توب علينا يا رب من موال كل سنة

[ali desoky 391]

توب علينا يا رب من موال كل سنة

 

 

 

 

 

 

 

 

قبضت الجمعية يا عبد السلام

 

لا يا سعاد لسه بكرة ان شاء الله

 

خلاص بكرة ان شاء الله ما ترجعش من الشغل على البيت

 

امال اروح فين اخد الفلوس و اطفش

 

لا يا خفيف الظل تاخد الفلوس و تستنانى فى العتبة علشان نجيب طلبات العيال و بعد كده نطلع على الفجاله نجيب الكشاكيل بالمرة

 

العتبة و الفجاله

يعنى كده الجمعية طارت خلاص

 

الله ما تطير مش خسارة فى العيال و طلباتهم

 

طب طلبات البهوات و الهوانم ايه

 

اهم قاعدين بره اسالهم بنفسك علشان ما ترجعش تقولى هاتجيبى الحاجات دى كلها ليه

 

.....................................

 

 

يا ولاد بابا بكرة هايقبض الجمعية كل واحد من دلوقتى يقول عايز ايه

 

الورقة و القلم اهم كل واحد يقول عايز ايه بقى علشان اعمل الميزانية

 

أحمد قول لبابا على طلباتك

 

بص يا حاج عايز مصاريف الكلية و فلوس الكتب كمان بالمرة قبل ما الفلوس تخلص و حسبة 400 جنية اجيب لى بنطلون و تى شيرتين يستروا ابنك قدام زمايله

 

هدوم ايه يا ابنى ما انت لسه جايب السنة اللى فاتت

 

فى ايه يا بابا هو انا كنت جيبت حاجة فى العيد

 

عيد ايه يا ابنى هو انت لسه عيل

 

طب ما انا استجدعت معاك و ما جبتش حاجة ساعتها استجدع انت معايا دلوقتى و ادينى اجيب طقمين علشان السنة الجديدة

 

استجدع ايه يا زفت انت . انت مش ساعتها واخد منى 100 جنية عيدية على حس انك ما جبتش هدوم جديدة

 

اتصرفوا و ربنا غيرت بطارية الموبايل و جبت شاحن جديد

 

و مصاريفك و فلوس الكتب كام ان شاء الله

 

يعنى حسبة 400 جنية كمان

 

يعنى انت لوحدك عايز 800 جنية امال اخواتك ياخدوا ايه بس

 

ياخدوا ايه ربنا ياخدهم و يريحك منهم

 

ايه الانانية اللى انت فيها دى يعنى لما انت تاخد 800 جنية انا اطلب الالف جنية اللى عايزاهم ازاى

 

الف جنية بتوع ايه يا ست هانم انتى كمان

 

يادوب يا بابا انت ناسى انها اول سنة ليا فى الكلية

 

لا يا حبيبتى فاكر و فاكر برضه انى صارف عليكى الجلد و السقط علشان تخرجى من الثانوية الزفت بتاعتك

 

يا بابا حرام عليك اشمعنى انا اللى بتعمل معايا كده

 

يا بنتى الرحمة حلوة حرام عليكى دى الجمعية كلها 2000 جنية لما اخوكى ياخد 800 و انتى 1000 اخواتك الصغيرين ياخدوا ايه ان شاء الله

 

و حد كان قالك تدى له 800 جنية

 

و انتى مالك يا باردة

 

تصدقى عندك حق كل واحد فيكم ياخد 600 جنية يصرف بيهم نفسه

يا بابا مش هاينفع و الله

 

هو ده اللى عندى لسه مصاريف المدارس و اللبس بتاع اخواتك

 

بالراحة شوية على العيال يا عبد السلام

 

بالراحة ايه انتى كمان مش لسه فى مصاريف العيال الصغيرة . هو لبس المدرسة الجديدة لونه ايه يا محمود

 

البنطلون رمادى و القميص ابيض يا بابا

 

يعنى 80 جنية بنطلون و قميص غير مصاريف المدرسة

 

لا يا بابا انا عايز بنطلونين و قميصين

 

ليه بس يا ابنى

 

علشان اعرف اغير براحتى يا بابا

 

خلاص يا سيدى 160 لبس طب و مصاريف المدرسة كام ان شاء الله

 

بيقولوا 80 جنية

 

يعنى انت لوحدك عايز 240 جنية

 

بابا

 

نعم

 

انت نسيت الكوتشى و الشنطة

 

طب الشنطة ماشى لكن كوتشى ليه

انت مش لسه جايب واحد فى العيد

 

لأ طبعا ده هاشيله اخرج بيه انا عايز واحد تانى للمدرسة

 

حاضر يا سيدى يعنى كمان حسبة 60 جنية

 

60 بس ماشى يا سيدى

 

بابا و انا مش هاتشوفنى عايزة ايه

 

عايزة ايه يا ست دينا

 

عايزة مريلتين و شنطتين و جزمتين

 

هاتجيبى من كل حاجة اتنين ليه ان شاء الله

 

هى يعنى جت عليا انا

 

جت عليكى ايه يا بنت

 

بس يا دينا بابا مش مستحمل هزار دلوقتى هما مريلتين و شنطة و جزمة بس

 

طب و مرايل جديدة ليه هى مش نفس المدرسة و بعدين دى الحاجة لسه جديدة هى بقالها غير سنة واحده بس

 

الزى اتغير يا سيدى روحت اسال النهارده قالوا لى غيروه

 

منهم لله ربنا يورينى فيهم يوم طب و عرفتى المصاريف كام

 

بيقولوا بقت 80 جنية

 

ليه حتة عيلة فى 2 اتدائى ادفع لها مصاريف 80 جنية ليه امال لو دخلتها مدرسة خاصة هادفع كام

