعة دول عشان يبقى دليل حكمة ربك من جواز فلان بفلانه رزق فلان أنه يلتحق بوظيفة فى شركة ما عشان رزق صاحب الشركة أنه يكسب من وراه بشكل أو بآخر وعشان يعود الرزق ده على كل واحد شغال بالشركة دى يعنى هى الحكاية مش مرتبطة بشكل شخصى وبس أهى ,,, دى الحكاية ليها أبعاد وأبعاد وأبعاد واحد بسم الله ما شاء الله متدين وله وظيفة متحرمة وعيلته كبيرة ولها أصل ووووو ... إلخ كان نفسه يتجوز واحدة من حسب ونسب وأصل ودين وخلق وجمال ,,, وحاول بكل ما يملك أنه يتمم الجوازة دى لكن سبحان الله ,,, تقف الجوازة على حاجة أهيف من الهيافة ويبقى نصيب الشخص ده فى واحدة تانية خالص أقل من الأولانية فى حاجات كتير ويبقى نصيب البنت دى فى واحد أقل من اللى اتقدملها فى الأول بمراحــــــــــــــــــــــــــــــــــــــــــل بس اصبر وانظر فيما بعد لحياة كل من الطرفين ,,, هتلاقى نفسك بتقول كلام غير الكلام اللى كنت بتقوله فى الأول خالص رؤيتى الشخصية لهذا الموضوع ,,, أن حكمة ربك لا تدركها لا الأبصار ولا العقول إلا بعد فترة كبيرة وقليل من البشر من يهبهم الله برؤية حكمته ويخصهم بهذه الهبة الحكاية بسيطة خالص ,,, عقول بتركب على عقول ,,, سبحان من يركب عقل على عقل وروح على روح ونفس على نفس زى نظام الإنزيمات فى الخلية وزى نظام القفل والمفتاح ,,, ادى المفتاح فى إيدك اليمين والقفل فى إيدك الشمال منين ما يدخل المفتاح فى القفل ويتلاقى الإنزيم الخلوى مع شقه النشط ,,, تكتمل الحلقة وتقدر تشوف ايه اللى ورا الباب المغلق وبلاش نقول " جزرة وقضمها جحش " ونقول " قدر الله وما شاء فعل " " إنا كل شىءٍ خلقناه بقدر " نقطة ومن أول السطر . :: رسالة عقلانية :: - " شبكة الثقة " ... أجمل وأصعب ما فى الدنيا أنك تثق بنفسك وقدراتك ,,, ويوم ما ربنا يكرمك بثقتك فى نفسك وقدراتك وتفكر تثق بمن حوالك فخلى بالك من عدة حاجات :- 1- ثقتك فى والدك ووالدتك ثقة فطرية مش بس صعب أنك تفقدها بل مستحيل حتى تفكر التفكير ده 2- يوم ما تحب توسع دايرة الثقة دى " قرايب - أصدقاء - زمايل " ... فكر فى مقدار الثقة المُعطاة من جانبك قبل التفكير فى الأشخاص 3- اعلم تمام العلم ,,, كل ما كانت شبكة ثقتك قصيرة فمردودها عليك هيكون أسرع ,,, شبكة ثقتك زى شبكة أسلاك الكهربا 4- يوم ما تفكر أنك تعطى الثقة لفلان وتسحبها منه وتكون أنت الغلطان وتحب تسترجع الثقة دى فده شبه مستحيل 5- احترم جميع العقول بس مش شرط أنك تثق فيها ,,, زى ما قلنا فوق ربك بيركب عقول على عقول ,,, كل يوم فى عقول فى الطالع وعقول بتنضج وعقول بتتفتح وعقول بتكبر وعقول برضه فى النازل كل يوم بعد عنك 6- تملى هنقول ,,, ثقتك بنفسك وبعدها ثقة ومن أول السطر . :: المنتدى اليوم :: - عيد مبارك سعيد على جميع أعضاء المنتدى وزواره وجميع المسلمين فى مشارق الأرض ومغاربها - دلوقتى ممكن تدخل قسم رمضانيات من الباب الخلفى للمنتدى ,,, ويا مكتر الأبواب الخلفية للمنتدى - زمان لما كنت عيل شفت فيلم ما فكان بطل الفيلم بيقول لعيل صغير " روح يا تامر إلعب مع الأسد " ... دلوقتى فى أوقات فراغى بقول " روح ياد يا أحمد إلعب فى المنتدى" - فى ليلة العيد .. التدافع على بوابة المنتدى كان بالجملة !!! .. مع إن التذاكر كانت بالكوم فى رمضان لدخول مسرح فارغ جماهيرياً وممتلىء بالممثلين على خشبة المسرح و[عروض] " ...... " !!! - عادة فيا وللأسف مش قادر أبطلها أبداً ... بحب أنكش كل حاجة لعل وعسى فى النكشة دى يحصل تغيير مع أن التغيير مش فى كتالوج الشعب المصرى ولا العربى تحيا جمهورية مصر العربية تم تعديل September 12, 2010 بواسطه Dr.A7MD شارك هذه المشاركه رابط المشاركه شار ك علي موقع اخر