 

خاصة و هو احنا برضه هانقدر على مصاريف الخاصة احمد ربنا ان الحكومة لسه ما قفلتش المدارس دى ام عمرو بتقولى بتدفع للواد الواحد 3000 جنية فى السنة غير الباص

 

ايوه يا بابا انا كمان عايزة اروح فى الباص

 

لا يا حبيبتى انا اتفقت لك مع تاكسى هايجى ياخدك و يوديكى كل يوم انتى و 10 عيال و هاياخد 50 جنية بس فى الشهر

 

تاكسى ليه ان شاء الله ما هى السنة اللى فاتت كانت بتروح لوحدها

 

لأ كانت بتروح و تيجى مع محمود لكن دلوقتى كل واحد فيهم فى مدرسة

 

طب ما تاخدها معاك فى سكتك يا حبيبى

 

مش هاينفع يا بابا انا مدرستى بعد الظهر

 

طب ما توصليها انتى يا سعاد

 

مبقاش عندى صحة للشحططة كل يوم فى المشوار رايح جاى و لو هاخد توك توك هانصرف اد كده مرتين

 

طب ما تاخديها انتى يا منه

 

لا طبعا انا لو مشيت مع بنتك دى هاموتها لك دى مشيها مقرف

 

احمد

 

ما تبصليش قسما بالله اكون راميها لك تحت اول اتوبيس يقابلنى

 

بقى كده طب ماشى منكم لله . ده كده الالفين جنية طاروا خلاص

 

طاروا ايه ده لسه فلوس الكشاكيل و الجلاد و الاقلام و المساطر

 

كمان اتفرج يا بيه يا اللى بتقول لى عايز 800 جنية ده بدل ما كنت تشتغل و تجيب مصاريفك و تساعد اخواتك

 

هما المتخرجين لاقيين شغل علشان انا اشتغل

 

فوضت امرى لربنا بس على الله الجمعية تكفى الهم ده كله قال و انا كنت ناوى امشى نفسى باللى يفضل لحد اخر الشهر

 

..................................................

 

تانى يوم فى الشغل

 

 

كويس انك جيت يا استاذ عبد السلام

 

خير

 

كنت عايز حضرتك فى موضوع كده

 

خير يا مصطفى فى ايه

 

و الله انا مكسوف من حضرتك اوى ما تتكلم انت يا استاذ على

 

فى ايه يا جماعه

 

فى ان مراة مصطفى فى المستشفى دلوقتى و لازم تولد و كان عايز ياخد الجمعية مكانك الشهر ده

 

نعم

 

و الله الولادة جت مفاجأة يا استاذ عبد السلام

 

و هو انت ما كنتش عارف ميعاد ولادة مراتك و لا ايه

 

عارف بس للأسف الولد طلع ابن سبعه هاعمل ايه

 

يا ابنى و الله انا مزنوق اكتر منك

 

يا استاذ عبد السلام انا ما سيبتش حد ما سألتهوش على فلوس محدش فايض منه حاجة و لازم تولد حالا يا اما هاتموت هى و الطفل و الله

 

يا عبد السلام فك زنقته دلوقتى و ما تقلقش هو دوره فى الجمعية الاسم الجاى ان شاء الله و الشهر ده من اللى بعده مش كتير

 

و الله يا جماعة مش عارف اقول ايه

 

قول موافق يا استاذ عبد السلام ابوس ايدك مراتى و ابنى فى خطر

 

خلاص يا ابنى خدهم ربنا يقومها لك بالسلامة ان شاء الله

 

و طبعا عبد السلام اتصل بسعاد و قالها ما تقابلنيش بعد الشغل لان الجمعية مش هاخدها النهارده و خاف يقولها على اللى عمله

 

 

.............................................

 

فى البيت

 

طب الجمعية هاتاخدها امتى بكرة ؟

 

و الله مش عارف اقولك ايه

 

فى ايه اوعى تكون قبضتها و اتسرقت

 

لا يا ستى ما اتسرقتش انا هاحكى لك على كل حاجة

 

و حكى لها كل اللى حصل فى الشغل

 

 

يا لهوى انت اكيد بتهرج

 

طب هاعمل ايه الواد كان هايبوس ايدى يا سعاد

 

طب و احنا هانعمل ايه دلوقتى

 

بصى انا هاتصرف بكرة ان شاء الله

 

هاتتصرف ازاى ده انت لسه واخد سلفة و طارت هى و المرتب فى الكحك و لبس العيد

 

ربك هايسترها ان شاء الله هاحاول اشوف قرشين عند اى حد ان شا الله حتى ندفع المصاريف و نجيب لبس العيال الصغيرة و احمد و منه يبقوا يستنوا للشهر الجاى

 

يستنوا يا اخويا يعنى هانعمل ايه

 

................................................

 

 

و تانى يوم حاول عبد السلام يتصرف علشان يجيب فلوس من اى حته لكن فشل و لقى سعاد بتكلمه تطمن

 

 

قالها جهزى العيال و حصلينى على مجلس الشعب

 

انت بتقول ايه

 

اسمعى اللى باقولك عليه

 

و فعلا لبست و جريت هى و العيال الاربعه لقوا عبد السلام واقف شايل يافطة مكتوب عليها

 

 

( يا تأجلوا المدارس . يا تأجلوا رمضان . خبطتين فى الراس توجع يا ظلمة )

 

 

 

 

 

 

منقول

[عاشقة الفردوس 161]

 

 

 

الله المستعان فعلا ضربتين في الرأس يوجعو

[ohabo raby 87]

يا حول الله .. مش عارفة اضحك ولا ازعل والله الموال ده فعلا ربنا يتوب علينا منه