بنت مصرية 66 قام بنشر September 17, 2010 لحظة واحدة ماشاء الله دكتور احمد وحاجة برة الكمبيوتر والبرامح جميل جدا فكرة السلسلة جميلة وانا للاسف ماشفتهاش غير النهاردة الاسلوب جميل جدا بارك الله فيك والموضوع بيناقش حاجة مهمة المثل ده بصراحة انا اول مرة اسمعه ...(بجد انا من كوكب آخرفعلا) وزي ماقلت هو اصلا الانسان المؤمن فعلا لازم يشوف كل اموره خير بلاء خير رزق خير اصلي اللي خلقك مش هيرضي ابدا لك غير الخير ... بالنسبة لموضوع رمضان في المنتدي انا توقعت ده بس للاسف مش كدا ولاتعليق لاني كنت اكثر المتضررين وفي العيد طبعا مانقدرش غير اانا نفتح احضان المنتدي لاولاده ... اما التغيير انا معاك في اللي بتقوله ولكن هناك من رحمهم ربي وهدف من اهدافي انا اعلم ثقافة التغيير للافضل دي ربنا يرزقنا الاخلاص في العمل بالوجه الذي يرضيه عنا جزاك الله كل خير يعني بجد مش عارفة اقول ايه متابعة باذن الله ربنا يوفقك ويرزقك من غير ماتحتشب اخي دكتور احمد تقبل مروري شارك هذه المشاركه رابط المشاركه شار ك علي موقع اخر
الفقيرة الى الله 77 قام بنشر September 17, 2010 جزاك الله خيرا يا دكتور ...احمد. شارك هذه المشاركه رابط المشاركه شار ك علي موقع اخر
Dr.A7MD 130 قام بنشر September 18, 2010 لحظة واحدة ماشاء الله دكتور احمد وحاجة برة الكمبيوتر والبرامح جميل جدا فكرة السلسلة جميلة وانا للاسف ماشفتهاش غير النهاردة الاسلوب جميل جدا بارك الله فيك والموضوع بيناقش حاجة مهمة المثل ده بصراحة انا اول مرة اسمعه ...(بجد انا من كوكب آخرفعلا) وزي ماقلت هو اصلا الانسان المؤمن فعلا لازم يشوف كل اموره خير بلاء خير رزق خير اصلي اللي خلقك مش هيرضي ابدا لك غير الخير ... بالنسبة لموضوع رمضان في المنتدي انا توقعت ده بس للاسف مش كدا ولاتعليق لاني كنت اكثر المتضررين :kiss: وفي العيد طبعا مانقدرش غير اانا نفتح احضان المنتدي لاولاده ... اما التغيير انا معاك في اللي بتقوله ولكن هناك من رحمهم ربي وهدف من اهدافي انا اعلم ثقافة التغيير للافضل دي ربنا يرزقنا الاخلاص في العمل بالوجه الذي يرضيه عنا جزاك الله كل خير يعني بجد مش عارفة اقول ايه متابعة باذن الله ربنا يوفقك ويرزقك من غير ماتحتشب اخي دكتور احمد تقبل مروري نورتى الموضوع أختى بنت مصرية محدش يقدر ينكر جهد أى حد فى رمضانبس أقول ايه !!! ... إن شاء الله الجايات أفضل وفي العيد طبعا مانقدرش غير اانا نفتح احضان المنتدي لاولاده ... محدش قال نقفل المنتدى فى العيد ... أنا كان قصدى مقارنة ليلة العيد بطوال شهر رمضان نورتى مصر ومصر منورة بيكى جزاك الله خيرا يا دكتور ...احمد. وجزاكى كل خير أختى الفقيرة إلى الله شارك هذه المشاركه رابط المشاركه شار ك علي موقع اخر
